Read fon Bǐbɛ́mɛ 43 Bible Online

Bǐbɛ́mɛ 43 - fon bible

Bǐbɛ́mɛ 43

¹Adɔ e tɔ́n ɔ́ lɛ́ ɖo syɛ́nsyɛ́n d'é jí wɛ ɖo Kanáa.

²Ée Jakɔ́bu kpó mɛ tɔn lɛ́ɛ kpó ɖu blěe e yě hɛn wá sín Ejípu ɔ́ bǐ ɔ́, é ɖɔ nú vǐ tɔn lɛ́ɛ ɖɔ: “Mi sɔ́ nǔ bó ná lɛ́ yi xɔ blěe kpɛɖé wá nú mǐ.”

³Judáa ka ɖɔ n'i ɖɔ: “Nya e nyí gǎn ɖo dɔ̌n ɔ́ ɖɔ nú mǐ tawun ɖɔ nú mǐ má kplá nɔví mǐtɔn kpɛví ɔ́ wá ǎ ɔ́, émí kún ná yí mǐ gbeɖé ó.

⁴Énɛ́ ɔ́ wú ɔ́, nú a yǐ gbe bɔ Bɛnjamɛ́ɛ ná xwedó mǐ yi ɔ́, mǐ ná yi xɔ blěe wá nú we.

⁵Amɔ̌, nú a gbɛ̌ ɔ́, mǐ ná yi ǎ, ɖó nya ɔ́ kó ɖɔ nú mǐ ɖɔ nú mǐ má kplá nɔví mǐtɔn kpɛví ɔ́ wá ǎ ɔ́, émí kún ná yí mǐ gbeɖé ó.”

⁶Ée Judáa ɖɔ mɔ̌ ɔ́, Jakɔ́bu kanbyɔ́ yě ɖɔ: “Nɛ̌ gbɔn bɔ mi lɔ ka ɖɔ nú nya ɔ́ ɖɔ émí ɖó nɔví kpɛví tawun? Nǔ wɛ mi wa dó mì hǔn.”

⁷Vǐ lɛ́ɛ ká yí gbe n'i ɖɔ: “Nya ɔ́ wɛ tɛ́n hǔn dó xo nú mǐ, bó kan nǔ byɔ́ mǐ dó mǐ ɖésúnɔ kpó mɛ mǐtɔn lɛ́ɛ kpó wú; é kanbyɔ́ mǐ ɖɔ tɔ́ mǐtɔn kpo ɖo gbɛ a jí, mǐ ɖó nɔví ɖěvo a jí, bɔ mǐ ká yí gbe nú nǔ e é kanbyɔ́ mǐ lɛ́ɛ. Mǐ má tunwun ɖɔ é ná ɖɔ nú mǐ ɖɔ mǐ ní yi kplá nɔví mǐtɔn ɔ́ wá nɛ́.”

⁸Judáa ɖɔ nú tɔ́ tɔn ɖɔ: “Daá, gbɔ nú Bɛnjamɛ́ɛ ní xwedó mì; mǐ ná sɔ́ nǔ bó ná ɖidó. Énɛ́ ɔ́, hwi kpó mǐ kpó, kpó vǐ mǐtɔn lɛ́ɛ kpó sɔ́ ná kú adɔ ǎ; mǐ ná nɔ gbɛ.

⁹É ɖo alɔ ce mɛ; nyɛ wɛ a nǎ kan ɛ byɔ́. Ényí un ma kplá ɛ wá nú we ǎ hǔn, hwɛ tɔn ní nɔ kɔ ce káká sɔ́yi.

¹⁰Nú é má nyí ɖɔ mǐ kó nɔ te dín wɛ ǎ ɔ́, mǐ ná kó yi dɔ̌n, bó wá azɔn we din.”

¹¹Énɛ́ ɔ́, tɔ́ yětɔn Jakɔ́bu ɖɔ nú yě ɖɔ: “Ényí mɔ̌ wɛ hǔn, nǔ e mi ná bló ɔ́ ɖíe: nú mi xweyǐgbe ɔ́, mi ná hɛn nǔ e nyɔ́ hú nǔ bǐ ɖo to mǐtɔn mɛ lɛ́ɛ ati mɛ, bó ná yi ná nya ɔ́: mi ná hɛn célu kpɛɖé, wǐin kpɛɖé, bó ná hɛn nǔsáwǔ wǎnɖagbenɔ, atínhúnhɔ́n kpɛɖé, pitáci kpɛɖé, kpódó amadi kpɛɖé kpó.

