Read fon Bǐbɛ́mɛ 7 Bible Online

Bǐbɛ́mɛ 7 - fon bible

Bǐbɛ́mɛ 7

¹Mawu Mavɔmavɔ ɖɔ nú Nɔwée ɖɔ: “Byɔ̌ tɔjíhún ɔ́ mɛ, hwi kpó xwédo towe bǐ kpó, ɖó un mɔ ɖɔ hwi ɖokpónɔ géé wɛ nɔ́ wa nǔ jlɔ́jlɔ́ ɖo mɛ e ɖo ayǐkúngban jí lɛ́ɛ mɛ.

²A nǎ fɔ kanlin e ma vɛ́ mɛ ǎ lɛ́ɛ, asú ɖokpó asi ɖokpó donu tɛ́nwe, bó ná zé éé vɛ́ mɛ lɛ́ɛ asú ɖokpó asi ɖokpó.

³A nǎ fɔ xɛ lɛ́ɛ lɔ asú ɖokpó asi ɖokpó donu tɛ́nwe. A nǎ bɛ́ kanlin énɛ́ lɛ́ɛ kpó xɛ énɛ́ lɛ́ɛ kpó dó tɔjíhún ɔ́ mɛ; énɛ́ ɔ́, a nǎ hɛn kún yětɔn ɖó te ɖo ayǐkúngban ɔ́ jí.

⁴Đó é kpo azǎn tɛ́nwe din bɔ un ná sɛ́ jǐ dó, bɔ é ná ja kɔn nyi ayǐkúngban ɔ́ jí xɔ kéze kanɖé (40) zǎn kanɖé (40), bɔ un ná vɔ nǔ e ɖo gbɛ ɖo ayǐkúngban ɔ́ jí bɔ un bló lɛ́ɛ bǐ.”

⁵Nɔwée bló nǔ e Mawu Mavɔmavɔ ɖɔ n'i lɛ́ɛ bǐ nǔgbó.

⁶Xwe nǔwɔntɔn (600) wɛ Nɔwée ɖó hwenu e tɔ ɖaxó ɔ́ gba mɛ ɖo ayǐkúngban ɔ́ jí é.

⁷ Nɔwée kpó vǐ tɔn lɛ́ɛ kpó asi tɔn lɛ́ɛ kpó, kpódó vǐ tɔn sín asi lɛ́ɛ kpó byɔ́ tɔjíhún ɔ́ mɛ, bó ná gán ɖo tɔ sí.

⁸Kanlin e vɛ́ mɛ lɛ́ɛ kpó éé má vɛ́ mɛ ǎ lɛ́ɛ kpó, kpó xɛ lɛ́ɛ kpó, kpódó nǔ e nɔ́ sá gbɔn kɔ́ mɛ lɛ́ɛ kpó ɔ́,

⁹yě nɔ́ zɔn webɔ webɔ asú ɖokpó asi ɖokpó wá Nɔwée gɔ́n lě e Mawu kó ɖɔ gbɔn nú Nɔwée é.

¹⁰Azǎn tɛ́nwegɔ́ ɔ́ gbe ɔ́, tɔ gba gbɛ ɔ́ bǐ.

¹¹ Hwenu e Nɔwée ɖo xwe nǔwɔntɔn (600) ɖó wɛ ɔ́, sun wegɔ́ ɔ́ sín azǎn afɔtɔn-nukún-we gbe ɔ́, sin e ɖo domaɖó-azan mɛ ɔ́ gba wu, bɔ hɔn e hɛn sin e ɖo jǐnukúnsin ɔ́ ɖó te ɔ́ hun.

¹²Bɔ jǐ jɛ jija jí, bó ja xɔ kéze kanɖé (40) zǎn kanɖé (40).

¹³Gbe énɛ́ ɔ́ gbe wɛ Nɔwée kpódó asi tɔn kpó vǐ tɔn Sɛ́mu, Cámu kpódó Jafɛ́ti kpó, kpódó asi yětɔn lɛ́ɛ kpó byɔ́ tɔjíhún ɔ́ mɛ.

¹⁴Yě kpó gběkanlin tɛnmɛ tɛnmɛ lɛ́ɛ kpó, xwé gbe kanlin tɛnmɛ tɛnmɛ lɛ́ɛ kpó, kpó nǔ tɛnmɛ tɛnmɛ e nɔ sá gbɔn kɔ́ mɛ lɛ́ɛ kpó xɛ tɛnmɛ tɛnmɛ lɛ́ɛ kpó, kpó nǔ e kó sixú nɔ́ zɔn lɛ́ɛ bǐ kpó.

¹⁵Nǔ e kó sixú ɖó funfún lɛ́ɛ bǐ zɔn webɔ webɔ, asú ɖokpó asi ɖokpó, bó yi Nɔwée gɔ́n, ɖo tɔjíhún ɔ́ mɛ.

¹⁶Nǔ e ɖo gbɛ lɛ́ɛ bǐ byɔ́ tɔjíhún ɔ́ mɛ, asú kpó asi kpó lě e Mawu Mavɔmavɔ ɖɔ gbɔn nú Nɔwée é. Énɛ́ ɔ́ gúdo ɔ́, Mawu Mavɔmavɔ sú tɔjíhún ɔ́ sín hɔn ɔ́ dó Nɔwée.

¹⁷Jǐ ɔ́ ja xɔ azǎn kanɖé (40). Sin ɔ́ nɔ́ ɖo jǐ yi wɛ, bó nɔ́ ɖo tɔjíhún ɔ́ zé dó jǐ wɛ, bɔ tɔjíhún ɔ́ ɖo sin nukún mɛ.

¹⁸Sin ɔ́ ɖo jijɛ jí wɛ, bó ɖo jǐ yi wɛ mɔ̌hunkɔtɔn, bɔ tɔjíhún ɔ́ ɖo sin nukún mɛ bó ɖo yiyi wɛ.

¹⁹Sin ɔ́ ɖo jijɛ jí wɛ káká bó bú só ɖaxó ɖaxó e ɖo hwe glɔ́ lɛ́ɛ bǐ.

²⁰Sin ɔ́ bú só lɛ́ɛ, káká bó ɖó mɛ̌tlu tɛ́nwe adaɖé ɖo só lɛ́ɛ ta nu.

²¹Nǔ e ɖo gbɛ ɖo ayǐkúngban ɔ́ jí lɛ́ɛ bǐ wɛ kú: xɛ lɛ́ɛ, xwé gbe kanlin lɛ́ɛ, gběkanlin lɛ́ɛ, bǐ wɛ kú. Nǔ e gɔ́ ayǐkúngban jí lɛ́ɛ kpódó gbɛtɔ́ lɛ́ɛ kpó bǐ wɛ kú.

²²Nǔ e kó sixú ɖó funfún, nǔ e kó sixú ɖo gbɛ ɖo ayǐkúngban jí lɛ́ɛ bǐ wɛ kú.

²³Énɛ́ ɔ́, Mawu Mavɔmavɔ sú nǔ e ɖo gbɛ ɖo ayǐkúngban ɔ́ jí lɛ́ɛ bǐ sín kún dó. É sú yě bǐ sín kún dó sín ayǐkúngban jí. Nɔwée kɛ́ɖɛ́ jɛ́n gán, éé kpó mɛ tɔn lɛ́ɛ kpó, kpó kanlin e byɔ́ tɔjíhún ɔ́ mɛ xá ɛ lɛ́ɛ kpó.

²⁴Tɔ ɔ́ nɔ gǐgɔ́ mɔ̌ káká nú azǎn kantɔn gban (150).