Read fon Bǐbɛ́mɛ 28 Bible Online

Bǐbɛ́mɛ 28 - fon bible

Bǐbɛ́mɛ 28

¹Énɛ́ ɔ́, Izáki ylɔ́ Jakɔ́bu bó xo ɖɛ dó jǐ tɔn, bó gbɛ́ n'i ɖɔ: “Ma da Kanáanu ɖě ó.

²Yi Mɛzopotamíi taligbé tɔn, ɖo nɔ towe tɔ́ Betuwɛ́li xwé, bó da asi ɖo dɔ̌n. A nǎ da nɔ towe nɔví Labáan ví nyɔ̌nu ɖokpó.

³Mawu Nǔbǐwúkpétɔ́ ɔ́ ní xo ɖɛ dó jǐ towe; ní bló bónú a nǐ ji bó gba kún. A nǐ nyí tɔ́gbó nú togun wɔ̌buwɔ́bú.

⁴ Đɛ e Mawu xo dó Ablaxámu jí ɔ́ ní nɔ hwi kpódó vǐ towe lɛ́ɛ kpó jí, bónú to e é ná Ablaxámu ɔ́, to énɛ́ e mɛ a ɖo jǒnɔ nyí ɖe wɛ din ɔ́ ní nyí towe.”

⁵Ée Izáki ɖɔ mɔ̌ ɔ́, é sɛ́ Jakɔ́bu dó, bɔ é ɖidó Labáan gɔ́n ɖo Mɛzopotamíi taligbé tɔn. Labáan ɔ́, Betuwɛ́li ví wɛ é nyí. Betuwɛ́li ka nyí Alamunu, bɔ Labáan nyí Hlebeka nɔví. Hlebeka ɔ́ wɛ nyí Jakɔ́bu kpódó Esawu kpó sín nɔ.

⁶Esawu mɔ ɖɔ Izáki xo ɖɛ dó Jakɔ́bu jí, bó sɛ́ ɛ dó Mɛzopotamíi taligbé tɔn, bɔ é ná yi da asi ɖo dɔ̌n, bɔ ée é ɖo ɖɛ xo dó jǐ tɔn wɛ ɔ́, é gbɛ́ n'i ɖɔ ní má da Kanáanu lɛ́ɛ ɖě ó.

⁷É lɔmɔ̌ mɔ ɖɔ Jakɔ́bu se tónú nú tɔ́ tɔn kpódó nɔ tɔn kpó, bó yi Mɛzopotamíi taligbé tɔn.

⁸Énɛ́ ɔ́, Esawu mɔ nukúnnú jɛ wú ɖɔ tɔ́ émítɔn Izáki gbɛ́ wǎn nú Kanáanu lɛ́ɛ.

⁹Énɛ́ ɔ́ wú ɔ́, é yi Ablaxámu ví Isimayɛ́li gɔ́n, bó da vǐ tɔn Maxaláti, Nɛbayɔ́ti nɔví ɔ́ gɔ́ nú asi e é kó da ɖ'ayǐ lɛ́ɛ.

¹⁰Jakɔ́bu gosín Bɛ̌-Ceva bó ɖidó Haláani.

¹¹É wá jɛ fí ɖé bó dɔ́ fí ɔ́, ɖó hwe ko yi xɔ. É zé awǐnnya e ɖo fínɛ́ lɛ́ɛ ɖokpó, bó ɖó kɔ bó dɔ́ fínɛ́.

¹² É kú dlɔ̌; é ná mɔ nǔɖé ɔ́, é mɔ alyá ɖokpó ɖo te, bó gosín kɔ́ mɛ káká yi sɔ́ jǐnukúnsin. Kpowun ɔ́, wɛnsagun Mawu tɔn lɛ́ɛ nɔ́ ɖo alyá ɔ́ jí gbɔn yi jǐ wɛ, bó nɔ́ ɖo te jɛ wɛ.

¹³ Bɔ Mawu Mavɔmavɔ nɔ alyá ɔ́ sín aga, bó ɖɔ: “Mawu Mavɔmavɔ wɛ un nyí; Mawu tɔ́gbó towe Ablaxámu tɔn wɛ un nyí, Mawu Izáki tɔn wɛ un nyí. Un ná ná ayǐkúngban e jí a mlɔ̌ ɔ́ hwi kpó vǐ towe lɛ́ɛ kpó.

¹⁴ Vǐ towe lɛ́ɛ ná sukpɔ́ kɔ́gúdu ɖɔhun. Yě ná gba kpé ayǐkúngban ɔ́ jí sín zǎnzǎnhwe jí káká yi gbadahwe jí; sín totaligbé wá tofɔligbé, bɔ un ná xo ɖɛ dó akɔta e ɖo ayǐkúngban jí lɛ́ɛ bǐ jí, gbɔn hwi kpódó vǐ towe lɛ́ɛ kpó jí.

¹⁵Đǒtó ganjí. Nyi ɖésú ɖo kpɔ́ xá we; un ná kpé nukún wǔ we gbɔn fí e a nǎ gbɔn lɛ́ɛ bǐ, bó ná lɛ́ kplá we wá to élɔ́ mɛ. Un ná jó we dó ǎ; un ná ɖe akpá e un dó nú we ɔ́ bǐ.”

¹⁶Ée Jakɔ́bu fɔ́n sín amlɔ mɛ ɔ́, é ɖɔ: “Mawu Mavɔmavɔ ɖo tɛn élɔ́ mɛ dandan, bɔ nyɛ ka tunwun ɖ'ayǐ ǎ.”

¹⁷Xɛsi ɖi i, bɔ é ɖɔ: “Tɛn élɔ́ mɛ dó xɛsi ɖésú; é ná nyí nǔɖé zɛ xwé Mawu tɔn kpó sɛ́xwé hɔn kpó wú ǎ.”

¹⁸Jakɔ́bu fɔ́n zǎn, bó zé awǐnnya e é ɖó kɔ ɔ́ tun te, bó dó bló awǐnnya e è nǎ nɔ́ sɛn é, bó kɔn ami d'é jí.

¹⁹É sun nyǐ tɛn ɔ́ mɛ ɖɔ Betɛ́li; tínmɛ tɔn wɛ nyí “Xwé Mawu tɔn”. Lǔzi wɛ toxo ɔ́ ká nɔ́ nyí ɖ'ayǐ.

²⁰Ée Jakɔ́bu bló mɔ̌ ɔ́, é d'akpá ɖɔ: “Ényí Mawu nɔ kpɔ́ xá mì ɔ́, nú é kpé nukún wǔ ce ɖo ali jí ɔ́, ényí é ná nǔɖuɖu mì bó ná nǔ e un ná dó ɔ́ mì ɔ́,

²¹ényí un lɛ́ kɔ wá tɔ́ ce xwé wǔyɛ́yɛ́ afɔyɛ́yɛ́ ɔ́, Mawu Mavɔmavɔ ná nyí Mawu ce.

²²Awǐnnya élɔ́ e un sɔ́ tun te dó bló awǐnnya e è nǎ nɔ́ sɛn ɔ́ ná nyí Mawu xwé.” Bɔ é ɖɔ nú Mawu ɖɔ: “Nǔ e a nǎ ná mì lɛ́ɛ ɔ́, un ná ná we bǐ sín mǎɖówǒ.”