Read fon 1 Axɔ́sú 1 Bible Online

1 Axɔ́sú 1 - fon bible

1 Axɔ́sú 1

¹Axɔ́sú Davídi ko kpo; xwe tɔn ko sɛ yi. È na bo bɛ́ avɔ cyɔ́n n'i ɔ́, é nɔ glɔ́n jɔhɔn n'i ǎ.

²Énɛ́ ɔ́, mɛsɛntɔ́ tɔn lɛ́ɛ ɖɔ n'i ɖɔ: “Sɛ́mɛɖó, mǐ ná yi ba ɖyɔ̌vǐ ɖokpó wá nú mɛ, bónú é ná nɔ wa azɔ̌ nú mɛ; é ná nɔ kpé nukún mɛ wǔ, é ná nɔ mlɔ́ kpɔ́ xá mɛ, bó ná nɔ glɔ́n jɔhɔn nú mɛ.”

³Ée yě ɖɔ mɔ̌ n'i ɔ́, yě yi ba ɖyɔ̌vǐ e nyɔ́ ɖɛkpɛ ganjí ɔ́ gbɔn Izlayɛ́li to ɔ́ bǐ mɛ, bó mɔ ɖokpó ɖo gletoxo Cunɛ́mu tɔn mɛ; nyǐkɔ tɔn nɔ́ nyí Avicági; yě kplá ɛ wá nú axɔ́sú ɔ́.

⁴Đyɔ̌vǐ énɛ́ ɔ́ nyɔ́ ɖɛkpɛ tawun. É nɔ kpé nukún dó axɔ́sú ɔ́ wú, bó nɔ́ wa azɔ̌ n'i; lo ɔ́, axɔ́sú ɔ́ ɖó xó xá ɛ ǎ.

⁵ Hwenɛ́nu ɖokpó ɔ́, axɔ́sú Davídi sín vǐ Adoniyasi e nɔ tɔn nɔ́ nyí Hagiti ɔ́ bɛ́ goyíyí bó ɖɔ émí wɛ ná nyí axɔ́sú. É ba kɛkɛ́ví ɖokpó kpó sɔ́ kpó, bɔ gbɛtɔ́ kanɖé wǒ (50) ɖo wezun kán wɛ ɖo nukɔn tɔn.

⁶Nǔ e wa wɛ é nɔ́ ɖe lɛ́ɛ ɔ́, tɔ́ ɔ́ nɔ́ kɛ nu dó ɖě wú n'i kpɔ́n gbeɖé ɖo gbɛ tɔn mɛ ǎ; é ká nɔ́ kan nǔ e wú é ɖo mɔ̌ wa wɛ ɔ́ byɔ́ ɛ ǎ. Adoniyasi ka nyí mɛɖé bó nyɔ́ ɖɛkpɛ tawun; é wɛ jɛ Abusalɔ́mu nɛgbé.

⁷É blá ɖɔ xá ahwangán ɖaxó Jowabu, Selúya ví ɔ́ kpódó vɔ̌sánú-xwlémawutɔ́ Abiyatáa kpó, bɔ yě húzú jɛ jǐ tɔn.

⁸Lo ɔ́, vɔ̌sánú-xwlémawutɔ́ Sadɔ́ku kpódó Benayahu Yexoyada ví ɔ́ kpó, kpódó gbeyíɖɔ Mawu tɔn Natáan kpó, kpódó Cimɛ́yi kpó, kpódó Hleyi kpó, kpódó ahwanfuntɔ́ syɛ́nsyɛ́n e nɔ kplá Davídi lɛ́ɛ kpó ɖo jǐ tɔn ǎ.

⁹Adoniyasi ylɔ́ agɔ̌ ɖaxó ɖokpó, ɖo awǐnnya Zohelɛti tɔn e ɖo Eyinu-Hlogɛ́li ɔ́ kpá, bó fɔ gbɔ̌, nyibú kpó kanlin e dó jǒ lɛ́ɛ kpó dó sá vɔ̌. É ylɔ́ nɔví tɔn axɔ́sú ɔ́ sín vǐ lɛ́ɛ bǐ, bó ylɔ́ Judáa ví e ɖo azɔ̌ wa nú axɔ́sú ɔ́ wɛ lɛ́ɛ bǐ.

