Read fon Bǐbɛ́mɛ 35 Bible Online

Bǐbɛ́mɛ 35 - fon bible

Bǐbɛ́mɛ 35

¹ Énɛ́ ɔ́ gúdo ɔ́, Mawu ɖɔ nú Jakɔ́bu ɖɔ: “Sɔ́ nǔ bó yi Betɛ́li, bó nɔ fínɛ́. A nǎ mɛ vɔ̌sákpe ɖokpó ɖó fínɛ́ nú nyɛ Mawu e tɔ́n dó jǐ towe hwenu e a ɖo hinhɔn nú nɔví towe Esawu wɛ é.”

²Bɔ Jakɔ́bu ɖɔ nú xwédo tɔn kpódó mɛ e ɖo kpɔ́ xá ɛ lɛ́ɛ bǐ kpó ɖɔ: “Mi bɛ́ vodún mitɔn lɛ́ɛ bǐ síin. Mi slá wǔ bó ɖyɔ́ awu.

³Mǐ ná sɔ́ nǔ bó ná yi Betɛ́li. Un ná mɛ vɔ̌sákpe ɖokpó nú Mawu ɖó fínɛ́. É wɛ yí ɖɛ ce gbe e gbe adǎn gbo mì é. É wɛ nɔ gǔdo ce bɔ un yi tomɛ bó wá.”

⁴Énɛ́ ɔ́, yě bɛ̌ vodún yětɔn lɛ́ɛ bǐ, kpódó tógbé e ɖo tó yětɔn mɛ lɛ́ɛ bǐ kpó jó nú Jakɔ́bu, bɔ Jakɔ́bu dó bǐ do ɖó cɛ́nitín e ɖo Sikɛ́mu kpá ɔ́ sá.

⁵Énɛ́ ɔ́ gúdo ɔ́, yě ɖidó. Toxo e lɛ́ lɛ̌ dó yě lɛ́ɛ jɛ xɛsi ɖi nú Mawu jí; énɛ́ ɔ́, mɛɖé sɔ́ jɛ Jakɔ́bu ví lɛ́ɛ gbé mɛ ǎ.

⁶Jakɔ́bu kpódó mɛ e kpó é kpó zɔn lɛ́ɛ bǐ kpó wá Lǔzi. Lǔzi ɔ́ wɛ ɖo Betɛ́li nyí wɛ ɖo Kanáa tomɛ.

⁷É mɛ vɔ̌sákpe ɖokpó ɖó fínɛ́, bó sun nyǐ tɛn énɛ́ ɔ́ mɛ ɖɔ: “Ɛli-Betɛ́li”. Ɛli-Betɛ́li sín tínmɛ wɛ nyí “Mawu Betɛ́li tɔn”, ɖó fínɛ́ wɛ Mawu tɔ́n dó jǐ tɔn ɖe hwenu e é ɖo hinhɔn nú nɔví tɔn wɛ é.

⁸Debola kú bɔ è ɖi i ɖó cɛ́nitín ɖé sá, ɖo Betɛ́li sín afɔligbé, bó nɔ́ ylɔ́ atín ɔ́ ɖɔ avǐcɛ́nitín. Debola wɛ nɔ ná anɔ̌ Hlebeka.

⁹Ée Jakɔ́bu lɛ́ kɔ sín Mɛzopotamíi taligbé tɔn ɔ́, Mawu lɛ́ tɔ́n dó jǐ tɔn, bó xo ɖɛ dó jǐ tɔn,

¹⁰ bó ɖɔ n'i ɖɔ: “Jakɔ́bu wɛ a nɔ nyí; amɔ̌, din ɔ́, è sɔ́ nǎ nɔ́ ylɔ́ we ɖɔ mɔ̌ ǎ; Izlayɛ́li wɛ a nǎ nɔ́ nyí.” Lě e Mawu sun nyǐ i ɖɔ Izlayɛ́li gbɔn ɔ́ nɛ́.

¹¹ Mawu lɛ́ ɖɔ n'i ɖɔ: “Mawu Nǔbǐwúkpétɔ́ wɛ un nyí. Ji bó gba kún. Vǐ towe lɛ́ɛ ná sukpɔ́ káká bó ná nyí akɔta ɖokpó. Akɔta wɔ̌buwɔ́bú wɛ yě ná tlɛ nyí, lobɔ axɔ́sú ná tɔ́n ɖo vǐ towe lɛ́ɛ mɛ.

¹²Un ná ná we to e un ná Ablaxámu kpódó Izáki kpó ɔ́, bó ná ná vǐ e ná nɔ do towe mɛ lɛ́ɛ.”

