Read ewe Samuel I 17 Bible Online

Samuel I 17 - ewe bible

Samuel I 17

¹Eye Filistitowo ƒo woƒe aʋakɔwo nu ƒu, be yewoawɔ aʋa. Wova kpe ta ɖe Soxo le Yuda, eye woƒu asaɖa anyi ɖe Soxo kple Azeka dome le Efes-Damim.

²Eye Saul kple Israel-ŋutsuwo hã ƒo ƒu heƒu asaɖa anyi ɖe logotibali la me, eye wodze aʋa ɖe Filistitowo ŋu.

³Filistitowo tsi tre ɖe to ŋu le go si me, eye Israel tsi tre ɖe to ŋu le go keme, eye bali tso wo dome.

⁴Tete ame dzɔtsua ɖe ɖo tso Filistitɔwo ƒe asaɖa la me, eŋkɔ nye Goliat, amesi tso Gat; ekɔ abɔklugui ade kple asi ɖeka.

⁵Eɖo akɔblikuku ɖe ta, eye wòdo gawu, si le abe lãtsro ene, eye gawu la ƒe kpekpeme le akɔbli sekel akpe atɔ̃.

⁶Edo akɔbliwu ɖe akpligbe, eye wòlé akɔblikplɔ ɖe abɔ.

⁷Eƒe akplɔ ƒe ati le abe abaladoti ene, eye akplɔ la ŋuta kpe gayibɔ sekel alafa ade, eye akpoxɔnutsɔla zɔ eŋgɔ.

⁸Eye wòtsi tre yɔ Israel ƒe aʋalɔgoawo ɖa gblɔ na wo bena: Nukaŋuti mieho va dze aʋa? Alo menye Filistitɔ menye, eye miawo míenye Saul ƒe dolawo oa? Miɖe ŋutsu ɖeka le mia dome, ne wòava gbɔnye!

⁹Ne ete ŋu wɔ aʋa kplim, eye wòwum la, ekema mianye dɔlawo na mi; ke ne nye alɔ sẽ wu etɔ, eye mewui la, ekema mianye dɔlawo na mí, eye miasubɔ mi.

¹⁰Eye Filistitɔ la gblɔ bena: Meɖe alɔme le Israel ƒe aʋalɔgoawo ŋu egbe. Miɖe ŋutsu ɖeka nam, ne mía kplii míawɔ aʋa!

¹¹Esi Saul kple Israel blibo la se Filistitɔa ƒe nyawo la, dzi ɖe le wo ƒo, eye wovɔ̃ ŋutɔ.

¹²Dawid enye Efrattɔ ma, si tso Betlexem le Yuda, amesi ŋkɔ nye Isai la, ƒe vi; viŋutsu enyi le esi, eye wònye amegã ɖeɖi le ŋutsuwo dome le Saul ŋɔli.

¹³Eye Isai ƒe vi xoxoetɔ etɔ̃awo kplɔ Saul ɖo yi aʋa la. Via etɔ̃, siwo yi aʋa la, ŋkɔwo nye: Eliab, si nye ŋgɔgbevi la, evelia nye Abinadab, eye etɔ̃lia nye Sama.

¹⁴Dawid enye ɖevitɔ, ke xoxoetɔ etɔ̃awo kplɔ Saul ɖo.

¹⁵Eye Dawid dzona le Saul gbɔ enuenu ɖakplɔa fofoa ƒe alẽwo le Betlexem.

¹⁶Ke Filistitɔ la tena vana ŋdi kple fiẽ va tsia tre ɖi ŋkeke blane sɔŋ.

¹⁷Eye Isai gblɔ na via Dawid bena: Tsɔ bli tɔtɔe efa ɖeka sia kple abolo bɔbɔ ewo siawo ƒu du yi na nɔviwòwo le asaɖa la me!

¹⁸Tsɔ notsi babla lalã ewo siawo yi na ame akpe ƒe amegã, eye bia nɔviwòwo be, woli sesĩe mahã? Eye xɔ dzesi tso wo gbɔ vɛ!

¹⁹Woawo kple Saul kpakple Israel-ŋutsuwo katã le aʋa wɔm kple Filistitɔwo le logobali la me.

²⁰Eye Dawid fɔ ŋdi kanya hetsɔ alẽawo de asi na alẽkplɔla, eye wòdo agba heyi, abe alesi Isai de se ne ene; eye wòva tasiaɖamwo ƒe takpeƒe, esime aʋakɔ la dze aʋa ɖe asi aseyetsotso me.