¹²Mi ná hɛn akwɛ́ e mi ná dó xɔ nǔ ná ɔ́, bó ná lɛ́ hɛn akwɛ́ e mi wá mɔ ɖo ati mitɔn lɛ́ɛ mɛ ɔ́ yi. É sixú nyí wɔn wɛ yě wɔn jó dó nyi ati mitɔn lɛ́ɛ mɛ.

¹³Mi bo sɔ́ nǔ bó kplá nɔví mitɔn, lobo yi nya ɔ́ gɔ́n.

¹⁴Mawu Nǔbǐwúkpétɔ́ ɔ́ ní bló bónú nya ɔ́ ní kú nǔbláwǔ nú mi, bó jó Sinmɛnyɔ́ɔ kpó Bɛnjamɛ́ɛ kpó dó, nú yě ní lɛ́ kɔ xwedó mi wá xwé. Nyɛ ɔ́, nú é byɔ́ ɖɔ má ba vǐ ce lɛ́ɛ kpo hǔn, má ba yě kpo.”

¹⁵Jakɔ́bu ví lɛ́ɛ bɛ́ nǔ e yě ná yi ná Jozɛ́fu lɛ́ɛ, bó zé akwɛ́ e yě ná yi xɔ jinukún ná é kpó akwɛ́ e yě wá mɔ ɖo ati yětɔn lɛ́ɛ mɛ ɔ́ kpó. Yě sɔ́ nǔ, bó kplá Bɛnjamɛ́ɛ, bó yi Ejípu ɖo Jozɛ́fu gɔ́n.

¹⁶Ée Jozɛ́fu mɔ ɖɔ Bɛnjamɛ́ɛ kpó yě kpó wɛ wá ɔ́, é ɖɔ nú nǔjíkpɔ́ntɔ́ tɔn ɖɔ: “Kplá mɛ élɔ́ lɛ́ɛ yi xwé ce gbe; a nǎ hu kanlin ɖokpó, bó ná bló nǔɖuɖu ɖ'ayǐ, ɖó é jɛ hwemɛ ɔ́, yě ná ɖu nǔ xá mì.”

¹⁷Nya nǔjíkpɔ́ntɔ́ ɔ́ ká bló nǔ e Jozɛ́fu ɖɔ n'i é; é kplá yě yi gǎn tɔn xwé.

¹⁸Ée é kplá yě xwe xwé ɔ́ gbe ɔ́, xɛsi jɛ yě jí, bɔ yě ɖɔ: “Akwɛ́ e è sɔ́ dó ati mǐtɔn lɛ́ɛ mɛ azǎn nabí ɖé ɖíe ɔ́ wú wɛ è kplá mǐ xweyǐgbe. È jlǒ ná zɔn jǐ mǐtɔn, bó dó ya nú mǐ; è nǎ sɔ́ mǐ dó ɖó kannumɔ, bó ná yí tócí mǐtɔn lɛ́ɛ.”

¹⁹Hwenu e yě jló ná byɔ́ xwé ɔ́ gbe ɔ́, yě sɛ yi nǔjíkpɔ́ntɔ́ ɔ́ gɔ́n, bó ɖɔ n'i ɖɔ:

²⁰“Kɛnklɛ́n! Mǐ kó wá fí ɖokpó kpɔ́n, bó wá xɔ nǔɖuɖu.

²¹Ée mǐ lɛ́ kɔ bo jɛ fí e mǐ ɖó ná dɔ́ ɔ́, mǐ hun ati mǐtɔn lɛ́ɛ, bó mɔ ɖɔ akwɛ́ e ɖokpó ɖokpó mǐtɔn lɛ́ɛ dó xɔ nǔ ná ɔ́ ɖo ati mǐtɔn mǐtɔn mɛ. Amɔ̌, mǐ hɛn akwɛ́ lɛ́ɛ wá; akwɛ́ lɛ́ɛ ɖíe. Đě hwe ǎ.

²²Mǐ tunwun mɛ e bɛ́ akwɛ́ ɔ́ dó ati mǐtɔn lɛ́ɛ mɛ ɔ́ ǎ. Mǐ hɛn akwɛ́ ɖěvo wá din bó ná lɛ́ dó xɔ nǔɖuɖu ɖěvo ná.”

