Read fon Bǐbɛ́mɛ 6 Bible Online

Bǐbɛ́mɛ 6 - fon bible

Bǐbɛ́mɛ 6

¹ Hwenu e gbɛtɔ́ lɛ́ɛ jɛ kún gba jí ɖo ayǐkúngban ɔ́ jí ɔ́,

²nǔɖíɖó e ɖo sɛ́xwé lɛ́ɛ mɔ ɖɔ vǐ yětɔn nyɔ̌nu lɛ́ɛ nyɔ́ ɖɛkpɛ ɖésú, bɔ yě kpɔ́n éé jló yě lɛ́ɛ ɖo nyɔ̌nuví énɛ́ lɛ́ɛ mɛ bó da.

³Ée yě bló mɔ̌ ɔ́, Mawu Mavɔmavɔ ɖɔ émí kún ná jó gbɛtɔ́ nyi gbɛ káká sɔ́yi ó, ɖó nǔ e yě wa nyi do ɔ́ wú. Agbaza kpowun wɛ gbɛtɔ́ nyí; xwe kantɔn (120) jɛ́n é ná nɔ́ nɔ gbɛ xɔ.

⁴ Ée vǐ nǔɖíɖó e ɖo sɛ́xwé lɛ́ɛ tɔn lɛ́ɛ ɖó xó xá vǐ nyɔ̌nu gbɛtɔ́ tɔn lɛ́ɛ ɔ́, yě ji vǐ nú yě. Vǐ énɛ́ lɛ́ɛ wɛ nyí gbɛtɔ́ sakasaka e tíin ɖo ayǐkúngban ɔ́ jí hwenɛ́nu lɛ́ɛ. Yě wɛ nyí ahwanfuntɔ́ syɛ́nsyɛ́n hwexónu tɔn lɛ́ɛ; yě lɛ́ kpo ɖo ayǐkúngban jí káká jɛ égbé.

⁵ Mawu Mavɔmavɔ mɔ ɖɔ dǎka xixo gbɛtɔ́ tɔn sukpɔ́, bɔ gbɛtɔ́ nɔ́ ɖo nǔ nyanya kɛ́ɖɛ́ lin wɛ hwebǐnu.

⁶Ée Mawu Mavɔmavɔ mɔ mɔ̌ ɔ́, gbɛtɔ́ e é bló ɔ́ wá vɛ́ n'i, bɔ akpɔ ɖó e.

⁷Bɔ é ɖɔ: “Un ná sú gbɛtɔ́ e un bló ɔ́ sín kún dó sín ayǐkúngban ɔ́ jí. Un ná sú gbɛtɔ́ kpó kanlin kpó, kanlin e nɔ sá lɛ́ɛ kpódó xɛ lɛ́ɛ kpó bǐ sín kún dó, ɖó blǒ e un bló yě ɔ́ wá vɛ́ nú mì.”

⁸Mawu Mavɔmavɔ ká nyɔ́ xomɛ dó nya ɖé wú; nya ɔ́ nɔ́ nyí Nɔwée.

⁹ Nɔwée ɔ́, mɛɖé wɛ é nyí bó nɔ́ wa nǔ jlɔ́jlɔ́, ɖo mɛ e kpó é kpó ɖo gbɛ hwenɛ́nu lɛ́ɛ tɛ́ntin. È nɔ mɔ nǔ jɛ do ɖě ɖɔ dó éyɛ́ wú ǎ; é nɔ́ yi xá Mawu. Vǐ tɔn lɛ́ɛ ɖíe:

¹⁰Vǐ súnnu atɔn wɛ é ji: Sɛ́mu, Cámu kpódó Jafɛ́ti kpó.

¹¹Mawu mɔ ɖɔ gbɛtɔ́ lɛ́ɛ ɖě kún sɔ́ ɖo jlǒ émítɔn wa wɛ ó; yě bǐ wɛ nyí nǔ baɖabaɖa, bɔ dǎka kpé ayǐkúngban ɔ́ bǐ jí.

