Read fon Bǐbɛ́mɛ 39 Bible Online

Bǐbɛ́mɛ 39 - fon bible

Bǐbɛ́mɛ 39

¹Isimayɛ́li ví lɛ́ɛ kplá Jozɛ́fu yi Ejípu, bó sɔ́ ɛ sa xá nya Ejípunu ɖé; è nɔ ylɔ́ nya ɔ́ ɖɔ Potifáa. Potifáa ɔ́ wú wɛ axɔ́sú Ejípu tɔn nɔ ɖeji dó. É wɛ nyí sɔ́ja e nɔ cɔ́ axɔ́sú ɔ́ lɛ́ɛ sín gǎn.

² Mawu Mavɔmavɔ ka ɖo kpɔ́ xá Jozɛ́fu, bɔ nǔ bǐ ɖo yiyi n'i wɛ. Gǎn tɔn Ejípunu ɔ́ sín xwé gbe wɛ é nɔ́ nɔ.

³Jozɛ́fu sín gǎn ɔ́ mɔ ɖɔ Mawu Mavɔmavɔ ɖo kpɔ́ xá ɛ; é mɔ ɖɔ Mawu Mavɔmavɔ nɔ bló bɔ nǔ e wa wɛ é ɖe lɛ́ɛ bǐ nɔ́ ɖo yiyi n'i wɛ.

⁴Énɛ́ ɔ́, Potifáa gǎn tɔn ɔ́ yí wǎn n'i, bó sɔ́ ɛ dó ɖó azɔ̌watɔ́ é ɖésúnɔ tɔn; é sɔ́ ɛ gǎn ɖó xwé tɔn nu, bó sɔ́ nǔ tɔn lɛ́ɛ bǐ dó alɔ mɛ n'i.

⁵Ée Potifáa sɔ́ Jozɛ́fu ɖó xwé tɔn nu bó sɔ́ nǔ tɔn lɛ́ɛ dó alɔ mɛ n'i lě tlóló ɔ́, Mawu Mavɔmavɔ kɔn nyɔ̌ná tɔn dó xwé tɔn jí ɖó Jozɛ́fu wú; énɛ́ ɔ́, nyɔ̌ná Mawu Mavɔmavɔ tɔn ɖo nǔ tɔn lɛ́ɛ bǐ jí, éé ɖo xwé tɔn gbe lɛ́ɛ kpó éé ɖo gle tɔn mɛ lɛ́ɛ bǐ kpó jí.

⁶Ée Potifáa zé nǔ tɔn lɛ́ɛ bǐ dó alɔ mɛ nú Jozɛ́fu ɔ́, é sɔ́ nɔ́ wa nǔ ɖěbǔ ɖo xwé tɔn gbe ǎ; nǔ jɛ́n é nɔ́ wá ɖu. Jozɛ́fu ɔ́, mɛɖé wɛ, bó nyɔ́ ɖɛkpɛ, bó nyɔ́ kpɔ́n.

⁷Ée yě ɖo fínɛ́ ɔ́, Jozɛ́fu sín gǎn sín asi wá jɛ ɖɛkpɛ tɔn mɔ jí, bó ɖɔ n'i ɖɔ: “Wǎ mlɔ́ kpɔ́ xá mì!”

⁸Jozɛ́fu ka gbɛ́ bó ɖɔ nú gǎn tɔn sín asi ɔ́ ɖɔ: “Đǒtó mì, gǎn ce sɔ́ nǔ tɔn lɛ́ɛ bǐ dó alɔ ce mɛ, bó ɖeji dó wǔtu ce, lobo sɔ́ byɔ́ ɖɔ é ná wa nǔ ɖěbǔ ɖo xwé tɔn gbe ǎ.

⁹Mɛɖé ɖó acɛ hú mì ɖo xwé tɔn gbe ǎ, é ká gbɛ́ nǔɖé nú mì ɖo xwé ɔ́ gbe ǎ. Hwi ɖokpónɔ wú jɛ́n un ma ná ɖó alɔ ǎ, ɖó asi tɔn wɛ a nyǐ. Un sixú dó nǔ baɖabaɖa mɔ̌hun sin, bó hu hwɛ dó Mawu ce ǎ.”

