Read fon 2 Samuwɛ́li 22 Bible Online

2 Samuwɛ́li 22 - fon bible

2 Samuwɛ́li 22

¹Davídi wɛ ji han élɔ́ dó kpa susu nú Mawu Mavɔmavɔ, gbe e gbe Mawu Mavɔmavɔ hwlɛ́n ɛ sín kɛntɔ́ tɔn lɛ́ɛ bǐ lɔ mɛ, ɖo tají ɔ́, Sawúlu lɔ mɛ é.

²“Mawu Mavɔmavɔ wɛ nyí só ce, é wɛ nyí ahohó ce, bó nyí mɛhwlɛ́ngántɔ́ ce.

³Mawu wɛ nyí só ce, é glɔ́ wɛ un nɔ́ hɔn hwlá cí. É wɛ nyí gǎglónú ce, bó nyí hlɔ̌nhlɔ́n e nɔ hwlɛ́n mì gán é. É glɔ́ wɛ un nɔ hɔn hwlá cí. É wɛ nyí mɛhwlɛ́ngántɔ́ ce, é wɛ nɔ́ hwlɛ́n mì sín adǎkaxotɔ́ lɛ́ɛ sí.

⁴Susu nú Mawu Mavɔmavɔ!” Un sú xó ylɔ́ ɛ hweɖěbǔnu ɔ́, é nɔ yí mì sín kɛntɔ́ ce lɛ́ɛ lɔ mɛ.

⁵Kú sín aslɔkɛ́ lɛ́ɛ wá ján go dó mì, kú ɖo xɛsi dó nú mì wɛ tɔsisa ɖo adǎn jí ɖɔhun.

⁶Yɔdo lɛ́ɛ nyi kan lɛ́ lɛ̌ dó mì, kú nyi ɖɔ dó fyán mì.

⁷Hwenu e adǎn gbo mì ɔ́, un ylɔ́ Mawu Mavɔmavɔ, un sú xó ylɔ́ Mawu ce. É se gbe ce sɛ́ dó sín xwé tɔn gbe, xó e un sú ɔ́ yi tó tɔn mɛ.

⁸Ayǐkúngban ɔ́ húnhún, bó dán wǔ, jǐnukúnsin sín dodó lɛ́ɛ sísɔ́, bó húnhún, ɖó Mawu sin xomɛ.

⁹Azizɔ nɔ tɔ́n sín awɔntín tɔn mɛ, myɔ hɛhɛ ɖé nɔ tɔ́n sín nu tɔn mɛ, myɔkán nɔ́ tɔ́n sín myɔ ɔ́ mɛ.

¹⁰É dɔn jǐnukúnsin wá do, bó jɛ te, akpɔ́kpɔ́ tlitli ɖé ɖo afɔ tɔn lɛ́ɛ glɔ́.

¹¹É xá wɛnsagun ɖokpó jí, bó zɔn ɖidó, é tɔ́n, bó zɔn jɔhɔn mɛ.

¹²É sɔ́ zǐnflú dó dó goxɔ lɛ́ lɛ̌ dó éɖée, é sɔ́ sin kpó akpɔ́kpɔ́ wiwi lɛ́ɛ kpó bú dó éɖée.

¹³Wěziza ɖé ɖo nukɔn tɔn, myɔkán ɖo zo da wɛ ɖo nukɔn tɔn.

¹⁴Mawu Mavɔmavɔ dó gbe sín sɛ́xwé, è se Mawu Ajalɔ̌nlɔn sín gbe.

¹⁵É da gǎ, bó gba kɛntɔ́ ce lɛ́ɛ dó, jǐ kɛ wun bɔ yě bǐ hɔn.

¹⁶Adǎn e jɛ wɛ Mawu Mavɔmavɔ ɖe ɔ́, kpó funfún e ɖo awɔntín tɔn mɛ tɔ́n sín wɛ ɔ́ sín zǐngídi kpó zɔ́n, bɔ xu ɔ́ sín azan jí jɛ wěxo, bɔ è mɔ nǔ jɛ gbɛ ɔ́ sín dodó lɛ́ɛ wú.

¹⁷É dlɛ̌n alɔ tɔn sín jǐxwé bó hɛn mì, é ɖe mì tɔ́n sín tɔ ɖaxó mɛ.

