Read fon Bǐbɛ́mɛ 38 Bible Online

Bǐbɛ́mɛ 38 - fon bible

Bǐbɛ́mɛ 38

¹Hwenɛ́nu ɔ́, Judáa gosín nɔví tɔn lɛ́ɛ gɔ́n, bó yi nya ɖé gɔ́n ɖo Adulámu; è nɔ ylɔ́ nya ɔ́ ɖɔ Ila.

²Judáa mɔ nya Kanáanu ɖé sín vǐ nyɔ̌nu; è nɔ ylɔ́ nya ɔ́ ɖɔ Cuwa. É da vǐ ɔ́ bó ɖó xó xá ɛ.

³Bɔ é mɔ xo bó ji vǐ súnnu ɖokpó lobo sun nyǐ i ɖɔ Ɛ́ɛ.

⁴Nyɔ̌nu énɛ́ ɔ́ lɛ́ mɔ xo bó ji vǐ súnnu ɖokpó, bó sun nyǐ i ɖɔ Ɔɔnáni.

⁵É lɛ́ ji vǐ súnnu ɖěvo bó sun nyǐ i ɖɔ Cela. Kezívu wɛ Judáa ɖe hwenu e é ji Cela é.

⁶Judáa da asi nú Ɛ́ɛ nukɔngbéví tɔn ɔ́. Nyɔ̌nu ɔ́ nɔ́ nyí Tamáa.

⁷Ɛ́ɛ nukɔngbéví Judáa tɔn ɔ́, jijɔ tɔn nyɔ́ Mawu Mavɔmavɔ nukún mɛ ǎ, bɔ é hu i.

⁸Énɛ́ ɔ́, Judáa ɖɔ nú Ɔɔnáni ɖɔ: “Sɔ́ fofó towe sín asi ɔ́ da, ɖó asú tɔn nɔví wɛ a nyǐ. Đǒ xó xá ɛ, bó ná ɖó vǐ donu nú fofó towe.”

⁹Ɔɔnáni ka tunwun ɖɔ vǐ e émí ná ji n'i ɔ́ kún ná nyí vǐ émítɔn ó; énɛ́ ɔ́ wú ɔ́, nú é ɖó xó xá fofó tɔn sín asi ɔ́, é nɔ́ ná afɔ kɔn nyi kɔ́ mɛ, bónú fofó tɔn ní má ɖó vǐ ɖé donu ó.

¹⁰Nǔ énɛ́ ɔ́ e bló wɛ Ɔɔnáni ɖe ɔ́ nyɔ́ Mawu Mavɔmavɔ nukún mɛ ǎ, bɔ é hu é lɔmɔ̌.

¹¹Énɛ́ ɔ́, Judáa ɖɔ nú Tamáa vǐ tɔn sín asi ɔ́ ɖɔ: “Yi nɔ asúkúkúxɔmɛ ɖo tɔ́ towe xwé, káká jɛ hwenu e vǐ ce Cela ná su asi da é.” É ɖɔ mɔ̌, ɖó é ɖo linlin wɛ ɖɔ nú Cela da Tamáa gbeɖé ɔ́, é lɔmɔ̌ ná kú fofó tɔn lɛ́ɛ ɖɔhun. Bɔ Tamáa yi cí tɔ́ tɔn xwé nǔgbó.

¹²Ée yě ɖo fínɛ́ káká ɔ́, Cuwa ví, Judáa sín asi ɔ́ wá kú. Ée azǎn nabí e è nǎ nɔ nǔwamɛxɔmɛ ná lɛ́ɛ wá yi ɔ́, Judáa yi Timuna é kpó xɔ́ntɔn tɔn Ila Adulámunu ɔ́ kpó, bó ná yi kpɔ́n mɛ e ɖo fún kpa nú lɛ̌ngbɔ́ tɔn lɛ́ɛ wɛ é.

¹³Énɛ́ ɔ́, è yi ɖɔ nú Tamáa ɖɔ: “Asú towe tɔ́ xwe Timuna bó ná yi kpa fún nú lɛ̌ngbɔ́ tɔn lɛ́ɛ.”

¹⁴Ée Tamáa se mɔ̌ ɔ́, é ɖe asúkúsiwu sín kɔ; é cyɔ́n avɔ nukún mɛ, bó sɔ́ nǔ agalɛtɔ́ ɖɔhun, lobo yi jínjɔ́n fí e è nɔ gbɔn byɔ́ Eyinayímu toxo mɛ é, ɖo Timuna sín alixo; é mɔ ɖɔ Cela ko su asi da, è kún ká sɔ́ émí da n'i ó.

¹⁵Judáa mɔ Tamáa; ée é cyɔ́n avɔ nukún mɛ ɔ́, é vɛdó ɖɔ agalɛtɔ́ ɖé wɛ sín.

¹⁶Ée é má tunwun ɖɔ vǐ émítɔn sín asi ɔ́ wɛ ǎ ɔ́, é sɛ yi gɔ̌n tɔn, bó ɖɔ n'i ɖɔ: “Wǎ mlɔ́ kpɔ́ xá mì.” Nyɔ̌nu ɔ́ ká kanbyɔ́ ɛ ɖɔ: “Étɛ́ a nǎ ná mì bɔ un ná wá mlɔ́ kpɔ́ xá we?”

¹⁷Bɔ Judáa yí gbe n'i ɖɔ: “Un ná zé lɛ̌ngbɔ́ví ɖokpó ɖo lɛ̌ngbɔ́ ce lɛ́ɛ mɛ sɛ́ dó we.” Nyɔ̌nu ɔ́ ká ɖɔ n'i ɖɔ: “É nyɔ́, amɔ̌, a nǎ tó zé nǔɖé nú mì ɖó gbanu hwɛ̌, káká jɛ hwenu e a nǎ sɛ́ lɛ̌ngbɔ́ví ɔ́ dó mì é.”

