Read fon Bǐbɛ́mɛ 9 Bible Online

Bǐbɛ́mɛ 9 - fon bible

Bǐbɛ́mɛ 9

¹ Mawu xo ɖɛ dó Nɔwée kpódó vǐ tɔn lɛ́ɛ kpó jí, bó ɖɔ nú yě ɖɔ: “Mi gba kún, mi ji gba, bó kpé ayǐkúngban ɔ́ bǐ jí.

²Kanlin e ɖo ayǐkúngban jí lɛ́ɛ, xɛ lɛ́ɛ, nǔ e kó nɔ́ sá gbɔn kɔ́ mɛ lɛ́ɛ kpó hweví lɛ́ɛ kpó bǐ ná nɔ́ ɖi xɛsi nú mi. Yě ɖo alɔ mitɔn mɛ.

³Nǔ e kó sixú nɔ́ dán wǔ ɖo ayǐkúngban ɔ́ jí, bó ɖo gbɛ lɛ́ɛ bǐ wɛ ná nyí nǔɖuɖu nú mi. Un ná nǔ énɛ́ lɛ́ɛ bǐ mi lě e un ko ná gběhan mi gbɔn é.

⁴ Amɔ̌, nǔ ɖokpó e ɖ'é mɛ ɔ́, mi ɖó ná ɖu lan e mɛ hun kpo ɖe ɔ́ ǎ.

⁵Mɔ̌ ɖokpó ɔ́, un ná kan hun mitɔn byɔ́. Un ná kan hun mitɔn byɔ́ kanlin e ná hu gbɛtɔ́ é bǐ, bó ná kanbyɔ́ gbɛtɔ́ e ná hu nɔzo tɔn é bǐ.

⁶ Nyɛ Mawu bló gbɛtɔ́ bɔ é nyí akpajlɛ́ ce; énɛ́ wú ɔ́, mɛ e kɔn gbɛtɔ́ sín hun kɔn nyi ayǐ ɔ́, gbɛtɔ́ wɛ ná kɔn hun tɔn kɔn nyi ayǐ.

⁷ Midɛɛ lɛ́ɛ ɔ́, mi gba kún, mi ji gba, mi ji kpé ayǐkúngban ɔ́ bǐ jí.”

⁸Mawu lɛ́ ɖɔ nú Nɔwée kpó vǐ tɔn lɛ́ɛ kpó ɖɔ:

⁹“Nyɛ ɔ́, un jɛ akɔ xá mi, bó jɛ xá kúnkan mitɔn lɛ́ɛ,

¹⁰bó jɛ xá nǔ e ɖo gbɛ, bó ɖo ayǐkúngban ɔ́ jí xá mi lɛ́ɛ: xɛ lɛ́ɛ, xwé gbe kanlin lɛ́ɛ, gběkanlin lɛ́ɛ, nǔ e tɔ́n sín tɔjíhún ɔ́ mɛ lɛ́ɛ, kanlin e ɖo ayǐkúngban ɔ́ jí lɛ́ɛ bǐ.

¹¹Un jɛ akɔ xá mi ɖɔ: tɔ ɖě sɔ́ ná gba gbɛ ɔ́, bó hu nǔ e ɖo gbɛ ɖo ayǐkúngban jí lɛ́ɛ ɖě gbeɖé ǎ. Tɔ ɖě sɔ́ ná gba nǔ e ɖo gbɛ ɖo ayǐkúngban jí lɛ́ɛ ɖě gbeɖé nǔgbó ǎ.”

¹²Mawu lɛ́ ɖɔ: “Akɔ e un jɛ xá mi ɔ́, nǔ e ná ɖe xlɛ́ nyi kpó mi kpó, kpódó nǔ e ɖo gbɛ ɖo ayǐkúngban jí lɛ́ɛ bǐ kpó káká sɔ́yi ɔ́ ɖíe:

¹³Un sɔ́ nyǐ ce ɖó akpɔ́kpɔ́ mɛ bɔ é ná nyí akɔ e un jɛ xá mi ɔ́ sín wuntun ɖo nyɛ kpó gbɛ ɔ́ kpó tɛ́ntin.

