Read fon Bǐbɛ́mɛ 33 Bible Online

Bǐbɛ́mɛ 33 - fon bible

Bǐbɛ́mɛ 33

¹Jakɔ́bu zé ta bo mɔ Esawu sɛ́ dó, bɔ gbɛtɔ́ afɔwe (400) ɖo gǔdo tɔn. Énɛ́ ɔ́, Jakɔ́bu má vǐ lɛ́ɛ. É bɛ́ vǐ e Lěya ji lɛ́ɛ nú Lěya, bó bɛ́ ée Hlacɛ́li ji lɛ́ɛ nú Hlacɛ́li, bó bɛ́ ée mɛsɛntɔ́ we lɛ́ɛ ji lɛ́ɛ nú yě mɛ ɖokpó ɖokpó.

²É bɛ́ mɛsɛntɔ́ we lɛ́ɛ kpó vǐ yětɔn lɛ́ɛ kpó ɖó nukɔn, bɔ Lěya kpó vǐ tɔn lɛ́ɛ kpó bɔ dó yě wǔ, bɔ Hlacɛ́li kpódó Jozɛ́fu kpó ɖo gǔdo.

³É ɖésúnɔ jɛ nukɔn nú yě, bó ɖo kɔ́ ɖe wɛ káká yi fofó tɔn gɔ́n. Azɔn tɛ́nwe wɛ é ɖe kɔ́ ɔ́.

⁴Esawu ka kán wezun yi kpé e, bó zunfán ɛ, bó kplá así kɔ n'i, bó kí si n'i, bɔ yě mɛ we lɛ́ɛ bɛ́ avǐ.

⁵Esawu zé ta bo mɔ nyɔ̌nu lɛ́ɛ kpó vǐ yětɔn lɛ́ɛ kpó, bó kanbyɔ́ Jakɔ́bu ɖɔ: “Mɛ̌ ká nyí mɛ élɔ́ lɛ́ɛ?” Bɔ Jakɔ́bu yí gbe n'i ɖɔ: “Vǐ e Mawu jɔwǔ mì, bó ná nyɛ mɛsɛntɔ́ towe ɔ́ lɛ́ɛ wɛ.”

⁶Mɛsɛntɔ́ nyɔ̌nu lɛ́ɛ kpó vǐ yětɔn lɛ́ɛ kpó sɛ wá, bó ɖe kɔ́.

⁷Lěya lɔ kpó vǐ tɔn lɛ́ɛ kpó sɛ wá, bó ɖe kɔ́. Jozɛ́fu kpó Hlacɛ́li kpó wá sɛ wá bó ɖe kɔ́.

⁸Bɔ Esawu kanbyɔ́ Jakɔ́bu ɖɔ: “Kanlin tobutóbú e un kpé nɛ́ lɛ́ɛ ɔ́, étɛ́ ná dó wa ná wɛ a ɖe?” Bɔ Jakɔ́bu yí gbe n'i ɖɔ: “Mɛɖaxó ce, hwi wɛ un hɛn wá ná, bónú a nǎ nyɔ́ xomɛ dó wǔ ce.”

⁹Bɔ Esawu ɖɔ n'i ɖɔ: “Nɔví ce, nǔ e un ɖó lɛ́ɛ kpé mì kpo. Hɛn towe lɛ́ɛ.”

¹⁰Bɔ Jakɔ́bu yí gbe n'i ɖɔ: “Éeǒ! Kɛnklɛ́n, a nyɔ̌ xomɛ dó wǔ ce nǔgbó hǔn, yǐ nǔ e un hɛn wá nú we lɛ́ɛ. Mɔ e un wá mɔ we ɔ́ cí Mawu wɛ un mɔ ɖɔhun. A yǐ mì tawun.

¹¹Hǔn bo yí nǔ e è hɛn wá nú we lɛ́ɛ, ɖó Mawu jɔwǔ mì ɖésú, bɔ nǔ ɖěbǔ hwedó mì ǎ.” Jakɔ́bu jɛ kɔ nú Esawu káká bɔ é gbɔ bó yí nǔ lɛ́ɛ,

¹²bó ɖɔ nú Jakɔ́bu ɖɔ: “Wǎ mǐ yi; mǐ ní jɛ ali. Un ná nɔ nukɔn nú we.”

¹³Jakɔ́bu yí gbe n'i ɖɔ: “Mɛɖaxó ce, a tunwun ɖɔ vǐ lɛ́ɛ ɔ́, kɛ́ɖɛ́ kɛ́ɖɛ́ wɛ è nɔ hɛn yě. Un ka lɛ́ ɖó gbɔ̌ví kpó nyibúví kpó, bɔ yě kpo ɖo anɔ̌ nu. È zun zɔnlin dó yě jí syɛ́nsyɛ́n mɔ̌ nú kéze ɖokpó ɔ́, yě bǐ ná kú.

¹⁴Hǔn mɛɖaxó ce! Bo zɔn mǐ yi, bónú nyɛ mɛsɛntɔ́ towe ná xwedó zɔnlin yětɔn, bó ná zɔn dɛ̌dɛ̌ xá yě, káká wá hwi mɛɖaxó ce xwé ɖo Seyíi.”

¹⁵Esawu ɖɔ: “Un jló ɖɔ má jó mɛ ce lɛ́ɛ ɖě dó nú we.” Bɔ Jakɔ́bu yí gbe n'i ɖɔ: “Mɛɖaxó ce, étɛ́wú wɛ a ka ná bló mɔ̌? Vɛ̌ kó jɔwǔ mì kpowun!”

¹⁶Gbe nɛ́ gbe ɖokpó ɔ́, Esawu wlí ali ɖidó Seyíi,

¹⁷bɔ Jakɔ́bu ka ɖidó Sukɔ́tu. É gbá xɔ ɖokpó nú é ɖésúnɔ, bó dó azava nú kanlin tɔn lɛ́ɛ. Énɛ́ ɔ́ wú wɛ é ɖó nyǐkɔ nú tɛn énɛ́ ɔ́ mɛ ɖɔ Sukɔ́tu. Tínmɛ tɔn wɛ nyí azava lɛ́ɛ.

¹⁸Ée Jakɔ́bu lɛ́ kɔ sín Mɛzopotamíi taligbé tɔn ɔ́, é wá Sikɛ́mu ɖo Kanáa, wǔyɛ́yɛ́ afɔyɛ́yɛ́. É ɖó gɔnu ɖó toxo ɔ́ nukɔn.

¹⁹ É xɔ ayǐkúngban e jí é dó goxɔ tɔn nyi ɔ́ ɖo Hamɔ́ɔ ví lɛ́ɛ sí. Tɔ́ yětɔn wɛ ɖó Sikɛ́mu toxo ɔ́ ayǐ. Gankwɛ́ kanwe ko (100) wɛ é xɔ ayǐkúngban ɔ́ yí.

²⁰É mɛ vɔ̌sákpe ɖokpó nyi fínɛ́, bó sun nyǐ ɖɔ Ɛli-Elohe-Izlayɛ́li. Tínmɛ tɔn wɛ nyí Mawu, Mawu Izlayɛ́li tɔn.