¹⁸Judáa ka kanbyɔ́ ɛ ɖɔ: “Nǔ tɛ́ un ná zé nú we ɖó gbanu?” Bɔ é yí gbe n'i ɖɔ: “Nǔ e a nɔ dó ɖó wuntun nǔ ná ɔ́ kpó kan tɔn kpó, kpódó kpo e a hɛn ɔ́ kpó.” Ée nyɔ̌nu ɔ́ ɖɔ mɔ̌ ɔ́, Judáa zé nǔ e é xa lɛ́ɛ n'i, bó mlɔ́ kpɔ́ xá ɛ. Gbe énɛ́ ɔ́ gbe e é ɖó xó xá ɛ ɔ́, sun jɛ́n kó nɔ te n'i nɛ́.

¹⁹Énɛ́ ɔ́ gúdo ɔ́, Tamáa sí te, bó yi xwé. É ɖe avɔ sín nukún mɛ, bó lɛ́ sɔ́ asúkúsiwu tɔn dó.

²⁰Judáa wá sɛ́ lɛ̌ngbɔ́ví ɔ́ dó gbɔn xɔ́ntɔn tɔn Adulámunu ɔ́ jí, bɔ é ná yí nǔ e é fɔ ɖó gbanu lɛ́ɛ ɖo nyɔ̌nu ɔ́ sí. Lo ɔ́, xɔ́ntɔn tɔn ɔ́ sɔ́ wá mɔ nyɔ̌nu ɔ́ ǎ.

²¹É kanbyɔ́ mɛ e ɖo fínɛ́ lɛ́ɛ ɖɔ: “Fítɛ́ nyɔ̌nu agalɛtɔ́ e ɖo Eyinayímu lixo fí ɔ́ ɖe?” Bɔ mɛ lɛ́ɛ yí gbe n'i ɖɔ: “Agalɛtɔ́ ɖé nɔ fí kpɔ́n gbeɖé ǎ mɛ.”

²²Bɔ xɔ́ntɔn ɔ́ lɛ́ kɔ wá Judáa gɔ́n, bó ɖɔ n'i ɖɔ: “Un mɔ ɛ ǎ; mɛ e ɖo fínɛ́ lɛ́ɛ tlɛ ɖɔ nú mì ɖɔ agalɛtɔ́ ɖé kún nɔ fínɛ́ kpɔ́n gbeɖé ó.”

²³Ée Judáa se mɔ̌ ɔ́, é ɖɔ: “É ní bó hɛn nǔ e un bɛ́ n'i lɛ́ɛ! Mǐ ní má húzú nǔkiko ó. Nyɛ ko sɛ́ lɛ̌ngbɔ́ví e xó é ɖɔ ɔ́ dó e din, bɔ hwɛ ka yi ba ɛ kpo. Nǔɖé sɔ́ nyí ce ɖ'é mɛ ǎ.”

²⁴É ná bló sun atɔn mɔ̌ bɔ è wǎ ɖɔ nú Judáa ɖɔ: “Vǐ towe sín asi Tamáa lɛ aga bó tlɛ ɖo xo din.” Bɔ Judáa ɖɔ è nǐ ɖe e tɔ́n, bó dó e zo.

²⁵Hwenu e è kplá ɛ xweyǐgbe ɔ́, é ɖɔ sɛ́ dó asú tɔn tɔ́ ɖɔ: “Mɛ e tɔn nǔ élɔ́ lɛ́ɛ nyí ɔ́ wɛ un mɔ xo ná. Kpɔ́n nǔ e è nɔ dó ɖó wuntun nǔ ná é, bó kpɔ́n kan e ɖ'é wú é, kpó kpo élɔ́ kpó. Tɛ́nkpɔ́n bó tunwun mɛ e tɔn yě nyí é.”

²⁶Ée Judáa mɔ nǔ lɛ́ɛ ɔ́, é tunwun, bó ɖɔ: “Hwɛ tɔn jɔ. Nǔ e un ɖó ná wa ɔ́, un wa ǎ, ɖó un sɔ́ sɔ́ ɛ da nú vǐ ce Cela ǎ.” Énɛ́ ɔ́ gúdo ɔ́, Judáa sɔ́ ɖó xó ɖě xá ɛ ǎ.

²⁷Ée Tamáa sín vǐjiji hwenu wá su ɔ́, è mɔ ɖɔ hǒxo wɛ ɖo xo tɔn mɛ.

²⁸Hwenu e é ɖo vǐ ji wɛ ɔ́, vǐ lɛ́ɛ ɖokpó ɖe alɔ tɔ́n. Nyɔ̌nu-ajinɔtɔ́ ɔ́ ká sin kan vɔvɔ dó alɔ ɔ́ bó ɖɔ: “Nukɔngbéví ɔ́ ɖíe!”

²⁹Lo ɔ́, vǐ énɛ́ ɔ́ wún alɔ tɔn bɔ wegɔ́ tɔn tɔ́n jɛ nukɔn. Énɛ́ ɔ́, nyɔ̌nu-ajinɔtɔ́ ɔ́ sú xó ɖɔ: “Nɛ̌ wɛ a wa gbɔn bo ɖe ali nú hwiɖée?” Bɔ é sun nyǐ vǐ ɔ́ ɖɔ “Pɛlɛ́si”. Pɛlɛ́si sín tínmɛ wɛ nyí ali.

³⁰Énɛ́ ɔ́ gúdo ɔ́, éyɛ́ wá tɔ́n bɔ kan vɔvɔ ɔ́ ɖo alɔ tɔn. È ka sun nyǐ éyɛ́ ɖɔ Zeláxi.