Read fon Bǐbɛ́mɛ 26 Bible Online

Bǐbɛ́mɛ 26 - fon bible

Bǐbɛ́mɛ 26

¹Adɔ ɖěvo lɛ́ tɔ́n ɖo to ɔ́ mɛ, ɖo éé tɔ́n ɖo Ablaxámu hwenu ɔ́ gúdo, bɔ Izáki yi axɔ́sú Filisitɛ́ɛn lɛ́ɛ tɔn Abimɛlɛ́ki gɔ́n ɖo Geláa.

²Mawu Mavɔmavɔ tɔ́n dó jǐ tɔn, bó ɖɔ n'i ɖɔ: “Ma yi Ejípu ó; to e xó un ná ɖɔ nú we ɔ́ mɛ wɛ a nǎ nɔ.

³ Nɔ to élɔ́ mɛ fí; un ná nɔ kpɔ́ xá we, bó ná xo ɖɛ dó jǐ towe, ɖó hwi kpó kúnkan towe lɛ́ɛ kpó wɛ un ná ayǐkúngban élɔ́ bǐ, bɔ akpá e un dó nú tɔ́ towe Ablaxámu, bó xwlé nyɛ ɖésú d'é jí ɔ́, un ná ɖe.

⁴Un ná bló bɔ kúnkan towe ná sukpɔ́ sunví e ɖo jǐnukúnsin lɛ́ɛ ɖɔhun. Un ná ná ayǐkúngban élɔ́ bǐ kúnkan towe lɛ́ɛ, bó ná xo ɖɛ dó akɔta e ɖo ayǐkúngban jí lɛ́ɛ bǐ jí gbɔn yě jí.

⁵Đó Ablaxámu se tónú nú mì; é xwedó nǔ e un ɖɔ lɛ́ɛ; é bló nǔ e un zɔ́n lɛ́ɛ; é xwedó tito ce lɛ́ɛ; é nyi sɛ́n ce lɛ́ɛ.”

⁶Énɛ́ ɔ́, Izáki cí Geláa.

⁷ Nú mɛ e ɖo fínɛ́ lɛ́ɛ kan nǔ byɔ́ ɛ dó asi tɔn wú ɔ́, é nɔ́ ɖɔ nú yě ɖɔ nɔví émítɔn wɛ, ɖó é ɖo xɛsi ɖi wɛ ɖɔ nú émí ɖɔ nú yě ɖɔ asi émítɔn wɛ ɔ́, yě táá hu émí, ɖó Hlebeka nyɔ́ ɖɛkpɛ ɖésú.

⁸Ée Izáki ka ɖo to ɔ́ mɛ bɔ é lín ɔ́, é wá ɖo ayihún da xá asi tɔn wɛ gbe ɖokpó, bɔ axɔ́sú Filisitɛ́ɛn lɛ́ɛ tɔn Abimɛlɛ́ki mɔ ɛ gbɔn flɛtɛ́li nu.

⁹Bɔ Abimɛlɛ́ki ylɔ́ Izáki bó ɖɔ n'i ɖɔ: “Hǔn nyɔ̌nu ɔ́, asi towe wɛ! Bɔ a ka ɖɔ nɔví émítɔn wɛ.” Bɔ é yí gbe n'i ɖɔ: “Un ɖɔ mɔ̌, ɖó un ɖo xɛsi ɖi wɛ ɖɔ yě táá hu mì ɖó éyɛ́ wú.”

¹⁰Abimɛlɛ́ki ɖɔ: “Étɛ́ wɛ a wa xá mǐ nɛ́? Kpɛví ɖé wɛ kpo bɔ toví ce lɛ́ɛ ɖě ná kó ɖó xó xá asi towe ɖo to ɔ́ mɛ, bɔ a nǎ kó dɔn mǐ dó hwɛ mɛ.”

¹¹Bɔ Abimɛlɛ́ki ɖe gbeta élɔ́ tɔ́n ɖɔ: “Mɛ ɖěbǔ ɖ'alɔ nya élɔ́ abǐ asi tɔn wú ɔ́, è nǎ hu i.”

