Read fon 2 Samuwɛ́li 24 Bible Online

2 Samuwɛ́li 24 - fon bible

2 Samuwɛ́li 24

¹Mawu Mavɔmavɔ lɛ́ sin xomɛ dó Izlayɛ́li ví lɛ́ɛ, bó dɔn Davídi dó yě jí, bó ɖɔ n'i ɖɔ: “Yi sɔ́ mɛ e ɖo Izlayɛ́li kpó Judáa kpó lɛ́ɛ sín kɛ́n.”

²Ahwangán ɖaxó Jowabu ɖo axɔ́sú Davídi kpá ɖo fínɛ́, bɔ axɔ́sú ɔ́ ɖɔ n'i ɖɔ: “Yi gbɔn akɔta e ɖo Izlayɛ́li lɛ́ɛ bǐ mɛ, bó sɔ́ mɛ lɛ́ɛ sín kɛ́n, sín Dan ɖo totaligbé káká wá Bɛ̌-Ceva ɖo tofɔligbé, bónú má tunwun mɛ nabí e ɖo to ɔ́ mɛ é.”

³Jowabu ɖɔ nú axɔ́sú ɔ́ ɖɔ: “Mawu Mavɔmavɔ, Mawu mɛtɔn ní bló bónú togun ɔ́ mɔ̌hunkɔtɔn donu kanwe ko ní ji d'é jí, bónú mɛ ɖésú ná mɔ ɖó nukún wú. Amɔ̌, Sɛ́mɛɖó, étɛ́wú è jlǒ ná sɔ́ mɛ lɛ́ɛ sín kɛ́n kpɔ́n?”

⁴É ɖo mɔ̌ có, xó e axɔ́sú ɔ́ ɖɔ ɔ́, é ɖɔ wɛ; Jowabu kpó ahwangán lɛ́ɛ kpó sixú gbɛ́ ǎ; énɛ́ ɔ́, yě gbɔ bo gosín gɔ̌n tɔn, bó ɖidó mɛ lɛ́ɛ sín kɛ́n sɔ́ gbé lě e é ɖɔ gbɔn é.

⁵Yě dó asá Judɛ́ɛn tɔ ɔ́ bó jɛ mɛ lɛ́ɛ sín kɛ́n sɔ́ jí ɖo Alowɛ́ɛ toxo ɔ́ kpó toxo e ɖo tɔdo ɔ́ tɛ́ntin ɔ́ kpó mɛ. Yě gbɔn akɔta Gadi tɔn yíkúngban jí ɖidó Yazɛ́ɛ.

⁶Yě byɔ́ Galadi yíkúngban jí, bó yi Hitíti lɛ́ɛ sín tomɛ. Yě yi Kadɛ́ci, bó yi Dan-Yaani, kpó toxo e lɛ́ lɛ̌ dó e lɛ́ɛ kpó mɛ, bó wá yi Sidɔ́ɔn.

⁷Yě lɛ́ yi toxo e è mɛ ahohó lɛ́ lɛ̌ dó ɖo Tíi ɔ́ mɛ, bó gbɔn Hivíti lɛ́ɛ kpó Kanáanu lɛ́ɛ kpó sín toxo lɛ́ɛ bǐ mɛ, bó wá fó dó Bɛ̌-Ceva, ɖo Judáa sín tofɔligbé.

⁸Sun tɛ́nnɛ azǎn ko wɛ yě zě ɖó te bo gbɔn to ɔ́ bǐ mɛ káká wá Jeluzalɛ́mu.

⁹Jowabu ɖó lě e é sɔ́ mɛ lɛ́ɛ sín kɛ́n gbɔn ɔ́ sín gbe nú axɔ́sú ɔ́. É mɔ gbɛtɔ́ e hɛn ɔ́, é ná sixú yi fun ahwan ɔ́ adɔ̌kpo kanɖé (800.000) ɖo Izlayɛ́li, bó mɔ gbɛtɔ́ adɔ̌kpo koatɔ́n (500.000) ɖo Judáa.

