Read fon 2 Samuwɛ́li 1 Bible Online

2 Samuwɛ́li 1 - fon bible

2 Samuwɛ́li 1

¹Ée Davídi hu Amalɛ́ki ví lɛ́ɛ ɔ́, é lɛ́ kɔ wá Siklági, bo bló azǎn we ɖo fínɛ́. Sawúlu ka ko kú hwenɛ́nu nɛ́.

²Azǎn tɔn atɔngɔ́ ɔ́ gbe ɔ́, nya ɖokpó gosín Sawúlu sín ahwankpá mɛ bó wá. Nya ɔ́ vún awu dó kɔ nú éɖée, bó lɛ kɔ́ dó ta dó ɖe xlɛ́ ɖɔ émí ɖo aluwɛ mɛ. Ée é wá Davídi nukɔn ɔ́, é jɛ kpo bo ɖe kɔ́.

³Bɔ Davídi kanbyɔ́ ɛ ɖɔ: “Fítɛ́ a gosín?” Bɔ é yí gbe n'i ɖɔ: “Ahwankpá Sawúlu tɔn mɛ wɛ un hɔn sín.”

⁴Davídi ɖɔ: “Étɛ́ ká jɛ? Đɔ nú mì.” Bɔ é ɖɔ n'i ɖɔ: “Ahwangɔnu Izlayɛ́li tɔn ɔ́ hɔn ɖo ahwan nukɔn. È hu mɛ gěgé ɖo yě mɛ, káká bɔ Sawúlu kpó vǐ tɔn Jonatáan ɔ́ lɔmɔ̌ kpó kú.”

⁵Davídi kanbyɔ́ nya e hɛn xó énɛ́ wá ɔ́ ɖɔ: “Nɛ̌ a wa gbɔn bo tunwun ɖɔ Sawúlu kpó vǐ tɔn Jonatáan kpó cí ahwan?”

⁶ Nya ɔ́ yí gbe n'i ɖɔ: “Yiyi wɛ un ɖe bo wá jɛ Gilubowa só jí, bó mɔ Sawúlu gán jɛ hwǎn tɔn wú, lobɔ ahwankɛkɛ́ví kpó sɔ́xátɔ́ ɖé lɛ́ɛ kpó ɖo sisɛkpɔ́ ɛ wɛ, bó ná hu i.

⁷É lílɛ́ bó mɔ mì, lobo ylɔ́ mì, bɔ un sɔ.

⁸É kanbyɔ́ mì ɖɔ: ‘Hwi mɛ̌ ká nɛ́?’ Bɔ un yí gbe n'i ɖɔ: ‘Amalɛ́ki ví ɖé wɛ.’

⁹Bɔ é ɖɔ nú mì ɖɔ: ‘Wǎ nɔ te akpá ce fí, bó hu mì, ɖó un ɖo wǔvɛ́ ɖé mɔ wɛ, ayi ce ka kpo ɖo te.’

¹⁰Ée é ɖɔ mɔ̌ ɔ́, un sɛkpɔ́ ɛ lobo hu i, ɖó un mɔ ɖɔ wǔ e é gblé ɔ́, é kún sɔ́ sixú nɔ gbɛ ó. Sɛ́mɛɖó, ée un bló mɔ̌ é ɔ́, un zé tablá tɔn kpó alɔgan tɔn kpó wá nú we.”

¹¹Ée Davídi se mɔ̌ ɔ́, é vún awu dó kɔ nú éɖée, bɔ mɛ e ɖo fínɛ́ xá ɛ lɛ́ɛ lɔ vún awu dó kɔ nú yěɖée.

¹²Yě byɔ́ aluwɛ mɛ; yě ɖo avǐ ya wɛ, yě ɖu nǔ ǎ káká jɛ gbadanu. Yě byɔ́ aluwɛ mɛ, ɖó Sawúlu kpó vǐ tɔn Jonatáan kpó, kpódó Izlayɛ́li ví e ɖo togun Mawu Mavɔmavɔ tɔn mɛ bó cí ahwan lɛ́ɛ bǐ kpó tamɛ.

¹³Davídi kanbyɔ́ nya ɔ́ ɖɔ: “Fítɛ́ nu ka nú we?” Nya ɔ́ yí gbe bo ɖɔ: “Nya jǒnɔ Amalɛ́ki ví ɖé sín vǐ wɛ un nyí. Fí wɛ é sá xwé nyi.”

¹⁴Bɔ Davídi sú xó bó ɖɔ: “Étɛ́! A ja axɔ́sú e Mawu Mavɔmavɔ sɔ́ ɔ́ hu gbé bɔ xɛsi ɖi we ǎ!”

