Read fon Bǐbɛ́mɛ 42 Bible Online

Bǐbɛ́mɛ 42 - fon bible

Bǐbɛ́mɛ 42

¹Jakɔ́bu se ɖɔ blěe tíin ɖo Ejípu, lobo ɖɔ nú vǐ tɔn súnnu lɛ́ɛ ɖɔ: “Nɛ̌ gbɔn bɔ mi ka cí fí bó nɔ́ ɖo miɖée kpɔ́n wɛ?

² Un se ɖɔ blěe tíin ɖo Ejípu. Mi wá yi dɔ̌n, bó ná xɔ ɖě wá nú mǐ, bónú mǐ ná mɔ nǔ ɖu, bɔ adɔ sɔ́ ná hu mǐ ǎ.”

³Ée Jakɔ́bu ɖɔ mɔ̌ ɔ́, Jozɛ́fu sín nɔví súnnu wǒ ɖidó Ejípu, bó ná yi xɔ blěe.

⁴Jakɔ́bu lɔn bɔ Bɛnjamɛ́ɛ, Jozɛ́fu sín nɔví kpɛví ɔ́ xwedó yě yi ǎ; ɖó é ɖo xɛsi ɖi wɛ ɖɔ nǔ baɖabaɖa ɖé táá jɛ dó jǐ tɔn.

⁵Jakɔ́bu ví lɛ́ɛ wá Ejípu bɔ yě kpó nǔxɔtɔ́ ɖěvo lɛ́ɛ kpó wá kplé afɔ, ɖó adɔ tɔ́n ɖo Kanáa to ɔ́ bǐ mɛ.

⁶Jozɛ́fu wɛ nyí tokpɔngán ɖo to ɔ́ mɛ; é wɛ nɔ́ sa blěe nú mɛ bǐ. Nɔví tɔn lɛ́ɛ ká wá, bó ɖe kɔ́ n'i.

⁷Jozɛ́fu mɔ nɔví tɔn lɛ́ɛ bó tunwun; amɔ̌, é bló nǔ mɛ ma tunwun yě ɖɔhun; é kanbyɔ́ yě kpó adǎn kpó ɖɔ: “Fítɛ́ mi gosín?” Bɔ yě yí gbe n'i ɖɔ: “Kanáa wɛ mǐ gosín, bó wá nǔɖuɖu xɔ gbé.”

⁸Jozɛ́fu tunwun nɔví tɔn lɛ́ɛ, amɔ̌, yědɛɛ lɛ́ɛ tunwun i ǎ.

⁹ É flín dlɔ̌ e é kú dó yě wú lɛ́ɛ, bó ɖɔ nú yě ɖɔ: “Nǔdobatɔ́ wɛ mi nyí; fí e to ɔ́ ɖo nuvo ɖe lɛ́ɛ ba do ná gbé wɛ mi tɔ́n.”

¹⁰Yě ká gbɛ́ bó ɖɔ: “Mɔ̌ wɛ ǎ mɛ gǎn, blěe xɔ gbé wɛ mǐ mɛsɛntɔ́ towe lɛ́ɛ ja.

¹¹Tɔ́ ɖokpó ɔ́ ví wɛ mǐ nyǐ. Mǐ nyǐ adingbannɔ ǎ; mǐ mɛsɛntɔ́ towe lɛ́ɛ nyí nǔdobatɔ́ ǎ.”

¹²Bɔ Jozɛ́fu ɖɔ nú yě ɖɔ: “Mi tɔ́n blěe kɛ́ɖɛ́ xɔ gbé ǎ. Fí e to ɔ́ ɖo nuvo ɖe lɛ́ɛ ba do ná gbé wɛ mi tɔ́n.”

¹³Yě ká ɖɔ n'i ɖɔ: “Mǐ mɛ mɛsɛntɔ́ towe lɛ́ɛ ɔ́, tɔ́ ɖokpó ɔ́ sín vǐ súnnu wěwe wɛ mǐ nyí ɖo Kanáa. Mɛ e nyí yɔkpɔ́vú bǐ ɖo mǐ mɛ ɔ́ ɖo tɔ́ mǐtɔn gɔ́n din, bɔ nɔví mǐtɔn ɖokpó ká tíin bó sɔ́ ɖe ǎ.”

¹⁴Bɔ Jozɛ́fu ɖɔ nú yě ɖɔ: “Nǔ e ɖɔ nú mi wɛ un ɖe ɔ́ nɛ́; nǔdobatɔ́ wɛ mi nyí.

¹⁵Un ná tɛ́n mi kpɔ́n: un xwlé axɔ́sú Ejípu tɔn ɔ́ nú mi. Cóbónú mi ná gosín fí ɔ́, nɔví mitɔn kpɛví bǐ ɔ́ jɛ́n mi ná yi kplá wá.