¹⁰Ée Davídi sɔ́ mɛ lɛ́ɛ sín kɛ́n fó ɔ́, hǔn tɔn jɛ xixo jí, bɔ é ɖɔ nú Mawu Mavɔmavɔ ɖɔ: “Nǔ énɛ́ e un wa ɔ́, hwɛ ɖaxó ɖokpó wɛ un hu dó we. Din ɔ́, Mawu Mavɔmavɔ, kɛnklɛ́n zé hwɛ kɛ mɛsɛntɔ́ towe, ɖó taɖunɔnú ɖésú wɛ un wa.”

¹¹Ée Davídi fɔ́n ayǐhɔ́ngbe tɔn ɔ́, Mawu Mavɔmavɔ ɖɔ xó nú Gadi gbeyíɖɔ nǔmɔtɔ́ Davídi tɔn.

¹²Mawu Mavɔmavɔ ɖɔ n'i ɖɔ é ní yi ɖɔ nú Davídi ɖɔ: “Un sɔ́ awě atɔn ɖó te nú we. A nǎ zě ɖokpó, bɔ un ná sɛ́ dó we.”

¹³Ée Mavɔmavɔ ɖɔ mɔ̌ nú Gadi ɔ́, é yi Davídi gɔ́n, bó wlí nǔ e Mavɔmavɔ ɖɔ n'i ɔ́ ɖɔ n'i. É kanbyɔ́ ɛ ɖɔ: “A jlǒ ɖɔ adɔ ní tɔ́n ɖo to towe mɛ xɔ xwe tɛ́nwe a? Abǐ a jlǒ ná hɔn ɖo kɛntɔ́ towe lɛ́ɛ nukɔn káká nú sun atɔn a? Abǐ a jlǒ ɖɔ jɛmɛjí ná nɔ to towe jí káká nú azǎn atɔn a? Lin tamɛ kpɔ́n ganjí, bó ɖɔ nǔ e un ná yi ɖɔ nú mɛ e sɛ́ mì dó ɔ́.”

¹⁴Davídi ɖɔ nú Gadi ɖɔ: “Ado ɖaxó ɖé ɖo huhu mì wɛ. Amɔ̌, un mɔ ɖɔ un jɛ Mawu Mavɔmavɔ lɔ mɛ ɔ́, é nyɔ́ hú un jɛ gbɛtɔ́ lɔ mɛ, ɖó Mawu Mavɔmavɔ nɔ́ kú nǔbláwǔ nú mɛ ɖésú.”

¹⁵Mawu Mavɔmavɔ sɛ́ jɛmɛjí dó Izlayɛ́li to ɔ́ mɛ gbe énɛ́ gbe zǎnzǎn káká wá jɛ hwenu e Mawu Mavɔmavɔ ɖó dó é. Bɛ́ sín Dan káká wá Bɛ̌-Ceva ɔ́, gbɛtɔ́ adɔ̌kpo atɔn děgba we afɔwó (70.000) kú ɖo togun ɔ́ mɛ.

¹⁶Ée wɛnsagun Mawu Mavɔmavɔ tɔn dlɛ́n alɔ dó Jeluzalɛ́mu jí, bó ɖo jɛmɛjí ɔ́ ná sɛ́ dó wɛ ɔ́, Mawu Mavɔmavɔ mɔ ɖɔ fí e émí wa nǔ xá yě jɛ ɔ́ kpé, lobo ɖɔ nú wɛnsagun nǔhɛngblétɔ́ ɔ́ ɖɔ: “É nyɔ́ mɔ̌, zě alɔ dó do.” Hwenɛ́nu ɔ́, wɛnsagun ɔ́ kó sɛkpɔ́ fí e Alona Jebuzinu ɔ́ nɔ́ fún jinukún ɖe é.

