Read fon Bǐbɛ́mɛ 44 Bible Online

Bǐbɛ́mɛ 44 - fon bible

Bǐbɛ́mɛ 44

¹Énɛ́ ɔ́ gúdo ɔ́, Jozɛ́fu zɔ́n nǔjíkpɔ́ntɔ́ tɔn ɖɔ: “Dǒ blěe dó mɛ élɔ́ lɛ́ɛ ɖokpó ɖokpó sín ati mɛ ní gɔ́, lě e yě ná sixú hɛn gbɔn é, bó fɔ akwɛ́ yětɔn yětɔn ɖó blěe ɔ́ jí ɖo ati ɔ́ mɛ.

²A nǎ lɛ́ zé kɔ́fu ce e è sɔ́ kpatágan dó bló ná ɔ́ dó mɛ kpɛví bǐ ɔ́ sín ati mɛ, ɖo akwɛ́ e é hɛn bó ná dó xɔ blěe ná é kpá.” Nǔjíkpɔ́ntɔ́ ɔ́ ká bló nǔ e Jozɛ́fu ɖɔ n'i ɔ́.

³Ayǐhɔ́ngbe tɔn ɔ́, ée wun kɛn lě tlóló ɔ́, é ná gbe Jakɔ́bu ví lɛ́ɛ, bɔ yě ɖidó, yě kpó tócí yětɔn lɛ́ɛ kpó.

⁴Toxo ɔ́ mɛ wɛ yě tɔ́n sín kɛ́ɖɛ́, yě kó jɛ fí ɖé ǎ, bɔ Jozɛ́fu ɖɔ nú nǔjíkpɔ́ntɔ́ tɔn ɖɔ: “Sí te bó jɛ mɛ énɛ́ lɛ́ɛ gúdo. Nú a sun yě dó ɔ́, a nǎ kanbyɔ́ yě ɖɔ: ‘Nɛ̌ wɛ gbɔn bɔ mi zé nǔ nyanya dó sú nǔ ɖagbe xɔ́ ná?

⁵Kpatágan kɔ́fu e mɛ gǎn ce nɔ́ nu sin ɖe, bó nɔ́ lɛ́ dó tunwun sɔ e ja é ná ɔ́ ɖo así mitɔn a cé? Nǔ énɛ́ ɔ́ e mi wa ɔ́ nyɔ́ ɖěbǔ ǎ.’ ”

⁶Nǔjíkpɔ́ntɔ́ ɔ́ ká jɛ gǔdo yětɔn nǔgbó, bó yi sun yě dó, lobo ɖɔ xó e gǎn tɔn ɖɔ ní ɖɔ lɛ́ɛ nú yě.

⁷Jakɔ́bu ví lɛ́ɛ ká yí gbe n'i ɖɔ: “Nɛ̌ wɛ gbɔn bɔ gǎn mǐtɔn ká ɖo xó ɖɔ gbɔn mɔ̌ wɛ? Mǐ mɛsɛntɔ́ towe lɛ́ɛ ná wa mɔ̌ gbeɖé ǎ.

⁸Akwɛ́ e mǐ mɔ ɖo ati mǐtɔn lɛ́ɛ mɛ ɖo Kanáa ɔ́, mǐ lɛ́ kɔ ná wá nú we. Aniwú mǐ ká ná fin kpatágan abǐ siká ɖo gǎn towe xwé?

⁹Mɛ e sí a nǎ mɔ kɔ́fu ɔ́ ɖe ɖo mǐ mɛsɛntɔ́ towe lɛ́ɛ mɛ ɔ́, mɛ ɔ́ ní kú, bónú mǐ lɔmɔ̌ ní húzú kannumɔ towe.”

¹⁰Nǔjíkpɔ́ntɔ́ ɔ́ ɖɔ nú yě ɖɔ: “É nyɔ́! Lě e mi ɖɔ gbɔn ɔ́ wɛ un ná xwedó. Mɛ e sí un ná mɔ kɔ́fu ɔ́ ɖe ɔ́ ná nyí kannumɔ ce. Un ka ná jó mɛ e kpo lɛ́ɛ dó.”

¹¹Ée é ɖɔ mɔ̌ tlóló ɔ́, mɛ ɖokpó ɖokpó ɖe agban tɔn sín tócí tɔn jí, bó hun ɖó nuvo.

