Read fon Bǐbɛ́mɛ 34 Bible Online

Bǐbɛ́mɛ 34 - fon bible

Bǐbɛ́mɛ 34

¹Vǐ nyɔ̌nu e Lěya ji nú Jakɔ́bu bɔ é nɔ́ nyí Dina ɔ́, xwe gbɛ̌ tɔn e ɖo to ɔ́ mɛ lɛ́ɛ ba kpɔ́n gbé gbe ɖokpó.

²Bɔ Sikɛ́mu mɔ ɛ, bó xo e sɔ́, bó hwlɛ́n kan xá ɛ, bó gbá vɔ n'i. Sikɛ́mu ɔ́, Hamɔ́ɔ e nyí Hivíti lɛ́ɛ sín gǎn ɔ́ sín vǐ wɛ.

³Ayi tɔn bǐ ɖo Dina Jakɔ́bu ví ɔ́ wú. É yí wǎn n'i, bɔ wǎn e é yí n'i ɔ́ nɔ́ ɖo jijɛ jí wɛ, bɔ é nɔ́ ɖo xó ɖagbe ɖagbe ɖɔ n'i wɛ.

⁴Énɛ́ ɔ́, Sikɛ́mu ɖɔ nú tɔ́ tɔn Hamɔ́ɔ ɖɔ ní byɔ́ vǐ ɔ́ nú émí, bónú émí ná da.

⁵Jakɔ́bu se ɖɔ è gbǎ avɔ nú vǐ émítɔn Dina ɔ́. Vǐ tɔn súnnu lɛ́ɛ ká kplá kanlin tɔn lɛ́ɛ yi amagbomɛ hwenɛ́nu. Énɛ́ ɔ́, é ɖɔ xó ɖě ǎ káká bɔ yě lɛ́ kɔ wá xwé gbe.

⁶Hamɔ́ɔ Sikɛ́mu sín tɔ́ ɔ́ yi Jakɔ́bu gɔ́n, bó ná ɖɔ xó n'i.

⁷Jakɔ́bu ví lɛ́ɛ kplá kanlin lɛ́ɛ sín amagbo mɛ ja xwé gbe, bó se nǔ e jɛ é, bɔ ahwi xo yě. Xomɛ sin yě ɖésú, ɖó xó e Sikɛ́mu ɖó xá Jakɔ́bu ví ɔ́, hɛ̌nnú wɛ é wa; è nɔ bló mɔ̌ ɖo Izlayɛ́li ǎ.

⁸Hamɔ́ɔ ɖɔ xó xá yě bó ɖɔ nú yě ɖɔ: “Vǐ ce Sikɛ́mu yí wǎn nú vǐ mitɔn; é yí wǎn n'i ɖésú; mi kɛnklɛ́n bó ná ɛ, bónú é ná da.

⁹Mǐ nǎ jɛ akɔ; mi ná nɔ́ ná vǐ mitɔn lɛ́ɛ mǐ bɔ mǐ ná nɔ́ da, bɔ mǐdɛɛ lɛ́ɛ ná nɔ́ ná mǐtɔn lɛ́ɛ e mi, bɔ mi ná nɔ́ da.

¹⁰Mi ná nɔ akpá mǐtɔn; to ɔ́ ɖo wɛn nú mi; mi ná nɔ fí, bó ná wa ajɔ̌, bó ná ɖó nǔkan.”

¹¹Sikɛ́mu ɔ́ ka ɖɔ nú Dina sín tɔ́ kpó Dina sín nɔví lɛ́ɛ kpó ɖɔ: “Ényí mi byɔ́ nǔɖé mì bó ná dó jɔwǔ mì ɔ́, un ná ná mi.

¹²Mi byɔ́ agban mì, bónú é ní tlí, mi byɔ́ nǔ gěgé mì. Un ná ná nǔ e mi ná byɔ́ ɔ́ bǐ. Mi ní vɛ́ kó ná vǐ ɔ́ mì nú má da.”

¹³Lo ɔ́, ée Sikɛ́mu ko dó winnyá Jakɔ́bu ví súnnu lɛ́ɛ sín nɔví Dina ɔ́, yě sɔ́ sísɛ́ ɖó nukɔn dó yí gbe nú Sikɛ́mu kpódó tɔ́ tɔn Hamɔ́ɔ kpó.

¹⁴Yě ɖɔ nú yě ɖɔ: “Mǐ sixú da nɔví mǐtɔn nú mɛ e ma gbo ada ǎ é ǎ, ɖó winnyá wɛ é ná nyí nú mǐ.

¹⁵Nǔ e mi ná bló bɔ mǐ ná yí gbe nú xó mitɔn ɔ́ ɖíe; súnnu e ɖo mi mɛ lɛ́ɛ bǐ ná gbo ada mǐ ɖɔhun.

¹⁶Énɛ́ ɔ́, mǐ ná ná vǐ mǐtɔn lɛ́ɛ mi, bɔ mi ná da, bɔ mi lɔ ná ná vǐ mitɔn lɛ́ɛ mǐ bɔ mǐ ná da. Mǐ ná nɔ akpá mitɔn, bɔ mǐ ná kplé bó nyí togun ɖokpó.

¹⁷Nú mi ma ka se xó mǐtɔn bó gbo ada ǎ ɔ́, mǐ ná kplá vǐ mǐtɔn bó ɖidó.”

¹⁸Ée yě ɖɔ mɔ̌ ɔ́, Hamɔ́ɔ kpódó vǐ tɔn Sikɛ́mu kpó yí gbe nú xó yětɔn.

