Read fon Bǐbɛ́mɛ 41 Bible Online

Bǐbɛ́mɛ 41 - fon bible

Bǐbɛ́mɛ 41

¹Xwe tɔn we gúdo ɔ́, é wá su gbe ɖokpó zǎn mɛ, bɔ axɔ́sú Ejípu tɔn ɔ́ kú dlɔ̌, bó mɔ éɖée ɖo Nilu tɔ ɔ́ tó.

²É ná mɔ nǔɖé ɔ́, nyibú asi kloklo ɖɛkpɛ ɖɛkpɛ tɛ́nwe jɛ́n tɔ́n sín tɔ ɔ́ mɛ bó jɛ gběhan ɖu jí ɖo tɔ ɔ́ tó.

³É lɛ́ mɔ nyibú asi gǒ xúxú kannylámɔnɔ tɛ́nwe tɔ́n sín tɔ ɔ́ mɛ, bó jɛ ɖě lɛ́ɛ gúdo, bó yi nɔ te akpá yětɔn ɖo tɔ ɔ́ tó.

⁴Nyibú asi gǒ xúxú kannylámɔnɔ lɛ́ɛ fɔ nyibú asi kloklo ɖɛkpɛ ɖɛkpɛ tɛ́nwe lɛ́ɛ ɖu. Hwenɛ́nu ɔ́, axɔ́sú ɔ́ nyí sín amlɔ mɛ.

⁵Axɔ́sú ɔ́ wlí amlɔ bó lɛ́ kú dlɔ̌ ɖěvo. É kú dlɔ̌ bó mɔ blěe tɛ́nwe ɖo hankán ɖokpó ɔ́ wú. Blěe tɛ́nwe lɛ́ɛ bǐ hwán, bó kló bó nyɔ́ ɖɛkpɛ.

⁶É lɛ́ mɔ blěe tɛ́nwe ɖěvo tɔ́n ɖo ɖě lɛ́ɛ kpá. Yědɛɛ lɛ́ɛ ɖi be ǎ bɔ jɔhɔn zǎnzǎnhwe jí tɔn ko hɛn bǐ fyɔ́.

⁷Blěe e má ɖi be ǎ lɛ́ɛ ká fɔ blěe e hwán, bó dó kwín ganjí lɛ́ɛ mi; hwenɛ́nu ɔ́, axɔ́sú ɔ́ nyí sín amlɔ mɛ, bó mɔ ɖɔ dlɔ̌ kú wɛ émí ɖe.

⁸ Ayi tɔn gbadó ayǐhɔ́ngbe tɔn zǎnzǎn, bɔ é dó wɛn sɛ́ dó majíkiblótɔ́ lɛ́ɛ bǐ kpó nǔnywɛ́tɔ́ Ejípu tɔn lɛ́ɛ bǐ kpó ɖɔ yě ní wá. Ée mɛ lɛ́ɛ wá ɔ́, é wlí dlɔ̌ e é kú lɛ́ɛ ɖɔ nú yě. Lo ɔ́, yě mɛ ɖěbǔ kpé wú bó tín nǔ e ɖɔ wɛ dlɔ̌ lɛ́ɛ ɖe ɔ́ mɛ nú axɔ́sú ɔ́ ǎ.

⁹Énɛ́ ɔ́, mɛ e nɔ ɖa wɔ̌xúxú nú axɔ́sú ɔ́ lɛ́ɛ sín gǎn ɔ́ yí xó, bó ɖɔ nú axɔ́sú ɔ́ ɖɔ: “Sɛ́mɛɖó, nǔ e un wa nyi do ɖ'ayǐ lɛ́ɛ ɔ́, un ná flín dó ɖɔ xó nú mɛ égbé.

¹⁰A sin xomɛ dó mǐ mɛsɛntɔ́ towe lɛ́ɛ gbe ɖokpó, bó wlí nyɛ kpó mɛ e nɔ ɖa wɔ̌xúxú nú mɛ é sín gǎn ɔ́ kpó dó ganxó, ɖo mɛ e nɔ cɔ́ we lɛ́ɛ sín gǎn xwé.

¹¹Mǐ mɛ we lɛ́ɛ kú dlɔ̌ ɖo zǎn ɖokpó ɔ́ mɛ, bɔ dlɔ̌ e mǐ kú lɛ́ɛ ɖokpó ɖokpó ɖó tínmɛ tɔn.

