Read ewe Samuel I 28 Bible Online

Samuel I 28 - ewe bible

Samuel I 28

¹Eye wòva me le ɣemaɣi bena, Filistitɔwo ƒo woƒe aʋakɔwo nu ƒu, ne woawɔ aʋa kple Israel. Eye Axis gblɔ na Dawid bena: Nyae be, mia kple wò amewo miele aʋa ho ge kplim!

²Tete Dawid gblɔ na Axis bena: Enyo, akpɔ nusi wò dɔla le wɔwɔ ge. Axis gblɔ na Dawid bena: Ekema matsɔ wò awɔ ŋunye dzɔlae ɖaa.

³Samuel ku, eye Israel blibo la fa nɛ, eye woɖii ɖe Rama, eƒe du la me. Ke Saul nyã ŋɔliyɔlawo kple afakalawo ɖa le anyigba la dzi.

⁴Esi Filistitɔwo kpe ta va ƒu asaɖa anyi ɖe Sunem la, Saul hã ƒo Israel blibo la nu ƒu, eye woƒu asaɖa anyi ɖe Gilboa.

⁵Ke esi Saul kpɔ Filistitɔwo ƒe aʋakɔa la, evɔ̃, eye dzika tso eƒo ŋuta.

⁶Eye Saul bia nu Yehowa, ke Yehowa meɖo ŋu nɛ le drɔ̃e me loo alo to Urim alo nyagblɔɖilawo dzi o.

⁷Tete Saul gblɔ na eƒe dɔlawo bena: Midi nyɔnua ɖe, si me ŋɔliyɔgbɔgbɔ le la nam, ne mayi egbɔ aɖabia nui ase. Eƒe dɔlawo gblɔ nɛ bena: Kpɔ ɖa, nyɔnu ŋɔliyɔlaa ɖe le En-Dor.

⁸Tete Saul trɔ eƒe nɔnɔme hedo awu bubuwo, eye eya kple ŋutsu eve woyi heva nyɔnu la gbɔ le zã me. Eye wògblɔ bena: Ka nu, ne nayɔ ŋɔli nam, eye nakplɔ amesi mayɔ na wò la vɛ nam!

⁹Nyɔnu la gblɔ nɛ bena: Kpɔ ɖa, wò ŋuta ènya nusi Saul wo, eye wotsrɔ̃ ŋɔliyɔlawo kple afakalawo ɖa le anyigba la dzi. Nukaŋuti nèle mɔ trem na nye agbe, be nawum?

¹⁰Tete Saul ta Yehowa nɛ bena: Meta Yehowa ƒe agbe, ne fɔɖiɖi anɔ dziwò le nya sia me fi!

¹¹Nyɔnu la gblɔ bena: Ameka yɔ ge mala na wò? Eɖo ŋu bena: Yɔ Samuel nam!

¹²Esi nyɔnua kpɔ Samuel la, edo ɣli sesĩe. Eye nyɔnu la gblɔ na Saul bena: Nukaŋuti nèblem? Evɔ wònye wòe nye Saul hafi!

¹³Ke fia la gblɔ nɛ bena: Megavɔ̃ o, nuka nèhekpɔ ma? Nyɔnu la ɖo ŋu na Saul bena: Mekpɔ mawua ɖe le dodom tso anyigba tu me.

¹⁴Eye wòbiae bena: Aleke eƒe nɔnɔme le? Eɖo nu bena: Ame tsitsia ɖe le dodom, eye wòɖo awu ʋlaya. Esi Saul dze sii bena, Samuel ye la, ede ta agu, eye wobɔbɔ.

¹⁵Eye Samuel gblɔ na Saul bena: Nukaŋuti neɖe fu nam, eye nèna wokplɔm vɛ? Saul ɖo ŋu bena: Meɖo xaxa me ŋutɔ: Filistitɔwo le aʋa wɔm kplim, ke Mawu trɔ ʋu le yonyeme, eye megale nya ŋu ɖom nam azɔ to nyagblɔɖilawo dzi loo alo to drɔ̃e me o; eyata mena woyɔ wò vɛ, ne nagblɔ nusi mawɔ la nam!

¹⁶Samuel gblɔ be: Yehowa trɔ ʋu le yowòme hezu wò futɔ; evɔ nukaŋuti nèle nu biamem?

¹⁷Yehowa wɔ, abe alesi wògblɔ to dzinye ene, eye Yehowa xɔ fiaɖuƒe la le asiwò hetsɔ na hawòvi Dawid.

¹⁸Esi meɖo to Yehowa ƒe gbe o, eye mèwɔ eƒe dɔmedzoe, si wòdo ɖe Amalek ŋu dzi o la, eyata Yehowa le nusia wɔm wò egbea ɖo.

¹⁹Yehowa atsɔ Israel hã ade asi na Filistitɔwo akpe ɖe ŋuwò, eye etsɔ la mía kple viwòŋutsuwo miava gbɔnye, Yehowa atsɔ Israel ƒe aʋakɔ la hã ade asi na Filistitɔwo.

²⁰Enumake Saul tsra ɖe anyigba dremu, eye wòvɔ̃ ŋutɔ le Samuel ƒe nyawo ta. Ŋusẽ gɔ̃ hã megale eŋu o, elabena meɖu naneke ŋkeke blibo kple zã blibo la o.

²¹Eye nyɔnu la va Saul gbɔ, eye wòkpɔ bena, dzidzi ƒoe ŋutɔ. Tete wògblɔ nɛ bena: Kpɔ ɖa, wò dɔlanyɔnu sewo gbe; metsɔ nye agbe ɖo asi ƒo me, eye meɖo to wò nya, siwo negblɔ nam.

²²Eyata wò hã ɖo to wò dɔlanyɔnu ƒe gbe, eye na matsɔ abolo via ɖe aɖo akɔwòme, ne naɖu, be ŋusẽ naɖo ŋuwò, hafi nalé wò mɔ!

²³Ke egbe gblɔ bena: Nyemele nu ɖu ge o. Tete eƒe dɔlawo kple nyɔnu la ƒoe ɖe enu, eye wòɖo to woƒe gbe, eye wòtsi tre tso anyigba hebɔbɔ nɔ aba dzi.

²⁴Nyivi damia ɖe le nyɔnu la si le aƒea me, eye wòɖe abla hetsoe, eye woku wɔ blu hetɔ tatali maʋamaʋã.

²⁵Eye wòtsɔe va ɖo Saul kple eƒe dɔlawo kɔme, eye woɖui; emegbe; wotso hedzo le zã ma me.