¹⁰Amɔ̌ é ylɔ́ gbeyíɖɔ Mawu tɔn Natáan ǎ, é ylɔ́ Benayahu ǎ, é ylɔ́ ahwanfuntɔ́ syɛ́nsyɛ́n lɛ́ɛ ǎ, é ká ylɔ́ nɔví tɔn Salomɔ́ɔ ɔ́ ǎ.

¹¹ Énɛ́ ɔ́, Natáan ɖɔ nú Bɛtisabe Salomɔ́ɔ sín nɔ ɔ́ ɖɔ: “A ka se ɖɔ Adoniyasi Hagiti ví ɔ́ húzú axɔ́sú cóbɔ aklúnɔ mǐtɔn Davídi ma tunwun a?

¹²Din ɔ́, wǎ nú má ɖɔ xó élɔ́ nú we bónú a nǎ hwlɛ́n hwi kpó vǐ towe Salomɔ́ɔ kpó sín gbɛ.

¹³Yi axɔ́sú Davídi gɔ́n, bó ɖɔ n'i ɖɔ: ‘Sɛ́mɛɖó, è ɖɔ nú nyɛ mɛsɛntɔ́ mɛtɔn bó xwlé nǔ d'é jí ɖɔ vǐ ce Salomɔ́ɔ wɛ ná wá ɖu axɔ́sú ɖó mɛ tɛn mɛ, bó ná jínjɔ́n axɔ́súzinkpo jí ǎ cé? Nɛ̌ ká gbɔn bɔ Adoniyasi ka ɖo axɔ́sú ɖu wɛ?’

¹⁴Hwenu e a nǎ kpo ɖo fínɛ́ bó ɖo xó ɖɔ xá axɔ́sú ɔ́ wɛ ɔ́, nyɛ ɖésú ná yi mɔ ɛ, bó ná gɔ́ so nú xó towe.”

¹⁵Ée Bɛtisabe se mɔ̌ ɔ́, é yi axɔ́sú ɔ́ gɔ́n. Axɔ́sú ɔ́ ka ɖo xɔ tɔn mɛ, ɖó é kó kpo bǐ. Đyɔ̌vǐ Avicági Cunɛ́munu ɔ́ ɖo fínɛ́, bó ɖo nukún kpé dó wǔ tɔn wɛ.

¹⁶Ée Bɛtisabe wá ɔ́, é jɛ kpo bo ɖe kɔ́ nú axɔ́sú ɔ́, bɔ é kanbyɔ́ ɛ ɖɔ: “Nɛ̌ wɛ gbɔn nú we?”

¹⁷Bɔ Bɛtisabe yí gbe n'i ɖɔ: “Sɛ́mɛɖó, mɛ ɖésúnɔ ko ɖɔ nú nyɛ mɛsɛntɔ́ mɛtɔn, bó xwlé Mawu Mavɔmavɔ, Mawu mɛtɔn d'é jí ɖɔ vǐ ce Salomɔ́ɔ wɛ ná ɖu axɔ́sú ɖó tɛn mɛtɔn mɛ, bó ná jínjɔ́n zinkpo mɛtɔn jí ǎ cé?

¹⁸Lo ɔ́, Sɛ́mɛɖó, Adoniyasi ko ɖo axɔ́sú ɖu wɛ, bɔ mɛ ka tunwun ǎ!

¹⁹É ylɔ́ agɔ̌ ɖaxó ɖokpó, bó bɛ́ nyibú, gbɔ̌ kpó kanlin e dó jǒ lɛ́ɛ kɔn nyi kpɔ́ dó sá vɔ̌ ná. É ylɔ́ vǐ mɛtɔn lɛ́ɛ bǐ, bó ylɔ́ vɔ̌sánú-xwlémawutɔ́ Abiyatáa, bó ylɔ́ ahwangán ɖaxó Jowabu; é ka ylɔ́ vǐ mɛtɔn Salomɔ́ɔ ǎ.

²⁰Sɛ́mɛɖó, Izlayɛ́li togun ɔ́ bǐ sín nukún wɛ ɖo jǐ mɛtɔn, bónú mɛ ɖésúnɔ ná ɖɔ mɛ e ná wá jínjɔ́n zinkpo mɛtɔn jí hwenu e è ma sɔ́ ná ɖo fí ǎ é.

²¹É ma nyí mɔ̌ ǎ ɔ́, hwenu e mɛ ná wá gosín mǐ mɛ fí ɔ́, è nǎ wa ɖɔ nyɛ kpó vǐ ce Salomɔ́ɔ kpó wa nǔ nyi do, bó ná dó ya nú mǐ.”