¹²Dɔ̌nkpɛvú ɖé kpó mǐ kpó wɛ ɖo gankpá ɔ́ mɛ fínɛ́; Eblée wɛ, bó nyí kannumɔ nú mɛ e nɔ cɔ́ mɛ é sín gǎn ɔ́. Éyɛ́ wɛ mǐ wlí dlɔ̌ e mǐ kú lɛ́ɛ ɖɔ ná, bɔ é tín dlɔ̌ mǐtɔn mǐtɔn mɛ nú mǐ.

¹³Nǔ e é ɖɔ nú mǐ lɛ́ɛ ká jɛ nǔgbó. Sɛ́mɛɖó lɛ́ sɔ́ mì ɖó tɛn ce mɛ, bó ká ɖɔ bɔ è dǒ kan kɔ nú mɛ e nɔ ɖa wɔ̌xúxú nú mɛ é sín gǎn ɔ́ dó atín wú.”

¹⁴Ée axɔ́sú ɔ́ se mɔ̌ ɔ́, é dó wɛn sɛ́ dó Jozɛ́fu, bɔ è yi ɖe e tɔ́n sín gankpá ɔ́ mɛ tlóló. Ée Jozɛ́fu tɔ́n ɔ́, è xwlɛ́ ta n'i, bó ɖyɔ́ awu n'i, bɔ é ɖidó axɔ́sú ɔ́ gɔ́n.

¹⁵Ée Jozɛ́fu wá ɔ́, axɔ́sú ɔ́ ɖɔ nú Jozɛ́fu ɖɔ: “Un kú dlɔ̌ ɖokpó; mɛ ɖěbǔ ká kpé wú bó tín nǔ e ɖɔ wɛ dlɔ̌ ɔ́ ɖe ɔ́ mɛ nú mì ǎ. Un ka se ɖɔ nú è kú dlɔ̌ bó ɖɔ nú we ɔ́, a nɔ tínmɛ nú mɛ tlóló.”

¹⁶Jozɛ́fu ka yí gbe n'i ɖɔ: “Nyɛ wɛ ǎ; gbeɖé kpɔ́n! Mawu wɛ ná ná tínmɛ tɔn nǔgbó ɔ́ we.”

¹⁷Énɛ́ ɔ́, axɔ́sú ɔ́ ɖɔ nú Jozɛ́fu ɖɔ: “Un kú dlɔ̌ bó mɔ nyɛɖée ɖo te ɖo Nilu tɔ ɔ́ tó.

¹⁸Un ná mɔ nǔɖé ɔ́, nyibú asi kloklo ɖɛkpɛ ɖɛkpɛ tɛ́nwe jɛ́n tɔ́n sín tɔ ɔ́ mɛ bó jɛ gběhan ɖu jí ɖo tɔ ɔ́ tó.

¹⁹Un lɛ́ mɔ nyibú asi tɛ́nwe ɖěvo tɔ́n sín tɔ ɔ́ mɛ, bó jɛ ɖě lɛ́ɛ gúdo. Yědɛɛ lɛ́ɛ ká xú gǒ kácɛ́kácɛ́, bó nylá kan káká; un mɔ nyibú kannylámɔnɔ mɔ̌hunkɔtɔn kpɔ́n gbeɖé ɖo Ejípu to ɔ́ mɛ ǎ.

²⁰Nyibú gǒxúxú kannylámɔnɔ lɛ́ɛ wlí nyibú kloklo tɛ́nwe nukɔntɔn lɛ́ɛ ɖu.

²¹Yě fɔ nyibú kloklo énɛ́ lɛ́ɛ mi, có mɛɖé tunwun ɖɔ nǔɖé ɖo adɔgo yětɔn mɛ ǎ. Lě e yě nylá kan gbɔn ɖ'ayǐ ɔ́ jɛ́n yě lɛ́ kpo ɖe. Hwenɛ́nu wɛ un nyí sín amlɔ mɛ.

²²Énɛ́ ɔ́ gúdo ɔ́, un lɛ́ kú dlɔ̌ ɖěvo bó mɔ blěe ɖɛkpɛ ɖɛkpɛ tɛ́nwe ɖo hankán ɖokpó ɔ́ wú, bɔ yě kló ganjí.