¹²Nǔjíkpɔ́ntɔ́ ɔ́ ká kíjé ati lɛ́ɛ. É bɛ́ sín mɛ e nyí mɛxó nú yě ɔ́ jí, bó wá fó dó mɛ e nyí yɔkpɔ́vú bǐ ɔ́ jí, bó wá mɔ kɔ́fu ɔ́ ɖo Bɛnjamɛ́ɛ yɔkpɔ́vú bǐ ɔ́ sín ati mɛ.

¹³Ée nǔ cí mɔ̌ ɔ́, ahwi xo yě, bɔ yě vún awu yětɔn lɛ́ɛ dó kɔ nú yěɖée, bɔ mɛ ɖokpó ɖokpó lɛ́ dó agban nú tócí tɔn, bó lɛ́ kɔ yi toxo ɔ́ mɛ.

¹⁴Judáa kpó nɔví tɔn lɛ́ɛ kpó wá Jozɛ́fu xwé. Jozɛ́fu ka kpo ɖo xwé gbe, bɔ yě jɛ kpo bó ɖe kɔ́.

¹⁵Jozɛ́fu ka kanbyɔ́ yě ɖɔ: “Nɛ̌ gbɔn bɔ mi wa nǔ gbɔn mɔ̌? Mi tunwun ɖɔ gbɛtɔ́ nyɛ ɖɔhun ɔ́, ɖó acɛ bó nɔ tunwun nǔ e ɖo jijɛ wɛ ɔ́ bǐ ǎ cé?”

¹⁶Judáa ka yí gbe ɖɔ: “Xó tɛ́ mǐ nǎ ɖɔ? Nɛ̌ mǐ nǎ wa gbɔn bó mɛ́ ɖ'é mɛ? Mawu mɔ hwɛ e mǐ mɛsɛntɔ́ towe lɛ́ɛ hu é. Hǔn mǐ kpó mɛ e sí è mɔ kɔ́fu ɔ́ ɖe ɔ́ kpó húzú hwi gǎn ce ɔ́ sín kannumɔ.”

¹⁷Bɔ Jozɛ́fu ɖɔ: “Un sixú bló mɔ̌ gbeɖé ǎ. Mɛ e sí è mɔ kɔ́fu ɔ́ ɖe ɔ́ wɛ ná nyí kannumɔ ce. Midɛɛ lɛ́ɛ mi lɛ́ kɔ yi tɔ́ mitɔn gɔ́n dó fífá mɛ.”

¹⁸Ée Jozɛ́fu ɖɔ mɔ̌ ɔ́, Judáa sɛkpɔ́ ɛ bó ɖɔ: “Kɛnklɛ́n gǎn ce, nú nyɛ mɛsɛntɔ́ towe ná ɖɔ xó ɖokpó nú we. Un tunwun ɖɔ acɛ ɖokpó ɔ́ wɛ hwi kpó axɔ́sú ɔ́ kpó ɖó; nǔ ɖo mɔ̌ có, ma sin xomɛ dó nyɛ mɛsɛntɔ́ towe ɔ́ ó.

¹⁹Azɔn nukɔn nukɔntɔn ɔ́, a kanbyɔ́ mǐ ɖɔ tɔ́ mǐtɔn kpo ɖo gbɛ a jí, abǐ mǐ lɛ́ ɖó nɔví ɖěvo a jí.

²⁰Mǐ ká yí gbe ɖɔ tɔ́ mǐtɔn kpo ɖo gbɛ, bó ká kó kpo. Mǐ ká ɖó nɔví súnnu kpɛví ɖokpó, bɔ tɔ́ mǐtɔn ji ɖo kpikpoxɔmɛ. Nɔví mǐtɔn énɛ́ ɔ́ ɖó fofó ɖokpó bɔ é nyí nɔ tɔn sín vǐ; é ká kó kú. É wá kpo é ɖokpónɔ bɔ tɔ́ mǐtɔn yí wǎn n'i.

²¹Ée mǐ ɖɔ mɔ̌ ɔ́, a ɖɔ nú mǐ mɛsɛntɔ́ towe lɛ́ɛ ɖɔ mǐ ní yi kplá nɔví mǐtɔn énɛ́ ɔ́ wá bónú émí ná mɔ ɛ ɖó nukún wú.