¹⁶Mi sɛ́ mɛ ɖokpó dó nú é ní yi kplá nɔví mitɔn ɔ́ wá. Midɛɛ lɛ́ɛ ɔ́, un nǎ wlí mi dó gan ɖo fí. Un ná ba do nú xó mitɔn kpɔ́n, bó ná kpɔ́n ɖɔ xó nǔgbó ɖɔ wɛ mi ɖe a jí; é má nyí mɔ̌ ǎ hǔn, nǔdobatɔ́ wɛ mi nyí; axɔ́sú Ejípu tɔn ɔ́ wɛ un xwlé nú mi.”

¹⁷Ée Jozɛ́fu ɖɔ mɔ̌ ɔ́, é bɛ́ yě dó gankpá mɛ nú azǎn atɔn.

¹⁸Azǎn tɔn atɔngɔ́ ɔ́ gbe ɔ́, Jozɛ́fu ɖɔ nú yě ɖɔ: “Đó nyɛ ɖó sísí nú Mawu wútu ɔ́, nǔ e mi ná wa bó ná gán ɔ́ ɖíe:

¹⁹Ényí xó nǔgbó ɖɔ wɛ jɛ́n mi ɖe hǔn, mi mɛ ɖokpó ní cí gankpá ɔ́ mɛ, bónú mɛ e kpo lɛ́ɛ ná zé blěe yi jó nú mɛ mitɔn e xovɛ́ ɖo sinsin wɛ ɖo xwé lɛ́ɛ,

²⁰bó ná kplá nɔví mitɔn kpɛví ɔ́ wá nú mì. Énɛ́ ɔ́, un ná tunwun ɖɔ xó nǔgbó ɖɔ wɛ mi ɖe, bɔ mi sɔ́ ná kú ǎ.” Bɔ yě yí gbe nú nǔ e Jozɛ́fu ɖɔ nú yě ɔ́.

²¹Énɛ́ ɔ́, yě jɛ ɖiɖɔ nú yěɖée jí ɖɔ: “Agɔ ɖésú wɛ mǐ jɛ dó nɔví mǐtɔn mɛ, ɖó hwenu e é ɖo kɛnklɛ́n dó nú mǐ wɛ bɔ mǐ gbɛ́ bǐ ɔ́, mǐ mɔ ya e ji wɛ é ɖe ɔ́ hǔn. Nǔ énɛ́ ɔ́ wɛ zɔ́n bɔ mǐ lɔ wá ɖo hwɛ xɔ́ sú wɛ.”

²² Hwlibɛ́ni ka yí xó, bó ɖɔ nú yě ɖɔ: “Un ma gbɛ́ nú mi hwenɛ́nu ɖɔ mi ní má wa nǔ nyanya ɖé xá nyaví ɔ́ ó a? Un gbɛ́ nú mi, mi ka ba ná se ǎ. Hun tɔn ɖíe ɖo axɔ́ byɔ́ mǐ wɛ e.”

²³Yě ká tunwun ɖɔ Jozɛ́fu se gbe e dó wɛ émí ɖe ɔ́ ǎ, ɖó nú é ja xó ɖɔ xá yě gbé ɔ́, gbesetɔ́ wɛ é nɔ́ ba.

²⁴Ée Jozɛ́fu se xó e ɖɔ wɛ yě ɖe ɔ́, é gosín yě gɔ́n bó bɛ́ avǐ. Jozɛ́fu lɛ́ kɔ wá yě gɔ́n, bó ɖɔ xó xá yě. Énɛ́ ɔ́ gúdo ɔ́, é wlí mɛ e nɔ nyí Sinmɛnyɔ́ɔ ɖo yě mɛ ɔ́, bó dó wlɔ ɛ ɖo nukún yětɔn mɛ.

²⁵Énɛ́ ɔ́ gúdo ɔ́, Jozɛ́fu ná gbe ɖɔ è nǐ dó blěe dó ati yětɔn lɛ́ɛ mɛ, bónú é ní gɔ́, bónú è nǐ zé mɛ ɖokpó ɖokpó sín akwɛ́ dó ati tɔn mɛ, lobo ná nǔ e yě ná ɖu ɖo alixo ɔ́ yě; bɔ è blǒ lě e Jozɛ́fu ɖɔ gbɔn ɔ́.

²⁶Énɛ́ ɔ́, yě dó blěegban nú tócí yětɔn lɛ́ɛ bó ɖidó.

²⁷Zǎn kú dó yě ɖo fí ɖé, bɔ yě ná dɔ́ fínɛ́. Mɛ ɖokpó ká ɖo yě mɛ, bó tún ati tɔn, bó ná ná nǔɖuɖu tócí tɔn; é ná mɔ nǔɖé ɔ́, é mɔ akwɛ́ ɖo blěe ɔ́ jí aga.

