Read ewe Samuel I 8 Bible Online

Samuel I 8 - ewe bible

Samuel I 8

¹Eye wova me, esime Samuel tsi la, etsɔ viaŋutsuwo ɖo ʋɔnudrɔ̃lawo ɖe Israel nu.

²Viaŋutsu ŋgɔgbea ŋkɔ nye Yoel, evelia ŋkɔ nye Abia, woawoe nye ʋɔnudrɔ̃lawo le Beerseba.

³Ke viaŋutsuwo meto eƒe ʋe me o, eye wodi viɖe yome, woxɔ zãnu, eye wòtrɔ gbɔ ʋɔnudɔdrɔ̃.

⁴Tete Israel-ame tsitsiwo katã va kpe ta ɖe Samuel gbɔ le Rama,

⁵eye wogblɔ nɛ bena: Kpɔ ɖa, ètsi, eye viwowo mele wo ʋe me tom o; eyata ɖo fia na mí, amesi adrɔ̃ ʋɔnu na mí abe alesi wòle le dukɔwo katã dome ene!

⁶Ke nya la medze Samuel ŋu o, esi wogblɔ be: Ɖo fia na mi, ne woadrɔ̃ ʋɔnu na mi! Eye Samuel ɖo gbe ɖa na Yehowa.

⁷Eye Yehowa gblɔ na Samuel bena: Ɖo to dukɔ la ƒe gbe le nusianu, si woagblɔ na wo la me, elabena menye wòe wogbe o, ke boŋ nyee wogbe be, nyemagaɖu fia ɖe yewo dzi o.

⁸Alesi wole wɔwɔm tso gbesigbe mekplɔ wo tso Egipte vaseɖe egbe, eye wogblẽm ɖi subɔ mawu bubuwo la, nenema pɛpɛpɛ wole wɔwɔm de wò hã ŋuwò.

⁹Eyata do to woƒe gbe; ɖeko naxlɔ̃ nu wo, eye nato fia, si le wo dzi ɖu ge la, ƒe kɔnuwo na wo!

¹⁰Tete Samuel gblɔ Yehowa ƒe nyawo katã na dukɔ, si le fia biam le egbɔ,

¹¹hegblɔ bena: Fia, si le mia dzi ɖu ge la, ƒe kɔnuwo enye si: Axɔ mia viŋutsuwo, eye wòatsɔ wo aɖo eƒe tasiaɖam kple eƒe sɔɖolawo nu, ne woanɔ du ƒum le eƒe tasiaɖam ŋgɔ.

¹²Atsɔ wo ado amegãwo ɖe ame akpe kple ame blaatɔ̃ nu na eɖokui, woaŋlɔ agble nɛ, eye woaŋe nu nɛ, woatu aʋawɔnuwo ne, eye woawɔ tasiaɖam ŋu nuwo nɛ.

¹³Atsɔ mia vinyɔnuwo awɔ amitɔlawo, nuɖalawo kple aboloƒolawoe.

¹⁴Eye woaxɔ agble, weingble kple amitibɔ nyuitɔwo le mia si atsɔ na eƒe dɔlawo.

¹⁵Axɔ agblemenu kple weingblemenu fe ewolia le mia si na eƒe aƒe dzikpɔlawo kple dɔlawo.

¹⁶Axɔ miaƒe dɔlaŋutsuwo kple dɔlanyɔnuwo kple miaƒe ɖekakpui zãzɛwo kpakple miaƒe tedziwo, ne woawɔ dɔ nɛ.

¹⁷Axɔ miaƒe alẽwo ƒe ewolia, eye mianye dɔlawo nɛ.

¹⁸Gbemagbe míado ɣli le fia, si mieha la ta; ke Yehowa mado to mi o.

¹⁹Gake dukɔ la gbe toɖoɖo Samuel hegblɔ bena: Gbeɖe, ke boŋ fia nenɔ mía nu,

²⁰ne miawo hã mianɔ abe dukɔwo katã ene! Míaƒe fia nadrɔ̃ ʋɔnu na mí, eye wòadze mía ŋgɔ awɔ aʋa na mí!

²¹Eye Samuel se dukɔ la ƒe nyawo katã, eye wogblɔ wo ɖe Yehowa ƒe to me.

²²Eye Yehowa gblɔ na Samuel bena: Ɖo to woƒe gbe, eye nado fia ɖe wo nu! Tete Samuel gblɔ na Israel-ŋutsuwo bena: Mia dome amesiame negbugbɔ yi eƒe du me!