Read fon 2 Samuwɛ́li 10 Bible Online

2 Samuwɛ́li 10 - fon bible

2 Samuwɛ́li 10

¹Azǎn ɖé jɛ ǎ bɔ Amumɔ́ɔ ví lɛ́ɛ xɔ́sú Naxáci kú, bɔ vǐ tɔn Hanúni jɛ do tɔn mɛ.

²Davídi nɔ ɖɔ dó ayi mɛ ɖɔ: “Un ná wa ɖagbe nú Hanúni Naxáci ví ɔ́ lě e tɔ́ tɔn bló gbɔn nú mì é.” Ée Davídi lin mɔ̌ ɔ́, é sɛ́ gǎn hɔn-yitɔ́ tɔn ɖé lɛ́ɛ dó, nú yě ná yi dó nǔwamɛgbe e. Ée gǎn hɔn-yitɔ́ tɔn lɛ́ɛ yi Amumɔ́ɔ ví lɛ́ɛ sín tomɛ ɔ́,

³Amumɔ́ɔ ví lɛ́ɛ sín gǎn hɔn-yitɔ́ lɛ́ɛ yi ɖɔ nú gǎn yětɔn Hanúni ɖɔ: “A vɛdó ɖɔ tɔ́ towe ná zé su wú jɛ́n Davídi sɛ́ gǎn hɔn-yitɔ́ tɔn lɛ́ɛ dó ɖɔ yě wá dó nǔwamɛgbe we a? Gbeɖé, mɔ̌ wɛ ǎ. É sɛ́ yě dó nú yě ná wá ba do nú toxo ɔ́, bó ná wá gba.”

⁴Énɛ́ ɔ́, Hanúni ɖe gbe, bɔ è wlí gǎn hɔn-yitɔ́ Davídi tɔn lɛ́ɛ, bó xwlɛ́ atán yětɔn akpá ɖokpó, bó sɛ́n awu yětɔn lɛ́ɛ, sín nɛgbé káká wá alin, lobo nya yě.

⁵È yi ɖɔ nǔ e jɛ ɔ́ nú Davídi. Ée é se mɔ̌ ɔ́, é sɛ́ mɛ dó gbě yětɔn mɛ, bɔ è yi kpé yě; amɔ̌, winnyá hu gǎn hɔn-yitɔ́ lɛ́ɛ ɖésú, ɖó nǔ e è wa xá yě ɔ́ wútu. Axɔ́sú Davídi ɖɔ sɛ́ dó yě ɖɔ yě ní nɔ Jeliko káká nú atán yětɔn ní wú bǐ cóbónú yě ní wá xwé.

⁶Ée Amumɔ́ɔ ví lɛ́ɛ mɔ ɖɔ émí zé émíɖée dó xomɛ nú Davídi ɔ́, yě da sɔ́ja Silíinu e ɖo Bɛti-Hlehovu kpó Sova kpó lɛ́ɛ adɔ̌kpo (20.000) dó yěɖée jí. Yě lɛ́ kplá sɔ́ja afatɔ́n (1.000) ɖo Maaka xɔ́sú ɔ́ sín ahwangɔnu ɔ́ mɛ, bó lɛ́ kplá sɔ́ja děgba atɔn (12.000) ɖo Tɔ́vu xɔ́sú ɔ́ sín ahwangɔnu ɔ́ mɛ.

⁷Ée Davídi se nǔ e wa wɛ Amumɔ́ɔ ví lɛ́ɛ ɖe ɔ́, é sɛ́ ahwangán ɖaxó Jowabu kpó ahwanfuntɔ́ tɔn e sín alɔ se kpɛ́n ganjí lɛ́ɛ bǐ kpó dó ahwangbénu.

⁸Amumɔ́ɔ ví lɛ́ɛ sɔ́ ahwannú bó wá to yěɖée ɖó toxo ɔ́ sín hɔntogbó jí, bɔ sɔ́ja Silíinu e gosín Sova kpó Hlexɔ́vu kpó lɛ́ɛ, sɔ́ja Tɔ́vu tɔn lɛ́ɛ kpó Maaka tɔn lɛ́ɛ kpó ɖo fí vo, ɖo gběhan ɔ́ mɛ.