²³Un lɛ́ mɔ blěe xúxú e má ɖi be ǎ bɔ jɔhɔn zǎnzǎnhwe jí tɔn kó hɛn fyɔ́ lɛ́ɛ tɛ́nwe tɔ́n ɖo ɖě lɛ́ɛ kpá.

²⁴Blěe e má ɖi be ǎ lɛ́ɛ ká fɔ blěe ɖɛkpɛ ɖɛkpɛ tɛ́nwe lɛ́ɛ mi. Un ko wlí ɖɔ nú majíkiblótɔ́ lɛ́ɛ, yě mɛ ɖěbǔ ká ɖɔ tínmɛ tɔn nú mì ǎ.”

²⁵Jozɛ́fu ka ɖɔ nú axɔ́sú ɔ́ ɖɔ: “Dlɔ̌ we e mɛ kú lɛ́ɛ ɔ́, nǔ ɖokpó ɔ́ ɖɔ wɛ yě ɖe. Nǔ e wa gbé Mawu ja ɔ́ wɛ é ɖe xlɛ́ mɛ.

²⁶Nyibú asi ɖɛkpɛ ɖɛkpɛ tɛ́nwe lɛ́ɛ ɔ́, xwe tɛ́nwe wɛ. Blěe ɖɛkpɛ ɖɛkpɛ tɛ́nwe lɛ́ɛ ɔ́, xwe tɛ́nwe wɛ. Hǔn nǔ ɖokpó ɔ́ ɖɔ wɛ dlɔ̌ we lɛ́ɛ ɖe.

²⁷Nyibú asi gǒxúxú, kannylámɔnɔ tɛ́nwe e jɛ nukɔntɔn lɛ́ɛ gúdo lɛ́ɛ kpódó blěe tófwe e jɔhɔn zǎnzǎnhwe jí tɔn kó hɛn fyɔ́ lɛ́ɛ kpó ɔ́, nǔ e ɖɔ wɛ yě ɖe ɔ́ wɛ nyí ɖɔ adɔ ná tɔ́n nú xwe tɛ́nwe.

²⁸Sɛ́mɛɖó, nǔ e un ko ɖɔ nú mɛ zaanɖé din ɔ́ wɛ; nǔ e wa gbé Mawu ja ɔ́ wɛ é zé xlɛ́ mɛ.

²⁹Xwe tɛ́nwe ja bɔ nǔɖuɖu ná tíin kɔn nyi kpɔ́ gégé gbɔn Ejípu to ɔ́ bǐ mɛ.

³⁰Xwe tɛ́nwe e ná jɛ xwe tɛ́nwe nukɔntɔn lɛ́ɛ gúdo ɔ́, adɔ ná tɔ́n bɔ è sɔ́ ná flín ɖɔ nǔɖuɖu kó tíin bó túnflá ɖo to ɔ́ mɛ kpɔ́n ǎ. Adɔ ɔ́ ná zɔ́n bɔ to ɔ́ bǐ ná jɛ vɔ̌.

³¹Adɔ énɛ́ e ná tɔ́n ɔ́ ná syɛ́n káká bɔ mɛɖé sɔ́ ná tunwun ɖɔ nǔɖuɖu kó tíin, bó túnflá ɖo to ɔ́ mɛ kpɔ́n ǎ.

³²Ée è blǒ bɔ mɛ kú nǔ ɖokpó ɔ́ sín dlɔ̌ dó azɔn we jí mɔ̌ ɔ́, é ɖe xlɛ́ ɖɔ nǔ e Mawu lin ɖɔ émí ná wa ɔ́, wa jɛ́n é ná wa dandan; é ká ná lín cóbó wa nǔ ɔ́ ǎ.

³³Sɛ́mɛɖó, nǔ e mɛ ná wa din ɔ́, mɛ ná ba gbɛtɔ́ e bí ganjí, bó ɖó nǔnywɛ́ ɔ́ ɖokpó, bó ná sɔ́ ɖó Ejípu to ɔ́ nu.

³⁴Mɛ ná lɛ́ sɔ́ gǎn ɖé lɛ́ɛ ɖo to ɔ́ mɛ, bɔ yě ná nɔ́ yí blěe e ná tíin ɖo Ejípu nú xwe tɛ́nwe lɛ́ɛ sín atɔ́ɔ́nvlɔ́ɖó.