¹⁵Ée Davídi ɖɔ mɔ̌ ɔ́, é ylɔ́ mɛsɛntɔ́ tɔn lɛ́ɛ ɖokpó, bó ná ɛ gbe ɖɔ: “Hu dǎwe nɛ́.” Mɛsɛntɔ́ ɔ́ hu Amalɛ́ki ví ɔ́ nǔgbó.

¹⁶Hwenɛ́nu ɔ́, Davídi ɖɔ: “Hwi ɖésú wɛ zɔ́n bɔ è hu we, hwi ɖésú wɛ ɖɔ émí hu axɔ́sú e Mawu Mavɔmavɔ sɔ́ é.”

¹⁷Énɛ́ gúdo ɔ́, Davídi kpa nǔwamɛhan ɖokpó dó Sawúlu kpó vǐ tɔn Jonatáan kpó e kú é tamɛ.

¹⁸ É ɖɔ è nǐ kplɔ́n han énɛ́ Judáa ví lɛ́ɛ bǐ. Han e è nɔ ylɔ́ ɖɔ “Nǔwamɛhan Gǎ tɔn” ɔ́, è wlǎn dó “Nǔjlɔ́jlɔ́watɔ́ wéma” ɔ́ mɛ. Han ɔ́ ɖíe:

¹⁹Izlayɛ́li, étɛ́wú ahwanfuntɔ́ towe ɖaxó ɔ́ ká kú mɔ̌? Étɛ́wú ahwanfuntɔ́ syɛ́nsyɛ́n lɛ́ɛ ká ɖo títɛ́ ɖo só lɛ́ɛ jí?

²⁰È ma ɖɔ xó énɛ́ nú mɛɖé se ɖo Gati ó. È ma ɖɔ xó énɛ́ ɔ́ gbɔn Acikelɔ́ni sín ali lɛ́ɛ ɖě jí ó; é má nyí mɔ̌ ǎ ɔ́, xomɛ táá hun Filisitɛ́ɛn lɛ́ɛ sín vǐ nyɔ̌nu lɛ́ɛ, mɛ e ma nɔ sɛn Mawu ǎ lɛ́ɛ sín vǐ nyɔ̌nu lɛ́ɛ táá j'awǎ.

²¹Gilubowa só lɛ́ɛ mi! Ahǔn má sɔ́ ja dó mi jí gbeɖé ó, jǐ ma sɔ́ ja dó mi jí gbeɖé ó. È ma sɔ́ mɔ ayǐkúngban e ná nyɔ́ jinukún ɔ́ ɖě ɖo mi sí gbeɖé ó, ɖó fínɛ́ wɛ ahwanfuntɔ́ lɛ́ɛ sín gǎglónú j'ayǐ ɖe, bɔ yě ɖu winnyá. Sawúlu tɔn lɔ j'ayǐ ɖo fínɛ́, bɔ mɛɖé sɔ́ ná sá ami dó gbeɖé ǎ.

²²Jonatáan sín gǎ nɔ yi do ɖo kɛntɔ́ nukɔn ǎ, kɛntɔ́ ɔ́ ná bó dó hlɔ̌nhlɔ́n gbɔn ɖěbǔ ɔ́, gǎ tɔn nɔ yi do ǎ. Sawúlu ka nɔ nyi hwǐ tɔn gblá ǎ.

²³Hwenu e Sawúlu kpó Jonatáan kpó ɖo gbɛ ɔ́, yě yí wǎn nú yěɖée ɖésú. Yě yí wǎn nú yěɖée káká bó zɔn kpɔ́ yi kú. Yě yá alɔ hú gangan, Yě kpan akɔ́n hú kinnikínní.

²⁴Vǐ nyɔ̌nu Izlayɛ́li tɔn lɛ́ɛ e mi, mi ví Sawúlu; é wɛ nɔ dó akwɛ́núvɔ mi; é wɛ nɔ zé sikánú lɛ́ɛ dó ɖó acɔ́ nú awu mitɔn lɛ́ɛ.

²⁵Étɛ́wú ahwan ná ɖo te mɔ̌ bɔ ahwanfuntɔ́ syɛ́nsyɛ́n lɛ́ɛ ná kú? Étɛ́wú Jonatáan ka ná kú jɛ só jí xwlɛlɛ mɔ̌?

²⁶Nɔví ce Jonatáan, kú towe wɛ zɔ́n bɔ un ɖo wǔvɛ́ mɔ wɛ lě. Hwi wɛ nɔ dó xomɛhunhun nú mì. A yí wǎn nú mì bɔ é vɛ́ jlɛ́. Wǎn yíyí e a ɖǒ nú mì ɔ́ hú wǎn e è nɔ yí nú nyɔ̌nu é.

²⁷Étɛ́wú ahwanfuntɔ́ syɛ́nsyɛ́n lɛ́ɛ ka ná cí ahwan mɔ̌? Étɛ́wú ahwanfuntɔ́ nukúnɖéjí énɛ́ lɛ́ɛ ná dɔn?