Read fon Bǐbɛ́mɛ 11 Bible Online

Bǐbɛ́mɛ 11 - fon bible

Bǐbɛ́mɛ 11

¹Xóxó hwenu ɔ́, gbe ɖokpó ɔ́ wɛ gbɛtɔ́ lɛ́ɛ bǐ nɔ́ dó, bó nɔ́ zán xógbe ɖokpó lɛ́ɛ.

²Zǎnzǎnhwe jí wɛ gbɛtɔ́ lɛ́ɛ gosín, bó yi mɔ tɔdo ɖé ɖo Mɛzopotamíi, bó jɛ agban nyi fínɛ́.

³Yě ɖɔ nú yěɖée ɖɔ: “Éénɛ́! Din ɔ́, mǐ ní sún blǐki, bó xo zo dó ɖo kpó mɛ.” Yě sɔ́ blǐki lɛ́ɛ dó ɖó awǐnnya, bó sɔ́ gudlɔ́n dó ɖó kɔ́ nyinya.

⁴Yě lɛ́ ɖɔ: “Din ɔ́, mǐ ní gbá toxo ɖaxó ɖokpó, síngbó ɖaxó ɖokpó, bɔ é ná yi jǐ yi sɔ́ jǐnukúnsin. Énɛ́ ɔ́, nyǐkɔ mǐtɔn ná yi jǐ, bɔ mǐ ná gba kpé ayǐkúngban ɔ́ bǐ jí ǎ.”

⁵Énɛ́ ɔ́, Mawu Mavɔmavɔ jɛ te bó wá kpɔ́n toxo ɔ́ kpódó síngbó ɖaxó e gbá wɛ gbɛtɔ́ lɛ́ɛ ɖe ɔ́ kpó,

⁶bó ɖɔ: “Yě bǐ nyí togun ɖokpó, bó ɖo gbe ɖokpó ɔ́ dó wɛ. Nǔ e yě ká sí te din bó ɖɔ émí ná bló é nɛ́. Yě lɛ́n nǔɖé bó ná wa din ɔ́, nǔɖé sɔ́ ɖe bó ná hɛn yě ɖó te ǎ.

⁷Ée é nyí mɔ̌ din ɔ́, mǐ ní jɛ te, bó ná sɔ́ gbe vovo dó nu nú yě; énɛ́ ɔ́, mɛ ɖě ɔ́ sɔ́ ná mɔ nǔ jɛ xó e ɖɔ wɛ mɛ ɖě ɔ́ ɖe ɔ́ mɛ ǎ.”

⁸Nǔgbó ɔ́, Mawu Mavɔmavɔ gba yě dó sín fínɛ́, bɔ yě gba kpé ayǐkúngban ɔ́ bǐ jí, bó jó toxo e gbá wɛ yě ɖe ɔ́ dó.

⁹Énɛ́ ɔ́ wú wɛ toxo ɔ́ nɔ́ nyí Babɛ́li; tínmɛ tɔn wɛ nyí hannyahannya, ɖó fínɛ́ wɛ Mawu Mavɔmavɔ sɔ́ gbe vovo e è nɔ dó ɖo ayǐkúngban jí lɛ́ɛ dó nu nú yě ɖe; fínɛ́ wɛ Mawu Mavɔmavɔ ka lɛ́ gba yě dó kpé ayǐkúngban ɔ́ bǐ jí ɖe.

¹⁰Sɛ́mu ví lɛ́ɛ sín nyǐkɔ ɖíe: ée tɔ gba gbɛ ɔ́ bɔ é ɖó xwe we ɔ́, Sɛ́mu ji Aapakisadu. Xwe kanwe ko (100) ɖó wɛ é ɖe hwenɛ́nu.

¹¹Ée Sɛ́mu ji Aapakisadu gúdo ɔ́, é nɔ gbɛ xɔ xwe afɔwe kanwe ko (500), bó lɛ́ ji vǐ súnnu bó ji nyɔ̌nu.

¹²Aapakisadu ɖó xwe gbantɔ́n (35), bó ji Cɛláxi.

¹³Ée Aapakisadu ji Cɛláxi gúdo ɔ́, é lɛ́ nɔ gbɛ xɔ xwe afɔwe-nukún-atɔn (403), bó lɛ́ ji vǐ súnnu, bó ji nyɔ̌nu.

