Read fon Bǐbɛ́mɛ 21 Bible Online

Bǐbɛ́mɛ 21 - fon bible

Bǐbɛ́mɛ 21

¹Mawu Mavɔmavɔ wa ɖagbe nú Sala lě e é ɖɔ gbɔn é; é ɖe akpá e é dó n'i é.

² Sala mɔ xo bó ji vǐ súnnu ɖokpó nú Ablaxámu ɖo hwenu e Mawu ɖɔ dó é. Ablaxámu ka ko ɖo kpikpoxɔmɛ hwenɛ́nu.

³Ablaxámu sun nyǐ vǐ e Sala ji n'i ɔ́ ɖɔ Izáki.

⁴ Ée vǐ ɔ́ ɖó azǎn tántɔn ɔ́, Ablaxámu gbo ada n'i lě e Mawu kó ɖɔ gbɔn n'i ɖ'ayǐ é.

⁵Xwe kanwe ko (100) ɖó wɛ Ablaxámu ɖe hwenu e Sala ji Izáki é.

⁶Bɔ Sala ɖɔ: “Mawu dó nǔkiko nú mì; mɛ ɖěbǔ se ɔ́, mɛ ɔ́ ná ko mì.”

⁷Sala lɛ́ ɖɔ: “Ényí mɛ ɖé ɖɔ nú Ablaxámu ɖɔ nyɛ Sala ná ná anɔ̌ vǐ ɔ́, é ná ɖi ǎ. Din ɔ́ ɖíe é ko kpo bǐ bɔ un ji vǐ súnnu ɖokpó n'i e.”

⁸Izáki su bɔ Sala ɖe anɔ̌ n'i. Gbe e gbe é ɖe anɔ̌ n'i ɔ́, Ablaxámu ylɔ́ agɔ̌ ɖaxó ɖokpó.

⁹Sala mɔ vǐ súnnu e Hagáa Ejípunu ɔ́ ji nú Ablaxámu ɔ́ ɖo nǔ ko wɛ,

¹⁰ bó ɖɔ nú Ablaxámu ɖɔ: “Nya mɛsɛntɔ́ nyɔ̌nu élɔ́ tɔ́n kpó vǐ tɔn kpó, ɖó mɛsɛntɔ́ nɛ́ ɔ́ sín vǐ ná ɖu gǔ xá vǐ ce ǎ.”

¹¹Xó énɛ́ ɔ́ e Sala ɖɔ ɔ́ nylá Ablaxámu nukún mɛ ɖésú, ɖó vǐ tɔn wɛ Isimayɛ́li lɔmɔ̌ nyí.

¹² Lo ɔ́, Mawu ɖɔ nú Ablaxámu ɖɔ: “Ma nú xó énɛ́ ɔ́ e è ɖɔ dó vǐ ɔ́ kpó mɛsɛntɔ́ towe nyɔ̌nu ɔ́ kpó wú ɔ́ ní nylá nukún towe mɛ ó. Yǐ gbe nú nǔ e Sala ná byɔ́ we lɛ́ɛ bǐ, ɖó kún e sín akpá un dó nú we ɔ́, Izáki jí wɛ a nǎ gba kún ɔ́ gbɔn.

¹³Un na bo bló mɔ̌ ɔ́, un ná bló akɔta ɖokpó gbɔn mɛsɛntɔ́ towe nyɔ̌nu ɔ́ sín vǐ súnnu lɔmɔ̌ jí, ɖó vǐ towe wɛ é nyí.”

¹⁴Ayǐhɔ́ngbe tɔn ɔ́, Ablaxámu fɔ́n zǎn bó zé nǔɖuɖu, bó wún sin dó anyǔglo mɛ, bó sɔ́ nú Hagáa, bó zé ɖó abɔ̌ta n'i, bó zé vǐ ɔ́ lɔ n'i, bó nya ɛ tɔ́n. Hagáa ka ɖidó, bó ɖo flúflú wɛ ɖo Bɛ̌-Ceva sín gbětótló ɔ́ mɛ.

¹⁵Ée sin e ɖo anyǔglo ɔ́ mɛ ɔ́ vɔ ɔ́, Hagáa jó vǐ ɔ́ dó nyi atínvú ɖé sá,

¹⁶bó yi jínjɔ́n zɔ zaan; è nyi hwǎn ɔ́, fí e é sixú yi jɛ ɔ́ wɛ é ɖe dó vǐ ɔ́. Đó é ɖo ɖiɖɔ wɛ ɖɔ: “Un sixú ɖo vǐ ce kpɔ́n wɛ bɔ é ná kú ǎ.” É jínjɔ́n ayǐ ɖo zɔ zaan, bó sú xó lobo wlí avǐ.

¹⁷Mawu se vǐ ɔ́ sín gbe, bɔ wɛnsagun Mawu tɔn ylɔ́ Hagáa sín jǐxwé bó ɖɔ n'i ɖɔ: “Hagáa, étɛ́ wɛ ɖo wiwa we wɛ? Ma ɖi xɛsi ó, ɖó Mawu se vǐ ɔ́ sín gbe ɖo fí e é ɖe ɔ́.

