Read fon Bǐbɛ́mɛ 13 Bible Online

Bǐbɛ́mɛ 13 - fon bible

Bǐbɛ́mɛ 13

¹Ée axɔ́sú ɔ́ ɖɔ mɔ̌ ɔ́, Ablámu kplá asi tɔn, bó bɛ́ nǔ e nyí étɔn lɛ́ɛ bǐ bó tɔ́n sín Ejípu bó ɖidó Nɛgɛ́vu. Lɔ̌ti lɔ xwedó e.

²Ablámu jɛ dɔkun ɖésú; é ɖó kanlin kpó kpatágan kpó, kpódó siká kpó kpɔ́ gégé.

³É ɖo fí lɛ́ɛ fí lɛ́ɛ gbɔn wɛ ɖo Nɛgɛ́vu káká wá jɛ Betɛ́li, fí e é kó ɖó gɔnu ɖó ɖ'ayǐ é, ɖo Betɛ́li kpó Ayíi kpó tɛ́ntin,

⁴ɖo fí e é mɛ vɔ̌sákpe ɖó ɖ'ayǐ é. Ée é jɛ fínɛ́ ɔ́, é xomlá Mawu Mavɔmavɔ sín nyǐkɔ.

⁵Lɔ̌ti lɔmɔ̌ ɖó gbɔ̌ kpó nyibú kpó gěgé, lobo ɖó goxɔ é ɖésúnɔ tɔn gěgé. É xwedó Ablámu.

⁶To e mɛ yě ká jɛ ɔ́ gbló bónú yě mɛ we lɛ́ɛ ná nɔ kpɔ́ ǎ, ɖó kanlin yětɔn lɛ́ɛ sukpɔ́.

⁷Énɛ́ ɔ́ wɛ zɔ́n, bɔ kanlinnyitɔ́ Ablámu tɔn lɛ́ɛ kpó Lɔ̌ti tɔn lɛ́ɛ kpó ɖɔ jlɛ. Kanáanu lɛ́ɛ kpó Pɛliziti lɛ́ɛ kpó ká ɖo to ɔ́ mɛ hwenɛ́nu.

⁸Énɛ́ ɔ́, Ablámu ɖɔ nú Lɔ̌ti ɖɔ: “Kɛnklɛ́n, tagba ɖó ná tíin ɖo nyɛ kpó hwi kpó tɛ́ntin ǎ; tagba ka ɖó ná tíin ɖo kanlinnyitɔ́ ce lɛ́ɛ kpó towe lɛ́ɛ kpó tɛ́ntin ǎ, ɖó nɔví wɛ mǐ nyǐ.

⁹To ɔ́ bǐ nɛ́ ɖo nukɔn towe nɛ́; gbɔ nú mǐ ná jɛ vovo. Sɔ́ fí e jló we é: ényí a ɖidó amyɔxwé ɔ́, nyɛ ná ɖidó ɖisíxwé; ényí a ka ɖidó ɖisíxwé ɔ́, nyɛ ná ɖidó amyɔxwé.”

¹⁰ Ée Ablámu ɖɔ mɔ̌ ɔ́, Lɔ̌ti zé ta bó mɔ ayǐkúngban wɛnjɛ Judɛ́ɛn tɔn ɔ́ bǐ, bɔ sin kpé fí bǐ. Má ɖɔ nú mi, fí énɛ́ ɔ́ kó cí jikpá Mawu Mavɔmavɔ tɔn ɖɔhun káká yi Sowáa, bó cí Ejípu to ɖɔhun cóbɔ Mawu Mavɔmavɔ wá gba Sodɔ́mu kpó Gomɔ́ɔ kpó.

¹¹Ée Lɔ̌ti mɔ mɔ̌ ɔ́, é sɔ́ ayǐkúngban wɛnjɛ Judɛ́ɛn tɔn ɔ́ bǐ, lobo bɛ́ nǔ bó yi jɛ zǎnzǎnhwe jí. Lě e yě jɛ vovo gbɔn ɔ́ nɛ́.

¹²Énɛ́ ɔ́, Ablámu yi nɔ ayǐkúngban Kanáa tɔn ɔ́ jí; Lɔ̌ti ka yi jɛ toxo e ɖo ayǐkúngban wɛnjɛ ɔ́ jí lɛ́ɛ kpá, lobo ján goxɔ tɔn lɛ́ɛ káká yi Sodɔ́mu.

¹³Sodɔ́munu lɛ́ɛ ɔ́, yě dá ɖésú; yě nɔ́ hu hwɛ dó Mawu Mavɔmavɔ ɖésú.

¹⁴Ée Lɔ̌ti jó Ablámu dó ɔ́, Mawu Mavɔmavɔ ɖɔ nú Ablámu ɖɔ: “Sí te, zě ta d'aga, bó kpɔ́n totaligbé, tofɔligbé, zǎnzǎnhwe jí kpódó gbadahwe jí kpó sɛ́ dó.

¹⁵ To e mɔ wɛ a ɖe nɛ́ lɛ́ɛ ɔ́, un ná ná bǐ hwi kpó vǐvú towe lɛ́ɛ kpó káká sɔ́yi.

¹⁶Un ná bló bɔ vǐvú towe lɛ́ɛ ná sukpɔ́ kɔ́gúdu ɖɔhun. Yě ná sukpɔ́ káká bɔ mɛɖé ná sixú xa yě ǎ, lě e è ma sixú xa kɔ́ e ɖo ayǐkúngban jí ɔ́ ǎ é ɖɔhun.

¹⁷Sí te bó ɖi sa gbɔn to ɔ́ bǐ mɛ, ɖó hwi wɛ un ná ná to ɔ́ bǐ.”

¹⁸Ablámu tún goxɔ tɔn lɛ́ɛ bó yi ján yě ɖó zun Mamulée tɔn lɛ́ɛ mɛ, ɖo Eblɔ́n kpá. É mɛ vɔ̌sákpe ɖokpó nyi fínɛ́ nú Mawu Mavɔmavɔ.