Read fon 2 Samuwɛ́li 12 Bible Online

2 Samuwɛ́li 12 - fon bible

2 Samuwɛ́li 12

¹ Mawu Mavɔmavɔ sɛ́ Natáan dó Davídi gɔ́n, bɔ Natáan yi gɔ̌n tɔn bó ɖɔ n'i ɖɔ: “Nya we ɖé lɛ́ɛ tíin bó nɔ́ nɔ toxo ɖokpó ɔ́ mɛ, bɔ mɛ ɖokpó nyí dɔkunnɔ, bɔ mɛ ɖě ɔ́ nyí wamamɔnɔ.

²Nya dɔkunnɔ ɔ́ ɖó gbɔ̌ kpó nyibú kpó kpɔ́ gégé.

³Wamamɔnɔ ɔ́ ká ɖó nǔɖé ǎ; lɛ̌ngbɔ́ví asi ɖokpó jɛ́n é xɔ, bɔ é ɖo así tɔn, bɔ é nɔ ná nǔɖuɖu. Lɛ̌ngbɔ́ví asi ɔ́ kpó nya ɔ́ sín vǐ lɛ́ɛ kpó ɖo fínɛ́, bó ɖo susu wɛ. Nǔ e é ɖu ɔ́ wɛ lɛ̌ngbɔ́ví ɔ́ nɔ ɖu, bó nɔ nu sin ɖo ká ɖokpó ɔ́ nu xá ɛ; é nɔ́ mlɔ́ akpá tɔn, bó cí vǐ nyɔ̌nu ɖɔhun n'i.

⁴Jǒnɔ ká wá ba nya dɔkunnɔ ɔ́ gbe ɖokpó. É ká hu gbɔ̌ tɔn ɖě, abǐ nyibú tɔn ɖě dó yí jǒnɔ e wá ba ɛ ɔ́ ná ǎ. Lɛ̌ngbɔ́ví asi ɖokpó e nya wamamɔnɔ ɔ́ ɖó é wɛ é zé bo hu, bó ɖa dó yí jǒnɔ e wá ba ɛ ɔ́ ná.”

⁵Nǔ e nya dɔkunnɔ nɛ́ ɔ́ wa é sin xomɛ nú Davídi ɖésú, bɔ é xwlé Mawu ɖɔ: “Mawu Mavɔmavɔ ɖo gbɛ. Nya e wa mɔ̌ ɔ́, hu jɛ́n è nǎ hu i.

⁶Ée wamamɔnɔ ɔ́ sín nǔ ma blá wǔ n'i ǎ, bɔ é bló mɔ̌ ɔ́, é ná ná lɛ̌ngbɔ́ví asi ɛnɛ dó sú ɖokpó e é zé ɔ́ sín axɔ́.”

⁷Bɔ Natáan ɖɔ nú Davídi ɖɔ: “Hwi wɛ nyí nya e xó ɖɔ wɛ è ɖe é. Xó e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe; ɖǒtó: ‘Un zé we axɔ́sú ɖó Izlayɛ́li to ɔ́ nu, bó hwlɛ́n we gán ɖo Sawúlu sí,

⁸bó zé gǎn towe sín xwédo ɔ́ dó alɔ mɛ nú we, bó ná asi tɔn lɛ́ɛ we, bó lɛ́ ná Izlayɛ́li kpó Judáa kpó sín togun we. Ényí nǔ énɛ́ lɛ́ɛ má kpé we ǎ ɔ́, un ná lɛ́ ná we d'é jí.

⁹Étɛ́wú a ma ka ké ya nú xó ce ǎ, bó wa nǔ e un ma yí wǎn ná ǎ é? A hu Ulíi Hitíti ɔ́; hwi wɛ zɔ́n bɔ Amumɔ́ɔ ví lɛ́ɛ hu i, bɔ a lɛ̌ zé asi tɔn bo da.

¹⁰Din ɔ́, è nǎ ɖo mɛ hu wɛ ɖo xwé towe gbe tɛgbɛ, ɖó a ké ya ɖěbǔ nú mì ǎ, ɖó a yǐ Ulíi Hitíti ɔ́ sín asi bo da.

