Read fon Bǐbɛ́mɛ 19 Bible Online

Bǐbɛ́mɛ 19 - fon bible

Bǐbɛ́mɛ 19

¹Wɛnsagun Mawu tɔn we lɛ́ɛ wá Sodɔ́mu gbe nɛ́ gbe gbadanu. Lɔ̌ti ko ɖo ayǐjínjɔ́n ɖo hɔntogbó Sodɔ́mu tɔn ɔ́ jí hwenɛ́nu. Ée é mɔ wɛnsagun lɛ́ɛ ɔ́, é sí te bó yi kpé yě bó xwe agbɔ̌nnusú do.

²Énɛ́ ɔ́ gúdo ɔ́, é ɖɔ: “Mɛɖaxó ce lɛ́ɛ e mi, mi kɛnklɛ́n, mi wá mǐ yi nyɛ mɛsɛntɔ́ mitɔn ɔ́ sín xwé gbe. Mi ná klɔ́ afɔ bó dɔ́ ayǐ. Énɛ́ ɔ́, mi ná fɔ́n zǎn sɔ bó ná lɛ́ wlí ali mitɔn ɖidó.” Yě ká gbɛ́ bó ɖɔ: “Éeǒ, mǐ ná dɔ́ xwé towe gbe ǎ, alixo fí wɛ mǐ ná dɔ́.”

³Lo ɔ́, Lɔ̌ti dó tagba tɔn nú yě káká, bɔ yě gbɔ bó yi xwé tɔn gbe. Énɛ́ ɔ́, é yí jǒnɔ yětɔn, bó ɖa wɔ̌xúxú e mɛ è ma dó tɔ́n ǎ é, bɔ yě ɖu.

⁴Yě kó mlɔ́ ayǐ cóbɔ Sodɔ́munu lɛ́ɛ wá xá xwé ɔ́ ǎ; súnnu e ɖo to ɔ́ mɛ lɛ́ɛ bǐ wɛ wá, bɛ́ sín yɔkpɔ́vú lɛ́ɛ jí káká yi degénɔ kpikpoe lɛ́ɛ jí. To ɔ́ bǐ wɛ xo zǐn bó wá.

⁵ Ée mɛ lɛ́ɛ wá ɔ́, yě ylɔ́ Lɔ̌ti bó kanbyɔ́ ɛ ɖɔ: “Fítɛ́ mɛ e wá gɔ̌n towe zǎn élɔ́ mɛ lɛ́ɛ ɖe? Đe yě tɔ́n bónú mǐ ná zé yě dó ɖu gbɛ.”

⁶Lɔ̌ti ka tɔ́n bó yi mɔ yě ɖo hɔnto, bó sú hɔn dó éɖée ɖo gǔdo,

⁷bó ɖɔ nú yě ɖɔ: “Nɔví ce lɛ́ɛ e mi, mi kɛnklɛ́n, mi ma dó nǔ mɔ̌hunkɔtɔn sin ó.

⁸Mi ɖótó mì. Un ɖó vǐ nyɔ̌nu we bɔ yě kpo ɖo alɔjí; un ná kplá yě wá nú mi, bɔ nǔɖé jló mi ɔ́, mi ná zé yě dó wa. Amɔ̌, mi ma wa nǔ ɖěbǔ nú mɛ énɛ́ lɛ́ɛ ó, ɖó jǒnɔ ce lɛ́ɛ wɛ yě nyǐ[4].”

⁹Ée Lɔ̌ti ɖɔ mɔ̌ nú yě ɔ́, yě ɖɔ n'i ɖɔ: “Bɛ̌ hwiɖée sín fínɛ́. Jǒnɔ wɛ a nyǐ bó ká ja acɛ kpa nú mǐ gbé. É nyɔ́, mǐ nǎ wa nǔ towe bɔ é ná syɛ́n hú nǔ e mǐ nǎ wa xá yědɛɛ lɛ́ɛ é.” Ée yě ɖɔ mɔ̌ ɔ́, yě sísɛ́ Lɔ̌ti kpó hlɔ̌nhlɔ́n kpó, bó ɖidó hɔn ɔ́ fó gbé.

¹⁰Énɛ́ ɔ́, wɛnsagun we lɛ́ɛ dlɛ́n alɔ bó dɔn Lɔ̌ti byɔ́ xwé ɔ́ gbe, bó sú hɔn ɔ́,

¹¹ bó va nukún yě mɛ e ɖo hɔn ɔ́ ta lɛ́ɛ bǐ, bɛ́ sín mɛ e nyí yɔkpɔ́vú bǐ ɔ́ jí káká yi jɛ mɛ e nyí mɛxó bǐ ɔ́ jí, bɔ yě jɛ avi dlá jí, bó sɔ́ sixú mɔ hɔn ɔ́ ǎ.

¹²Wɛnsagun we lɛ́ɛ ɖɔ nú Lɔ̌ti ɖɔ: “Mɛ towe lɛ́ɛ ɖě sɔ́ kpo ɖo fí a? Vǐ towe sín asú wɛ a, vǐ towe súnnu abǐ nyɔ̌nu wɛ a, mɛ ɖěbǔ nyí towe ɖo to ɔ́ mɛ hǔn, ɖe bǐ tɔ́n sín fí.

