Read fon Bǐbɛ́mɛ 17 Bible Online

Bǐbɛ́mɛ 17 - fon bible

Bǐbɛ́mɛ 17

¹Hwenu e Ablámu ɖo xwe kanwe afɔtɔn-nukún-ɛnɛ (99) ɖó wɛ ɔ́, Mawu Mavɔmavɔ tɔ́n dó jǐ tɔn, bó ɖɔ n'i ɖɔ: “Nyɛ wɛ nyí Mawu Nǔbǐwúkpétɔ́ ɔ́. Nɔ nɔ ali ce jí; è nǐ má nɔ́ mɔ nǔjɛdo ɖé ɖɔ dó wǔ towe ó.

²Un ná jɛ akɔ xá we; un ná bló bɔ a nǎ gba kún bɔ é ná vɛ́ jlɛ́.”

³Ée Ablámu se mɔ̌ ɔ́, é xwe agbɔ̌nnusú do, bɔ Mawu ɖɔ n'i ɖɔ:

⁴“Nyɛ ɔ́, akɔ e un jɛ xá we ɔ́ ɖíe: A nǎ húzú tɔ́gbó nú akɔta wɔ̌buwɔ́bú.

⁵ È sɔ́ ná nɔ́ ylɔ́ we ɖɔ Ablámu ǎ, lo ɔ́, è nǎ nɔ́ ylɔ́ we ɖɔ Ablaxámu, ɖó un sɔ́ we dó húzú tɔ́gbó nú akɔta wɔ̌buwɔ́bú.

⁶Un ná bló bɔ vǐ towe lɛ́ɛ ná sukpɔ́, bó ná húzú akɔta gěgé; axɔ́sú gěgé ná tɔ́n ɖo vǐ towe lɛ́ɛ mɛ.

⁷ Un ná jɛ akɔ xá we, bó ná jɛ xá vǐ towe e ná jɛ do towe mɛ lɛ́ɛ, jijimɛ ɖě jɛ ɖě gúdo. Akɔjijɛ mavɔ mavɔ ɖé wɛ é ná nyí, bó ná zɔ́n bɔ un ná nyí Mawu towe, bó ná nyí Mawu vǐ towe e ná jɛ do towe mɛ lɛ́ɛ tɔn.

⁸ Un ná ná to élɔ́ e mɛ a nyǐ jǒnɔ ɖe din ɔ́ hwi kpódó vǐ towe e ná jɛ do towe mɛ lɛ́ɛ kpó. To ɔ́ wɛ nyí Kanáa; un ná bǐ yě. É ná nyí yětɔn káká sɔ́yi, bɔ un ná nyí Mawu yětɔn.”

⁹Mawu lɛ́ ɖɔ nú Ablaxámu ɖɔ: “Hwɛ ɔ́, a nǎ ɖó sísí nú akɔ e un jɛ xá we ɔ́. Hwi kpó vǐ towe e ná jɛ do towe mɛ lɛ́ɛ kpó ná ɖó sísí nú akɔ e un jɛ xá mi é, jijimɛ ɖě jɛ ɖě gúdo.

¹⁰ Akɔ e jɛ xá hwi kpó kúnkan towe lɛ́ɛ bǐ kpó wɛ un ɖe bɔ mi ɖó ná nɔ́ xwedó ɔ́ ɖíe: È ɖǒ ná nɔ́ gbo ada nú súnnu e ɖo mi mɛ lɛ́ɛ bǐ.

¹¹Mi ná nɔ́ gbo ada. Adagbigbo ɔ́ wɛ ná nyí akɔjijɛ e ɖo nyɛ kpó mi kpó tɛ́ntin ɔ́ sín wuntun.

¹²Mi ji vǐ súnnu ɖěbǔ, bónú é ɖó azǎn tántɔn ɔ́, mi ɖó ná gbo ada n'i. Mɔ̌ wɛ mi nǎ bló nú kannumɔ e è ji ɖo to mitɔn mɛ lɛ́ɛ, bó ná lɛ́ bló nú kannumɔ e mi zé akwɛ́ dó xɔ bɔ yě má nyí akɔta mitɔn ǎ lɛ́ɛ bǐ. Mɔ̌ wɛ mi ná bló gbɔn ɖo jijimɛ lɛ́ɛ bǐ mɛ.

¹³Hǔn, è ɖǒ nǎ gbo ada nú xwéví kpó kannumɔ e è xɔ lɛ́ɛ kpó, bónú akɔ e un jɛ xá mi ɔ́ ná nyí wuntun ɖé ɖo agbaza mitɔn wú káká sɔ́yi.