¹⁹Nyaví ɔ́ ká sɔ́ ɖó adagbigbo xó ɔ́ te ǎ, ɖó é yí wǎn nú Jakɔ́bu ví ɔ́ ɖésú; é wɛ è ka nɔ sí hú mɛ bǐ ɖo tɔ́ tɔn xwé.

²⁰Hamɔ́ɔ kpó vǐ tɔn Sikɛ́mu kpó yi toxo ɔ́ sín hɔntogbó jí, bó kplé mɛ yětɔn lɛ́ɛ, bó ɖɔ nú yě ɖɔ:

²¹“Jakɔ́bu kpó mɛ tɔn lɛ́ɛ kpó ɔ́, mɛɖé wɛ yě nyí bó nyɔ́ xomɛ dó mǐ wú; yě ní nɔ to ɔ́ mɛ bó wa ajɔ̌; to ɔ́ gbló ganjí, bɔ yě ná mɔ tɛn ɖ'é mɛ. Mǐ nǎ nɔ́ da vǐ yětɔn nyɔ̌nu lɛ́ɛ, bɔ yě lɔ ná nɔ́ da mǐtɔn lɛ́ɛ.

²²Lo ɔ́, cóbónú yě ná yí gbe bó nɔ akpá mǐtɔn, bɔ mǐ ná bló togun ɖokpó ɔ́, nǔ ɖokpó tíin bɔ mǐ ná to bló hwɛ̌; é wɛ nyí ɖɔ súnnu e ɖo mǐ mɛ lɛ́ɛ ɖó ná gbo ada yě ɖésúnɔ ɖɔhun.

²³Ényí mǐ bló nǔ e yě byɔ́ mǐ, cóbó ná sixú nɔ akpá mǐtɔn ɔ́, kanlin yětɔn lɛ́ɛ kpó dɔkun yětɔn lɛ́ɛ bǐ kpó ma ná nyí mǐtɔn a?”

²⁴Mɛ e wá kplé ɖo tɛn ɔ́ mɛ lɛ́ɛ bǐ yí gbe nú xó e Hamɔ́ɔ kpódó vǐ tɔn Sikɛ́mu kpó ɖɔ ɔ́, bɔ súnnu e ɖo yě mɛ, bó wá fínɛ́ lɛ́ɛ bǐ gbo ada.

²⁵Azǎn tɔn atɔngɔ́ ɔ́ gbe, gbe e gbe ada ɔ́ ɖo nǔ wa xá yě wɛ ganjí ɔ́, Jakɔ́bu ví súnnu we, Sinmɛnyɔ́ɔ kpódó Levíi kpó sún hwǐ, bó byɔ́ toxo ɔ́ mɛ, bó hu súnnu e ɖo toxo ɔ́ mɛ lɛ́ɛ bǐ; mɛɖé lɛ́n nǔ mɔ̌hunkɔ dó yě wú ǎ. Sinmɛnyɔ́ɔ kpó Levíi kpó ɔ́, Dina sín nɔví wɛ yě nyí.

²⁶Yě hu Hamɔ́ɔ lɔ, kpódó vǐ tɔn Sikɛ́mu kpó, bó kplá Dina sín Sikɛ́mu xɔ mɛ, bó tɔ́n.

²⁷Jakɔ́bu ví súnnu e kpo lɛ́ɛ bɛ́ nǔ e ɖo cyɔ lɛ́ɛ wú lɛ́ɛ bǐ, bó fɔ nǔ e ɖo toxo ɔ́ mɛ lɛ́ɛ bǐ, ɖó è dǒ winnyá nɔví yětɔn.

²⁸Yě bɛ̌ gbɔ̌ yětɔn lɛ́ɛ, bó bɛ́ nyibú yětɔn lɛ́ɛ kpódó tócí yětɔn lɛ́ɛ kpó. Yě bɛ̌ nǔ e ɖo toxo ɔ́ mɛ lɛ́ɛ bǐ kpódó nǔ e ɖo gletoxo mɛ lɛ́ɛ kpó.

²⁹Yě bɛ̌ dɔkun yětɔn lɛ́ɛ bǐ, bó bɛ́ vǐ yětɔn lɛ́ɛ kpó asi yětɔn lɛ́ɛ kpó, bó bɛ́ nǔ e ɖo xwé yětɔn gbe lɛ́ɛ bǐ.

³⁰Énɛ́ ɔ́, Jakɔ́bu ɖɔ nú Levíi kpó Sinmɛnyɔ́ɔ kpó ɖɔ: “Nǔ énɛ́ e mi bló din bɔ un húzú nǔ gbɛ́hɛn nú to ɔ́ mɛ nu lɛ́ɛ, Kanáanu lɛ́ɛ, kpó Pɛliziti lɛ́ɛ kpó ɔ́, kɛn wɛ mi ba nú mì. Yě ná xísí dó mì, bó tɔ́n ahwan mì bo ɖu ɖo jǐ ce, bó sú nyɛ kpódó xwédo ce kpó sín kún dó, ɖó mɛ kwín we ɖé jɛ́n un ɖó.”

³¹Bɔ vǐ lɛ́ɛ yí gbe n'i ɖɔ: “È nǎ wa nǔ xá nɔví mǐtɔn agalɛtɔ́ ɖɔhun mɔ̌ bɔ mǐdɛɛ lɛ́ɛ ná xwɛ wɛ a?”