Read ewe Samuel I 13 Bible Online

Samuel I 13 - ewe bible

Samuel I 13

¹Saul ɖu fia ƒe ɖeka, eye esi wòle fia ɖum de Israel dzi le ƒe evelia me la,

²Saul tia ame akpe etɔ̃ tso Israel. Ame akpe eve le Saul ŋu le Mixmas kple Betel-to dzi, eye ame akpe ɖeka le Yonatan ŋu le Gibea-Benyamin; ke eɖe asi le dukɔ la ƒe ame mamleawo ŋu, amesiame yi eƒe agbadɔ me.

³Eye Yonatan si Filistitɔwo ƒe dzɔla, siwo le Geba, eye Filistitɔwo see. Tete Saul na woku kpẽ le anyigba blibo la katã dzi, bena Hebritɔwo nasee.

⁴Eye Israel blibo la se bena, Saul si Filistitɔwo ƒe dzɔlawo, eye Israel-viwo ƒe nya gblẽ le Filistitɔwo gbɔ. Tete woyɔ dukɔ la ƒo ƒu ɖe Saul ŋu le Gilgal.

⁵Eye Filistitɔwo kpe ta be, yewoawu aʋa kple Israel; tasiaɖamwo le akpe blaetɔ̃, sɔɖolawo le ame akpe ade, eye afɔzɔlawo sɔ gbɔ abe ƒutake ene. Eye woho va ƒu asaɖa anyi ɖe Mixmas gbɔ le Bet-Awen ƒe ɣedzeƒe gome.

⁶Esi Israel-ŋutsuwo kpɔ be, woɖo hiã me, eye dukɔ la ɖo xaxa me la, woɣla ɖe dowo kple ŋuvegoewo, agadowo, mɔwo kple ʋewo me.

⁷Eye Hebritɔwo tso Yordan yi Gad-nyigba kple Gilead-nyigba dzi; ke Saul gale Gilgal ke, eye dukɔ blibo la le dzodzom nyanyanya le eyome.

⁸Eye wolala ŋkeke adre, si Samuel ɖo; ke Samuel meva Gilgal o. Tete dukɔ la kaka le eŋu.

⁹Eye Saul gblɔ bena: Mihe numevɔsa kple akpedavɔsa vɛ! Eye wosa numevɔ.

¹⁰Esi wosa numevɔ vɔ la, tete Samuel do, eye Saul yi ɖakpee, be yeado gbe nɛ.

¹¹Ke Samuel gblɔ bena: Nuka nèwɔ? Saul ɖo ŋu bena: Esi mekpɔ be, dukɔ la kaka le ŋunye, wò hã mèva le ɣeyiɣi la dzi o, eye Filistitɔwo va kpe ta ɖe Mixmas la,

¹²tete mebu be, Filistitɔwo le gbɔnye va ge le Gilgal, evɔ nyemekpɔ ƒo koko na Yehowa haɖe o; eyata mezi ɖokuinye dzi hesa numevɔ.

¹³Samuel gblɔ na Saul bena: Ewo bometsinu! Ɖe wònye ɖe nèlé Yehowa, wò Mawu ƒe se, si wòde na wò me ɖe asi la, anye ne Yehowa ana wò fiaɖuɖu nali ke ɖe Israel tegbee.

¹⁴Ke azɔ wò fiaɖuɖu mali ke o. Yehowa ɖi ŋutsu bubu, si dze eŋu, na eɖokui, eye Yehowa tsɔe ɖo fia ɖe eƒe dukɔ nu; elabena melé se, si Yehowa de na wò la me ɖe asi o.

¹⁵Tete Samuel dze mo tso Gilgal yi Gibea-Benyamin. Ke Saul xlẽ dukɔ, si tsi eŋu la, wole ame alafa ade.

¹⁶Eye Saul kple via Yonatan kpakple dukɔ, si tsi eŋu la, ƒu asaɖa anyi ɖe Geba-Benyamin, eye Filistitɔwo ƒu asaɖa anyi ɖe Mixmas.

¹⁷Eye aʋalɔgo etɔ̃ tso Filistitowo ƒe asaɖa me, be woaɖanyi afu. Aʋalɔgo ɖeka trɔ to Ofra-mɔ dzi ɖo ta Saul-nyigba dzi.

¹⁸Aʋalɔgo evelia trɔ to Bet-Xoron-mɔ, eye aʋalɔgo etɔ̃lia trɔ to liƒo, si ho gɔ̃ ɖe Zeboim-bali me ɖo ta gbedzi la gbɔ mɔ.

¹⁹Ke nutulaa ɖeke mele Israel-nyigba blibo la dzi o; elabena Filistitɔwo bu be, Hebritɔwo ava tu yi kple akplɔ na wo ɖokui.

²⁰Eye Israel blibo la dome amesiame yia Filistitowo gbɔ ɖatea woƒe agblenuwo, hɛ gobɛwo, akplɔ nuevee, fiawo kple nutɔnuiwo.

²¹Eye woƒe hɛ gobɛwo, gaflowo, fiawo kple nutɔnuawo nu tsi kpo.

²²Esi aʋakpegbe ɖo la, womekpɔ yi alo akplɔ le dukɔ blibo, si le Saul kple Yonatan ŋu la si o, negbe Saul kple via Yonatan si ko wole.

²³Eye Filistitɔwo ƒe dzɔlaa ɖewo to Mixmas ƒe to dzi mɔ.