¹⁴Nú un kplé akpɔ́kpɔ́ lɛ́ɛ ɖó jǐnukúnsin hweɖěbǔnu ɔ́, nyǐ ɔ́ ná nɔ́ ɖi ɖo akpɔ́kpɔ́ ɔ́ mɛ,

¹⁵bó ná nyí flǐn nú mì, nú akɔ e un jɛ xá mi, bó jɛ xá nǔ e ɖo gbɛ ɔ́ mɛ lɛ́ɛ bǐ é, bɔ tɔ sɔ́ ná gba gbɛ ɔ́, bó vɔ nǔ e ɖo gbɛ lɛ́ɛ ɖěbǔ ǎ.

¹⁶Nyǐ ɔ́ ná ɖo akpɔ́kpɔ́ ɔ́ mɛ, bɔ un nǎ nɔ́ mɔ, bɔ é ná nyí flǐn nú mì nú akɔ e un jɛ xá mi bó jɛ xá nǔ e ɖo gbɛ ɖo ayǐkúngban jí lɛ́ɛ bǐ káká sɔ́yi é.”

¹⁷Mawu lɛ́ vɔ́ ɖɔ nú Nɔwée ɖɔ: “Wuntun e nyí xlɛ̌ nú akɔ e un jɛ xá nǔ e ɖo gbɛ ɖo ayǐkúngban jí lɛ́ɛ bǐ ɔ́ nɛ́.”

¹⁸Nɔwée ɔ́, vǐ tɔn atɔn lɛ́ɛ kpó é kpó tɔ́n sín tɔjíhún ɔ́ mɛ; nyǐkɔ yětɔn ɖíe: Sɛ́mu, Cámu kpódó Jafɛ́ti kpó. Cámu ɔ́ wɛ nyí Kanáa sín tɔ́.

¹⁹Nɔwée sín vǐ atɔn énɛ́ lɛ́ɛ wɛ gba kún, bó kpé ayǐkúngban ɔ́ bǐ jí.

²⁰Nɔwée wɛ nyí glesi nukɔntɔn e dó vǐwun é.

²¹É nu vɛ̌ɛn mú gbe ɖokpó, bó jɛ mɛ̌ jɔgbe ɖo goxɔ tɔn mɛ.

²²Bɔ Cámu, Kanáa tɔ́ ɔ́ mɔ tɔ́ ɔ́ ɖo mɛ̌, bó yi ɖɔ nú nɔví tɔn we ɖě lɛ́ɛ ɖo kɔ́xo.

²³Énɛ́ ɔ́, Sɛ́mu kpódó Jafɛ́ti kpó sɔ́ awu ɖaxó ɖokpó nyi abɔ̌ yětɔn ta, bó zɔn gǔdo agɔ káká byɔ́ goxɔ e mɛ tɔ́ yětɔn ɖe ɔ́ mɛ, bó sɔ́ cyɔ́n n'i. Yě ká sɔ́ kɔ ɖó zɔ; yě mɔ tɔ́ yětɔn sín mɛ̌ ǎ.

²⁴Ée ahan wá hɔ́n nú Nɔwée ɔ́, é se nǔ e vǐ tɔn kpɛví ɔ́ bló n'i é,

²⁵bó ɖɔ: “Nǔɖé ná nyɔ́ nú Kanáa ǎ; é wɛ ná nyí kannumɔ kannumɔ lɛ́ɛ tɔn nú nɔví tɔn lɛ́ɛ.” Nu wɛ un dó e.

²⁶É lɛ́ ɖɔ: “Susu nú Mawu Mavɔmavɔ, Mawu Sɛ́mu tɔn! Kanáa ní ká nyí kannumɔ nú Sɛ́mu.

²⁷Mawu ní bló bónú Jafɛ́ti ní gba kún. Sɛ́mu sín goxɔ sá wɛ é ká ná nɔ, bɔ Kanáa ka ná nyí kannumɔ nú yě.”

²⁸Ée tɔ gba gbɛ ɔ́ gúdo ɔ́, Nɔwée lɛ́ nɔ gbɛ xɔ xwe afɔɖé kantɔn gban (350).

²⁹Nɔwée nɔ gbɛ xɔ xwe afɛnɛ kantɔn gban (950) bó kú.