Read fon Bǐbɛ́mɛ 8 Bible Online

Bǐbɛ́mɛ 8 - fon bible

Bǐbɛ́mɛ 8

¹Mawu ká wɔn Nɔwée kpódó kanlin e kpó é kpó ɖo tɔjíhún ɔ́ mɛ lɛ́ɛ kpó ǎ. É wɔn gběkanlin lɛ́ɛ ǎ, é wɔn xwé gbe kanlin lɛ́ɛ ǎ. É sɛ́ jɔhɔn ɖé dó bɔ é nyi dó ayǐkúngban ɔ́ jí bɔ sin ɔ́ jɛ mimɛ jí.

²Domaɖó-azan e hun ɔ́ sú, bɔ hɔn e ɖo hunhun ɖo jǐnukúnsin lɛ́ɛ sú; énɛ́ ɔ́, jǐ ɔ́ kɛn,

³bɔ sin ɔ́ jɛ yiyi jí kpɛɖé kpɛɖé. Azǎn kantɔn gban (150) gúdo ɔ́, é yi do,

⁴bɔ ɖo sun tɛ́nwegɔ́ ɔ́ sín azǎn afɔtɔn-nukún-wegɔ́ ɔ́ gbe ɔ́, tɔjíhún ɔ́ yi glín ɖó só Alaláti tɔn lɛ́ɛ wú.

⁵Sin ɔ́ ɖo yiyi wɛ káká nú sun wǒ. Đo sun wǒgɔ́ ɔ́ sín azǎn nukɔntɔn ɔ́ gbe ɔ́, è jɛ só lɛ́ɛ sín ta nu mɔ jí.

⁶Azǎn kanɖégɔ́ ɔ́ (40) gbe ɔ́, Nɔwée hun flɛtɛ́li e é ɖe dó tɔjíhún ɔ́ wú ɔ́,

⁷bó jó avǔnsákɔwó ɖokpó dó bɔ é yi. Ée é yi ɔ́, é lɛ́ kɔ wá tlóló, bó nɔ́ ɖo yiyi wɛ, bó nɔ́ ɖo wǐwá wɛ káká bɔ sin ɔ́ bǐ vɔ ɖo ayǐkúngban ɔ́ jí.

⁸É lɛ́ jó xwelé ɖokpó dó bɔ é yi; é bló mɔ̌, bó ná kpɔ́n ɖɔ sin ɔ́ kó ɖe kpo a jí.

⁹Xwelé ɔ́ ká mɔ fí e é ná ɖó jɛ ɔ́ ɖěbǔ ǎ, bó gbɔ bó lɛ́ kɔ wá Nɔwée gɔ́n, ɖó sin lɛ́ kpo ɖo ayǐkúngban ɔ́ bǐ jí. Nɔwée ka dlɛ́n alɔ bó wlí i, bó sɔ́ ɛ dó tɔjíhún ɔ́ mɛ.

¹⁰Nɔwée nɔ te nú azǎn tɛ́nwe, bó lɛ́ jó xwelé ɔ́ dó bɔ é yi.

¹¹Énɛ́ ɔ́ tɔn ɔ́, xwelé ɔ́ wá lɛ́ kɔ wá gɔ̌n tɔn gbadanu, bó ba olívuma zínzɔ́n ɖokpó hɛn nu. Énɛ́ ɔ́, Nɔwée mɔ ɖɔ sin ɔ́ kó ɖe kpo ɖo ayǐkúngban ɔ́ jí.

¹²Nɔwée lɛ́ kú hǔn bó nɔ te nú azǎn tɛ́nwe ɖěvo, bó lɛ́ jó xwelé ɔ́ dó bɔ é yi; é ká sɔ́ lɛ́ kɔ wá gɔ̌n tɔn ǎ.