¹⁴Cɛláxi ɔ́, xwe gban wɛ é ɖó, bó ji Ebɛ́ɛ.

¹⁵Ée Cɛláxi ji Ebɛ́ɛ gúdo ɔ́, é lɛ́ nɔ gbɛ xɔ xwe afɔwe-nukún-atɔn (403), bó lɛ́ ji vǐ súnnu bó ji nyɔ̌nu.

¹⁶Ebɛ́ɛ ɔ́, xwe gban-nukún-ɛnɛ (34) wɛ é ɖó, bó ji Pɛlɛ́gi.

¹⁷Ée Ebɛ́ɛ ji Pɛlɛ́gi gúdo ɔ́, é lɛ́ nɔ gbɛ xɔ xwe afɔwe gban (430), bó lɛ́ ji vǐ súnnu bó lɛ́ ji nyɔ̌nu.

¹⁸Pɛlɛ́gi ɔ́, xwe gban (30) wɛ é ɖó, bó ji Hlewu.

¹⁹Ée é ji Hlewu gúdo ɔ́, é lɛ́ nɔ gbɛ xɔ xwe afɔɖé tɛ́nnɛ (209), bó lɛ́ ji vǐ súnnu bó ji nyɔ̌nu.

²⁰Hlewu ɔ́, xwe gban-nukún-we (32) wɛ é ɖó, bó ji Selúgi.

²¹Ée é ji Selúgi gúdo ɔ́, é lɛ́ nɔ gbɛ xɔ xwe afɔɖé tɛ́nwe (207), bó lɛ́ ji vǐ súnnu bó ji nyɔ̌nu.

²²Selúgi ɔ́, xwe gban (30) wɛ é ɖó, bó ji Naxɔ́ɔ.

²³Ée é ji Naxɔ́ɔ gúdo ɔ́, é lɛ́ nɔ gbɛ xɔ xwe afɔɖé (200), bó ji vǐ súnnu bó ji nyɔ̌nu.

²⁴Naxɔ́ɔ ɔ́, xwe koatɔ́n-nukún-ɛnɛ (29) wɛ é ɖó, bó ji Tɛláxi.

²⁵Ée é ji Tɛláxi gúdo ɔ́, é lɛ́ nɔ gbɛ xɔ xwe kanwe gbantɔ́n-nukún-ɛnɛ (119), bó lɛ́ ji vǐ súnnu bó ji nyɔ̌nu.

²⁶Tɛláxi ɔ́, xwe kanɖé gban (70) wɛ é ɖó, bó ji Ablámu, Naxɔ́ɔ kpó Halani kpó.

²⁷Tɛláxi ví lɛ́ɛ ɖíe: Tɛláxi ji Ablámu, Naxɔ́ɔ kpódó Halani kpó. Halani ka ji Lɔ̌ti.

²⁸Halani ɔ́ ká kú jɛ nukɔn nú tɔ́ tɔn Tɛláxi, ɖo to e mɛ è ji i ɖe ɔ́, ɖo Wúu, Kaludéenu lɛ́ɛ yíkúngban jí.

²⁹Ablámu kpó Naxɔ́ɔ kpó wá da asi. Ablámu sín asi nɔ nyí Salayíi, bɔ Naxɔ́ɔ tɔn ɔ́ nɔ́ nyí Miluka. Tɔ́ tɔn nɔ́ nyí Halani. Halani wɛ lɛ́ nyí Yisika sín tɔ́.

³⁰Ablámu sín asi Salayíi ɔ́, wɛnsinɔ wɛ; é ji vǐ ɖě ǎ.

³¹Tɛláxi kplá vǐ tɔn Ablámu kpó vǐvú tɔn Lɔ̌ti Halani ví ɔ́ kpó, kpódó vǐ tɔn Ablámu ɔ́ sín asi Salayíi kpó, bɔ yě gosín Wúu, ɖo Kaludéenu lɛ́ɛ yíkúngban jí, bó ɖidó Kanáa. Yě yi jɛ Haláani bó cí fínɛ́.

³²Tɛláxi nɔ gbɛ xɔ xwe afɔɖé atɔ́ɔ́n (205), bó kú ɖo Haláani.