²⁸Ée é mɔ mɔ̌ ɔ́, é ɖɔ nú nɔví tɔn lɛ́ɛ ɖɔ: “È lɛ̌ kɔ nú akwɛ́ nyɛtɔn; é ɖíe ɖo ati ce mɛ e.” Bɔ ayi yětɔn gbadó, bɔ yě jɛ sísɔ́sísɔ́ jí, lobo nɔ ɖɔ nú yěɖée ɖɔ: “Étɛ́ ɖíe Mawu wa xá mǐ e?”

²⁹Ée yě yi mɔ tɔ́ yětɔn Jakɔ́bu ɖo Kanáa ɔ́, yě wlí nǔ e jɛ lɛ́ɛ bǐ ɖɔ n'i.

³⁰Yě ɖɔ n'i ɖɔ: “Ée mǐ yi ɔ́, dǎwe e nyí gǎn ɖo to ɔ́ nu ɔ́ bɛ́ zǐngídi dó mǐ jí, bó mɔ mǐ dó mɔ nǔdobatɔ́.

³¹Bɔ mǐ ɖɔ n'i ɖɔ: ‘Mǐ nyǐ nǔdobatɔ́ ǎ. Mǐ nyǐ adingbannɔ ǎ.

³²Mǐ mɛ wěwe wɛ nyí tɔ́ ɖokpó ɔ́ ví, bɔ mɛ ɖokpó ɖo mǐ mɛ, bó sɔ́ ɖe ǎ. Mɛ kpɛví bǐ e ká ɖo mǐ mɛ ɔ́ ɖo tɔ́ mǐtɔn gɔ́n ɖo Kanáa.’

³³Mɛ e nyí gǎn ɖo to ɔ́ nu ɔ́ ká ɖɔ nú mǐ ɖɔ: ‘Ényí nǔgbó ɖɔ wɛ jɛ́n mi ɖe din ɔ́, fí e un ná tunwun ɖe ɔ́ ɖíe: mi ná jó nɔví mitɔn ɖokpó dó nú mì, bó ná yí blěe e mi ná yi ná mɛ mitɔn e xovɛ́ ɖo sinsin wɛ ɖo xwé lɛ́ɛ, bó ná yi, lobo ná kplá nɔví mitɔn kpɛví ɔ́ wá nú mì.

³⁴Énɛ́ ɔ́, un ná tunwun ɖɔ xó nǔgbó ɖɔ wɛ mi ɖe; mi kún nyí nǔdobatɔ́ ó. Nú mi lɛ́ kɔ wá ɔ́, un ná jó nɔví mitɔn dó nú mi, bɔ mi ná vo bó wa ajɔ̌ ɖo to ɔ́ mɛ.’ ”

³⁵Ée yě ɖɔ xó énɛ́ ɔ́, bó húzú ati yětɔn lɛ́ɛ ɔ́, mɛ ɖokpó ɖokpó mɔ akwɛ́ tɔn ɖo blǎblá ɖo ati tɔn mɛ. Yě kpó tɔ́ yětɔn kpó mɔ akwɛ́ bláblá lɛ́ɛ bɔ xɛsi jɛ yě jí.

³⁶Bɔ tɔ́ yětɔn ɖɔ nú yě ɖɔ: “Mi ɖo vǐ ce lɛ́ɛ yí sín así ce wɛ: Jozɛ́fu sɔ́ ɖe ǎ, Sinmɛnyɔ́ɔ sɔ́ ɖe ǎ, bɔ din ɔ́, mi lɛ́ jló ná zé Bɛnjamɛ́ɛ yi. Nyɛ ɖokpónɔ jɛ́n nǔ wa.”

³⁷Hwlibɛ́ni ɖɔ nú tɔ́ tɔn ɖɔ: “Daá, jǒ Bɛnjamɛ́ɛ dó nú mì; un ná kplá ɛ wá nú we; nú un ma kplá ɛ wá nú we ǎ hǔn, hu vǐ ce súnnu we lɛ́ɛ.”

³⁸Bɔ Jakɔ́bu ɖɔ: “Vǐ ce ná xwedó mi ǎ; ɖó fofó tɔn kó kú, bɔ é kpo éyɛ́ ɖokpónɔ. Ényí é xwedó mi bónú nǔɖé wa ɛ ɖo alixo ɔ́, é ná sín nǔ énɛ́ ɔ́ wú, bɔ un ná kú; lě e un ko kpo sɔ din é ɔ́, un ná nɔ aluwɛ mɛ káká bó ná kú.”