¹²É kpɔ́n ayǐkúngban ɔ́ jí bó mɔ ɖɔ gbɛtɔ́ lɛ́ɛ bǐ wɛ nyí nǔ baɖabaɖa; yě bǐ wɛ.

¹³Ée nǔ nyí mɔ̌ ɔ́, Mawu ɖɔ nú Nɔwée ɖɔ: “Un ná gbɔ bó hu gbɛtɔ́ lɛ́ɛ bǐ, ɖó yě ɖo dǎka xo gbɔn ayǐkúngban ɔ́ bǐ jí wɛ. Un ná sú gbɛtɔ́ kpó nǔ e ɖo ayǐkúngban ɔ́ jí lɛ́ɛ bǐ kpó sín kún dó.

¹⁴A nǎ zé gofɛ́ɛtín dó bló tɔjíhún ɖokpó ná. A nǎ gbo tɔjíhún ɔ́ mɛ, bɔ é ná ɖó xɔ mɛ gěgé, bó ná sá awɔn dó ɖo xomɛ kpódó gǔdo kpó.

¹⁵Lě e a nǎ bló tɔjíhún ɔ́ gbɔn ɔ́ ɖíe: ga tɔn ná ɖó mɛ̌tlu kantɔn gban (150), gblǒ tɔn ná ɖó mɛ̌tlu koatɔ́n (25), bɔ jǐ yiyi tɔn ná ɖó mɛ̌tlu afɔtɔn.

¹⁶A nǎ bló pinyɔ́ɔ ɖó tɔjíhún ɔ́ ta, bó ná gbá xɔ ɖ'é jí, bɔ xɔ ɔ́ ná ɖó mɛ̌tlu vlɔ́ dó tɔjíhún ɔ́. A nǎ ɖe ali dó tɔjíhún ɔ́ wú ɖo akpá ɖokpó bó dó hɔn nu. Tɔjíhún ɔ́, síngbó atɔnnɔ wɛ é ná nyí.

¹⁷Đó nyɛ ná bló bɔ tɔ ná ɖi sín kpé fí bǐ, bɔ nǔ e kó sixú ɖo gbɛ ɖo ayǐkúngban jí é bǐ ná kú. Un ná sú nǔ e ɖó funfún ɖo ayǐkúngban jí é bǐ sín kún dó.

¹⁸Amɔ̌, hwɛ ɔ́, un ná jɛ akɔ xá we; a nǎ byɔ́ tɔjíhún ɔ́ mɛ, hwi kpó vǐ towe lɛ́ɛ kpó, kpó asi towe kpó, kpódó vǐ towe lɛ́ɛ sín asi lɛ́ɛ kpó.

¹⁹Nǔ e ɖo gbɛ lɛ́ɛ bǐ ɔ́, a nǎ zé we we; a nǎ zé asú ɖokpó asi ɖokpó dó tɔjíhún ɔ́ mɛ, bɔ yě ná nɔ fínɛ́ xá we, bónú mi kpó yě kpó ná nɔ gbɛ.

²⁰Kanlin alɔkpa alɔkpa lɛ́ɛ, xɛ alɔkpa alɔkpa lɛ́ɛ, kpó kanlin alɔkpa alɔkpa e nɔ sá gbɔn kɔ́ mɛ lɛ́ɛ kpó, asú ɖokpó asi ɖokpó ná wá gɔ̌n towe, bó ná nɔ gbɛ.

²¹Hwɛ ɔ́, a nǎ hɛn nǔ e è ko nɔ ɖu ɔ́ bǐ dó hwiɖée jí, bɔ hwi kpó yě kpó ná nɔ́ ɖu.”

²² Nǔ e Nɔwée wa ɔ́ nɛ́. É bló lě e Mawu ɖɔ n'i gbɔn ɔ́ pɛ́pɛ́pɛ́.