Read fon Bǐbɛ́mɛ 14 Bible Online

Bǐbɛ́mɛ 14 - fon bible

Bǐbɛ́mɛ 14

¹Hwenɛ́nu ɔ́, axɔ́sú ɛnɛ tíin; yě wɛ nyí: Amulafɛ́lu, Mɛzopotamíi sín axɔ́sú ɔ́; Alyɔki Ɛlasáa sín axɔ́sú ɔ́; Kedɔ́laomɛ́ɛ, Elámu sín axɔ́sú ɔ́ kpódó Tidealu, Goyímu sín axɔ́sú ɔ́ kpó;

²yě fun ahwan xá axɔ́sú atɔ́ɔ́n; yě wɛ nyí Bɛ́la, Sodɔ́mu sín axɔ́sú ɔ́, Bíica, Gomɔ́ɔ sín axɔ́sú ɔ́, Cinɛyavu, Adima sín axɔ́sú ɔ́, Cɛmɛvɛ́ɛ, Sevoyímu sín axɔ́sú ɔ́, lobo fun xá axɔ́sú Bɛ́la tɔn; to nɛ́ ɔ́ wɛ è nɔ lɛ́ ylɔ́ ɖɔ Sowáa.

³Axɔ́sú nɛ́ lɛ́ɛ e è fun ahwan xá lɛ́ɛ bǐ kplé ɖo tɔdo Sidímu tɔn e nyí Xu Kúkú ɔ́ mɛ.

⁴Axɔ́sú nɛ́ lɛ́ɛ kó nɔ axɔ́sú Kedɔ́laomɛ́ɛ glɔ́ nú xwe wěwe, bó fɔ́n gǔ ɖo xwe wǒ-atɔngɔ́ ɔ́ mɛ.

⁵Lo ɔ́, ɖo xwe wǒ-ɛnɛgɔ́ ɔ́ mɛ ɔ́, axɔ́sú Kedɔ́laomɛ́ɛ, kpó axɔ́sú e ɖo jǐ tɔn lɛ́ɛ kpó sɔ́ ahwannú, bó yi ɖu ɖo Hlafa ví lɛ́ɛ jí ɖo Acitalɔ́ti-Kaanayímu, bó ɖu ɖo Zuzi ví lɛ́ɛ jí ɖo Hamu, bó ɖu ɖo Emíti lɛ́ɛ jí ɖo ayǐkúngban wɛnjɛ Cawée-Kiliyatayímu tɔn jí,

⁶lobo ɖu ɖo Holiti lɛ́ɛ jí, ɖo Seyíi só kanmɛ, bó jɛ yě gúdo káká yi Eyilu-Paláni ɖo gbětótló ɔ́ kpá.

⁷Énɛ́ ɔ́ gúdo ɔ́, yě lɛ́ kɔ wá Eyinu-Micipáti e nyí Kadɛ́ci é, lobo ɖu ɖo Amalɛ́ki ví lɛ́ɛ bǐ jí, bó lɛ́ ɖu ɖo Amɔliti ɖo Hasasɔ́ni-Tamáa lɛ́ɛ jí.

⁸Énɛ́ ɔ́, axɔ́sú Sodɔ́mu tɔn ɔ́ kpó Gomɔ́ɔ tɔn ɔ́ kpó, kpó Adima tɔn ɔ́ kpó, kpó Sevoyímu tɔn ɔ́ kpó, kpódó Bɛ́la e è nɔ lɛ́ ylɔ́ ɖɔ Sowáa tɔn ɔ́ kpó sɔ́ ahwannú; yě yi tɔ́n ahwan yě ɖo tɔdo Sidímu tɔn ɔ́ mɛ.

⁹Yě yi fun ahwan xá Kedɔ́laomɛ́ɛ, axɔ́sú Elámu tɔn ɔ́, kpó Tidealu, axɔ́sú Goyímu tɔn ɔ́ kpó, kpó Amulafɛ́lu, axɔ́sú Mɛzopotamíi tɔn ɔ́ kpó, kpódó Alyɔki, axɔ́sú Ɛlasáa tɔn ɔ́ kpó: hǔn axɔ́sú ɛnɛ nɛ́ húzú kpan nukɔn axɔ́sú atɔ́ɔ́n nɛ́.

¹⁰Lo ɔ́, sin gɔ́ dotɔ e ɖo tɔdo Sidímu tɔn mɛ lɛ́ɛ bǐ mɛ, bɔ hwenu e axɔ́sú Sodɔ́mu tɔn ɔ́ kpó Gomɔ́ɔ tɔn ɔ́ kpó ɖo hinhɔn wɛ é ɔ́, yě mɛ ɖě lɛ́ɛ jɛ dotɔ mɛ, bɔ mɛ e kpo lɛ́ɛ hɔn ɖidó sókan mɛ.

¹¹Bɔ mɛ e ɖu ɖo yě jí lɛ́ɛ bɛ́ dɔkun e ɖo Sodɔ́mu kpó Gomɔ́ɔ kpó lɛ́ɛ bǐ kpódó nǔɖuɖu e yě kplé ɖ'ayǐ lɛ́ɛ bǐ kpó, lobo yi.