¹³Hwenu e Nɔwée ɖo xwe nǔwɔntɔn-nukún-ɖokpó (601) ɖó wɛ ɔ́, sun tɔn nukɔntɔn sín azǎn nukɔntɔn ɔ́ gbe ɔ́, sin ɔ́ xú sín ayǐkúngban ɔ́ jí. Nɔwée ɖe nǔ e é bú dó tɔjíhún ɔ́ síin bó kpɔ́n. É ná mɔ nǔɖé kpowun ɔ́, sin ɔ́ kó xú sín ayǐkúngban ɔ́ jí.

¹⁴Đo sun wegɔ́ ɔ́ sín azǎn koatɔ́n-nukún-wegɔ́ (27) ɔ́ mɛ ɔ́, ayǐkúngban ɔ́ xú bǐ.

¹⁵Énɛ́ ɔ́, Mawu ɖɔ nú Nɔwée ɖɔ:

¹⁶“Tɔ́n sín tɔjíhún ɔ́ mɛ hwi kpó asi towe kpó, vǐ towe lɛ́ɛ kpó, kpódó vǐ towe lɛ́ɛ sín asi lɛ́ɛ kpó.

¹⁷Đe kanlin tɛnmɛ tɛnmɛ e ɖo tɔjíhún ɔ́ mɛ xá we lɛ́ɛ bǐ tɔ́n. Đe xɛ kpó kanlin kpó, kpó nǔ e nɔ́ sá gbɔn kɔ́ mɛ lɛ́ɛ bǐ kpó tɔ́n. Yě nǐ kpé ayǐkúngban ɔ́ jí bó gba kún bó ji gba.”

¹⁸Ée Mawu ɖɔ mɔ̌ ɔ́, Nɔwée tɔ́n sín tɔjíhún ɔ́ mɛ, é kpó asi tɔn kpó vǐ tɔn lɛ́ɛ kpó, kpódó vǐ tɔn lɛ́ɛ sín asi lɛ́ɛ kpó.

¹⁹Énɛ́ ɔ́ gúdo ɔ́, kanlin tɛnmɛ tɛnmɛ lɛ́ɛ, xɛ tɛnmɛ tɛnmɛ lɛ́ɛ, kpó nǔ tɛnmɛ tɛnmɛ e nɔ sá gbɔn kɔ́ mɛ lɛ́ɛ bǐ kpó tɔ́n sín tɔjíhún ɔ́ mɛ, ɖě jɛ ɖě gúdo.

²⁰Ée yě tɔ́n ɔ́, Nɔwée bló vɔ̌sákpe ɖokpó nú Mawu Mavɔmavɔ, bó fɔ kanlin tɛnmɛ tɛnmɛ e ma vɛ́ mɛ ǎ lɛ́ɛ ɖokpó ɖokpó, xɛ tɛnmɛ tɛnmɛ e ma vɛ́ mɛ ǎ lɛ́ɛ ɖokpó ɖokpó, bó bɛ́ bǐ dó sá vɔ̌ e è nɔ dó zo ɔ́ nú Mawu Mavɔmavɔ ɖo vɔ̌sákpe ɔ́ jí.

²¹Bɔ Mawu Mavɔmavɔ se vɔ̌ ɔ́ sín wǎn, bɔ é nyɔ́ se n'i, bɔ é ɖɔ nú éɖée ɖɔ: “Un sɔ́ ná dó nu ayǐkúngban ɔ́ ɖě gbeɖé, ɖó dǎka xixo gbɛtɔ́ lɛ́ɛ tɔn wú ǎ, ɖó sín do wɛ gbɛtɔ́ kó ɖó ayi nyanya sín. Un ka sɔ́ ná vɔ nǔ e ɖo gbɛ ɖo ayǐkúngban ɔ́ jí lɛ́ɛ bǐ ɖě lě e un bló gbɔn din é ǎ.

²²Nú ayǐkúngban ɔ́ ɖo te jɛ́n wɛ ɔ́, jinukún e è nǎ dó é kpó ée è nǎ ya é kpó ná tíin; avivɔ kpódó yǒzo kpó ná tíin, alǔun kpódó jǐ hwenu kpó ná tíin, zǎn kpódó kéze kpó ná tíin.”