Read fon Bǐbɛ́mɛ 23 Bible Online

Bǐbɛ́mɛ 23 - fon bible

Bǐbɛ́mɛ 23

¹Sala nɔ gbɛ xɔ xwe kantɔn tɛ́nwe (127).

²É kú ɖo Kiliyati-Aaba. Toxo énɛ́ ɔ́ wɛ nyí Eblɔ́n bó ɖo Kanáa yíkúngban jí. Ablaxámu wa asi tɔn sín nǔ lɛ́ɛ, bó ví i.

³É gosín fí e cyɔ ɔ́ ɖe ɔ́, bó yi ɖɔ xó nú Hitíti lɛ́ɛ.

⁴ É ɖɔ nú yě ɖɔ: “Jǒnɔ wɛ un nyí ɖo tɛ́ntin mitɔn. Mi bo ná mì yɔdo ɖé ɖo mi gɔ́n, bónú má sɔ́ asi ce sín cyɔ yi ɖi d'é mɛ.”

⁵Hitíti lɛ́ɛ yí gbe n'i bó ɖɔ:

⁶“Daá, ɖǒtó mǐ. Axɔ́ví Mawu tɔn ɖokpó wɛ a nyǐ ɖo tɛ́ntin mǐtɔn. Đi asi towe dó yɔdo e nyɔ́ hú yɔdo lɛ́ɛ bǐ ɖo yɔdo mǐtɔn lɛ́ɛ mɛ ɔ́ mɛ, mɛ ɖěbǔ ɖo mǐ mɛ bó ná gbɛ́ nú we ɖɔ hwi ní má ɖi mɛ towe dó yɔdo émítɔn mɛ ó ǎ.”

⁷Ablaxámu sí te bó ɖe kɔ́ nú Hitíti e ɖo to ɔ́ mɛ lɛ́ɛ,

⁸bó ɖɔ nú yě ɖɔ: “Ényí mi ná gbe mì ɖɔ má ɖi mɛ ce ɖó fí hǔn, mi bo ɖótó mì, bó ná yi sa vo nú Eflɔ́ni, Soháa ví ɔ́ nú mì,

⁹bónú é ná jó yɔdo tɔn e ɖo sóxo mɛ ɖo Makipela, ɖo gle tɔn tó ɔ́ nú mì. Un ná sú i akwɛ́ nabí e é ɖó ná xɔ é, bɔ é ná nyí yɔdo ce ɖo mitɔn lɛ́ɛ mɛ.”

¹⁰Eflɔ́ni ɖésú ká ɖo yě mɛ fínɛ́ hwenɛ́nu; Hitíti wɛ é lɔmɔ̌ nyí. É yí gbe nú Ablaxámu ɖo nɔví tɔn e wá kplé ɖo toxo ɔ́ sín hɔntogbó jí lɛ́ɛ nukɔn ɖɔ:

¹¹“Éeǒ sɛ́mɛɖó! Đǒtó mì! Un ná we gle ɔ́ kpó yɔdo e ɖo sóxo mɛ é kpó d'é jí. Un ná we nǔ énɛ́ lɛ́ɛ ɖo mɛ ce lɛ́ɛ bǐ nukɔn. Đi asi towe.”

¹²Ablaxámu lɛ́ ɖe kɔ́ ɖo mɛ e ɖo to ɔ́ mɛ lɛ́ɛ bǐ nukɔn,

¹³bó ɖɔ nú Eflɔ́ni ɖo yě bǐ nukɔn ɖɔ: “Đǒtó mì! Kɛnklɛ́n gbɔ nú má sú gle ɔ́ sín axɔ́ we. Yǐ akwɛ́ tɔn ɖo así ce bónú má ɖi asi ce nyi fínɛ́.”

¹⁴Eflɔ́ni ka yí gbe nú Ablaxámu bó ɖɔ:

¹⁵“Sɛ́mɛɖó, ayǐkúngban e è nǎ da kpatágankwɛ́ kilóo ɛnɛ adaɖé mɔ̌ dó xɔ ɔ́, ani wɛ énɛ́ ɔ́ nyí ɖo nyɛ kpó hwi kpó tɛ́ntin? Đi mɛ towe kpowun.”

¹⁶Ablaxámu yí gbe bó da kpatágankwɛ́ kilóo ɛnɛ adaɖé e xó Eflɔ́ni ɖɔ ɖo mɛ bǐ nukɔn ɔ́ n'i. Kpatágankwɛ́ énɛ́ ɔ́ wɛ ɖo to jí hwenɛ́nu.

¹⁷Énɛ́ ɔ́, sín gbe nɛ́ gbe ɔ́, Eflɔ́ni sín gle e ɖo Makipela ɖo Mamulée sín zǎnzǎnhwe jí ɔ́ húzú Ablaxámu tɔn. Gle ɔ́ kpó yɔdo e ɖo sóxo mɛ ɔ́ kpó, kpó atín e ɖo gle ɔ́ jí lɛ́ɛ bǐ kpó

¹⁸húzú Ablaxámu tɔn, ɖo Hitíti e wá kplé ɖo toxo ɔ́ sín hɔntogbó jí lɛ́ɛ nukún mɛ.

¹⁹Énɛ́ ɔ́ gúdo ɔ́, Ablaxámu ɖi asi tɔn Sala ɔ́ dó yɔdo ɔ́ mɛ ɖo Makipela, ɖo Mamulée kpá. Toxo énɛ́ ɔ́ wɛ nyí Eblɔ́n ɖo Kanáa yíkúngban jí.

²⁰Gle ɔ́ kpó yɔdo e ɖo sóxo mɛ ɔ́ kpó sɔ́ nyí Hitíti lɛ́ɛ tɔn ǎ; yě ná gbe bɔ é húzú Ablaxámu tɔn, bɔ é ná nɔ ɖi cyɔ tɔn lɛ́ɛ nyi jí.