Read fon 2 Samuwɛ́li 18 Bible Online

2 Samuwɛ́li 18 - fon bible

2 Samuwɛ́li 18

¹Davídi kpɔ́n sɔ́ja e kplá ɛ lɛ́ɛ mɛ káká yi ɖó, lobo cyán sɔ́ja afatɔ́ngán lɛ́ɛ kpó sɔ́ja kanwekogán lɛ́ɛ kpó.

²É zé togun ɔ́ atɔnvlɔ́ɖó ɖó Jowabu sín acɛ mɛ, atɔnvlɔ́ɖó ɖó Avicáyi Jowabu nɔví Selúya ví ɔ́ sín acɛ mɛ, bó zé atɔnvlɔ́ɖó ɖó Itayi Gatinu ɔ́ sín acɛ mɛ. É ɖɔ nú sɔ́ja lɛ́ɛ ɖɔ: “Nyɛ kpó mi kpó ná yi.”

³Lo ɔ́, sɔ́ja lɛ́ɛ sú xó bó ɖɔ: “Gbeɖé! Mɛ kpó mǐ kpó ná yi ǎ! Đó ényí mǐ dó gblǒ mɛ ɔ́, é ná ɖɔ nǔɖé nú kɛntɔ́ ǎ. È na bo hu mɛ vlɔ̌ ɖo mǐ mɛ ɔ́, é ná ɖɔ nǔɖé nú kɛntɔ́ ǎ. Amɔ̌, mǐ mɛ děgba we afɔwó (10.000) tɛnmɛ wɛ mɛ ɖe. Hǔn din ɔ́, é nyɔ́ ɖɔ mɛ ní nɔ toxo ɔ́ mɛ, lobo ná nɔ dó alɔ mǐ sɛ́ dó.”

⁴Bɔ axɔ́sú ɔ́ ɖɔ: “É nyɔ́! Un ná bló nǔ e nyɔ́ mi nukún mɛ é.” Ée é ɖɔ mɔ̌ é ɔ́, é cí toxo ɔ́ sín hɔntogbó kpá, bɔ sɔ́ja lɛ́ɛ to yěɖée afatɔ́n (1.000), afatɔ́n, kanwe ko (100), kanwe ko, bó ɖo tíntɔ́n wɛ sonu sonu.

⁵Axɔ́sú ɔ́ ká ɖɔ nú Jowabu kpó Avicáyi kpó Itayi kpó ɖɔ: “Un ɖo kɛnklɛ́n dó nú mi wɛ, mi ma wa nǔ nyanya ɖé nú vǐ ce Abusalɔ́mu ó.” Sɔ́ja lɛ́ɛ bǐ se xó énɛ́ e axɔ́sú ɔ́ ɖɔ nú gǎn yětɔn lɛ́ɛ dó Abusalɔ́mu wú é.

⁶Ahwangɔnu Davídi tɔn jɛ ali bo ɖidó ahwan fun xá Abusalɔ́mu sín sɔ́ja lɛ́ɛ gbé. Yě fun ahwan ɔ́ ɖo Eflayímu sín zungbó mɛ.

⁷Davídi sín ahwangɔnu ɖu ɖo Abusalɔ́mu sín mɛ lɛ́ɛ jí. Mɛ e kú gbe nɛ́ gbe lɛ́ɛ sukpɔ́ ɖésú. Yě yi adɔ̌kpo (20.000).

⁸Yě fun ahwan ɔ́ gbɔn gbě ɔ́ bǐ jí. Mɛ e kú ɖo zungbó ɔ́ mɛ lɛ́ɛ hú mɛ e è hu ɖo ahwangbénu lɛ́ɛ.

⁹Abusalɔ́mu ɖo sɔ́tócí jí, bó wá xwetɔ́n ɖo Davídi sín sɔ́ja lɛ́ɛ nukɔn. Sɔ́tócí ɔ́ yi dó ta atínla hizihizi ɖé lɛ́ɛ mɛ, ɖo atín ɖaxó ɖé sá, bɔ Abusalɔ́mu sín ta ján dó atínla lɛ́ɛ tɛ́ntin, bɔ é cí gblɛlɛ mɛ fínɛ́, bɔ sɔ́tócí ɔ́ jó e dó nyi gblɛlɛ fínɛ́ bó ɖidó.

¹⁰Davídi sín sɔ́ja lɛ́ɛ ɖokpó wá mɔ ɛ, bó yi ɖɔ nú Jowabu ɖɔ: “Un mɔ Abusalɔ́mu bɔ é ján cí atínla mɛ.”

¹¹Bɔ Jowabu ɖɔ nú nya e hɛn xó nɛ́ wá é ɖɔ: “A mɔ ɛ nǔgbó a? Étɛ́wú a ma ka hu i azɔn ɖokpó ǎ? A ko hu i wɛ ɔ́, un ná ná gankwɛ́ wǒ kpó gǒjíblánú ɖokpó kpó we.”