¹⁷Ée Davídi mɔ wɛnsagun ɔ́ ɖo kún vívá nú togun ɔ́ wɛ é ɔ́, é ɖɔ nú Mawu Mavɔmavɔ ɖɔ: “Nyi wɛ hu hwɛ, hwɛ ce wɛ. Mɛ énɛ́ lɛ́ɛ ɔ́, xomɛvɔ́nɔ wɛ nú yě. Hǔn nyɛ kpó hɛ̌nnumɔ ce lɛ́ɛ kpó wɛ a nǎ dɔn tó ná.”

¹⁸Gbe énɛ́ gbe ɔ́, Gadi wá Davídi gɔ́n, bó ɖɔ n'i ɖɔ: “Yi gle e mɛ Alona Jebuzinu ɔ́ nɔ́ fún jinukún ɖe é mɛ, bó mɛ vɔ̌sákpe ɖokpó ɖó fínɛ́ nú Mawu Mavɔmavɔ.”

¹⁹Davídi yi gle ɔ́ mɛ lě e Mawu Mavɔmavɔ ɖɔ sɛ́ dó e gbɔn Gadi jí é.

²⁰Alona ɖo jǐ, bó mɔ axɔ́sú ɔ́ kpó mɛsɛntɔ́ tɔn lɛ́ɛ kpó jǎwe gɔ̌n tɔn, lobo tɔ́n, bó wá jɛ kpo ɖo axɔ́sú ɔ́ sá mɛ, bó xwe agbɔ̌nnusú do.

²¹Alona kanbyɔ́ axɔ́sú ɔ́ ɖɔ: “Đagbe wɛ sɛ́mɛɖó ce wá gɔ̌n ce a?” Bɔ Davídi yí gbe n'i ɖɔ: “Gle towe élɔ́ xɔ gbé wɛ un tɔ́n, bó ná mɛ vɔ̌sákpe ɖokpó ɖ'é jí nú Mawu Mavɔmavɔ, bɔ awě e ɖo to ɔ́ xo wɛ ɔ́, ná nɔ te.”

²²Bɔ Alona ɖɔ nú Davídi ɖɔ: “Sɛ́mɛɖó! È nǐ fɔ nǔ e ba wɛ mɛ ɖe lɛ́ɛ bǐ, bó sá vɔ̌ lɛ́ɛ lě e é jló mɛ gbɔn é. Nyibú ce lɛ́ɛ nɛ́ ɖo fínɛ́ nɛ́, é jló mɛ ɔ́, è nǎ zé yě dó sá vɔ̌ ná. Kpo e nyibú lɛ́ɛ nɔ́ dɔn gbɔn nǔkún jí ɔ́ nɛ́ ɖo fínɛ́ nɛ́, é jló mɛ ɔ́, è nǎ zé yě dó flɔ́ myɔ ná.

²³Un ná bǐ mɛ. Sɛ́mɛɖó, Mawu Mavɔmavɔ, Mawu mɛtɔn ná hun xomɛ bo yí vɔ̌ mɛtɔn.”

²⁴Lo ɔ́, axɔ́sú ɔ́ ɖɔ nú Alona ɖɔ: “Éeǒ, un jló ná xɔ ɖo así towe bó ná sú axɔ́ wɛ. Un jló ná sɔ́ nǔ e mɛ un ma dó nǔ ɖěbǔ ǎ é dó sá vɔ̌ nú Mawu Mavɔmavɔ, Mawu ce ǎ.” Ée Davídi ɖɔ mɔ̌ é ɔ́, é zé gankwɛ́ kanɖé wǒ (50) n'i, bó xɔ gle ɔ́ kpó nyibú lɛ́ɛ kpó.

²⁵Davídi mɛ vɔ̌sákpe ɔ́ ɖó fínɛ́ nú Mawu Mavɔmavɔ. É sá vɔ̌ e è nɔ dó zo lɛ́ɛ kpó kɔnɖókpɔ́ vɔ́ lɛ́ɛ kpó ɖ'é jí. Énɛ́ ɔ́ gúdo ɔ́, Mawu Mavɔmavɔ fá xomɛ dó to ɔ́ wú, bɔ awě e ɖo Izlayɛ́li to ɔ́ xo wɛ ɔ́ nɔ te.