Read fon Bǐbɛ́mɛ 49 Bible Online

Bǐbɛ́mɛ 49 - fon bible

Bǐbɛ́mɛ 49

¹Jakɔ́bu ylɔ́ vǐ tɔn lɛ́ɛ; ée yě wǎ ɔ́, é ɖɔ nú yě ɖɔ: “Mi sɛkpɔ́ mì, bónú má ɖɔ lě e sɔ ná cí gbɔn ɔ́ nú mi.

²Vǐ ce lɛ́ɛ e mi, mi kplé miɖée, bó ɖótó mì. Mi ɖótó nyɛ tɔ́ mitɔn Jakɔ́bu.

³Hwlibɛ́ni, hwɛ ɔ́, hwi wɛ nyí nukɔngbéví ce, hwi wɛ nyí vǐ nukɔntɔn e un ji, hwenu e hlɔ̌nhlɔ́n kpo ɖo wǔ ce ɔ́. A ɖǒ susu bó ɖó acɛ hú nɔví towe lɛ́ɛ.

⁴Tɔsisa e ɖo adǎn jí é ɖɔhun wɛ a cí. Nǔ ɖo mɔ̌ có nukɔngbéví e a nyǐ ɔ́ sín acɛ ɔ́, a sɔ́ ná ɖó ǎ, ɖó a ɖǒ xó xá asi ce ɖo zan ce jí. A mlɔ̌ zan ce jí, bó ɖu su ná.

⁵Sinmɛnyɔ́ɔ kpó Levíi kpó ɔ́, nɔví nɔví wɛ yě nyǐ. Yě ɖǒ gbe kpɔ́ bó xo dǎka.

⁶Amɔ̌, un jló ná nɔ gbě e blá wɛ yě ɖe ɔ́ mɛ ǎ. Un jló ná nɔ kplé yětɔn lɛ́ɛ tɛnmɛ ǎ, ɖó yě hu gbɛtɔ́ gěgé kpó xomɛsin kpó, yě sɛ́n dɔn nú nyibúsú gěgé; yě ká tunwun cóbó bló ǎ.

⁷Un dó nu xomɛsin yětɔn, ɖó é syɛ́n dín. Un dó nu adǎnwiwa yětɔn, ɖó adǎnwiwa énɛ́ ɔ́, mɛ wɛ yě dó hu. Un ná gba vǐ yětɔn lɛ́ɛ dó gbɔn Izlayɛ́li. Un ná fúnfún yě gbɔn to ɔ́ bǐ mɛ.

⁸Judáa, hwɛ ɔ́, nɔví towe lɛ́ɛ ná nɔ́ sɔ́ we su. A nǎ tɛ afɔ kɛntɔ́ towe lɛ́ɛ jí. Nɔví towe lɛ́ɛ ɖésú ná nɔ́ yi do nú we.

⁹ Judáa, vǐ ce, kinnikínní wínnyáwínnyá e wlí lan ɖu, bó lɛ́ kɔ wá nɔtɛn tɔn ɔ́ ɖɔhun wɛ a cí; kinnikínní ɔ́ mlɔ́ ayǐ, bó ɖo gbigbɔjɛ́ wɛ; mɛ̌ ná glá ba nǔɖɔ ɛ?

¹⁰Axɔ́sú kpogɛ ɔ́ ná nɔ Judáa hɛ́nnu mɛ, gǎn kpogɛ ɔ́ ná nɔ vǐ tɔn lɛ́ɛ sín alɔmɛ, káká jɛ hwenu e mɛ e tɔn é nyí ɔ́ ná wá, bɔ togun lɛ́ɛ ná se tónú n'i é.

¹¹Énɛ́ ɔ́, vǐwungbo mɛ ná d'agba káká bɔ é ná nɔ́ sin tócí tɔn nyi mɛ. É ná nɔ́ nya awu tɔn ɖo vɛ̌ɛn mɛ, bó ná nɔ́ nya awu tɔn gaga ɔ́ ɖo vǐwun sin mɛ.

¹²É nu vɛ̌ɛn káká bɔ nukún tɔn myá vɛ̌ɛn ɖɔhun. É nu nyibúnɔ́sin káká bɔ aɖǔ tɔn cí nyibúnɔ́sin ɖɔhun.[18]

¹³Zabulɔ́ɔn ɔ́, xutó wɛ é ná nɔ́ nɔ. É ná nɔ fí e tɔjíhún lɛ́ɛ nɔ́ glín ɖó é. Ayǐkúngban tɔn ná yi káká Sidɔ́ɔn.

¹⁴Isakáa ɔ́, tócí e dó hlɔ̌nhlɔ́n ganjí, bó mlɔ́ ayǐ ɖo kpó mɛ ɔ́ ɖɔhun wɛ é cí.

¹⁵É mɔ ɖɔ fí e gbɔjɛ́ ɖe wɛ émí ɖe ɔ́ nyɔ́, bó mɔ ɖɔ to ɔ́ nyɔ́ ɖɛkpɛ. É xá kpó, bó ná hɛn agban. É jó éɖée dó nú kannumɔzɔ́.

¹⁶Dan ná ɖu gǎn ɖo togun tɔn nu akɔta Izlayɛ́li tɔn ɖě lɛ́ɛ ɖɔhun.

¹⁷Dan ná nyí dan bó ɖo ali jí. É ná nyí amanɔnú jakpata ɖo aliswɛ́ɛ́n jí, bó ná nɔ́ xú aɖǔ sɔ́ dó afɔ, bɔ sɔ́xátɔ́ ná jɛ ayǐ wɛn.