²³Nǔjíkpɔ́ntɔ́ ɔ́ ká ɖɔ nú yě ɖɔ: “Ayi mitɔn ní jɛ ayǐ; mi ma ɖi xɛsi ó. Mawu mitɔn, Mawu tɔ́gbó mitɔn tɔn ɔ́ wɛ zé dɔkun dó ati mitɔn lɛ́ɛ mɛ. Nyɛ yí akwɛ́ e mi dó xɔ nǔ ná ɔ́ dó gbǎ mɛ.” Ée é ɖɔ mɔ̌ ɔ́, é yi kplá Sinmɛnyɔ́ɔ wá nú yě,

²⁴bó kplá yě mɛ bǐ byɔ́ Jozɛ́fu sín xwé gbe. É wún sin nú yě bɔ yě dó klɔ́ afɔ ná. É ná nǔɖuɖu tócí yětɔn lɛ́ɛ lɔmɔ̌.

²⁵Yě se ɖɔ fínɛ́ wɛ Jozɛ́fu kpó yě kpó ná ɖu nǔ ɖe; énɛ́ ɔ́, yě sɔ́ nǔ e yě ná ná Jozɛ́fu lɛ́ɛ ɖó alɔ jí cóbɔ é ná wá xwé gbe hwemɛ.

²⁶Ée Jozɛ́fu wá xwé gbe ɔ́, yě bɛ̌ nǔ e yě hɛn bó ná ná ɛ lɛ́ɛ n'i, bó ɖe kɔ́ n'i.

²⁷Jozɛ́fu ka kan lě e yě ɖe gbɔn ɔ́ byɔ́; é kan byɔ́ yě ɖɔ: “Tɔ́ mitɔn ɖíe ko kpo bǐ bɔ mi ɖɔ e; é ɖo ɖagbe a? É kpo ɖo gbɛ a?”

²⁸Bɔ yě yí gbe n'i ɖɔ: “Tɔ́ mǐtɔn mɛsɛntɔ́ towe ɔ́ ɖo ɖagbe; é kpo ɖo gbɛ.” Ée yě ɖɔ mɔ̌ ɔ́, yě yi do lobo ɖe kɔ́.

²⁹Jozɛ́fu zé ta bó mɔ Bɛnjamɛ́ɛ nɔví tɔn, nɔ tɔn ví ɔ́, bó ɖɔ: “Tɔ́ mitɔn ví kpodé e xó mi ɖɔ nú mì ɔ́ ɖíe a?” É lɛ́ ɖɔ: “Mawu ní kú nǔbláwǔ nú we se a vǐ ce!”

³⁰Ée Jozɛ́fu mɔ nɔví tɔn mɔ̌ ɔ́, tamɛ tɔn kɔ́yi, bɔ ɖasin wá yi dó e; é gbɔ bó yá wǔ byɔ́ xɔ mɛ bó ya avǐ.

³¹Ée é ya avǐ fó ɔ́, é fún nukún mɛ bó tɔ́n wá gɔ̌n yětɔn. É ɖo gǎn dó wɛ bó ná ɖu ɖo éɖée jí, bó ɖɔ è nǐ bɛ́ nǔɖuɖu lɛ́ɛ wá.

³²È nǎ nǔɖuɖu Jozɛ́fu ɖó vo, bó ná nɔví tɔn lɛ́ɛ ɖó vo; è nǎ Ejípunu e nɔ ɖu nǔ xá ɛ lɛ́ɛ lɔmɔ̌ ɖó vo, ɖó Ejípunu lɛ́ɛ sixú dó alɔ kpɔ́ xá Eblée lɛ́ɛ ǎ; su wɛ é nyí nú yě.

³³Jozɛ́fu sín nɔví lɛ́ɛ jínjɔ́n nukɔn tɔn. È to yě ɖě bɔ dó ɖě wú, bɛ́ sín mɛ e nyí mɛxó yětɔn ɔ́ jí káká yi jɛ mɛ e nyí yɔkpɔ́vú yětɔn bǐ ɔ́ jí. Lě e è to yě gbɔn ɔ́ kpácá yě bɔ yě nɔ́ kpɔ́n yěɖée.

³⁴Nǔ e ɖu wɛ Jozɛ́fu ɖe ɔ́ wɛ é ɖɔ bɔ è nǎ yě. Nǔɖuɖu e Jozɛ́fu ɖɔ bɔ è nǎ Bɛnjamɛ́ɛ ɔ́ hú nɔví tɔn ɖě lɛ́ɛ tɔn azɔn atɔ́ɔ́n. Yě kpó é kpó nu ahan, bɔ é kpé yě.