²¹Eye Israel kple Filistitowo ƒe aʋalɔgoawo dze aʋa hedze ŋgɔ wo nɔewo.

²²Eye Dawid tsa nusiwo wotso vɛ la, de asi na aʋawɔnuwo ŋu dzɔla, eye wòƒu du yi aʋadzedze la nu. Esi wòva la, ebia nɔviawo be, woli sesĩe mahã?

²³Esi wòle nu ƒom kpli wo la, kpo da, ame dzɔtsu, si ŋkɔ nye Goliat, amesi nye Filistitɔ tso Gat la, do tso Filistitowo ƒe aʋadzedze la me va gblɔ nya mawo ke, eye Dawid see.

²⁴Ke esi Israel-ŋutsuwo katã kpɔ ŋutsua la, wòsi le enu, eye wovɔ̃ ŋutɔ.

²⁵Eye Israel-ŋutsuwo gblɔ bena: Miele ŋutsu sia, si do va la, kpɔma? Alɔme de ge wòva le Israel ŋu. Ne amea de wui la, fia ana kesinɔnu geɖe, atsɔ vianyɔnu nɛ wòaɖe, eye wòana fofoa ƒe aƒe magadze nu le Israel o.

²⁶Tete Dawid bia ŋutsu, siwo le tsitre ɖe egbɔ bena: Nuka woawɔ na amesi awu Filistitɔ ma, eye wòaɖe ŋukpe ɖa le Israel ŋu la? Elabena ameka nye Filistitɔ bolotɔ sia, be wòanɔ alɔme ɖem le Mawu gbagbe la ƒe aʋalɔgoawo ŋu?

²⁷Ameawo ɖo ŋu ne abe tsã ene be: Ale kple ale woawɔ na amesi wui la, enye si.

²⁸Esi nɔvia xoxoetɔ Eliab se, alesi wòle nu ƒom kple ameawo la, dzi ku Eliab ɖe Dawid ŋu wògblɔ bena: Nuka wɔ ge nèva, eye ameka si netsɔ alẽ ʋee mawo ɖee le gbeadzi? Menya dàda kple vovlo, si le wò dzi me, elabena aʋa teƒe kpɔ ge nèva!

²⁹Dawid ɖo ŋu bena: Nuka mehewɔ fifia? Menye nya ta koe mebia oa?

³⁰Eye wòtrɔ le egbɔ te ɖe ame bubu ŋu hebia nya mawo ke, eye ameawo ɖo ŋu ne abe tsã ene.

³¹Wose nya, siwo Dawid gblɔ, eye wova gblɔe na Saul, eye wòna wokplɔe vɛ.

³²Eye Dawid gblɔ na Saul bena: Dzika megatso amea ɖeke ƒo o! Wò dɔla ayi aɖawɔ aʋa kple Filistitɔ ma.

³³Saul gblɔ na Dawid bena: Màte ŋu ayi aɖawɔ aʋa kple Filistitɔ sia o, elabena ɖevi nènye, ke eya la aʋawɔla wònye tso ɖevime ke!

³⁴Dawid gblɔ na Saul bena: Ne wò ɖɔla le fofoa ƒe alẽwo kplɔm, eye dzata alo sisiblisi va lé alẽ ɖeka le lãha ŋu la,

³⁵metia eyome, eye meƒonɛ heɖenɛ le eƒe nu me; ke ne ebe, yeawɔ nu kplim la, meléa eƒe ge, eye meƒonɛ wuna.

³⁶Alesi wò ɖɔla ƒoa dzata kple sisiblisi la, nenema ke wòava me na Filistitɔ bolotɔ sia abe wo dometɔ ɖeka ene, elabena Mawu gbagbe la ƒe aʋalɔgowo ŋu wòɖe alɔme le.

³⁷Dawid gagblɔ bena: Yehowa, si ɖem tso dzata kple sisiblisi si me la, eya ke aɖem tso Filistitɔ sia si me. Tete Saul gblɔ na Dawid bena: Heyi, Yehowa nanɔ kpli wò!

³⁸Eye Saul na Dawid do eƒe awu, edɔ akɔblikuku ɖe ta nɛ, eye wòna wodo gawu nɛ.

³⁹Eye Dawid ta eƒe yi ɖe awu la dzi, eye wòde asi zɔɖeɖe me, elabena mete edodo kpɔ o. Tete Dawid gblɔ na Saul bena: Nyemate ŋu anɔ alea ayi o, elabena nyemedoe kpɔ o. Eye Dawid ɖe wo ɖi.