³⁵Jinukún e è nǎ mɔ ɖo xwe ɖagbe e jǎwe nɛ́ lɛ́ɛ mɛ lɛ́ɛ ɔ́, yě ní sɛ bǐ xwe. Mɛ ɖésúnɔ ná ná gbe bɔ yě ná kplé blěe ɖ'ayǐ ɖo toxo ɖaxó ɖaxó lɛ́ɛ mɛ, lobo ná nɔ́ cɔ́.

³⁶Énɛ́ ɔ́, nǔɖuɖu énɛ́ lɛ́ɛ ná nɔ ayǐ nú to ɔ́, bɔ adɔ e ná tɔ́n nú xwe tɛ́nwe ɔ́ wá ɔ́, adɔ sɔ́ ná hu toví lɛ́ɛ ǎ.”

³⁷Xó énɛ́ e Jozɛ́fu ɖɔ ɔ́ nyɔ́ axɔ́sú ɔ́ kpódó gǎn hɔn-yitɔ́ tɔn lɛ́ɛ bǐ kpó nukún mɛ.

³⁸Énɛ́ ɔ́, axɔ́sú ɔ́ ɖɔ nú gǎn hɔn-yitɔ́ tɔn lɛ́ɛ ɖɔ: “Nya élɔ́ ɔ́, Yɛ Mawu tɔn ɖo jǐ tɔn. Mǐ ná sixú mɔ étɔn ɖɔhun a?”

³⁹É ká ɖɔ nú Jozɛ́fu ɖɔ: “Ée é nyí hwi wɛ Mawu zé nǔ énɛ́ lɛ́ɛ bǐ xlɛ́ din é ɔ́, mǐ sɔ́ sixú mɔ mɛɖé bɔ é ná bí ganjí, bó ɖó nǔnywɛ́ hwi ɖɔhun ǎ.

⁴⁰ Hǔn hwi wɛ un ná sɔ́ gǎn ɖó axɔ́súɖuto ce nu, bɔ toví ce lɛ́ɛ bǐ ná se tónú nú we. Axɔ́súzinkpo e jí un ɖe ɔ́ kɛ́ɖɛ́ wɛ ná zɔ́n bɔ un ná ɖó acɛ hú we.

⁴¹Din ɔ́, un sɔ́ we ɖó Ejípu to ɔ́ bǐ nu.”

⁴² Ée axɔ́sú ɔ́ ɖɔ mɔ̌ ɔ́, é ɖe alɔkɛ́ e ɖe acɛ tɔn xlɛ́ ɔ́, bó sɔ́ dó alɔ nú Jozɛ́fu; é zé akwɛ́núwu ɖagbe ɖagbe dó n'i, lobo zé sikáwlɔ dó kɔ n'i.

⁴³É ɖɔ bɔ è zě e dó ahwankɛkɛ́ mɛ; mɛ e xo kpó ɖó n'i tlóló ɔ́ wɛ è zě ɖ'ayǐ ná. Mɛ lɛ́ɛ nɔ ɖo awǒbóbó kpa wɛ ɖo nukɔn tɔn ɖɔ: “Mɛ bǐ ní jɛ kpo, mɛ bǐ ní jɛ kpo.” Lě e axɔ́sú ɔ́ sɔ́ Jozɛ́fu gǎn ɖó Ejípu to ɔ́ bǐ nu gbɔn ɔ́ nɛ́.

⁴⁴Axɔ́sú ɔ́ lɛ́ ɖɔ nú Jozɛ́fu ɖɔ: “Nyɛ wɛ nyí Ejípu xɔ́sú ɔ́; amɔ̌, nú mɛɖé ja nǔ ɖěbǔ wa gbé ɖo to ɔ́ mɛ, bónú a ma ná gbe tɔn ǎ ɔ́, mɛ ɔ́ ná sixú bló ǎ.”

⁴⁵Axɔ́sú ɔ́ sun nyǐ Jozɛ́fu ɖɔ Safunáti-Panɛ́yaxi. É zé Asenáti da n'i; Asenáti ɔ́, Poti-Fela, hunnɔ Ɔnu toxo ɔ́ tɔn ɔ́ sín vǐ wɛ. Bɔ Jozɛ́fu sɔ́ nǔ bó yi gbɔn Ejípu to ɔ́ mɛ.