⁹Jowabu mɔ ɖɔ émí ɖó kɛntɔ́ ɖo gǔdo nukɔn. Ée nǔ ɖo mɔ̌ ɔ́, é cyán sɔ́ja Izlayɛ́li tɔn e syɛ́n hú ɖě lɛ́ɛ bǐ lɛ́ɛ, bɔ yě húzú kpan nukɔn sɔ́ja Silíinu lɛ́ɛ.

¹⁰É zé nɔví tɔn Avicáyi ɖó sɔ́ja tɔn e kpo lɛ́ɛ nu, bɔ yě húzú kpan nukɔn Amumɔ́ɔ ví lɛ́ɛ.

¹¹Jowabu ɖɔ nú nɔví tɔn Avicáyi ɖɔ: “Nú Silíinu lɛ́ɛ ɖo gǎn hú mì wɛ ɔ́, a na wá dó alɔ mì. Nú é ká nyí ɖɔ Amumɔ́ɔ ví lɛ́ɛ wɛ ɖo gǎn hú hwɛ wɛ ɔ́, nyɛ ná wá dó alɔ we.

¹²Kpan akɔ́n! Mǐ ní ván kan bo fun ahwan nú togun mǐtɔn kpó Mawu mǐtɔn sín toxo lɛ́ɛ kpó. Mawu Mavɔmavɔ ní ka bló lě e é jló e gbɔn é.”

¹³Jowabu kpó ahwanfuntɔ́ tɔn lɛ́ɛ kpó sí ahwan te dó Silíinu lɛ́ɛ jí, bɔ yě hɔn ɖo nukɔn tɔn.

¹⁴Ée Amumɔ́ɔ ví lɛ́ɛ mɔ Silíinu lɛ́ɛ hɔn ɔ́, yě lɔ hɔn ɖo Avicáyi nukɔn, bó lɛ́ kɔ byɔ́ toxo yětɔn mɛ. Jowabu lɔ lɛ́ kɔ sín Amumɔ́ɔ ví lɛ́ɛ gúdo bó wá Jeluzalɛ́mu.

¹⁵Ée Silíinu lɛ́ɛ mɔ ɖɔ Izlayɛ́li ví lɛ́ɛ ɖu ɖo émí jí ɔ́, yě sɛ yěɖée kplé.

¹⁶Hadadɛzɛ́ɛ sɛ́ mɛ dó sɔ́ja Silíinu e ɖo Efláti tɔ ɔ́ gǔdo dɔ̌n lɛ́ɛ gbé mɛ, bɔ yě wǎ Helámu, bɔ Covaki ahwangán Hadadɛzɛ́ɛ tɔn zɔn yě nu, bó kplá yě wá.

¹⁷È yi ɖɔ nú Davídi. Ée é se mɔ̌ ɔ́, é kplé ahwangɔnu Izlayɛ́li tɔn ɔ́ bǐ, bó dó asá Judɛ́ɛn tɔ ɔ́, bó wá Helámu. Bɔ Silíinu lɛ́ɛ sɔ́ ahwan nú, bó tɔ́n ahwan Davídi.

¹⁸Amɔ̌, Silíinu lɛ́ɛ hɔn ɖo Izlayɛ́li ví lɛ́ɛ nukɔn. Davídi kpó ahwanfuntɔ́ tɔn lɛ́ɛ kpó hu sɔ́ yětɔn e nɔ dɔn ahwankɛkɛ́ví lɛ́ɛ nǔwɔntɔn kanwe ko (700), bó hu sɔ́xátɔ́ adɔ̌kpo we (40.000). Yě gblé wǔ ahwangán ɖaxó Covaki bɔ é kú jɛ fínɛ́.

¹⁹Ée axɔ́sú e ɖo Hadadɛzɛ́ɛ glɔ́ lɛ́ɛ bǐ mɔ ɖɔ Izlayɛ́li ví lɛ́ɛ ɖu ɖo émí jí ɔ́, yě gbɔ bó dó hwɛ gbo, bó nɔ acɛkpikpa Izlayɛ́li tɔn glɔ́. Lo ɔ́, Silíinu lɛ́ɛ sɔ́ glá gbeɖé ɖɔ émí ná dó alɔ Amumɔ́ɔ ví lɛ́ɛ ǎ.