¹³Đó mǐ ná gba to élɔ́. To ɔ́ mɛ nu lɛ́ɛ sín hwɛ e jɛ nú Mawu Mavɔmavɔ wɛ è ɖe lɛ́ɛ wá sukpɔ́ dín, bɔ é sɛ́ mǐ dó ɖɔ mǐ ní wá gba to ɔ́ hánnyá.”

¹⁴Énɛ́ ɔ́, Lɔ̌ti yi ɖɔ nú vǐ tɔn sín asúxɔ́ntɔn lɛ́ɛ ɖɔ: “Mi yá wǔ gosín fí, ɖó Mawu Mavɔmavɔ ná gba to ɔ́.” Lo ɔ́, yě vɛdó ɖɔ ayihún da wɛ é ɖe sín.

¹⁵Ée é jɛ ayǐtéhɔ̌nnu ɔ́, wɛnsagun Mawu tɔn lɛ́ɛ jɛ Lɔ̌ti kplɔ́ jí ɖɔ: “Yǎ wǔ kplá asi towe bó kplá vǐ towe nyɔ̌nu we lɛ́ɛ, bó gosín fí; é má nyí mɔ̌ ǎ ɔ́, hwenu e mǐ ná gba toxo ɔ́, ɖó hwɛ e é hu lɛ́ɛ wú ɔ́, mi ná kú kú e má nyí mitɔn ǎ é.”

¹⁶ Yě ɖɔ mɔ̌ có Lɔ̌ti ka ɖo afɔ dɔn dó ayǐ wɛ, bɔ wɛnsagun lɛ́ɛ gbɔ bó hɛn éé kpó asi tɔn kpó, kpódó vǐ tɔn lɛ́ɛ kpó sín alɔ, bó dɔn yě tɔ́n sín toxo ɔ́ mɛ, ɖó Mawu Mavɔmavɔ jló ná hwlɛ́n ɛ gán.

¹⁷Ée wɛnsagun lɛ́ɛ ɖe yě tɔ́n ɔ́, yě mɛ ɖokpó ɖɔ nú Lɔ̌ti ɖɔ: “Hɔn yi bó ná nɔ gbɛ. Ma kpɔ́n gǔdo ó, ma nɔ te fí ɖěbǔ ɖo ayǐkúngban wɛnjɛ ɔ́ jí ó, hɔn yi cí sókan mɛ; é má nyí mɔ̌ ǎ ɔ́, a nǎ kú.”

¹⁸Bɔ Lɔ̌ti ɖɔ nú yě ɖɔ: “Mɛɖaxó, kɛnklɛ́n gbɔ.

¹⁹A ko nyɔ́ xomɛ dó nyɛ mɛsɛntɔ́ towe ɔ́ wú, bó kó hɛn mì ɖó gbɛ dó ɖe wǎn yíyí ɖaxó e a ɖǒ nú mì ɔ́ xlɛ́ mì. Amɔ̌, un ná sixú hɔn yi sókan ɔ́ mɛ, cóbónú nyladó ɔ́ ná kó wá mɔ mì ǎ, bɔ un ná kú.

²⁰A mɔ toxo kpɛví énɛ́ ɔ́ a? É yá fí ganjí bɔ un hɛn ɔ́, un ná kán wezun yi fínɛ́ bó ná gán; toxo kpɛví ɖé wɛ.”

²¹Bɔ wɛnsagun ɔ́ ɖɔ n'i ɖɔ: “É nyɔ́, un ná bló énɛ́ lɔ nú we; un ná kpɔ́n dó hwi wú, bó ná sɔ́ toxo e xó ɖɔ wɛ a ɖe ɔ́, bó húzú xwe ǎ.

²²Hǔn, bó yá wǔ hɔn yi cí fínɛ́, ɖó a ma ko yi dɔ̌n ǎ ɔ́, un ná sixú wa nǔ ɖěbǔ ǎ.” Énɛ́ ɔ́ wú wɛ è nɔ ylɔ́ toxo énɛ́ ɔ́ ɖɔ Sowáa. Sowáa sín tínmɛ wɛ nyí toxo kpɛví.

²³Cóbónú Lɔ̌ti ná byɔ́ Sowáa toxo ɔ́ mɛ ɔ́, wun ko ɖo kinkɛn wɛ.

²⁴ Énɛ́ ɔ́, Mawu Mavɔmavɔ ɖésú sɛ́ hwemí kpó zo kpó dó sín jǐxwé bɔ yě ja kɔn nyi Sodɔ́mu kpó Gomɔ́ɔ kpó jí.

²⁵Mawu Mavɔmavɔ sɔ́ toxo énɛ́ lɛ́ɛ bǐ, bó húzú yě xwe; é sú mɛ e ɖo toxo énɛ́ lɛ́ɛ mɛ lɛ́ɛ sín kún dó, bó sɔ́ ayǐkúngban wɛnjɛ ɔ́ bǐ, kpó nǔ e wú ɖ'é jí lɛ́ɛ bǐ kpó bó húzú yě xwe.