²²É kpo ɖo xó ɖɔ xá axɔ́sú ɔ́ wɛ bɔ gbeyíɖɔ Mawu tɔn Natáan wá.

²³È wǎ ɖɔ nú axɔ́sú ɔ́ ɖɔ: “Gbeyíɖɔ Mawu tɔn Natáan wá.” Natáan wá axɔ́sú ɔ́ nukɔn, bo xwe agbɔ̌nnusú do, lobo ɖe kɔ́.

²⁴Bo ɖɔ n'i ɖɔ: “Sɛ́mɛɖó, mɛ ɖésúnɔ wɛ ɖɔ Adoniyasi ná ɖu axɔ́sú ɖó tɛn mɛtɔn mɛ, bó ná jínjɔ́n zinkpo mɛtɔn jí a?

²⁵Đó égbé din ɔ́, é yi tɔdo mɛ, bó ylɔ́ agɔ̌ ɖaxó ɖokpó, bó bɛ́ gbɔ̌, nyibú kpó kanlin e dó jǒ lɛ́ɛ kpó kɔn nyi kpɔ́ dó sá vɔ̌ ná. É ylɔ́ vǐ mɛtɔn lɛ́ɛ bǐ, bó ylɔ́ ahwangán lɛ́ɛ, lobo ylɔ́ vɔ̌sánú-xwlémawutɔ́ Abiyatáa bɔ yě ɖo gɔ̌n tɔn bó ɖo nǔ ɖu wɛ, bó ɖo ahan nu wɛ, bó nɔ sú xó ɖɔ: ‘Susu nú axɔ́sú Adoniyasi!’

²⁶É ka ylɔ́ nyɛ mɛsɛntɔ́ mɛtɔn ɔ́ ǎ, é ylɔ́ vɔ̌sánú-xwlémawutɔ́ Sadɔ́ku ǎ, é ylɔ́ Benayahu Yexoyada ví ɔ́ ǎ, é ka ylɔ́ vǐ mɛtɔn Salomɔ́ɔ ǎ.

²⁷Axɔ́sú sɛ́mɛɖó ce jɛ́n ná gbe, bɔ è wa nǔ gbɔn mɔ̌ a? Sɛ́mɛɖó ce jɛ́n sɔ́ mɛ e ná yi zinkpo mɛtɔn jí, ɖó tɛn mɛtɔn mɛ é, bó má ká ɖɔ xó ɖé nú mǐ mɛsɛntɔ́ tɔn lɛ́ɛ a? Nǔ ká sixú nyí mɔ̌ a?”

²⁸Ée Natáan ɖɔ mɔ̌ ɔ́, axɔ́sú Davídi ɖɔ è nǐ yi ylɔ́ Bɛtisabe wá nú émí. Bɔ Bɛtisabe wá bó yi axɔ́sú ɔ́ gɔ́n.

²⁹Bɔ axɔ́sú ɔ́ xwlé Mawu bó ɖɔ: “Mawu Mavɔmavɔ e hwlɛ́n mì sín nǔgbomɛ lɛ́ɛ bǐ mɛ ɔ́ ɖo gbɛ.

³⁰Lě e un ko xwlé Mawu Mavɔmavɔ, Mawu Izlayɛ́li tɔn ɔ́, bó ɖɔ nú we ɖɔ vǐ towe Salomɔ́ɔ ná ɖu axɔ́sú ɖó tɛn ce mɛ, bó ná jínjɔ́n zinkpo ce jí ɔ́, un ná bló égbé.”

³¹Ée Bɛtisabe se mɔ̌ ɔ́, é jɛ kpo bó ɖe kɔ́ nú axɔ́sú ɔ́, bó ɖɔ: “Susu nú sɛ́mɛɖó ce axɔ́sú Davídi káká sɔ́yi.”

³²Énɛ́ ɔ́ gúdo ɔ́, axɔ́sú Davídi ɖɔ è nǐ yi ylɔ́ vɔ̌sánú-xwlémawutɔ́ Sadɔ́ku, kpódó gbeyíɖɔ Mawu tɔn Natáan kpó, kpódó Benayahu Yexoyada ví ɔ́ kpó wá nú émí; ée yě wá ɔ́,

³³é ɖɔ nú yě ɖɔ: “Mi kplá sɔ́ja ce e nɔ nya xɛ ɖo jǐ ce lɛ́ɛ, bónú mi zé vǐ ce Salomɔ́ɔ ɖó sɔ́tócí ce jí, bó kplá ɛ yi tɔjɔtɛn Gixɔ́ni kɔn.