¹²Xwe énɛ́ ɔ́ xwe ɔ́, Izáki dó nǔkún ɖo to ɔ́ mɛ, bó ya nǔ e é dó ɔ́ mɔ̌hunkɔtɔn donu kanwe ko, ɖó Mawu Mavɔmavɔ xo ɖɛ dó jǐ tɔn.

¹³Dɔkun ɖo dɔkun jí jɛ n'i wɛ káká bɔ é húzú dɔkunnɔ ɖaxó.

¹⁴É ɖó gbɔ̌ kpó nyibú kpó kɔn nyi kpɔ́, bó ɖó mɛsɛntɔ́ kpɔ́ gégé. Énɛ́ ɔ́, nǔ tɔn jɛ Filisitɛ́ɛn lɛ́ɛ nukún mɛ su jí.

¹⁵Tɔ e tɔ́ tɔn Ablaxámu sín mɛsɛntɔ́ lɛ́ɛ kó kun ɖ'ayǐ hwenu e tɔ́ ɔ́ ɖo gbɛ lɛ́ɛ ɔ́, Filisitɛ́ɛn lɛ́ɛ bɛ́ kɔ́ dó sú bǐ.

¹⁶Énɛ́ ɔ́, Abimɛlɛ́ki ɖɔ nú Izáki ɖɔ: “Gosín to mǐtɔn mɛ, ɖó a hǔ gǎn mǐ dín.”

¹⁷Bɔ Izáki gosín fínɛ́, bó yi ɖó gɔnu ɖó tɔdo Geláa tɔn ɔ́ mɛ, bó nɔ fínɛ́.

¹⁸Bɔ tɔ e tɔ́ tɔn Ablaxámu kun hwenu e é ɖo gbɛ bɔ Filisitɛ́ɛn lɛ́ɛ sú ɖo kú tɔn gúdo lɛ́ɛ ɔ́, é vɔ́ bǐ kun. Nyǐkɔ e tɔ́ tɔn kó ɖó nú tɔ énɛ́ lɛ́ɛ ɖ'ayǐ ɔ́ jɛ́n é nɔ́ lɛ́ ylɔ́ yě.

¹⁹Mɛsɛntɔ́ Izáki tɔn lɛ́ɛ lɛ́ kun tɔ ɖokpó dó tɔdo ɔ́ mɛ, bó mɔ sin ɖ'é mɛ, bɔ sin ɔ́ nɔ́ sa.

²⁰Lɛ̌ngbɔ́nyitɔ́ Geláa tɔn lɛ́ɛ ká wá jɛ nǔ dɔn xá lɛ̌ngbɔ́nyitɔ́ Izáki tɔn lɛ́ɛ jí ɖɔ émítɔn wɛ nyí sin ɔ́, bɔ Izáki ɖó nyǐkɔ nú tɔ ɔ́ ɖɔ: “Esɛ́ki” tínmɛ tɔn wɛ nyí “adɔn”, ɖó yě dɔn nǔ xá ɛ.

²¹Mɛsɛntɔ́ Izáki tɔn lɛ́ɛ lɛ́ kun tɔ ɖěvo; yě lɛ́ dɔn nǔ xá ɛ ɖó tɔ énɛ́ ɔ́ lɔ wú, bɔ é ɖó nyǐkɔ nú tɔ ɔ́ ɖɔ “Sitina”; tínmɛ tɔn wɛ nyí “zalili”.

²²Énɛ́ ɔ́ wú wɛ é gosín fínɛ́, bó lɛ́ kun tɔ ɖěvo. È sɔ́ dɔn nǔ xá ɛ ɖo tɔ énɛ́ ɔ́ kɔn ǎ, bɔ é ɖó nyǐkɔ nú tɔ ɔ́ ɖɔ “Hlexɔvɔ́ti”; tínmɛ tɔn wɛ nyí “Tɛnmɛ”; ɖó é ɖɔ: “Mawu Mavɔmavɔ ná tɛnmɛ mǐ ɖo fí lo, bɔ nǔ e wa wɛ mǐ ɖe lɛ́ɛ ná yi nukɔn ɖo to ɔ́ mɛ.”