¹²Lɔ̌ti Ablámu nɔví ví ɔ́ ɖíe ká ɖo Sodɔ́mu hwenɛ́nu e.

¹³Yě mɛ e ɖo hinhɔn wɛ lɛ́ɛ ɖokpó wá ɖɔ nǔ e jɛ nɛ́ ɔ́ nú Ablámu. Ablámu Eblée ɔ́, nɔ́ nɔ zun Mamulée tɔn lɛ́ɛ mɛ. Mamulée ɔ́, Amɔliti wɛ. Ɛcikɔ́lu kpó Anɛ́ɛ kpó sín nɔví súnnu wɛ. Yě mɛ énɛ́ lɛ́ɛ jɛ akɔ xá Ablámu.

¹⁴Ée Ablámu se lě tlóló ɖɔ è wlǐ vǐ émítɔn bó zé yi ɔ́, é sɔ́ ahwannú nú mɛsɛntɔ́ tɔn e nyɔ́ ahwan fun ganjí, bó jɔ ɖo kún tɔn mɛ lɛ́ɛ afɔɖé kanwe gbantɔ́n-nukún-atɔn (318), lobo jɛ axɔ́sú lɛ́ɛ gúdo káká yi Dan.

¹⁵Ée yě yi jɛ dɔ̌n ɔ́, Ablámu má ahwangɔnu tɔn, bɔ é kpó mɛsɛntɔ́ lɛ́ɛ kpó ná tɔ́n ahwan axɔ́sú lɛ́ɛ zǎn mɛ. É ɖu ɖo yě jí, bó jɛ gǔdo yětɔn káká yi Hova. Hova ɔ́, toxo ɖé wɛ, bó ɖo totaligbé nú Damási.

¹⁶Ée é ɖu ɖo yě jí ɔ́, é bɛ́ dɔkun lɛ́ɛ bǐ wá yi. É lɛ́ kplá vǐ tɔn Lɔ̌ti ɔ́ lɔmɔ̌ wá kpó dɔkun tɔn lɛ́ɛ bǐ kpó, bó kplá nyɔ̌nu lɛ́ɛ kpó togun ɔ́ bǐ kpó.

¹⁷Ée Ablámu ɖu ɖo Kedɔ́laomɛ́ɛ kpó axɔ́sú e ɖo jǐ tɔn lɛ́ɛ kpó jí, bó lɛ́ kɔ jǎwe ɔ́, axɔ́sú Sodɔ́mu tɔn ɔ́ tɔ́n, bó yi kpé e ɖo tɔdo Cawée tɔn ɔ́ mɛ. Tɔdo Cawée tɔn ɔ́, è nɔ lɛ́ ylɔ́ ɖɔ tɔdo Axɔ́sú tɔn.

¹⁸ Lo ɔ́, Mɛlukisedɛ́ki[2], axɔ́sú Salɛ́mu tɔn ɔ́, éyɛ́ hɛn wɔ̌xúxú kpó vɛ̌ɛn kpó wá nú Ablámu. Mawu Ajalɔ̌nlɔn ɔ́ sín vɔ̌sánú-xwlémawutɔ́ wɛ é kó nyí ɖ'ayǐ.

¹⁹É xo ɖɛ dó Ablámu jí, bó ɖɔ: “Mawu Ajalɔ̌nlɔn ní kɔn nyɔ̌ná dó Ablámu jí. Mawu Ajalɔ̌nlɔn e bló jǐnukúnsin kpó ayǐkúngban kpó é ní kɔn nyɔ̌ná dó jǐ we.

²⁰Susu nú Mawu Ajalɔ̌nlɔn. É jó kɛntɔ́ towe lɛ́ɛ nú we.” Ablámu ná ɛ nǔ e é bɛ́ wá lɛ́ɛ bǐ sín mǎɖówǒ.

²¹Axɔ́sú Sodɔ́mu tɔn ɔ́ ɖɔ nú Ablámu ɖɔ: “Nǎ gbɛtɔ́ lɛ́ɛ mì, bó bɛ́ dɔkun lɛ́ɛ bǐ.”

²²Ablámu ka ɖɔ n'i ɖɔ: “Un xwlé Mawu Mavɔmavɔ, Mawu Ajalɔ̌nlɔn e bló jǐnukúnsin kpó ayǐkúngban kpó é:

²³Un ná zé nǔ towe ɖěbǔ ǎ; un ná ɖ'alɔ nyɛ̌ví vɔ́vɔ́ wú ǎ. Énɛ́ ɔ́, sɔ wá su ɔ́, a sɔ́ ná ɖɔ émí wɛ dó dɔkun nú mì ǎ.

²⁴Nyɛ ɖésúnɔ ɔ́, un ba nǔ ɖěbǔ ǎ. Un ba nǔ ɖěbǔ zɛ nǔ e mɛ ce lɛ́ɛ ɖu ɔ́ kpódó kanta e Anɛ́ɛ kpódó Ɛcikɔ́lu kpó, kpó Mamulée kpó ná yí é wú ǎ. Yě wɛ xwedó mì, yě ká ɖó ná yí kanta yětɔn.”