Read fon Bǐbɛ́mɛ 16 Bible Online

Bǐbɛ́mɛ 16 - fon bible

Bǐbɛ́mɛ 16

¹Ablámu sín asi Salayíi ɔ́ ji vǐ ɖěbǔ n'i ǎ. Salayíi ka ɖó mɛsɛntɔ́ nyɔ̌nu Ejípunu ɖokpó, bɔ è nɔ ylɔ́ ɛ ɖɔ Hagáa.

²Salayíi ɖɔ nú Ablámu ɖɔ: “Mawu Mavɔmavɔ ba nú má ɖó vǐ ǎ; gbɔ bó ɖó xó xá mɛsɛntɔ́ ce. Afɔ nyɔ́ ɔ́, un sixú ɖó vǐ gbɔn gbla tɔn mɛ[3].” Ablámu yí gbe nú xó e Salayíi ɖɔ é.

³Énɛ́ ɔ́, Salayíi sɔ́ mɛsɛntɔ́ tɔn Hagáa Ejípunu ɔ́ da nú asú tɔn. Ablámu ka ko bló xwe wǒ ɖo Kanáa hwenɛ́nu.

⁴É ɖó xó xá Hagáa bɔ é mɔ xo. Ée Hagáa mɔ ɖɔ kɛ́n jɛ émí wú ɔ́, é sɔ́ nɔ́ mɔ gǎn tɔn dó mɔ nǔɖé ǎ.

⁵Bɔ Salayíi ɖɔ nú Ablámu ɖɔ: “Zun e zun mì wɛ é ɖe ɔ́, nú é ji nǔɖé ɔ́, hwi wɛ ná kpan. Nyɛ wɛ sɔ́ mɛsɛntɔ́ ce ná we nǔgbó, amɔ̌, sín hwenu e é mɔ ɖɔ kɛ́n jɛ émí wú ɔ́, é sɔ́ nɔ mɔ mì dó mɔ nǔɖé ǎ. Mawu Mavɔmavɔ ní gbo hwɛ nú nyɛ kpó hwi kpó.”

⁶Lo ɔ́, Ablámu ɖɔ nú Salayíi ɖɔ: “Mɛsɛntɔ́ towe wɛ é nyí, bó ɖo acɛ towe glɔ́. Nǔɖé jló we hǔn, wa xá ɛ.” Ée é ɖɔ mɔ̌ ɔ́, Salayíi jɛ ya dó nú Hagáa jí káká bɔ é hɔn yi.

⁷Wɛnsagun Mawu Mavɔmavɔ tɔn mɔ Hagáa ɖo tɔjɔtɛn ɖé kɔn, ɖo gbětótló mɛ ɖo Cúu sín ali jí.

⁸Wɛnsagun ɔ́ kanbyɔ́ Hagáa ɖɔ: “Hagáa, mɛsɛntɔ́ Salayíi tɔn, fítɛ́ a gosín? Fítɛ́ a xwe?” Bɔ é yí gbe n'i ɖɔ: “Gǎn ce Salayíi hɔn ná wɛ un ɖe.”

⁹Bɔ wɛnsagun Mawu Mavɔmavɔ tɔn ɔ́ ɖɔ n'i ɖɔ: “Lɛ̌ kɔ yi gǎn towe gɔ́n bó hwíhwɛ́ hwiɖée ɖó glɔ̌ tɔn.

¹⁰Un ná bló bɔ vǐ towe lɛ́ɛ ná sukpɔ́ káká bɔ è nǎ sixú xa yě ǎ.

¹¹Xo wɛ a ɖe din, bó ná ji vǐ súnnu ɖokpó, lobo ná sun nyǐ i ɖɔ Isimayɛ́li; ɖó un se nǔwamɛ ví e ya wɛ a ɖe é.

¹²Vǐ ɔ́ ná cí tócí gbě tɔn ɖɔhun. É ná fun ahwan xá mɛ bǐ, bɔ mɛ bǐ ná fun ahwan xá ɛ; é ná nɔ zɔ nú mɛ bǐ, é ɖokpónɔ wɛ ná nɔ ayǐ.”

¹³Bɔ Hagáa ylɔ́ wɛnsagun Mawu Mavɔmavɔ tɔn e wá ɖɔ xó n'i ɔ́ ɖɔ: “Ata-Ɛli-Hlɔyi.” Đó é ɖo ɖiɖɔ dó xomɛ wɛ ɖɔ: “Un ka ba ɖɔ má kpɔ́n mɛ e ɖo mimɔ mì wɛ ɔ́ a?”

¹⁴Nǔ e wú è nɔ ylɔ́ dotɔ énɛ́ ɔ́ ɖɔ dotɔ Laxáyi-Hlɔyi tɔn ɔ́ nɛ́. Dotɔ énɛ́ ɔ́ ɖo Kadɛ́ci kpó Bɛlɛ́di kpó tɛ́ntin.

¹⁵ Hagáa ji vǐ súnnu ɖokpó nú Ablámu; bɔ Ablámu sun nyǐ vǐ ɔ́ ɖɔ Isimayɛ́li.

¹⁶Xwe kanwe ayizɛ́n (86) wɛ Ablámu ɖó hwenu e Hagáa ji Isimayɛ́li n'i é.