⁴⁶Xwe gban (30) ɖó wɛ Jozɛ́fu ɖe hwenu e è kplá ɛ wá axɔ́sú Ejípu tɔn ɔ́ gɔ́n é. Jozɛ́fu ka gosín axɔ́sú ɔ́ gɔ́n, bó yi gbɔn Ejípu to ɔ́ bǐ mɛ.

⁴⁷Xwe tɛ́nwe e mɛ nǔɖuɖu ná tíin kɔn nyi kpɔ́ gégé lɛ́ɛ sín hwenu ɔ́, ayǐkúngban ɔ́ nyɔ́ blěe ɖésú.

⁴⁸Énɛ́ ɔ́, Jozɛ́fu sɛ jinukún e è mɔ ɖo xwe tɛ́nwe lɛ́ɛ mɛ lɛ́ɛ bǐ xwe. É ɖó jinukúngɔ́ gbɔn toxo lɛ́ɛ mɛ. É nɔ́ bɛ́ blěe e è nɔ mɔ ɖo gle lɛ́ɛ mɛ lɛ́ɛ dó agɔ̌ mɛ, ɖo toxo e sɛkpɔ́ yě ɔ́ mɛ.

⁴⁹Jozɛ́fu kplé blěe ɖ'ayǐ, ɖo xwe tɛ́nwe énɛ́ lɛ́ɛ mɛ, bɔ é sukpɔ́ káká, bó cí kɔ́ e ɖo xutó ɔ́ ɖɔhun; blěe ɔ́ sukpɔ́ káká bɔ è sɔ́ sixú xa ǎ.

⁵⁰Cóbónú adɔ ɔ́ ná tɔ́n ɔ́, Jozɛ́fu sín asi Asenáti, Poti-Fela, hunnɔ Ɔnu toxo ɔ́ tɔn ɔ́ sín vǐ ɔ́ kó ji vǐ súnnu we n'i.

⁵¹Jozɛ́fu sun nyǐ nukɔngbéví ɔ́ ɖɔ Manasée bó ɖɔ: “Mawu bló bɔ un wɔn ya e un ji lɛ́ɛ bǐ, bó wɔn ɖɔ un ɖo zɔ nú mɛ ce lɛ́ɛ.”

⁵²É sun nyǐ vǐ wegɔ́ ɔ́ ɖɔ Eflayímu bó ɖɔ: “Mawu bló bɔ un ji vǐ ɖo to e mɛ è ko dó ya nú mì ɖe ɔ́ mɛ.”

⁵³Xwe tɛ́nwe e nǔɖuɖu ná tíin xɔ, ɖo Ejípu lɛ́ɛ wá yi.

⁵⁴ Bɔ xwe tɛ́nwe e adɔ ná tɔ́n ná lɛ́ɛ bɛ́ lě e Jozɛ́fu ɖɔ gbɔn é. Adɔ tɔ́n ɖo to lɛ́ɛ bǐ mɛ. Lo ɔ́, nǔɖuɖu tíin ɖo Ejípu to ɔ́ bǐ mɛ.

⁵⁵ Ée adɔ wá syɛ́n bǐ ɖo Ejípu to ɔ́ mɛ ɔ́, togun ɔ́ bǐ wlí xósúsú bó yi axɔ́sú ɔ́ gɔ́n, bó byɔ́ nǔɖuɖu. Axɔ́sú ɔ́ ká ɖɔ nú yě bǐ ɖɔ: “Mi yi Jozɛ́fu gɔ́n, bó bló nǔ e é ná ɖɔ nú mi é bǐ.”

⁵⁶Adɔ kpa zinkpo bó jínjɔ́n ayǐ ɖo to ɔ́ bǐ mɛ. Énɛ́ ɔ́, Jozɛ́fu hun blěe lɛ́ɛ bǐ bó sa blěe nú Ejípunu lɛ́ɛ. Adɔ ɔ́ ká lɛ́ ɖo syɛ́nsyɛ́n d'é jí wɛ ɖo Ejípu.

⁵⁷Bɔ mɛ lɛ́ɛ nɔ gosín to lɛ́ɛ mɛ to lɛ́ɛ mɛ, bó nɔ́ wá xɔ blěe ɖo Jozɛ́fu sí; ɖó adɔ ɔ́ syɛ́n ɖésú ɖo gbɛ ɔ́ bǐ mɛ.