¹⁴Súnnu e má ná gbo ada ǎ ɔ́, è nǎ ɖe e sín tɛ́ntin mitɔn, ɖó é gba akɔ e un jɛ xá mi é.”

¹⁵Mawu lɛ́ ɖɔ nú Ablaxámu ɖɔ: “A sɔ́ ná nɔ́ ylɔ́ asi towe ɖɔ Salayíi ǎ; lo ɔ́, a nǎ nɔ́ ylɔ́ ɛ ɖɔ Sala.

¹⁶Un ná xo ɖɛ dó jǐ tɔn, bó ná ná vǐ súnnu ɖokpó we gbɔn jǐ tɔn; un ná xo ɖɛ dó jǐ tɔn, bɔ é ná dó akɔta gěgé sín kún. Axɔ́sú gěgé ná tɔ́n ɖo vǐ tɔn lɛ́ɛ mɛ.”

¹⁷Ée Ablaxámu se mɔ̌ ɔ́, é xwe agbɔ̌nnusú do; é ko nǔ, bó ɖɔ dó xomɛ ɖɔ: “Nyɛ mɛ e ko ɖó xwe kanwe ko (100) ɔ́ wɛ è nǎ sixú ji vǐ ná a? Sala lɔmɔ̌ e kó ɖó xwe kanwe wǒ (90) ɔ́ wɛ ná lɛ́ ji vǐ a?”

¹⁸Énɛ́ ɔ́, é ɖɔ nú Mawu ɖɔ: “Mawu ce, Isimayɛ́li ní vɛ́ kó nɔ gbɛ, bónú a xo ɖɛ dó jǐ tɔn kpowun.”

¹⁹Bɔ Mawu ɖɔ nú Ablaxámu ɖɔ: “Éeǒ! Asi towe Sala ná ji vǐ súnnu ɖokpó nú we dandan. A nǎ sun nyǐ vǐ ɔ́ ɖɔ Izáki. Un ná jɛ akɔ xá ɛ, bɔ é ná nyí akɔjijɛ mavɔ mavɔ nú é kpó vǐ tɔn e ná jɛ do tɔn mɛ lɛ́ɛ kpó.

²⁰Un se nǔ e a byɔ́ nú Isimayɛ́li é; un ná xo ɖɛ dó jǐ tɔn; un ná bló bɔ é ná gba kún; vǐ tɔn lɛ́ɛ ná sukpɔ́ ɖésú. É ná ji axɔ́ví wěwe bó ná nyí tɔ́gbó togun ɖaxó ɖé tɔn.

²¹Amɔ̌, Izáki e Sala ná ji nú we ɖo xwe ɖě ɔ́ mɛ lěhwenu ɔ́, é wɛ un ná jɛ akɔ xá.”

²²Ée Mawu ɖɔ xó nú Ablaxámu fó ɔ́, é ɖidó jǐ.

²³Gbe nɛ́ gbe ɔ́, Ablaxámu gbo ada nú vǐ tɔn Isimayɛ́li ɔ́, bó gbo nú kannumɔ tɔn lɛ́ɛ bǐ: ée è ji ɖo xwé tɔn gbe lɛ́ɛ kpó ée é xɔ lɛ́ɛ bǐ kpó; nú è nǎ ɖɔ ɔ́, é gbo ada nú súnnu e kó ɖo xwé tɔn gbe lɛ́ɛ bǐ. É gbo ada nú yě bǐ lě e Mawu zɔ́n gbɔn é.

²⁴È gbo ada nú Ablaxámu lɔmɔ̌ gbe nɛ́ gbe. Xwe kanwe afɔtɔn-nukún-ɛnɛ (99) wɛ é ɖó.

²⁵Vǐ tɔn Isimayɛ́li ɔ́, xwe wǒ-atɔn wɛ éyɛ́ ɖó bɔ è gbo ada n'i.

²⁶Gbe nɛ́ gbe ɖokpó ɔ́ wɛ Ablaxámu kpó vǐ tɔn Isimayɛ́li kpó gbo ada.

²⁷Gbe nɛ́ gbe ɖokpó ɔ́ wɛ kannumɔ tɔn lɛ́ɛ bǐ gbo ada; kannumɔ e è ji ɖo xwé tɔn gbe lɛ́ɛ kpó ée é xɔ ɖo jǒnɔ lɛ́ɛ sí lɛ́ɛ bǐ kpó.