Read fon 2 Samuwɛ́li 11 Bible Online

2 Samuwɛ́li 11 - fon bible

2 Samuwɛ́li 11

¹Đo xwe e jɛ fínɛ́ ɔ́ mɛ ɔ́, hwenu e axɔ́sú lɛ́ɛ nɔ yi fun ahwan dó ɔ́, Davídi sɛ́ ahwangán ɖaxó Jowabu kpó mɛsɛntɔ́ tɔn lɛ́ɛ kpó Izlayɛ́li to ɔ́ bǐ kpó dó Amumɔ́ɔ ví lɛ́ɛ sín kún vívá gbé, lobo ná yí Hlaba toxo ɔ́. Davídi ɖésú ka cí Jeluzalɛ́mu.

²É wá su gbe ɖokpó, bɔ hwe ko lɛ́ kɔ, bɔ Davídi dɔ́ amlɔ bó fɔ́n, bó ɖidó sa ɖi gbé ɖo xɔ tɔn ta, bó mɔ nyɔ̌nu ɖé sɛ́ dó, bɔ é ɖo wǔ lɛ wɛ. Nyɔ̌nu ɔ́ nyɔ́ ɖɛkpɛ ɖésú.

³Davídi sɛ́ mɛ dó ɖɔ è yi ba do nú nyɔ̌nu e wɛ ɔ́, bɔ è ɖɔ n'i ɖɔ: “Bɛtisabe wɛ. Ulíi Hitíti ɔ́ sín asi wɛ. Tɔ́ tɔn nɔ nyí Eliamu.”

⁴Davídi sɛ́ wɛn dó ɖɔ è nǐ yi ylɔ́ Bɛtisabe wá, bɔ è yi ylɔ́ ɛ wá. Ée é wá ɔ́, Davídi ɖó xó xá ɛ. Énɛ́ ɔ́ gúdo ɔ́, é lɛ́ kɔ yi xwé. Glegbe wɛ é ká jɛ bó nya nǔ tlóló.

⁵Bɛtisabe mɔ xo, bó ɖɔ sɛ́ dó Davídi ɖɔ: “Sun nɔ te nú mì.”

⁶Énɛ́ ɔ́, Davídi dó wɛn sɛ́ dó ahwangán Jowabu tlóló, bó ɖɔ n'i ɖɔ: “Nyi Ulíi Hitíti ɔ́ sɛ́ dó mì.” Bɔ Jowabu nyi Ulíi sɛ́ dó Davídi.

⁷Ulíi wá, bɔ Davídi kan lě e Jowabu ɖe gbɔn ɔ́ byɔ́, bó kan lě e togun ɔ́ ɖe gbɔn ɔ́ byɔ́, lobo kan lě e ahwan ɔ́ ɖo yiyi wɛ gbɔn ɔ́ byɔ́.

⁸Énɛ́ ɔ́ gúdo ɔ́, é ɖɔ nú Ulíi ɖɔ: “Yi xwé gbe, bó yi gbɔjɛ́ kpɛɖé.” Ulíi tɔ́n sín hɔn ɔ́ mɛ, bɔ axɔ́sú Davídi sɛ́ nǔɖuɖu ɖagbe ɖagbe ɖé dó e.

⁹Ulíi ka yi xwé ǎ, bó yi mlɔ́ axɔ́sú ɔ́ sín mɛsɛntɔ́ lɛ́ɛ kpá ɖo axɔ́sú ɔ́ sín hɔnnúwa sá.

¹⁰Mɛ lɛ́ɛ wá yi ɖɔ nú axɔ́sú ɔ́ ɖɔ: “Ulíi yi xwé gbe ǎ.” Bɔ Davídi ɖɔ nú Ulíi ɖɔ: “Tomɛ wɛ a gosín ǎ cé? Étɛ́wú a ma yi xwé gbe ǎ?”

¹¹Ulíi ka yí gbe nú Davídi ɖɔ: “Akɔjijɛgbá mímɛ́ Mawu Mavɔmavɔ tɔn kpó ahwangɔnu Izlayɛ́li tɔn kpó, Judáa tɔn kpó ɖo goxɔ mɛ. Bɔ gǎn ce Jowabu kpó mɛsɛntɔ́ mɛtɔn lɛ́ɛ kpó ɖo ahwangbénu, bɔ nyɛ ná yi xwé ce gbe, bó ná ɖu nǔ bó nu ahan, bɔ nyi kpó asi ce kpó ná mlɔ́ ayǐ? Gbeɖé kpɔ́n!” Ée Ulíi ɖɔ mɔ̌ ɔ́, é xwlé nǔ ɖɔ: “È ɖo gbɛ bɔ funfún mɛtɔn ɖo dǐndín wɛ jɛ́n wɛ ɔ́, un ná dó nǔ mɔ̌hun sin gbeɖé ǎ.”

¹²Davídi ɖɔ n'i ɖɔ: “Bo lɛ́ nɔ fí égbé, bónú sɔ ko su ɔ́, a nǎ yi.” Bɔ Ulíi nɔ Jeluzalɛ́mu gbe nɛ́ gbe bɔ ayǐ hɔ́n.