¹¹Đǒtó xó e ɖɔ nú we wɛ un ɖe ɔ́ ganjí: un ná sɛ́ nǔ nyanya dó we, sín xwédo towe ɖésú mɛ. A nǎ ɖo nukún te lě, bɔ un ná ná asi towe lɛ́ɛ mɛ e nyí mɛ towe é ɖokpó, bɔ é ná ɖó xó xá yě agbawungba.

¹²Nǔ e hwɛ wa dó nǔglɔ́ ɔ́, nyɛ ná bló bɔ é ná jɛ kéze ɖéɖé, ɖo Izlayɛ́li to ɔ́ bǐ nukɔn.’ ”

¹³Bɔ Davídi ɖɔ nú Natáan ɖɔ: “Hwɛ wɛ un hu dó Mawu Mavɔmavɔ.” Bɔ Natáan ɖɔ n'i ɖɔ: “Ée a tunwun ɖɔ mɔ̌ ɔ́, Mawu Mavɔmavɔ zé hwɛ towe kɛ we, a nǎ kú ǎ.

¹⁴Nǔ énɛ́ e a wa ɔ́, do ɖaxó ɖé wɛ a jɛ dó Mawu Mavɔmavɔ bɔ Mawu Mavɔmavɔ sín kɛntɔ́ lɛ́ɛ mɔ ali bó ɖo ɖɔɖɔ ɖɔ nyɔ̌nu énɛ́ ɔ́ wú wɛ. Énɛ́ wú ɔ́, vǐ e è ji nú we din ɔ́ ná kú dandan.”

¹⁵Natáan ɖɔ mɔ̌ bó ɖidó xwé. Mawu Mavɔmavɔ sín alɔ jɛ vǐ e Ulíi sín asi ji nú Davídi ɔ́ wú, bɔ vǐ ɔ́ wlí azɔn ɖaxó ɖé.

¹⁶Davídi sa vo nú Mawu dó vǐ ɔ́ tamɛ, bó nɔ́ blá nu. É yi ayǐ mlɔ́ gbé tɛgbɛ ɔ́, é nɔ́ dɔ́ kɔ́ mɛ.

¹⁷Mɛsɛntɔ́ tɔn nukúnɖéjí lɛ́ɛ nɔ yi gɔ̌n tɔn bó nɔ ɖɔ é ní fɔ́n sín kɔ́ mɛ; lo ɔ́, é nɔ́ ba ná fɔ́n ǎ, é ká sɔ́ nɔ ɖu nǔ ɖěbǔ xá yě ǎ.

¹⁸Azǎn tɛ́nwegɔ́ ɔ́ gbe ɔ́, vǐ ɔ́ kú. Mɛsɛntɔ́ tɔn lɛ́ɛ ká tunwun lě e yě ná wá ɖɔ n'i gbɔn ɔ́ ǎ, ɖó yě nɔ́ ɖɔ: “Hwenu e vǐ ɔ́ ɖo gbɛ ɔ́ ɖíe mǐ ɖo xó ɖɔ n'i wɛ bɔ é ma ba ná se ǎ e. Nɛ̌ mǐ ká sixú glá ɖɔ n'i ɖɔ vǐ ɔ́ kú gbɔn din? É se din ɔ́, é sixú dó nǔ nyanya ɖé sin dó éɖée wú.”

¹⁹Davídi mɔ mɛsɛntɔ́ tɔn lɛ́ɛ ɖo kpá yi wɛ ɖo yěɖée tɛ́ntin, bó mɔ ɖɔ vǐ ɔ́ wɛ kú, lobo kanbyɔ́ yě ɖɔ: “Vǐ ɔ́ kú wɛ a?” Bɔ yě yí gbe n'i ɖɔ: “Ɛɛn é kú.”

²⁰Ée yě ɖɔ mɔ̌ ɔ́, Davídi fɔ́n sín kɔ́ mɛ, bó lɛ wǔ, bó sá nǔ, bó ɖyɔ́ awu lobo ɖidó sinsɛnxɔ mɛ, bó yi ɖe kɔ́ nú Mawu Mavɔmavɔ. Ée é lɛ́ kɔ wá xwé gbe ɔ́, é byɔ́ nǔɖuɖu lobo ɖu,

²¹bɔ mɛsɛntɔ́ tɔn lɛ́ɛ kanbyɔ́ ɛ ɖɔ: “Étɛ́wú a ka ɖo nǔ wa gbɔn mɔ̌ wɛ? Hwenu e vǐ ɔ́ ɖo gbɛ ɔ́, a ɖo nu blá wɛ, bó ɖo avǐ ya wɛ. Din e vǐ ɔ́ ká kú ɔ́, a fɔ́n bó ɖu nǔ.”

