Read ewe Rut 1 Bible Online

Rut 1 - ewe bible

Rut 1

¹Le ɣeyiɣi, siwo me ʋɔnudrɔ̃lawo le dziɖum la, dɔ va anyigba la dzi. Eye ŋutsua ɖe kple srɔ̃a kpakple viaŋutsu eveawoʋu tso Betlexem-Yuda, bena woaɖanɔ Moab-nyigba dzi.

²Ŋutsu la ŋkɔ nye Elimelex, eye srɔ̃a ŋkɔ nye Naomi, viaŋutsu eveawo ŋkɔ-wo nye Maxlon kple Xilion. Wonye Efrayimtɔwo tso Betlexem-Yuda, eye woʋu va Moab-nyigba dzi henɔ afima.

³Esi Naomi srɔ̃ Elimelex ku, eye eya kple viaŋutsu eveawo kpɔtɔ la,

⁴woɖe Moab-nyɔnuwo, siwo dome ɖeka ŋkɔ nye Orpa, eye evelia ŋkɔ nye Rut; eye wonɔ afima anɔ ƒe ewo.

⁵Ke wo ame eve la Maxlon kple Xilion hã ku; ale nyɔnu laƒeviwo kple eve kpakple srɔ̃a wogblẽe ɖi.

⁶Tete eya kple lɔ̃xoawo wotso hegbugbɔ tso Moab-nyigba dzi; elabena ese le Moab-nyigba dzi be, Yehowa kpɔ eƒe dukɔ la ɖa, eye wòna abolo wo.

⁷Ale wòʋu tso afisi wònɔ la, eye lɔ̃xoa eveawo kplɔe ɖo; eye wodze mɔ, be yewoagbugbɔ ayi Yuda-nyigba dzi.

⁸Tete Naomi gblɔ na lɔ̃xoa eveawo bena: Mitrɔ, eye mia dome amesiame negbugbɔ yi dadaa ƒe me! Yehowa ave mia nu, abe alesi mieve mía kple ame kukuawo nui ene!

⁹Yehowa ana miakpɔ dzudzɔ le mia srɔ̃wo ƒe me! Eye wòɖuɖɔ nu na wo; tete wofa avisesĩe

¹⁰hegblɔ nɛ bena: Míayi wò dukɔ gbɔ kpli wò boŋ!

¹¹Ke Naomi gblɔ bena: Vinyewo, migbugbɔ! Nukaŋuti miebe, yewoayi kplim? Alo ŋutsuvie gale dɔ menam miava ɖea?

¹²Vinyewo, migbugbɔ yi; elabena metsi akpa, ne mayi srɔ̃ ɖe ge. Eye ne megblɔ be, mele srɔ̃ ɖe ge le zã sia meadzi ŋutsuviwo la,

¹³ɖe mialala, vaseɖe esime woatsia? Alo ɖe miatsi anyi srɔ̃maɖemaɖea? Gbeɖe, vinyewo! Mia tɔ koe le veyem, elabena Yehowa do asi ɖe gbɔnye!

¹⁴Tete wogafa avi sesĩe. Eye Orpa ɖuɖɔ nu na lɔ̃xoa, ke Rut ya ku ɖe eŋu,

¹⁵eye wògblɔ bena: Kpɔ ɖa, atsuwòsi gbugbɔ yina eƒe ɖukɔ kple eƒe mawu gbɔ; gbugbɔ dze atsuwòsi yome!

¹⁶Ke Rut gblɔ bena: Megaƒoe ɖe nunye be, magblẽ wò ɖi agbugbɔ le yowòme o! Ke boŋ afisi nayi la, afima mayi; afisi natsi la, afima matsi; wò dukɔ anye nye dukɔ, eye wò Mawu anye nye Mawu;

¹⁷afisi naku ɖo la, afima maku ɖo, eye afima woaɖim ɖo! Yehowa nefiam, ne wòagafiam ɖe dzi; negbe ku koe aklã mía dome!

¹⁸Esi wòkpɔ be, eɖoe kplikpaa be, yeayi kplii la, edzudzɔ nyaƒoƒo ɖe enu.

¹⁹Ale woa kple eve la wodze mɔ heva Betlexem. Eye esi woɖo Betlexem la, du blibo la ƒo zi ɖe wo ŋu le gbɔgblɔm bena. Naomi enye sia?

²⁰Ke egblɔ na wo bena: Migayɔm be Naomi o, hafi boŋ miyɔ Mara nam: elabena ŋusẽkatãtɔ la do nublanuitɔm!

²¹Metsɔ nu geɖe yii, ke Yehowa kplɔm gbɔe asi gbɔloe; nukaŋuti miele yɔyem be Naomi, evɔ wònye Yehowa do nublanuitɔm ɖe?

²²Ale Naomi gbɔ va aƒe, eye lɔ̃xoa Rut, Moab-nyɔnu la, kpe ɖe eŋu tso Moab-nyigba dzi; eye wova Betlexem, esime wodze nuŋeŋe gɔme.