³⁴Nú mi jɛ fínɛ́ ɔ́, vɔ̌sánú-xwlémawutɔ́ Sadɔ́ku kpódó gbeyíɖɔ Mawu tɔn Natáan kpó ná kɔn ami dó ta n'i, bó ná sɔ́ ɛ axɔ́sú ɖó Izlayɛ́li togun ɔ́ nu. Mi ná kún lanzo, bó ná sú xó ɖɔ: ‘Susu nú axɔ́sú Salomɔ́ɔ!’

³⁵Énɛ́ ɔ́ gúdo ɔ́, mi ná xwedó e wá, bɔ é ná jínjɔ́n axɔ́súzinkpo ce jí, bó ná ɖu axɔ́sú ɖó tɛn ce mɛ. É wɛ un sɔ́ bɔ é ná ɖu gǎn ɖo Izlayɛ́li togun ɔ́ kpódó Judáa togun ɔ́ kpó nu.”

³⁶Ée axɔ́sú ɔ́ ɖɔ mɔ̌ ɔ́, Benayahu Yexoyada ví ɔ́ yí gbe n'i ɖɔ: “Sɛ́mɛɖó, è ɖɔ xó ganjí! Mawu Mavɔmavɔ, Mawu mɛtɔn ɖésú wɛ ɖɔ xó gbɔn jǐ mɛtɔn.

³⁷Mawu Mavɔmavɔ ní nɔ kpɔ́ xá Salomɔ́ɔ lě e é nɔ kpɔ́ xá mɛ gbɔn é. É ní bló bónú axɔ́súɖuɖu Salomɔ́ɔ tɔn ní ɖó susu hú gǎn mɛtɔn!”

³⁸Vɔ̌sánú-xwlémawutɔ́ Sadɔ́ku kpódó gbeyíɖɔ Mawu tɔn Natáan kpó, kpódó Benayahu Yexoyada ví ɔ́ kpó, kpódó Keleti lɛ́ɛ kpó, kpódó sɔ́ja Pɛlɛ́ti ví e nɔ nya xɛ ɖo axɔ́sú ɔ́ jí lɛ́ɛ kpó yi mɔ Salomɔ́ɔ, bó sɔ́ ɛ ɖó axɔ́sú Davídi sín sɔ́tócí jí, bó kplá ɛ yi tɔjɔtɛn Gixɔ́ni kɔn.

³⁹Vɔ̌sánú-xwlémawutɔ́ Sadɔ́ku ka ko zé lanzo ɖé ɖo goxɔ Mawu tɔn ɔ́ mɛ, bɔ ami ɖ'é mɛ. É kɔn ami ɔ́ dó ta nú Salomɔ́ɔ bó sɔ́ ɛ axɔ́sú. Énɛ́ ɔ́ gúdo ɔ́, è kún lanzo, bɔ togun ɔ́ bǐ ɖɔ: “Susu nú axɔ́sú Salomɔ́ɔ.”

⁴⁰Togun ɔ́ bǐ xwedó e yi toxo ɔ́ mɛ, bó ɖo kpete kún wɛ, bó ɖo awǎ jɛ wɛ mɔ̌hunkɔtɔn. Yě ɖo awǒbóbó kpa wɛ bó ɖo xó sú wɛ káká bɔ ayǐkúngban sísɔ́.

⁴¹Nǔ ɖu fó wɛ Adoniyasi kpódó mɛ e é ylɔ́ bɔ yě wá ɖo agɔ̌ ɖu xá ɛ wɛ lɛ́ɛ kpó ɖe kɛ́ɖɛ́, bó se zǐngídi ɔ́. Ée Jowabu se lanzo ɔ́ sín gbe ɔ́, é ɖɔ: “Nɛ̌ ka gbɔn bɔ zǐngídi ɖo toxo ɔ́ mɛ sɔ mɔ̌?”

⁴²Xó ɔ́ ɖɔ wɛ é ɖe bɔ Jonatáan vɔ̌sánú-xwlémawutɔ́ Abiyatáa ví ɔ́ wá, bɔ Adoniyasi ɖɔ n'i ɖɔ: “Sɛ wá gɔ̌n ce, ɖó mɛjɔmɛ ɖokpó wɛ nú we, xó ɖagbe ɖé jɛ́n wɛ a nǎ kó hɛn wá din.”