¹³Ée Mawu ɖɔ xó nú Jakɔ́bu gúdo ɔ́, é gosín fí e é ɖɔ xó n'i ɖe é.

¹⁴ Bɔ Jakɔ́bu sɔ́ awǐnnya ɖokpó tun te fí e Mawu ɖɔ xó n'i ɖe ɔ́, bó kɔn vɛ̌ɛn kpó ami kpó d'é jí.

¹⁵Jakɔ́bu sun nyǐ fí e Mawu tɔ́n dó jǐ tɔn ɖe ɔ́ ɖɔ Betɛ́li.

¹⁶Énɛ́ ɔ́ gúdo ɔ́, Jakɔ́bu kpó hɛ̌nnu tɔn kpó gosín Betɛ́li ɖidó. Fí e yě kpo ɖe dó Efláta ɔ́ hwe ǎ, bɔ Hlacɛ́li ji vǐ. Vǐjiji ɔ́ syɛ́n dó e.

¹⁷Hwenu e vǐnú ɖo wiwa ɛ wɛ ɔ́, nyɔ̌nu e ɖo aji n'i ɔ́ nɔ́ ɖɔ n'i ɖɔ: “Ma ɖi xɛsi ó. Súnnu ná ji wɛ a lɛ̌ ɖe.”

¹⁸Hlacɛ́li ɖo nǎ kú wɛ, bɔ cóbónú gbɔjɛ tɔn ná xwɛ ɔ́, é sun nyǐ vǐ ɔ́ ɖɔ Bɛni-Oníi; Bɛni-Oníi sín tínmɛ wɛ nyí wǔvɛ́sise sín vǐ. Lo ɔ́, vǐ tɔ́ ɔ́ sun nyǐ i ɖɔ Bɛnjamɛ́ɛ. Bɛnjamɛ́ɛ sín tínmɛ wɛ nyí ɖisílɔ ce sín vǐ.

¹⁹Hlacɛ́li kú bɔ è ɖi i dó Efláta lixo. To énɛ́ ɔ́ wɛ nyí Bɛteleyɛ́mu.

²⁰Jakɔ́bu zé awǐnnya ɖokpó tun te yɔ tɔn jí. Awǐnnya énɛ́ kpo ɖo Hlacɛ́li yɔta káká wá jɛ égbé.

²¹Énɛ́ ɔ́ gúdo ɔ́, Izlayɛ́li yi bó yi dó goxɔ tɔn ɖó Migidalu-Edɛ́ɛ gúdo.

²² Hwenu e Izlayɛ́li kpo ɖo gbě énɛ́ ɔ́ jí ɔ́, Hwlibɛ́ni yi ɖó xó xá Biluha tɔ́ tɔn sín asi[11] ɖokpó, bɔ tɔ́ ɔ́ se. Vǐ súnnu wěwe wɛ Jakɔ́bu ɖó.

²³Vǐ súnnu e Lěya ji n'i lɛ́ɛ ɖíe: Hwlibɛ́ni, Sinmɛnyɔ́ɔ, Levíi, Judáa, Isakáa, kpó Zabulɔ́ɔn kpó. Hwlibɛ́ni wɛ nyí nukɔngbéví Jakɔ́bu tɔn.

²⁴Hlacɛ́li sín vǐ súnnu lɛ́ɛ ɖíe: Jozɛ́fu kpó Bɛnjamɛ́ɛ kpó.

²⁵Mɛsɛntɔ́ Hlacɛ́li tɔn Biluha sín vǐ súnnu lɛ́ɛ ɖíe: Dan kpódó Nɛfutali kpó.

²⁶Mɛsɛntɔ́ Lěya tɔn Zilupa tɔn lɛ́ɛ ɖíe: Gadi kpódó Acɛ́ɛ kpó. Jakɔ́bu sín vǐ súnnu e è ji n'i ɖo Mɛzopotamíi taligbé tɔn lɛ́ɛ sín nyǐkɔ lɛ́ɛ nɛ́.

²⁷ Jakɔ́bu wá tɔ́ tɔn Izáki gɔ́n, ɖo Mamulée, ɖo Kiliyati-Aaba. To énɛ́ ɔ́ wɛ ɖo Eblɔ́n nyí wɛ din. Fínɛ́ wɛ Ablaxámu kpó Izáki kpó nɔ ɖ'ayǐ.

²⁸Izáki nɔ gbɛ xɔ xwe kɛnnɛ ko (180).

²⁹Izáki nɔ kpikpoxɔmɛ ɖésú. É wá kú, bó yi su tɔ́gbó tɔn lɛ́ɛ. Vǐ tɔn Esawu kpó Jakɔ́bu kpó ɖi i.