Read fon Bǐbɛ́mɛ 45 Bible Online

Bǐbɛ́mɛ 45 - fon bible

Bǐbɛ́mɛ 45

¹ Ée Judáa ɖɔ xó fó ɔ́, Jozɛ́fu sɔ́ sixú ɖu ɖo éɖée jí ɖo mɛ e lɛ́ dó e lɛ́ɛ nukɔn ǎ, bó gbɔ bó ɖɔ nú mɛsɛntɔ́ lɛ́ɛ ɖɔ yě bǐ ní tɔ́n. Ée yě tɔ́n ɔ́, é wá kpo é kpó nɔví tɔn lɛ́ɛ kpó, bɔ é ɖe éɖée xlɛ́ yě.

²É ɖo avǐ ya wɛ, bɔ gbe tɔn ɖo jǐ yi wɛ káká bɔ Ejípunu lɛ́ɛ se; mɛ e ɖo hɔnmɛ lɛ́ɛ lɔ se nǔ e ɖo jijɛ wɛ ɔ́.

³Jozɛ́fu ɖɔ nú nɔví tɔn lɛ́ɛ ɖɔ: “Nyɛ wɛ nyí Jozɛ́fu ɔ́. Tɔ́ ce kpo ɖo gbɛ a?” Lo ɔ́, nɔví tɔn lɛ́ɛ sixú yí gbe n'i ǎ, ɖó ayi yětɔn gbadó.

⁴É lɛ́ ɖɔ nú yě ɖɔ: “Mi sɛkpɔ́ mì, mi wá”, bɔ yě sɛkpɔ́ ɛ, bɔ é ɖɔ: “Nyɛ wɛ nyí nɔví mitɔn Jozɛ́fu e mi sa, bɔ è kplá yi Ejípu é.

⁵Amɔ̌, din ɔ́, énɛ́ kó wá yi; ado ní má hu mi ó. Sa e mi sa mì bɔ è kplá mì wá fí ɔ́ ní má vɛ́ nú mi ó. Mawu wɛ sɛ́ mì dó fí jɛ nukɔn nú mi, bónú má hwlɛ́n mi gán.

⁶Adɔ tɔ́n ɖo to ɔ́ mɛ din ɔ́, xwe we ɖíe; amɔ̌, é lɛ́ kpo xwe atɔ́ɔ́n sín gǔdo din bɔ è nǎ sixú lɛ gle ǎ, è nǎ ya nǔkún ǎ.

⁷Mawu sɛ́ mì dó fí jɛ nukɔn nú mi, bónú mi ná gán ɖo to ɔ́ mɛ; é sɛ́ mì dó bónú má hwlɛ́n mi mɛ gěgé gán.

⁸Hǔn mi wɛ zɔ́n bɔ un wá fí ǎ, Mawu wɛ zɔ́n bɔ un wá fí. É wɛ sɔ́ mì dó ɖó gǎn hɔn-yitɔ́ gán nú axɔ́sú ɔ́, bɔ un kpa acɛ dó axɔ́sú ɔ́ sín hɔn nu, bó ɖo Ejípu to ɔ́ bǐ nu.

⁹ Din ɔ́, mi yá wǔ yi tɔ́ ce gɔ́n, bó yi ɖɔ n'i ɖɔ: ‘Vǐ towe Jozɛ́fu ɖɔ: Mawu sɔ́ mì gǎn nú Ejípu to ɔ́ bǐ; yǎ wǔ wá gɔ̌n ce.

¹⁰A nǎ wá sá xwé ɖó Gocɛ́ni, bó ná nɔ akpá ce, hwi kpó vǐ towe lɛ́ɛ kpó, kpó vǐvú towe lɛ́ɛ kpó, gbɔ̌ towe lɛ́ɛ, kpó nyibú towe lɛ́ɛ kpó, kpódó nǔ e a ɖǒ lɛ́ɛ bǐ kpó.

¹¹Nú a wǎ jɛ fí ɔ́, un ná nɔ́ ná nǔɖuɖu we; un ná nɔ́ ná nǔɖuɖu hwi kpó mɛ towe lɛ́ɛ kpó, kpódó kanlin towe lɛ́ɛ kpó; énɛ́ ɔ́, nǔɖé sɔ́ ná hwedó mi ǎ. Đó adɔ ná lɛ́ nɔ te xɔ xwe atɔ́ɔ́n.’ ”

¹²Jozɛ́fu lɛ́ ɖɔ: “Mi ɖésúnɔ mɔ kpó nukún mitɔn kpó din ɖɔ nyɛ nɔví mitɔn ɔ́ wɛ ɖo xó ɖɔ nú mi wɛ; nɔví ce Bɛnjamɛ́ɛ lɔ mɔ din.

¹³Hǔn mi bo yi ɖɔ susu e un xɔ ɖo Ejípu fí ɔ́ bǐ kpódó nǔ e mi mɔ lɛ́ɛ bǐ kpó nú tɔ́ ce. Mi ka ná yá wǔ kplá ɛ wá fí nú mì.”