¹³Ée ayǐ hɔ́n ɔ́, Davídi ylɔ́ ɛ bó ná ɛ nǔɖuɖu, bó ná ɛ ahan, bɔ é nu mú. Ée gbadanu su ɔ́, Ulíi sɔ́ yi xwé ǎ; é yi mlɔ́ Davídi sín mɛsɛntɔ́ lɛ́ɛ kpá, lobo dɔ́ fínɛ́.

¹⁴Ayǐhɔ́ngbe zǎnzǎn ɔ́, Davídi wlán wěma dó así nú Ulíi, ɖɔ é ní sɔ́ yi jó nú Jowabu.

¹⁵É ɖɔ dó wěma ɔ́ mɛ ɖɔ: “Zě Ulíi ɖó fí e ahwan ɔ́ syɛ́n ɖe ganjí é, bó jó é ɖokpónɔ dó, bónú kɛntɔ́ ní kpé wǔ tɔn bo hu i.”

¹⁶Jowabu ɖo toxo e è jǎn go dó ɔ́ cɔ́ wɛ bó zé Ulíi ɖó fí e é tunwun ɖɔ è sɔ́ kɛntɔ́ e syɛ́n lɛ́ɛ ɖó é.

¹⁷Toxo ɔ́ mɛ nu lɛ́ɛ tɔ́n ahwan Jowabu gbe ɖokpó, bó hu sɔ́ja ɖé lɛ́ɛ kpó ahwangán ɖé lɛ́ɛ kpó ɖo ahwangɔnu Davídi tɔn mɛ. Ulíi lɔmɔ̌ ɖo mɛ e è hu lɛ́ɛ mɛ.

¹⁸Ée Ulíi kú é ɔ́, Jowabu ɖɔ nǔ e jɛ ɖo ahwangbénu ɔ́ bǐ sɛ́ dó Davídi.

¹⁹Jowabu ɖɔ nú mɛ e sɛ́ dó Davídi wɛ é ɖe é ɖɔ: “Nú a wlǐ nǔ e jɛ ɖo ahwan ɔ́ hwenu ɔ́ bǐ ɖɔ n'i fó ɔ́,

²⁰é sixú bɛ́ adǎn bó ɖɔ: ‘Étɛ́wú mi ka sɛkpɔ́ toxo ɔ́ sɔ mɔ̌ bó fun ahwan? Mi tunwun ɖɔ è nɔ́ nɔ ahohó ɔ́ ta bó nɔ́ da gǎ ǎ cé?

²¹ Mɛ̌ ká hu Abimɛlɛ́ki Yelubɛcɛ́ti ví ɔ́ ɖo Tevesi? É má nyí nyɔ̌nu wɛ nɔ dǒ ta, bó nyi sé ɖaxó ɖé, bɔ é jɛ jǐ tɔn, bɔ é kú a? Étɛ́wú midɛɛ lɛ́ɛ mi ka sɛkpɔ́ ahohó ɔ́ sɔ mɔ̌?’ Nú é ɖɔ mɔ̌ ɔ́, a nǎ ɖɔ n'i ɖɔ: ‘Ahwangán towe Ulíi, Hitíti ɔ́ lɔmɔ̌ kú.’ ”

²²Mɛ e Jowabu sɛ́ dó Davídi ɔ́ wá Davídi gɔ́n, bó wlí nǔ e Jowabu ɖɔ n'i ɔ́ bǐ ɖɔ nú Davídi.

²³É ɖɔ nú Davídi ɖɔ: “É wá jɛ hweɖénu bɔ mɛ lɛ́ɛ hú gǎn mǐ. Yě tɔ́n ahwan mǐ ɖo gběgbó mɛ; lo ɔ́, mǐ nya yě káká yi toxo ɔ́ sín hɔntogbó jí.

²⁴Amɔ̌, gǎdatɔ́ yětɔn lɛ́ɛ nɔ ahohó ɔ́ ta, bó da gǎ dó mǐ, bó hu ahwangán mɛtɔn ɖé lɛ́ɛ. Ahwangán mɛtɔn Ulíi, Hitíti ɔ́ lɔmɔ̌, kú.”

²⁵Davídi ɖɔ nú mɛ e wá dó wɛn ɛ é ɖɔ: “Yi ná akɔ́nkpinkpan Jowabu, bó ɖɔ n'i ɖɔ ní má lin nǔ énɛ́ kpɔ́n ó, ɖó è yi ahwan ɔ́, gbɛtɔ́ nɔ kú jɛ́n wɛ. È nɔ hu mɛ ɖo akpá ɖě xwé, bó nɔ hu ɖo akpá ɖě ɔ́ xwé. É ní lɛ́ húzú kan dó yě wǔ, bó gba toxo ɔ́.”

²⁶Bɛtisabe se ɖɔ asú émítɔn kú, bó nɔ asúkúkúxɔmɛ.

²⁷Ée Bɛtisabe nɔ asúkúkúxɔmɛ fó ɔ́, Davídi sɛ́ mɛ dó gbě tɔn mɛ, bɔ è yi kplá ɛ wá, bɔ é yí i dó xɔ tɔn sá, bɔ é húzú asi tɔn bo ji vǐ ɖokpó n'i. Nǔ énɛ́ e Davídi wa ɔ́ nyɔ́ Mawu Mavɔmavɔ nukún mɛ ɖěbǔ ǎ.