¹⁸Sí te; zě vǐ ɔ́ bó hɛn ɛ ganjí, ɖó un ná zé e dó bló akɔta ɖaxó ɖokpó.”

¹⁹Bɔ Mawu hun nukún nú Hagáa bɔ é mɔ dotɔ ɖokpó, bó yi wún sin gɔ́ anyǔglo ɔ́, bó ná sin vǐ tɔn.

²⁰Vǐ ɔ́ ɖo susu wɛ, bɔ Mawu ɖo kpɔ́ xá ɛ, bɔ é yi nɔ gbětótló mɛ, bó húzú gǎdatɔ́.

²¹Gbětótló Paláni tɔn ɔ́ mɛ wɛ é nɔ́ bɔ nɔ tɔn da Ejípunu ɖokpó n'i.

²² Hwenɛ́nu ɔ́, Abimɛlɛ́ki wá Ablaxámu gɔ́n, é kpó Pikɔ́lu ahwangán tɔn ɔ́ kpó, bó ɖɔ n'i ɖɔ: “Mawu ɖo kpɔ́ xá we ɖo nǔ e wa wɛ a ɖe lɛ́ɛ bǐ mɛ.

²³Énɛ́ ɔ́ wú ɔ́, xwlé Mawu nú mì ɖo fí din ɖɔ émí kún ná blɛ́ nyɛ kpó vǐ ce lɛ́ɛ kpó, kpódó vǐvú ce lɛ́ɛ kpó ó. Xwlé Mawu nú mì ɖɔ émí ná nyɔ́ xomɛ dó nyɛ kpó to e mɛ a nɔ ɔ́ kpó wú lě e nyɛ nyɔ́ xomɛ dó wǔ towe gbɔn é.”

²⁴Ée é ɖɔ mɔ̌ ɔ́, Ablaxámu ɖɔ: “Un xwlé Mawu nú we.”

²⁵Amɔ̌, Ablaxámu gbɛ́ nǔ nú Abimɛlɛ́ki, ɖó dotɔ e mɛsɛntɔ́ tɔn lɛ́ɛ fán asú bó yí ɔ́ wú.

²⁶Abimɛlɛ́ki ka ɖɔ n'i ɖɔ: “Un ka tunwun mɛ e wa mɔ̌ é ǎ mɛ. Hwi lɔ ka ɖɔ xó ɖěbǔ nú mì ɖ'ayǐ ǎ; sise wɛ jɛ́n un ɖe nɛ́.”

²⁷Énɛ́ ɔ́, Ablaxámu ná gbɔ̌ kpó nyibú kpó Abimɛlɛ́ki, bɔ yě mɛ we lɛ́ɛ nu alɛ.

²⁸Ablaxámu zé gbɔ̌ví asi tɛ́nwe ɖó vo,

²⁹bɔ Abimɛlɛ́ki kanbyɔ́ Ablaxámu ɖɔ: “Nɛ̌ gbɔn bɔ a zě gbɔ̌ví asi tɛ́nwe énɛ́ lɛ́ɛ ɖó vo?”

³⁰Ablaxámu ka yí gbe n'i ɖɔ: “Hwi ɖésú wɛ ná yí gbɔ̌ví tɛ́nwe élɔ́ lɛ́ɛ ɖo alɔ ce mɛ, bɔ é ná xlɛ́ ɖɔ nyɛ wɛ kun dotɔ ɔ́.”

³¹Nǔ e wú è nɔ ylɔ́ tɛn énɛ́ ɔ́ mɛ ɖɔ Bɛ̌-Ceva ɔ́ nɛ́. Bɛ̌-Ceva sín tínmɛ wɛ nyí alɛnutɔ; ɖó fínɛ́ wɛ yě mɛ ɖokpó ɖokpó xwlé Mawu nú yěɖée ɖe.

³²Lě e yě nu alɛ gbɔn ɖo Bɛ̌-Ceva ɔ́ nɛ́. Énɛ́ ɔ́ gúdo ɔ́, Abimɛlɛ́ki sɔ́ nǔ, é kpódó Pikɔ́lu ahwangán tɔn ɔ́ kpó, bɔ yě lɛ́ kɔ yi Filisitɛ́ɛn lɛ́ɛ sín tomɛ.

³³Ablaxámu ka tun atín e è nɔ ylɔ́ ɖɔ tamalisi ɔ́ ɖó Bɛ̌-Ceva, bó nɔ xomlá Mawu Mavɔmavɔ, Mawu tɛgbɛ tɔn ɔ́ sín nyǐkɔ ɖo fínɛ́.

³⁴Ablaxámu nɔ Filisitɛ́ɛn lɛ́ɛ sín tomɛ dɔ̌n ɖésú.