²²Bɔ é yí gbe nú yě ɖɔ: “Hwenu e vǐ ɔ́ kpo ɖo gbɛ ɔ́, un nɔ ɖo nu blá wɛ, bó nɔ ɖo avǐ ya wɛ, ɖó un nɔ ɖɔ: ‘Nǔ ce to ná blá wǔ nú Mawu Mavɔmavɔ bɔ é na jó vǐ ɔ́ dó nyi gbɛ hǔn mɛ̌ ká tunwun.’

²³Din e é ká kú ɔ́, étɛ́ sín nu blá wɛ un ná lɛ́ ɖe? Un sixú fɔ́n ɛ wɛ a? Nyɛ wɛ xwe fí e é ɖe é, amɔ̌, éyɛ́ sixú lɛ́ kɔ wá gɔ̌n ce ǎ.”

²⁴Davídi dó gbɔ nú asi tɔn Bɛtisabe, bó ɖó xó xá ɛ, bɔ é mɔ xo bo ji vǐ súnnu ɖokpó, bɔ è nɔ ylɔ́ vǐ ɔ́ ɖɔ Salomɔ́ɔ. Mawu Mavɔmavɔ yí wǎn nú vǐ ɔ́,

²⁵bó ɖɔ nú gbeyíɖɔ Natáan ɖɔ é ní sun nyǐ vǐ ɔ́ ɖɔ Yedidya, tínmɛ tɔn wɛ nyí wǎnyínámɔ Mawu Mavɔmavɔ tɔn.

²⁶Hwenɛ́nu ɔ́, ahwangán ɖaxó Jowabu ko yí Hlaba Amumɔ́ɔ ví lɛ́ɛ sín toxo ɖaxó ɔ́, bó ko yí slá e mɛ axɔ́sú ɔ́ ɖésú nɔ́ nɔ é,

²⁷bó sɛ́ mɛ dó Davídi ɖɔ è yi ɖɔ n'i ɖɔ: “Un tɔ́n ahwan Hlaba toxo ɔ́. Un ko yí slǎ e mɛ sindo ɖe é lɔ.

²⁸Din ɔ́, kplé ahwanfuntɔ́ e kpo lɛ́ɛ, bó wá xá toxo ɔ́, lobo ná yí hwi ɖésú. Un jló ná yí, bónú susu ɔ́ bǐ ná nyí ce ǎ.”

²⁹Énɛ́ ɔ́, Davídi kplé ahwanfuntɔ́ e kpo lɛ́ɛ bǐ, bó wá tɔ́n ahwan Hlaba toxo ɔ́, lobo yí.

³⁰É yí gbǎkún e ɖo ta nú Amumɔ́ɔ ví lɛ́ɛ sín vodún Mɔlɛ́ki é. Sikágbákún wɛ, bó da kilóo gban mɔ̌, bɔ è zě awǐnnya xɔ akwɛ́ dó ɖó acɔ́ ná. È zě gbǎkún énɛ́ xwe nú Davídi, bɔ Davídi lɛ́ hɛn nǔ ɖagbe ɖagbe ɖěvo lɛ́ɛ sín ahwangbénu wá yi xwé.

³¹Davídi kplá togun e ɖo fínɛ́ lɛ́ɛ gěgé sín toxo yětɔn mɛ, lobo zɔ́n azɔ̌ syɛ́nsyɛ́n lɛ́ɛ yě. Mɛɖě nɔ́ zɛ xwlɛ, mɛ ɖě nɔ́ kpa awǐnnya, mɛ ɖě nɔ́ mu atín, mɛ ɖě nɔ́ sún blǐki. Mɔ̌ jɛ́n é wa Amumɔ́ɔ ví lɛ́ɛ sín nǔ gbɔn, gbɔn toxo lɛ́ɛ bǐ mɛ. Énɛ́ ɔ́ gúdo ɔ́, Davídi lɛ́ kɔ é kpó ahwangɔnu tɔn bǐ kpó, bó wá Jeluzalɛ́mu.