¹²Sɔ́ja ɔ́ ká ɖɔ nú Jowabu ɖɔ: “A na bo xa gankwɛ́ afatɔ́n (1.000) dó alɔ mɛ nú mì ɔ́, un ná yí gbe bo hu axɔ́sú ɔ́ sín vǐ gbeɖé ǎ. Đó mǐ mɛ bǐ wɛ se bɔ axɔ́sú ɔ́ ɖɔ nú hwi kpó Avicáyi kpó Itayi kpó ɖɔ: ‘Un ɖo kɛnklɛ́n dó nú mi wɛ, mi ma hu vǐ ce Abusalɔ́mu ó.’

¹³Ényí un hu i din, bo bló mɛ ma se xó ɖé ɖɔhun ɔ́, axɔ́sú ɔ́ ná wá wɔ́ ɖɔ adingban wɛ, ɖó é nɔ dán do nú nǔɖé ǎ. É ká wá xɛ ɔ́, hwi ɖésú ná lɔn bó nɔ jǐ ce ǎ.”

¹⁴Bɔ Jowabu ɖɔ: “Nyɛ ɖo towe nɛ́ ná xweɖɔ wɛ ɖo fí wɛ ǎ.” Ée é ɖɔ mɔ̌ ɔ́, é fɔ hwǎn atɔn, bo yi lun dó hǔn mɛ nú Abusalɔ́mu e ján cí atínla mɛ, bó ka kpo ɖo gbɛ é.

¹⁵Sɔ́ja wǒ e hɛn ahwanfunnú Jowabu tɔn lɛ́ɛ wá xísí dó Abusalɔ́mu, bo hu i kpé.

¹⁶Ée yě bló mɔ̌ ɔ́, Jowabu kún lanzo, bo ɖó ahwan e fun wɛ yě ɖe ɔ́ te, bɔ Davídi sín sɔ́ja lɛ́ɛ lɛ́ kɔ sín ahwangɔnu Abusalɔ́mu tɔn gúdo.

¹⁷Yě zě Abusalɔ́mu sín cyɔ nyi dó do ɖaxó ɖé mɛ ɖo zungbó ɔ́ mɛ, bó bɛ́ awǐnnyaglo kɔn nyi jǐ tɔn kpɔ́ gégé. Hwenu e yě ɖo énɛ́ ɔ́ bló wɛ ɔ́, Abusalɔ́mu sín sɔ́ja lɛ́ɛ ɖokpó ɖokpó ba ali ɖó ta wú, bó yi xwé yětɔn yětɔn gbe.

¹⁸Hwenu e Abusalɔ́mu kpo ɖo gbɛ ɔ́, é zɔ́n bɔ è tun awǐnnya ɖokpó te ɖó axɔ́sú ɔ́ sín tɔdo mɛ, ɖó é kó ɖɔ: “Un ɖó vǐ ɖěbǔ bɔ è nǎ nɔ dó flín nyǐkɔ ce ná ǎ.” Lobo ná nyǐkɔ tɔn awǐnnya ɔ́, bɔ káká jɛ égbé ɔ́, è nɔ ylɔ́ awǐnnya ɔ́ ɖɔ “Awǐnnya Abusalɔ́mu tɔn.”

¹⁹Aximáasi Sadɔ́ku ví ɔ́ ɖɔ nú Jowabu ɖɔ: “Gbɔ nú má kán wezun yi dó wɛn ɖagbe élɔ́ axɔ́sú ɔ́ ɖɔ Mawu Mavɔmavɔ ba hlɔn n'i, bó yí i sín kɛntɔ́ tɔn lɛ́ɛ lɔ mɛ.”

²⁰Bɔ Jowabu ɖɔ n'i ɖɔ: “Égbé din ɔ́, hwi wɛ ná yi dó wɛn ǎ, gbe ɖěvo gbe ko su ɔ́, a nǎ yi dó, amɔ̌, ma yi égbé ó, ɖó axɔ́sú ɔ́ sín vǐ wɛ kú.”

²¹Lo ɔ́, Jowabu ɖɔ nú kannumɔ Etiopíinu ɖé ɖɔ: “Yi ɖɔ nǔ e a mɔ ɔ́ nú axɔ́sú ɔ́.” Bɔ kannumɔ ɔ́ ɖe kɔ́ nú Jowabu bo kán wezun bo ɖidó.

²²Aximáasi lɛ́ ɖɔ nú Jowabu ɖɔ: “Gbɔ nú ma xwedó Etiopíinu nɛ́ ɔ́, nǔɖé ná jɛ hǔn, ní jɛ.” Bɔ Jowabu kanbyɔ́ Aximáasi ɖɔ: “Vǐ ce, étɛ́ hwlɛ́n dó a ɖe? Wɛn énɛ́ má nyí wɛn e a yi dó ɔ́, é ná nyɔ́ nú we nɛ́!”

