Read ewe Yohanes III 1 Bible Online

Yohanes III 1 - ewe bible

Yohanes III 1

¹Hamemegã xoxo la ŋlɔ ɖo ɖe Gayo lɔlɔ̃tɔ, si melɔ̃na le nyateƒe me.

²Lɔlɔ̃tɔ, mele didim be, nuwo katã nadze dzi na wò nyuie, eye wò lãme nanɔ sesĩe, abe alesi wò luʋɔ le nyuie la ene.

³Elabena dzi dzɔm ŋutɔ, esime nɔviwo va ɖi ɖase le wò nyateƒetɔnyenye ŋuti, alesi nèzɔna le nyateƒe mee.

⁴Nyemekpɔ dzidzɔ gã wu esia be, mese bena, vinyewo zɔna le nyateƒe me o.

⁵Lɔlɔ̃tɔ, èwɔ nuteƒe le nusianu, si nèwɔ na nɔvi, siwo nye amedzrowo la me,

⁶amesiwo va ɖi ɖase le wò lɔlɔ̃ ŋuti le hame la ƒe ŋku me, eye ne èɖo wo ɖa alesi dze Mawu ŋu la, ekema èwɔe nyuie.

⁷Elabena eƒe ŋkɔ la ŋuti wodo go yi ɖo, eye womexɔa naneke le trɔ̃subɔlawo si o.

⁸Eyata ele na mí be, miaxɔ nenem me siawo, bene míazu woƒe hadɔwɔlawo na nyateƒe la.

⁹Meŋlɔ agbalẽ ɖo ɖe hame la; gake Diotrefo, si le didim be, yeaɖo ta ɖe wo nu la, mexɔ mi o.

¹⁰Eyata ne meva la, maɖo ŋku eƒe dɔwɔwɔ, siwo wòwɔna kple nya vɔ̃, siwo wònɔa gbɔgblɔm ɖe mía ŋuti la dzi; eye nusiawo mesu me nɛ o: Eya ŋutɔ hã mexɔa nɔviawo o, eye wòxea ma na amesiwo lã be, yewoaxɔ wo, eye wòɖea wo le ha me.

¹¹Lɔlɔ̃tɔ, megasi nu vɔ̃ɖi o, ke srɔ̃ nu nyui boŋ. Amesi wɔa nu nyui la, Mawu gbɔ wòtso, eye amesi woa nuvɔ̃ la, mekpɔa Mawu o.

¹²Demetrio kpɔa ɖaseɖiɖi nyui tso amewo katã kple nyateƒe la ŋutɔ hã gbɔ, eye miawo hã míele ɖase ɖim le eŋuti, eye ènyae bena, míaƒe ɖaseɖiɖi enye nyateƒe.

¹³Nya geɖe gali be, maŋlɔ aɖo ɖe wò; gake nyemelɔ̃ be, matsɔ agbalẽŋlɔtsi kple agbalẽŋlɔti aŋlɔ wo aɖo ɖe wò o;

¹⁴ke mele mɔ kpɔm bena, mava akpɔ wò ɖa kaba, eye ne mieɖo go ŋku me kple ŋku me la, míaƒo nu.

¹⁵Ŋutifafa nanɔ anyi kpli wò! Xɔlɔ̃wo ɖuɖɔ wò ƒã. Ɖuɖɔ xɔlɔ̃awo ɖekaɖeka nam ƒã!