¹⁸Mawu Mavɔmavɔ, un ɖo nukún ɖó hwlɛngán towe wɛ.

¹⁹Gadi ɔ́, mɛ wɔ̌buwɔ́bú ɖé lɛ́ɛ ná hɛn ahwanfunnú, bó ná wá tɔ́n ahwan ɛ. Amɔ̌, é wɛ ná zun dó yě jǐ.

²⁰Acɛ́ɛ ɔ́, nǔɖuɖu ɖagbe ná tíin ɖo gɔ́n tɔn. Nǔ ɖagbe e axɔ́sú ná nɔ́ ɖu ɔ́, é gɔ́n wɛ è nǎ nɔ́ mɔ ɖe.

²¹Nɛfutali ɔ́, agbanlín e è ɖe nyi te ɔ́ wɛ é nyí. É nɔ́ ji vǐ ɖɛkpɛ ɖɛkpɛ.

²²Jozɛ́fu ɔ́, atín e nɔ sɛ́n ganjí bó ɖo tɔjɔtɛn ɖé tó ɔ́ wɛ é nyí. Atínla lɛ́ɛ yi jǐ káká bó dín zɛ ahohó ɔ́ wú.

²³Gǎdatɔ́ lɛ́ɛ ɔ́, yě ɖo cícɔ́ ɛ wɛ. Yě ba xó e, yě da gǎ ɛ.

²⁴Amɔ̌, é hɛn gǎ tɔn syɛ́nsyɛ́n. Nǔbǐwúkpétɔ́ nyɛ Jakɔ́bu tɔn sín hlɔ̌nhlɔ́n zɔ́n, bɔ alɔ tɔn lɛ́ɛ syɛ́n; énɛ́ ɔ́, é húzú lɛ̌ngbɔ́nyitɔ́ Izlayɛ́li tɔn, só Izlayɛ́li tɔn.

²⁵Gbɔn Mawu nyɛ tɔ́ towe tɔn jí ɔ́, gbɔn Mawu Nǔbǐwúkpétɔ́ ɔ́ jí ɔ́, a nǎ mɔ sin sín jǐxwé, a nǎ mɔ sin sín ayǐkúngban glɔ́. Nyɔ̌nu lɛ́ɛ ná ji vǐ, kanlin lɛ́ɛ ná ji vǐ.

²⁶Đɛ e xo dó jǐ towe wɛ nyɛ tɔ́ towe ɖe lɛ́ɛ ɔ́, yě hú gǎn ɖagbe e só tɛgbɛ tɔn lɛ́ɛ nɔ wa é, yě hú gǎn ɖagbe e só kpɛví kpɛví xóxó hwenu tɔn lɛ́ɛ nɔ́ wa é. Nyɔ̌ná nyɛ tɔ́ towe tɔn ní kɔn dó jǐ towe, ní kɔn dó mɛ e nyí gǎn nú nɔví towe lɛ́ɛ jí.

²⁷Bɛnjamɛ́ɛ ɔ́, hla lanwlíɖutɔ́ wɛ é nyí. É nɔ́ wlí lan ɖu zǎnzǎn, bɔ é jɛ gbadanu ɔ́, é nɔ́ má nǔ e é wlí lɛ́ɛ.”

²⁸Mɛ e wá húzú akɔta Izlayɛ́li tɔn wěwe lɛ́ɛ ɔ́, xó e tɔ́ yětɔn ɖɔ nú yě, hwenu e é xo ɖɛ dó yě jí lɛ́ɛ é nɛ́. Đɛ vovo wɛ é xo dó mɛ ɖokpó ɖokpó jí.

²⁹Énɛ́ ɔ́ gúdo ɔ́, Jakɔ́bu ɖɔ lě e nǔ lɛ́ɛ ná nyí gbɔn ɔ́ nú vǐ tɔn lɛ́ɛ ɖɔ: “Un ná yi su tɔ́gbó ce lɛ́ɛ; nǔ nyí mɔ̌ hǔn, mi ɖi mì dó tɔ́gbó ce lɛ́ɛ kpá, ɖo sóxo e ɖo Eflɔ́ni Hetíi ví ɔ́ sín gle mɛ ɔ́ mɛ.

³⁰ Đo Makipela sín gle e ɖo Mamulée nukɔn ɖo Kanáa é. Gle e Ablaxámu xɔ ɖo Eflɔ́ni Hetíi ví ɔ́ sí, bó sɔ́ dó ɖó kúxwé tɔn ná é wɛ.

³¹ Fínɛ́ wɛ è ɖi Ablaxámu kpó asi tɔn Sala kpó ɖó; fínɛ́ wɛ è lɛ̌ wá ɖi Izáki kpó asi tɔn Hlebeka kpó ɖó. Fínɛ́ wɛ nyɛ ɖésúnɔ ɖi Lěya ɖó.

³²Gle ɔ́ kpó sóxo e ɖo gle ɔ́ mɛ ɔ́ kpó ɔ́, Hitíti lɛ́ɛ sí wɛ è xɔ ɖe.”

³³ Ée Jakɔ́bu ɖɔ xó énɛ́ lɛ́ɛ nú vǐ tɔn lɛ́ɛ fó ɔ́, é mlɔ́ ayǐ, bɔ gbɔjɛ tɔn xwɛ, bɔ é yi su tɔ́gbó tɔn lɛ́ɛ.