⁴³Bɔ Jonatáan yí gbe n'i ɖɔ: “Gbeɖé, xó ɖagbe ɖé wɛ ǎ! Sɛ́mɛɖó mǐtɔn Davídi wɛ sɔ́ Salomɔ́ɔ axɔ́sú.

⁴⁴É ɖɔ nú vɔ̌sánú-xwlémawutɔ́ Sadɔ́ku kpódó gbeyíɖɔ Mawu tɔn Natáan kpó, kpódó Benayahu Yexoyada ví ɔ́ kpó, kpódó Keleti lɛ́ɛ kpó, kpódó Pɛlɛ́tinu lɛ́ɛ kpó ɖɔ yě ní kplá Salomɔ́ɔ, bɔ yě sɔ́ ɛ ɖó axɔ́sú Davídi sín sɔ́tócí jí.

⁴⁵Bɔ vɔ̌sánú-xwlémawutɔ́ Sadɔ́ku kpódó gbeyíɖɔ Mawu tɔn Natáan kpó kɔn ami dó ta n'i, bó sɔ́ ɛ axɔ́sú ɖo tɔjɔtɛn Gixɔ́ni kɔn. Yě lɛ́ kɔ sín fínɛ́, bó ɖidó kpó awǎjijɛ kpó, bɔ toxo ɔ́ bǐ xozǐn. Zǐngídi e se wɛ mi ɖe ɔ́ nɛ́.

⁴⁶Salomɔ́ɔ ko ɖo zinkpo ɔ́ jí lɔ.

⁴⁷Bɔ mɛsɛntɔ́ axɔ́sú ɔ́ tɔn lɛ́ɛ wá xo ɖɛ nú sɛ́mɛɖó mǐtɔn axɔ́sú Davídi ɖɔ jí: ‘Mawu mɛtɔn ní bló bónú Salomɔ́ɔ sín nyǐkɔ ní gba kpé hú nyǐkɔ mɛtɔn. Ní bló bónú axɔ́súɖuɖu tɔn ní ɖó susu hú gǎn axɔ́súɖuɖu mɛtɔn!’ Énɛ́ ɔ́ gúdo ɔ́, axɔ́sú ɔ́ xwe agbɔ̌nnusú do ɖo zan tɔn jí,

⁴⁸bó ɖɔ: ‘Susu nú Mawu Mavɔmavɔ, Mawu Izlayɛ́li tɔn. É ná mɛ e ná nɔ zinkpo ce jí ɔ́ mì égbé, bɔ nyɛ ɖésú mɔ.’ ”

⁴⁹Ée mɛ e Adoniyasi ylɔ́ wá agɔ̌ gbé lɛ́ɛ se mɔ̌ ɔ́, xɛsi jɛ yě bǐ jí, bɔ yě jɛ te sí jí, bɔ mɛ ɖokpó ɖokpó wlí ali tɔn.

⁵⁰Adoniyasi lɔmɔ̌ ɖi xɛsi nú Salomɔ́ɔ bó yi goxɔ Mawu Mavɔmavɔ tɔn ɔ́ mɛ, bó zunfán vɔ̌sákpe ɔ́ sín zo lɛ́ɛ[1].

⁵¹È wǎ ɖɔ nú Salomɔ́ɔ ɖɔ: “Kpɔ́n! Adoniyasi ɖo xɛsi ɖi nú we wɛ, bó yi goxɔ Mawu tɔn ɔ́ mɛ, bó zunfán vɔ̌sákpe ɔ́ sín zo lɛ́ɛ, bó ɖɔ ényí axɔ́sú Salomɔ́ɔ ma xwlé nǔ égbé ɖɔ émí kún ná hu émí ó ǎ ɔ́, émí kún ná gosín fínɛ́ ó.”

⁵²Énɛ́ ɔ́, Salomɔ́ɔ ɖɔ: “Nú é zán ayixa ɖagbe ɔ́, ɖa e ɖo ta tɔn ɔ́ ɖokpó ná j'ayǐ ǎ; amɔ̌ é zán ayixa nyanya ɔ́, é ná kú.”

⁵³Axɔ́sú Salomɔ́ɔ sɛ́ mɛ dó bɔ è yi kplá ɛ sín vɔ̌sákpe ɔ́ kɔn wá; ée é wá ɔ́, é ɖe kɔ́ nú axɔ́sú Salomɔ́ɔ, bɔ Salomɔ́ɔ ɖɔ é ní yi xwé tɔn gbe.