²⁶ Lɔ̌ti sín asi ka kpɔ́n gǔdo, bó húzú jɛ sín bǒcyɔ.

²⁷Ablaxámu fɔ́n zǎn bó yi fí e é nɔ Mawu Mavɔmavɔ nukɔn ɖe é.

²⁸É kpɔ́n Sodɔ́mu kpó Gomɔ́ɔ kpó sɛ́ dó, bó kpɔ́n to e ɖo ayǐkúngban wɛnjɛ ɔ́ jí lɛ́ɛ bǐ sɛ́ dó, bó mɔ ɖɔ azɔ ɖo sisi wɛ myɔkpó ɖɔhun.

²⁹Énɛ́ ɔ́, ée Mawu sɔ́ toxo e ɖo gbě e jí Lɔ̌ti nɔ nɔ lɛ́ɛ bó húzú xwe ɔ́, é wɔn Ablaxámu ǎ, bó ɖe Lɔ̌ti sín nǔ baɖabaɖa e jɛ nɛ́ ɔ́ mɛ.

³⁰Lɔ̌ti gosín Sowáa bó yi cí sókan mɛ kpó vǐ tɔn nyɔ̌nu we lɛ́ɛ kpó, ɖó é ɖo xɛsi ɖi wɛ ɖo toxo ɔ́ mɛ. É kpó vǐ tɔn we lɛ́ɛ kpó yi nɔ sónu mɛ.

³¹É su gbe ɖokpó, bɔ vǐ mɛxó ɔ́ ɖɔ nú kpɛví ɔ́ ɖɔ: “Tɔ́ mǐtɔn kó kpo; súnnu ɖě ká ɖo gbě jí fí bó ná wá ɖó xó xá mǐ lě e è nɔ bló gbɔn é ǎ.

³²Wǎ nú mǐ ná ɖó vɛ̌ɛn kɔ jí nú tɔ́ mǐtɔn, bɔ é ná nu mú bó ɖó xó xá mǐ, bɔ mǐ ná ji vǐ n'i dó hɛn kún tɔn ɖó te.”

³³Yě ɖǒ vɛ̌ɛn kɔ jí nú tɔ́ yětɔn nǔgbó ɖo zǎn énɛ́ ɔ́ mɛ, bɔ vǐ nyɔ̌nu mɛxó ɔ́ yi mlɔ́ akpá tɔn. Tɔ́ yětɔn ká tunwun nǔ e jɛ lɛ́ɛ ɖě ǎ; é tlɛ tunwun hwenu e vǐ tɔn wá mlɔ́ akpá tɔn dó ɔ́, kpó hwenu e é fɔ́n dó ɔ́ kpó ǎ.

³⁴Ayǐhɔ́ngbe tɔn ɔ́, mɛxó ɔ́ ɖɔ nú mɛ kpɛví ɔ́ ɖɔ: “Nyɛ kpó tɔ́ mǐtɔn kpó ɖɔ éé ɖo mɔ̌ é zǎn mɛ. É jɛ zǎn mɛ ɔ́, mǐ ná lɛ́ ɖó vɛ̌ɛn kɔ jí n'i, bɔ é ná nu mú, bɔ a nǎ yi mlɔ́ akpá tɔn, bɔ hwi lɔ ná sixú hɛn tɔ́ mǐtɔn sín kún ɖó te.”

³⁵Bɔ yě lɛ́ ɖó vɛ̌ɛn kɔ jí nú tɔ́ yětɔn ɖo zǎn énɛ́ ɔ́ mɛ, bɔ é nu mú, bɔ vǐ kpɛví ɔ́ yi mlɔ́ akpá tɔn. Tɔ́ yětɔn ká tunwun nǔ e jɛ lɛ́ɛ ɖě ǎ; é tlɛ tunwun hwenu e vǐ tɔn yi mlɔ́ akpá tɔn dó ɔ́ kpó hwenu e é fɔ́n dó ɔ́ kpó ǎ.

³⁶Énɛ́ ɔ́, Lɔ̌ti sín vǐ nyɔ̌nu we lɛ́ɛ mɔ xo nú tɔ́ yětɔn.

³⁷Mɛxó ɔ́ ja vǐ ji gbé bó ji vǐ súnnu ɖokpó, bó sun nyǐ i ɖɔ Mɔwabu. É wɛ nyí Mɔwabunu lɛ́ɛ sín tɔ́gbó. Togun yětɔn kpo ɖo te káká wá jɛ égbé.

³⁸Mɛ kpɛví ɔ́ lɔmɔ̌ ja vǐ ji gbé bó ji vǐ súnnu ɖokpó, bó sun nyǐ i ɖɔ Bɛni-Amíi; é wɛ nyí Amumɔ́ɔ ví lɛ́ɛ sín tɔ́gbó[5]. Togun yětɔn kpo ɖo te káká wá jɛ égbé.