Read fon Bǐbɛ́mɛ 12 Bible Online

Bǐbɛ́mɛ 12 - fon bible

Bǐbɛ́mɛ 12

¹ Mawu Mavɔmavɔ ɖɔ nú Ablámu ɖɔ: “Tɔ́n sín to towe mɛ, mɛ towe lɛ́ɛ mɛ, tɔ́ towe xwé, lobo yi to e un ná xlɛ́ we ɔ́ mɛ.

²Un ná zé we dó bló akɔta ɖaxó ɖokpó ná, bó ná xo ɖɛ dó jǐ towe. Un ná bló bɔ nyǐkɔ towe ná yi jǐ, bɔ a nǎ nyí nyɔ̌ná nú mɛ ɖě lɛ́ɛ bǐ.

³ Un ná xo ɖɛ dó mɛ e ná xo ɖɛ dó jǐ towe lɛ́ɛ jí; un ná dó nu mɛ e ná dó nu we lɛ́ɛ. Hwi jí wɛ un ná gbɔn bó ná xo ɖɛ dó hɛ̌nnu e ɖo gbɛ ɔ́ mɛ lɛ́ɛ bǐ jí.”

⁴Énɛ́ ɔ́, Ablámu sɔ́ nǔ bó ɖidó lě e Mawu Mavɔmavɔ kó ɖɔ gbɔn n'i é, bɔ Lɔ̌ti xwedó e. Xwe kanɖé gbantɔ́n (75) ɖó wɛ Ablámu ɖe, bó gosín Haláani hwenɛ́nu.

⁵Ablámu kplá asi tɔn Salayíi kpódó Lɔ̌ti nɔví tɔn súnnu ví ɔ́ kpó. É bɛ́ dɔkun tɔn lɛ́ɛ bǐ bó kplá mɛsɛntɔ́ e é xɔ ɖo Haláani lɛ́ɛ. Yě wlí ali ɖidó Kanáa. Ée Ablámu kpó mɛ tɔn lɛ́ɛ kpó jɛ Kanáa ɔ́,

⁶yě gbɔn to ɔ́ mɛ dín, bó yi zun Mɔlée tɔn kɔn, ɖo to e è nɔ ylɔ́ ɖɔ Sikɛ́mu ɔ́ mɛ. Kanáanu lɛ́ɛ ká ɖo to ɔ́ mɛ hwenɛ́nu.

⁷ Mawu Mavɔmavɔ tɔ́n dó Ablámu jí ɖo fínɛ́, bó ɖɔ n'i ɖɔ: “Un ná ná to élɔ́ kúnkan towe.” Bɔ Ablámu mɛ vɔ̌sákpe ɖokpó nú Mawu Mavɔmavɔ nyi fí e é tɔ́n dó jǐ tɔn ɖe ɔ́.

⁸Énɛ́ ɔ́ gúdo ɔ́, Ablámu gosín Sikɛ́mu, bó yi sókan mɛ, ɖo Betɛ́li sín zǎnzǎnhwe jí, bó ɖó gɔnu nyi fínɛ́. Betɛ́li ɔ́ ɖo gbadahwe jí n'i, bɔ Ayíi ɖo zǎnzǎnhwe jí n'i. É lɛ́ mɛ vɔ̌sákpe ɖěvo ɖó fínɛ́ nú Mawu Mavɔmavɔ, lobo nɔ xomlá nyǐkɔ tɔn.

⁹Ablámu lɛ́ wlí ali ɖidó Nɛgɛ́vu.

¹⁰Adɔ wá tɔ́n ɖo Kanáa to ɔ́ mɛ, bɔ Ablámu yi Ejípu bó ná nɔ fínɛ́, ɖó adɔ e tɔ́n ɖo to ɔ́ mɛ ɔ́ syɛ́n ɖésú.

¹¹Ée é ɖo Ejípu tomɛ ná byɔ́ wɛ ɔ́, é ɖɔ nú asi tɔn Salayíi ɖɔ: “Đǒtó mì, un tunwun ɖɔ a nyɔ̌ ɖɛkpɛ;

¹²Ejípunu lɛ́ɛ mɔ we ɔ́, yě ná ɖɔ hwi wɛ nyí asi ce, bó ná hu mì, lobo ka ná yí we.

¹³ Ényí yě ɖɔ mɔ̌ hǔn, kɛnklɛ́n ɖɔ nú yě ɖɔ nɔví ce wɛ a nyǐ, bónú yě ná kpé nukún dó wǔ ce ganjí ɖó hwɛ wú; énɛ́ ɔ́, é ná sín hwɛ wú bɔ un ná gán.”

¹⁴Nǔgbó ɔ́, ée Ablámu byɔ́ Ejípu to ɔ́ mɛ ɔ́, Ejípunu lɛ́ɛ mɔ ɖɔ nyɔ̌nu ɔ́ nyɔ́ ɖɛkpɛ ɖésú.

¹⁵Axɔ́sú Ejípu tɔn ɔ́ sín gǎn hɔn-yitɔ́ lɛ́ɛ lɔ mɔ nyɔ̌nu ɔ́, bó yi kpa ɖɛkpɛ tɔn nú axɔ́sú ɔ́. Énɛ́ ɔ́, è kplá nyɔ̌nu ɔ́ yi dó hɔn nú axɔ́sú ɔ́.

¹⁶Axɔ́sú ɔ́ wa ɖagbe nú Ablámu ɖésú ɖó nyɔ̌nu ɔ́ wú. É ná ɛ lɛ̌ngbɔ́, nyibú, tócí, mɛsɛntɔ́ súnnu, nyɔ̌nu, tócí asi kpó lǎkúnmí kpó.

¹⁷Lo ɔ́, Mawu Mavɔmavɔ dó azɔn baɖabaɖa ɖé lɛ́ɛ axɔ́sú ɔ́ kpó xwédo tɔn kpó ɖó Ablámu sín asi Salayíi wú.

¹⁸Ée nǔ cí mɔ̌ ɔ́, axɔ́sú ɔ́ ylɔ́ Ablámu bó ɖɔ n'i ɖɔ: “Nɛ̌ gbɔn bɔ a wa mɔ̌ xá mì? Étɛ́wú wɛ a ma ɖɔ nú mì ɖɔ asi émítɔn wɛ ǎ?

¹⁹Étɛ́wú wɛ a ɖɔ nú mì ɖɔ nɔví émítɔn wɛ? Énɛ́ wɛ zɔ́n bɔ un zé e dó ɖó asi ná hǔn. Din ɔ́, asi towe ɖíe, kplá ɛ bó ɖidó!”

²⁰Énɛ́ ɔ́, axɔ́sú ɔ́ ná gbe mɛsɛntɔ́ tɔn lɛ́ɛ ɖɔ yě ní kplá Ablámu kpó asi tɔn kpó, kpódó nǔ e é ɖó lɛ́ɛ bǐ kpó káká yi to ɔ́ sín dogbó jí.