¹⁰Xó ɖokpó ɔ́ ɖɔ n'i wɛ jɛ́n nyɔ̌nu ɔ́ nɔ́ ɖe ayǐhɔ́ngbe ayǐhɔ́ngbe; Jozɛ́fu ka nɔ ɖótó e ǎ.

¹¹É wá su gbe ɖokpó, bɔ Jozɛ́fu byɔ́ xɔ mɛ, bó ná wa azɔ̌ tɔn lě e é kó nɔ́ bló gbɔn é; mɛ ɖěbǔ ká ɖo fínɛ́ gbe nɛ́ gbe ǎ,

¹²bɔ nyɔ̌nu ɔ́ wlí Jozɛ́fu sín awu bó ɖɔ: “Wǎ mǐ yi mlɔ́ ayǐ.” Jozɛ́fu ka jó awu ɔ́ dó n'i, bó hɔn tɔ́n sín xwé ɔ́ gbe.

¹³Ée é mɔ ɖɔ Jozɛ́fu jó awu dó alɔmɛ nú émí bó hɔn tɔ́n ɔ́,

¹⁴é ylɔ́ mɛ e nɔ nɔ xwé ɔ́ gbe lɛ́ɛ, bó ɖɔ nú yě ɖɔ: “Mi wá kpɔ́n! Nyaví Eblée e asú ce kplá wá nú mǐ ɔ́ jló ná ba hǎ mǐ. Nyaví ɔ́ wá gɔ̌n ce bó jló ná ɖó xó xá mì, bɔ un wlí xósúsú.

¹⁵Ée é mɔ ɖɔ un ɖo xó sú wɛ bɔ gbe ce ɖo jǐ yi wɛ ɔ́, é jó awu tɔn dó nú mì, bó hɔn tɔ́n.”

¹⁶Énɛ́ ɔ́, é sɔ́ Jozɛ́fu sín awu ɔ́ ɖó akpá, bó nɔ te káká bɔ asú tɔn wá xwé gbe.

¹⁷Ée asú tɔn wá xwé gbe ɔ́, é ɖɔ n'i ɖɔ: “Kannumɔ Eblée e a kplá wá nú mǐ ɔ́ wá gɔ̌n ce bó jló ná ba hǎ mì.

¹⁸Un ka wlí xósúsú, bɔ ée gbe ce ɖo jǐ yi wɛ ɔ́, é jó awu tɔn dó bó hɔn tɔ́n.”

¹⁹Ée Jozɛ́fu sín gǎn ɔ́ se xó e asi tɔn ɖɔ n'i lɛ́ɛ ɔ́, xomɛ sin i ɖésú,

²⁰bɔ é wlí Jozɛ́fu sú dó gankpá mɛ, fí e axɔ́sú ɔ́ sín gantɔ́ lɛ́ɛ nɔ́ nɔ é, bɔ é sɛn gan ɖo fínɛ́. Jozɛ́fu ɖo gankpá mɛ fínɛ́,

²¹ có Mawu Mavɔmavɔ ɖo kpɔ́ xá ɛ, bó kɔn nyɔ̌ná tɔn dó jǐ tɔn. Mawu Mavɔmavɔ bló bɔ gankpácɔ́tɔ́ ɔ́ yí wǎn nú Jozɛ́fu.

²²Énɛ́ ɔ́, é bɛ́ gantɔ́ e ɖo fínɛ́ lɛ́ɛ bǐ dó Jozɛ́fu sín alɔ mɛ. Nú è nǎ wa nǔ ɖěbǔ ɖo gankpá mɛ fínɛ́ ɔ́, éyɛ́ jɛ́n è nǎ mɔ.

²³Gantɔ́ lɛ́ɛ sín gǎn ɔ́ sɔ́ nɔ́ kpé nukún dó nǔ e é sɔ́ dó alɔmɛ nú Jozɛ́fu lɛ́ɛ ɖěbǔ wú ǎ, ɖó Mawu Mavɔmavɔ ɖo kpɔ́ xá Jozɛ́fu, bó nɔ́ bló, bɔ nǔ e é nɔ́ wa lɛ́ɛ bǐ nɔ́ ɖo yiyi n'i wɛ.