²³É wá gosín fínɛ́ bó yi Bɛ̌-Ceva.

²⁴Mawu Mavɔmavɔ tɔ́n dó jǐ tɔn zǎn mɛ bó ɖɔ n'i ɖɔ: “Mawu tɔ́ towe Ablaxámu tɔn wɛ un nyí; ma ɖi xɛsi ó, ɖó un ɖo kpɔ́ xá we; un ná xo ɖɛ dó jǐ we, bó ná bló bɔ kúnkan towe ná sukpɔ́ ɖó mɛsɛntɔ́ ce Ablaxámu wú.”

²⁵Ée Mawu Mavɔmavɔ ɖɔ mɔ̌ ɔ́, é mɛ vɔ̌sákpe ɖokpó nyi fínɛ́, bó xomlá Mawu Mavɔmavɔ, bó dó goxɔ tɔn ɖó fínɛ́; bɔ mɛsɛntɔ́ tɔn lɛ́ɛ jɛ dotɔ ɖokpó kun jí ɖó fínɛ́.

²⁶ É su gbe ɖokpó, bɔ Abimɛlɛ́ki gosín Geláa wá gɔ̌n tɔn, é kpódó xɔ́ntɔn tɔn Ahuzáti kpó, kpódó ahwangán tɔn Pikɔ́lu kpó.

²⁷Izáki kanbyɔ́ yě ɖɔ: “Aniwú mi wá gɔ̌n ce? Mi ɖíe gbɛ́ wǎn nú mì bó nya mì sín gɔ̌n mitɔn e.”

²⁸Bɔ yě yí gbe n'i ɖɔ: “Mǐ mɔ ɖɔ Mawu Mavɔmavɔ ɖo kpɔ́ xá we; énɛ́ ɔ́ wú wɛ mǐ ɖɔ mǐ ná xwlé nǔ ɖo mǐɖée tɛ́ntin, bɔ hwi kpó mǐ kpó ná nu alɛ.

²⁹Énɛ́ ɔ́, a nǎ wa nǔ nyanya ɖěbǔ xá mǐ ǎ, lě e mǐ lɔ ma dó tagba nú we ǎ, bó wa ɖagbe kɛ́ɖɛ́ nú we, lobo jó we dó bɔ a wa yi dó fífá mɛ ɔ́ ɖɔhun. Égbé din ɔ́, Mawu Mavɔmavɔ ka xo ɖɛ dó jǐ we.”

³⁰Izáki ylɔ́ agɔ̌ ɖokpó ɖó ta yětɔn mɛ, bɔ yě ɖu nǔ bó nu ahan.

³¹Yě fɔ́n zǎnzǎn tɛɛn bó xwlé nǔ nú yěɖée. Bɔ Izáki nyi yě, bɔ yě yi dó fífá mɛ.

³²Gbe énɛ́ ɔ́ gbe ɖokpó ɔ́, mɛsɛntɔ́ Izáki tɔn lɛ́ɛ wá ɖɔ tɔ e kun wɛ yě ɖe ɔ́ sín xó n'i ɖɔ: “Mǐ mɔ sin”.

³³É ɖó nyǐkɔ nú tɔ ɔ́ ɖɔ: “Civɛa”; tínmɛ tɔn wɛ nyí “È xwlé nǔ”. Énɛ́ ɔ́ wú wɛ è nɔ ylɔ́ toxo ɔ́ ɖɔ Bɛ̌-Ceva káká wá jɛ égbé. Bɛ̌-Ceva sín tínmɛ wɛ nyí “tɔ”.

³⁴Esawu ɖó xwe kanɖé (40) bó da asi we. É da Yexuditi, Beeli sín vǐ kpódó Basimáti, Elɔ́ni sín vǐ ɔ́ kpó. Nyɔ̌nu we lɛ́ɛ bǐ wɛ jɔ ɖo Hitíti kún mɛ.

³⁵Nyɔ̌nu énɛ́ lɛ́ɛ e Esawu da ɔ́ nyí akpɔ nú Izáki kpó Hlebeka kpó.