²³Aximáasi lɛ́ ɖɔ: “Nǔɖé ná jɛ hǔn, ní jɛ, un ná yi wɛ un ɖɔ.” Bɔ Jowabu ɖɔ n'i ɖɔ: “É nyɔ́, bo yi.” Ée é ɖɔ mɔ̌ ɔ́, Aximáasi kán wezun gbɔn ayǐkúngban wɛnjɛ e ɖo gbětótló mɛ ɔ́ jí, bó jɛ nukɔn nú Etiopíinu ɔ́.

²⁴Hwenɛ́nu ɔ́, Davídi ɖo ayǐjínjɔ́n ɖo toxo ɔ́ sín hɔntogbó we lɛ́ɛ tɛ́ntin. Sɔ́ja mɛcɔ́tɔ́ ɔ́ ká ɖo xɔ ta, ɖo hɔntogbó ɔ́ ta nu, ɖo ahohó ɔ́ ta. Sɔ́ja ɔ́ kpɔ́n zɔ sɛ́ dó, bó mɔ nya ɖokpó ɖo wezun jí, é ɖokpónɔ bó jǎwe.

²⁵Ée é mɔ mɔ̌ ɔ́, é sú xó bo ɖɔ nú axɔ́sú ɔ́, bɔ axɔ́sú ɔ́ ɖɔ: “Ényí é ɖokpónɔ wɛ zɔn hǔn, wɛn ɖagbe wɛ é hɛn jǎwe.” Nya ɔ́ ɖo wezun jí, bó ɖo sisɛkpɔ́ wɛ.

²⁶Sɔ́ja mɛcɔ́tɔ́ ɔ́ lɛ́ mɔ mɛ ɖěvo ɖo wezun jí jǎwe, bó lɛ́ sú xó, bó ɖɔ nú hɔnjínɔtɔ́ ɔ́ ɖɔ: “Mɛ ɖěvo ɖíe lɛ́ ɖo wezun jí é ɖokpónɔ bo jǎwe e.” Bɔ axɔ́sú ɔ́ ɖɔ: “É lɔmɔ̌ ɔ́, wɛn ɖagbe wɛ é hɛn jǎwe.”

²⁷Bɔ sɔ́ja mɛcɔ́tɔ́ ɔ́ ɖɔ: “Lě e mɛ nukɔntɔn ɔ́ ɖo wezun kán wɛ gbɔn ɔ́, é ɖi Aximáasi Sadɔ́ku ví ɔ́.” Bɔ axɔ́sú ɔ́ ɖɔ: “Nya ɖagbe ɖé wɛ n'i, xó ɖagbe ɖé wɛ é hɛn jǎwe dandan.”

²⁸Ée Aximáasi ɖo sisɛkpɔ́ wɛ é ɔ́, é sú xó bó ɖɔ nú axɔ́sú ɔ́ ɖɔ: “Nǔɖé jɛ ǎ!” É wá lobo xwe agbɔ̌nnusú do ɖo axɔ́sú ɔ́ sá mɛ, bó ɖɔ: “Sɛ́mɛɖó, susu nú Mawu Mavɔmavɔ, Mawu mɛtɔn. É jó mɛ e fɔ́n gǔ dó mɛ jí lɛ́ɛ nyi acɛ mɛtɔn mɛ.”

²⁹Axɔ́sú ɔ́ kanbyɔ́ ɛ ɖɔ: “Vǐ ce Abusalɔ́mu ɔ́ ká ɖo ganjí a?” Aximáasi yí gbe nú axɔ́sú ɔ́ bó ɖɔ: “Hwenu e Jowabu ɖo nyɛ kpó mɛsɛntɔ́ mɛtɔn ɖěvo kpó sɛ́ dó dě wɛ é ɔ́, un ɖo zǐngídi ɖé se wɛ, un ka tunwun nǔ e jɛ tawun é ǎ.”

³⁰Bɔ axɔ́sú ɔ́ ɖɔ: “Bo jɛ kɛ́n dě.” Bɔ Aximáasi jɛ kɛ́n ɖokpó, bó nɔ te.

³¹Tlóló ɔ́, kannumɔ Etiopíinu ɔ́ wá, bó ɖɔ nú axɔ́sú ɔ́ ɖɔ: “Un hɛn wɛn ɖagbe ɖokpó wá nú mɛ. Égbé ɔ́, Mawu Mavɔmavɔ ba hlɔn nú mɛ, é ɖe mɛ sín kɛntɔ́ mɛtɔn lɛ́ɛ bǐ sín alɔ mɛ.”

³²Axɔ́sú ɔ́ kanbyɔ́ Etiopíinu ɔ́ ɖɔ: “Vǐ ce Abusalɔ́mu ɔ́ ká ɖo ganjí a?” Etiopíinu ɔ́ yí gbe nú axɔ́sú ɔ́ bó ɖɔ: “Sɛ́mɛɖó, nǔ e gbo nyaví nɛ́ ɔ́ ní gbo kɛntɔ́ mɛtɔn lɛ́ɛ bǐ kpó mɛ e nɔ fɔ́n gǔ dó mɛ jí lɛ́ɛ bǐ kpó.”