¹⁴Ée Jozɛ́fu ɖɔ mɔ̌ ɔ́, é kplá así kɔ nú nɔví tɔn Bɛnjamɛ́ɛ bó wlí avǐ, bɔ Bɛnjamɛ́ɛ lɔ nɔ awa tɔn mɛ bó wlí avǐ.

¹⁵Jozɛ́fu lɛ́ kplá así kɔ nú nɔví tɔn ɖě lɛ́ɛ bǐ kpó avǐ kpó. Hwenɛ́nu wɛ nɔví tɔn lɛ́ɛ wá glá, bó jɛ xó ɖɔ xá ɛ jí.

¹⁶È se ɖo axɔ́sú Ejípu tɔn ɔ́ sín hɔnmɛ ɖɔ Jozɛ́fu sín nɔví lɛ́ɛ wá. Nǔ énɛ́ ɔ́ ká nyɔ́ axɔ́sú ɔ́ sín nukún mɛ; é nyɔ́ gǎn hɔn-yitɔ́ tɔn lɛ́ɛ lɔ sín nukún mɛ.

¹⁷Bɔ axɔ́sú ɔ́ ɖɔ nú Jozɛ́fu ɖɔ: “Đɔ nú nɔví towe lɛ́ɛ ɖɔ yě ní dó agban nú kanlin yětɔn lɛ́ɛ, bó yi Kanáa,

¹⁸bó kplá tɔ́ mitɔn kpó mɛ mitɔn lɛ́ɛ kpó, bó wá nɔ gɔ̌n ce. Énɛ́ ɔ́, un ná ná ayǐkúngban e nyɔ́ hú ɖě lɛ́ɛ bǐ ɖo Ejípu ɔ́ mi, bɔ mi ná ɖu jinukún ɖagbe e ɖo to ɔ́ mɛ lɛ́ɛ.

¹⁹A nǎ lɛ́ ɖɔ nú yě ɖɔ yě ní hɛn kɛkɛ́ví sín fí, bó ná bɛ́ asi yětɔn lɛ́ɛ, vǐ yětɔn lɛ́ɛ kpódó tɔ́ mitɔn lɔ kpó d'é mɛ, bó wá.

²⁰Nǔ e mi ná jó dó lɛ́ɛ ní má vɛ́ nú mi ó, ɖó ayǐkúngban e nyɔ́ hú ɖě lɛ́ɛ bǐ ɖo Ejípu to ɔ́ mɛ ɔ́, ná nyí mitɔn.”

²¹Jakɔ́bu vǐ lɛ́ɛ ká bló nǔ e è ɖɔ nú yě lɛ́ɛ. Jozɛ́fu ná kɛkɛ́ví yě lě e axɔ́sú ɔ́ ɖɔ gbɔn é. É lɛ́ ná nǔ e yě ná ɖu ɖo alixo ɔ́ yě.

²²É ná awu xɔ akwɛ́ yě mɛ ɖokpó ɖokpó, bó ná awu xɔ akwɛ́ atɔ́ɔ́n kpó gankwɛ́ afɔɖé kanwe ko (300) kpó Bɛnjamɛ́ɛ.

²³Jozɛ́fu dó nǔ e nyɔ́ hú nǔ bǐ ɖo Ejípu lɛ́ɛ sín agban nú tócí wǒ, bó dó blěe kpó wɔ̌xúxú kpó, kpódó nǔɖuɖu ɖěvo lɛ́ɛ kpó sín agban nú tócí asi wǒ, bó sɛ́ dó tɔ́ tɔn bɔ é ná zán dó ali wá.

²⁴Énɛ́ ɔ́ gúdo ɔ́, é ɖɔ nú nɔví tɔn lɛ́ɛ ɖɔ yě ní má ɖɔ jlɛ ɖo alixo ó. Ée é ɖɔ mɔ̌ nú yě ɔ́, é ná gbe yě ɖɔ yě ní ɖidó.

²⁵Énɛ́ ɔ́, yě gosín Ejípu bó yi Kanáa ɖo tɔ́ yětɔn Jakɔ́bu ɔ́ gɔ́n.

²⁶Ée yě jɛ tɔ́ yětɔn gɔ́n ɔ́, yě ɖɔ n'i ɖɔ: “Jozɛ́fu kpo ɖo gbɛ; é wɛ tlɛ kpa acɛ nú Ejípu to ɔ́ bǐ.” Yě ɖɔ mɔ̌ nú Jakɔ́bu có é ɖɔ nǔɖé n'i ǎ, ɖó é ɖi nǔ nú yě ǎ.

²⁷Yě ká wlí xó e Jozɛ́fu ɖɔ nú yě lɛ́ɛ bǐ ɖɔ n'i. Jakɔ́bu mɔ kɛkɛ́ví e Jozɛ́fu sɛ́ dó e bɔ è nǎ zé e d'é mɛ lɛ́ɛ. Hwenɛ́nu wɛ tɔ́ yětɔn sín ayi wá j'ayǐ.

²⁸Énɛ́ ɔ́, Jakɔ́bu ɖɔ: “Un sɔ́ ɖo nǔɖé ba hú mɔ̌ wɛ ǎ! Vǐ ce Jozɛ́fu kpo ɖo gbɛ. Un ná yi mɔ ɛ có bó ná kú.”