²²Bɔ mǐ ká yí gbe nú we ɖɔ nyaví ɔ́ kún sixú jó tɔ́ tɔn dó ó, ɖó nú é jó e dó ɔ́, tɔ́ ɔ́ ná kú.

²³Bɔ a ɖɔ nú mǐ mɛsɛntɔ́ towe lɛ́ɛ ɖɔ nú mǐ má kplá nɔví mǐtɔn kpɛví ɔ́ wá ǎ ɔ́, émí kún ná yí mǐ gbeɖé ó.

²⁴Énɛ́ ɔ́, ée mǐ lɛ́ kɔ yi mɛsɛntɔ́ towe, tɔ́ mǐtɔn ɔ́ gɔ́n ɔ́, mǐ ɖɔ xó e a ɖɔ lɛ́ɛ n'i.

²⁵Énɛ́ ɔ́ wú wɛ hwenu e tɔ́ mǐtɔn ɖɔ nú mǐ ɖɔ mǐ ní lɛ́ kɔ wá xɔ nǔɖuɖu kpɛɖé wá nú émí ɔ́,

²⁶mǐ ɖɔ n'i ɖɔ nú mǐ má kplá nɔví mǐtɔn kpɛví ɔ́ ǎ ɔ́, mǐ kún ná yi ó, ɖó nú mǐ má kplá ɛ hɛn yi ǎ ɔ́, nya e nyí gǎn ɖo dɔ̌n ɔ́ kún ná yí mǐ gbeɖé ó; nɔví mǐtɔn kpɛví ɔ́ jɛ́n mǐ ná kplá.

²⁷Bɔ mɛsɛntɔ́ towe tɔ́ mǐtɔn ɖɔ nú mǐ ɖɔ: ‘Mi tunwun ganjí ɖɔ asi ce ɔ́, vǐ súnnu we wɛ é ji nú mì.

²⁸Mɛ ɖokpó tíin bó bú. Un ɖi ɖɔ adǎnkanlin ɖé wɛ ná kó wlí i ɖu, ɖó un sɔ́ mɔ ɛ gbeɖé káká wá jɛ din ǎ.

²⁹Ényí mi lɛ́ kplá mɛ élɔ́ sín así ce din bónú nǔɖé wa ɛ hǔn, mi tunwun ɖɔ lě e un ko kpo sɔ élɔ́ ɔ́, un ná nɔ aluwɛ mɛ káká bó ná kú. Mi wɛ ka ná zɔ́n.’

³⁰Énɛ́ ɔ́ wú ɔ́, ényí un lɛ́ kɔ yi gɔ̌n tɔn, bó má kplá vǐ ɔ́ yi ǎ ɔ́, éyɛ́ mɛ e vǐ tɔn vɛ́ n'i sɔ mɔ̌ ɔ́,

³¹ényí é mɔ ɖɔ vǐ ɔ́ kún wá ó ɔ́, é ná kú. É ká kú mɔ̌ ɔ́, é ná nyí ɖɔ mǐ mɛsɛntɔ́ towe lɛ́ɛ wɛ zɔ́n bɔ é ná nɔ aluwɛ mɛ ɖo kpikpoxɔmɛ káká bó kú.

³²Nyɛ mɛsɛntɔ́ towe ɔ́ wɛ ká lɛ zin alɔ dó akɔ́n bó ɖɔ nú tɔ́ ce ɖɔ: ‘Ényí un ma kplá vǐ towe wá nú we ǎ hǔn, hwɛ tɔn ní nɔ kɔ ce káká sɔ́yi.’

³³Hǔn bo kɛnklɛ́n bó yí gbe, bónú nyɛ mɛsɛntɔ́ towe ɔ́ ná nyí kannumɔ towe ɖó vǐ ɔ́ tɛnmɛ; énɛ́ ɔ́, é ná lɛ́ kɔ xwedó fofó tɔn lɛ́ɛ yi xwé.

³⁴Ényí nyɛ kpó vǐ ɔ́ kpó má zɔn yi ǎ ɔ́, nɛ̌ un ná sixú yi tɔ́ ce gɔ́n gbɔn? Étɛ́! Tɔ́ ce jɛ aluwɛ mɛ ɔ́, é ná nyɔ́ mɔ nú mì ǎ.”