⁴⁰Etsɔ eƒe atizɔti ɖe asi, eye wòdi kpe zɔzrɔ̃e atɔ̃ le tɔʋu la me hetsɔ wo de alẽkplɔnu, si nye akplɔ la me, eye wòlé eƒe akafo ɖe asi hezɔ ɖe Filistitɔ la dzi.

⁴¹Eye Filistitɔ la le tetem ɖe Dawid ŋu, eye eƒe akpoxɔnutsɔla dze eŋgɔ.

⁴²Eye Filistitɔ la fɔ kɔ dzi kpɔ Dawid, eye wòdo vloe, elabena ɖevi ko wònye, ebia, eye wòdze ɖeka.

⁴³Tete Filistitɔ la gblɔ na Dawid bena: Avũe menye, hafi nèfɔ kpowo gbɔna gbɔnyea? Eye Filistitɔ la yɔ eƒe mawuwo ƒo fi de Dawid.

⁴⁴Eye Filistitɔ la gblɔ na Dawid bena: Va gbɔnye, ne matsɔ wò dã na dziƒoxewo kple gbemelãwo!

⁴⁵Dawid gblɔ na, Filistitɔ la bena: Wòa ètsɔ yi, tunuhlo kple akplɔ gbɔna gbɔnyee; ke nye la megbɔna gbɔwò le Yehowa Zebaot, Israel ƒe aʋalɔgo, siwo ŋu nède alɔme le la ƒe Mawu ƒe ŋkɔ me.

⁴⁶Yehowa atsɔ wò ade asi nam egbea, eye mawu wò atso ta le nuwò, eye matsɔ Filistitɔwo ƒe aʋakɔ la ƒe kukuwo ana dziƒoxewo kple anyigba dzi lãwo egbe sia, ne anyigba blibo la nadze sii bena, Mawua de li na Israel;

⁴⁷eye ameha blibo sia nadze sii bena, Yehowa metsɔa yi alo akplɔ ɖea ame o; elabena aʋa enye Yehowa tɔ, eye eyae atsɔ mi ade asi na mí.

⁴⁸Eye esi Filistitɔ la ɖe zɔ ɖe Dawid dzi, be yealé ɖe eŋu la, Dawid wɔ kaba ƒu du yi aʋadzedze la nu, be yeakpe Filistitɔ la.

⁴⁹Tete Dawid ƒo asi ɖe akplɔ me ɖe kpe ɖeka da kple akafo heƒo Filistitɔ la ƒe ŋgonu, eye kpe la ŋɔ eƒe ŋgonu, wòmũ tsyɔ mo anyi.

⁵⁰Ale Dawid tsɔ akafo kple kpe la kpɔ ŋusẽ ɖe Filistitɔ la dzi, eye wòƒo Filistitɔ la hewui; ke yi mele Dawid si o.

⁵¹Tete Dawid ƒu du te ɖe Filistitɔ la ŋu, eye wò ɖi eƒe yi le aku me hewui, eye wòtsɔe tso ta le enu. Esi Filistitɔwo kpɔ bena, woƒe kalẽtɔ ku la, wòsi.

⁵²Eye Israel-ŋutsuwo kple Yuda-ŋutsuwo ho, eye wotso aseye heti Filistitɔwo yome vaseɖe bali la me kple Ekron ƒe agbo nu, eye Filistitɔwo tsi aʋa ɖe Saarayim-mɔ dzi vaseɖe Gat kple Ekron.

⁵³Eye Israel-viwo trɔ tso Filistitɔwo yometiti me heva ha woƒe asaɖawo.

⁵⁴Eye Dawid tsɔ Filistitɔ la ƒe ta va Yerusalem, eye wotsɔ eƒe aʋawɔnuwo da ɖe eƒe agbadɔ me.

⁵⁵Esi Saul kpɔ Dawid wòyina Filistitɔa kpe ge la, ebia aʋafia Abner bena: Abner, ameka vi enye sia? Abner ɖo ŋu bena: Fiã, mefa wò siaa, nyemenyae o!

⁵⁶Fia la gblɔ bena; Yi ɖabia amesi vi ɖekakpui la nye ta se.

⁵⁷Esi Dawid gbɔ tso Filistitɔ la wuƒe la, Abner kplɔe yi Saul ŋku me, eye wòlé Filistitɔ la ƒe ta ɖe asi.

⁵⁸Eye Saul biae bena: Ɖekakpui, ameka vi nènye? Dawid ɖo ŋu bena: Wò dɔla Betlexemtɔ Isai ƒe vi menye.