¹⁸É yí mì sín kɛntɔ́ ce hlɔ̌nhlɔ́nnɔ ɔ́ sí, é yí mì sín kɛntɔ́ ce e syɛ́n hú mì lɛ́ɛ sí.

¹⁹Hwenu e adǎn ɖo gbigbo mì wɛ ɔ́, yě wá fyán mì, lo ɔ́, Mawu Mavɔmavɔ wɛ nyí gǎnjɛwú ce.

²⁰É ɖe mì tɔ́n, bó ná ayi j'ayǐ mì; é yí mì sín yě sí, ɖó é yí wǎn nú mì.

²¹Mawu Mavɔmavɔ nɔ wa mɔ̌ nú mì, ɖó un ɖo gbejí n'i, é ná ajɔ mì ɖó walɔ ɖagbe e un ɖó é wú.

²²Un wa nǔ e Mawu Mavɔmavɔ ɖɔ nú mì lɛ́ɛ; un wa nǔɖé nyi do nú Mawu ce ǎ.

²³Sɛ́n tɔn lɛ́ɛ bǐ wɛ ɖo ayi ce mɛ; un gɔn nǔ e é zɔ́n lɛ́ɛ ɖě wa ǎ.

²⁴Un jló ɖɔ é ní má mɔ nǔɖé ɖɔ dó wǔ ce ó; un lɔn bo jɛ hwɛ ɖé mɛ ǎ.

²⁵Énɛ́ ɔ́ wú wɛ Mawu Mavɔmavɔ ná ajɔ mì, ɖó é mɔ ɖɔ un ɖo gbejí nú émí; é mɔ ɖɔ un ɖó walɔ ɖagbe.

²⁶Mawu Mavɔmavɔ, mɛ ɖé ɖo gbejí nú we ɔ́, hwi lɔ nɔ nɔ gbejí n'i; mɛ ɖé ma mɔ nǔɖé ɖɔ dó wǔ towe ǎ ɔ́, hwi lɔ nɔ mɔ nǔɖé ɖɔ dó wǔ tɔn ǎ.

²⁷Mɛ ɖé ɖo mǐmɛ́ jí ɔ́, a nɔ nɔ mǐmɛ́ jí xá ɛ, mɛ ɖé ká ɖo yɛmɛnú wa wɛ ɔ́, a nɔ ko e.

²⁸A nɔ hwlɛ́n togun e nɔ zé éɖée hwe ɔ́ gán, bó nɔ zé mɛ e nɔ zé éɖée su ɔ́ hwe.

²⁹Nǔgbó wɛ Mawu Mavɔmavɔ, hwi wɛ nyí wěziza ce, hwi wɛ nɔ ná wěziza mì ɖo ablu mɛ.

³⁰A ɖo kpɔ́ xá mì ɔ́, un nɔ tɔ́n ahwan ahwangɔnu e ko sɔ́ ahwannú ganjí é; Mawu ce, a ɖo kpɔ́ xá mì ɔ́, un nɔ fán ahohó.

³¹Mawu ɔ́, alixlɛ́mɛtɔ́ e nyɔ́ bɔ nǔ bǐ vɔ ɖ'é wú ɔ́ wɛ, xó e Mawu Mavɔmavɔ nɔ ɖɔ ɔ́ nɔ sɔgbe. Gǎglónú wɛ é nyí nú mɛ e nɔ hɔn wá su i lɛ́ɛ bǐ.

³²Mawu mǐtɔn ɖɔhun we ɖe ǎ, Mawu Mavɔmavɔ wɛ, Mawu mǐtɔn wɛ nyí awǐnnya ɖokpó e mǐ ɖǒ é.

³³Ahohó ɖaxó wɛ Mawu nyí nú mì; é wɛ nɔ ɖe ali nú mì.

³⁴ É bló bɔ un nɔ yá afɔ zungbɔ́ ɖɔhun, é nɔ́ hɛn mì bɔ un nɔ nɔ te só jí.

³⁵É wɛ nɔ kplɔ́n ahwanfunfun mì. É wɛ nɔ bló bɔ awa ce lɛ́ɛ nɔ mɔ gǎn bó nɔ da gǎ e syɛ́n lɛ́ɛ.

³⁶Mawu Mavɔmavɔ, a cyɔ́n alɔ jǐ ce gǎglónú ɖɔhun, a hwlɛ̌n mì gán. Un ylɔ́ we ɔ́, a nɔ yí gbe nú mì, bó nɔ ná hlɔ̌nhlɔ́n mì.

³⁷A nɔ bló bɔ un nɔ kán wezun bléblé, un nɔ ɖe afɔ nyi do ǎ.

³⁸Un nɔ jɛ kɛntɔ́ ce lɛ́ɛ gúdo, bó nɔ sú kún yětɔn dó, un ma sú kún yětɔn dó ǎ ɔ́, un nɔ lɛ́ kɔ ǎ.

³⁹Un nɔ já yě, un nɔ gblé gbɛ dó nú yě. Yě sɔ́ ná sí te ǎ, yě ɖo kɔ́ mɛ, bɔ afɔ ce ɖo yě jí.

⁴⁰A nɔ ná hlɔ̌nhlɔ́n mì bɔ un nɔ dó fun ahwan, a nɔ zin kɛntɔ́ ce lɛ́ɛ dɛ́ ɖo nukɔn ce.

⁴¹A nɔ bló bɔ kɛntɔ́ ce lɛ́ɛ nɔ hɔn ɖo nukɔn ce, bɔ un nɔ hu mɛ e gbɛ́ wǎn nú mì lɛ́ɛ.

⁴²Yě nɔ́ ba mɛ e ná hwlɛ́n yě gán ɔ́ gbɔn fí bǐ bó ka nɔ́ ba kpo; yě nɔ́ sú xó ylɔ́ Mawu Mavɔmavɔ; é ká nɔ kɛ nu d'é mɛ nú yě ǎ.

⁴³Un nɔ li yě kɔ́ ɖɔhun, un nɔ li yě kpɔ́ɖɔ́kpɔ́ɖɔ́, un nɔ gbídí yě babá e ɖo ali jí é ɖɔhun.

⁴⁴A ɖe mì sín gǔ e togun ce fɔ́n dó jǐ ce ɔ́ mɛ, a sɔ́ mì ɖó togun lɛ́ɛ nu. Togun e un ma tunwun ɖ'ayǐ ǎ ɔ́ lɔ ɖo acɛ ce mɛ.

⁴⁵Toɖévomɛnu lɛ́ɛ nɔ jló ná nyí mɛ ɖo así ce, bɔ un ɖɔ xó lě tlóló kpowun ɔ́, yě nɔ́ bló ɖ'é jí.

⁴⁶Toɖévomɛnu lɛ́ɛ sín ayi sɔ́ nɔ jɛ ayǐ ǎ, bɔ yě nɔ́ tɔ́n sín fí e yě hɔn hwlá cí ɔ́ kpó xɛsi kpó.

⁴⁷Mawu Mavɔmavɔ ɖo gbɛ nǔgbó! Un dó kú nú mɛ e nyí só ce é. È nǐ kpa susu nú Mawu Mɛhwlɛ́ngántɔ́ ce.

⁴⁸É wɛ nyí Mawu e nɔ ba hlɔn nú mì é, é wɛ nɔ sɔ́ togun lɛ́ɛ ɖó acɛ ce mɛ.

⁴⁹Mawu Mavɔmavɔ, a nɔ yí mì sín kɛntɔ́ ce lɛ́ɛ sí, Mawu Mavɔmavɔ, a nɔ bló bɔ un nɔ ɖu ɖo mɛ e nɔ tɔ́n ahwan mì lɛ́ɛ jí. A nɔ hwlɛ́n mì gán ɖo adǎkaxotɔ́ lɛ́ɛ sí.

⁵⁰ Mawu Mavɔmavɔ ce, énɛ́ wú wɛ un ná nɔ kpa we ɖo akɔta lɛ́ɛ tɛ́ntin, bó ná nɔ ji han dó sɔ́ nyǐkɔ towe su.

⁵¹Mawu Mavɔmavɔ wa nǔ ɖaxó ɖaxó dó hwlɛ́n axɔ́sú e é sɔ́ é gán, é nyɔ́ xomɛ dó mɛ e é kɔn ami dó ta ná é wú, é nyɔ́ xomɛ dó Davídi kpó vǐ tɔn lɛ́ɛ kpó wú káká sɔ́yi.