Read fon 1 Axɔ́sú 10 Bible Online

1 Axɔ́sú 10 - fon bible

1 Axɔ́sú 10

¹ Axɔ́sú nyɔ̌nu Saba tɔn se lě e Salomɔ́ɔ sín nyǐkɔ ɖo jǐ yi wɛ gbɔn é. É wá gɔ̌n tɔn, bó ná nyi nǔbasɔ́ ɖé lɛ́ɛ dó e, dó tɛn ɛ kpɔ́n.

²É kpódó gbɛtɔ́ wɔ̌buwɔ́bú ɖé lɛ́ɛ kpó wɛ wá Jeluzalɛ́mu. É dó nǔsáwǔ wǎnɖagbenɔ gěgé, siká gěgé kpódó awǐnnya xɔ akwɛ́ gěgé kpó sín agban nú lǎkúnmí gěgé, bó wá Jeluzalɛ́mu. É yi Salomɔ́ɔ gɔ́n, bó kan nǔ e é kó lɛ́n dó ayi mɛ lɛ́ɛ bǐ byɔ́ ɛ.

³Salomɔ́ɔ kpé nǔ e é kanbyɔ́ ɛ lɛ́ɛ bǐ wú, bó ná sin nú yě; nǔ ɖěbǔ kpo bɔ axɔ́sú ɔ́ gɔn ma tínmɛ n'i ǎ.

⁴Axɔ́sú nyɔ̌nu Saba tɔn mɔ nǔnywɛ́ e Salomɔ́ɔ ɖó lɛ́ɛ bǐ, bó mɔ xwé e é sá é.

⁵É mɔ nǔ e Salomɔ́ɔ nɔ ɖu lɛ́ɛ, bó mɔ fí e gǎn hɔn-yitɔ́ tɔn lɛ́ɛ nɔ́ nɔ é, bó mɔ awu e mɛ mɛ e nɔ ná ɛ nǔɖuɖu lɛ́ɛ kpó mɛ e nɔ ba ahan n'i lɛ́ɛ kpó ɖe é, bó mɔ vɔ̌ e é dó zo nú Mawu Mavɔmavɔ lɛ́ɛ. Ée é mɔ nǔ énɛ́ lɛ́ɛ mɔ̌ ɔ́, agbɔ̌n kpé e,

⁶bɔ é ɖɔ nú axɔ́sú ɔ́ ɖɔ: “Xó e a nɔ ɖɔ bɔ un se ɖo to ce mɛ ɔ́, kpódó nǔnywɛ́ e a ɖǒ bɔ un se ɖo to ce mɛ ɔ́ kpó ɔ́, hǔn nǔgbó wɛ.

⁷Xó énɛ́ lɛ́ɛ e un se ɔ́, un ɖi có bó wá mɔ ɖó nukún wú ǎ. Nǔ e un ka wá mɔ ɖo fí din lɛ́ɛ ɔ́, un se vlɔ̌ɖówe có bó wá fí ǎ. Nǔnywɛ́ e a ɖǒ ɔ́ kpódó dɔkun e a jɛ ɔ́ kpán hú gǎn lě e è ɖɔ gbɔn bɔ un se é.

⁸Nǔ nyɔ́ nú mɛ towe lɛ́ɛ, nǔ nyɔ́ nú mɛsɛntɔ́ towe lɛ́ɛ; yě nɔ́ ɖo nukɔn towe hwebǐnu, bó nɔ ɖo nǔnywɛ́ yí ɖo así towe wɛ.

⁹Susu nú Mawu Mavɔmavɔ, Mawu towe e wa ɖagbe nú we, bó sɔ́ we ɖó axɔ́súzinkpo Izlayɛ́li tɔn jí é. Wǎn e Mawu Mavɔmavɔ yí nú Izlayɛ́li ɔ́ ɖo te káká sɔ́yi; énɛ́ ɔ́ wú wɛ é sɔ́ we axɔ́sú, bónú a nǎ wa nǔ jlɔ́jlɔ́, bó ná dó hwɛjijɔ.”

¹⁰Ée axɔ́sú nyɔ̌nu Saba tɔn ɔ́ ɖɔ mɔ̌ ɔ́, é ná siká tɔ́nu atɔn adaɖé mɔ̌ Salomɔ́ɔ, bó ná ɛ nǔsáwǔ wǎn ɖagbenɔ kpɔ́ gégé, bó ná ɛ awǐnnya xɔ akwɛ́. Sín gbe énɛ́ gbe ɔ́, è sɔ́ mɔ mɛɖé hɛn nǔsáwǔ wǎnɖagbenɔ ɖé wá Izlayɛ́li bɔ é sukpɔ́ sɔ ée axɔ́sú nyɔ̌nu Saba tɔn wá ná axɔ́sú Salomɔ́ɔ ɔ́ kpɔ́n gbeɖé ǎ.

¹¹Tɔjíhún axɔ́sú Ilámu tɔn e hɛn siká sín Ofíi wá lɛ́ɛ lɛ́ hɛn santálutín wɔ̌buwɔ́bú ɖé lɛ́ɛ kpó awǐnnya xɔ akwɛ́ wɔ̌buwɔ́bú ɖé lɛ́ɛ kpó wá.

¹²Axɔ́sú Salomɔ́ɔ sɔ́ santálutín lɛ́ɛ dó ná sósyɛ́n Mawu Mavɔmavɔ xwé ɔ́, lobo sɔ́ ɖě dó ná sósyɛ́n hɔnmɛ ɔ́, bó lɛ́ sɔ́ ɖě dó bló agǐdigbo kpódó kanhún lɛ́ɛ kpán nú hanjitɔ́ lɛ́ɛ. È sɔ́ hɛn santálutín wá Izlayɛ́li bɔ é sukpɔ́ sɔ mɔ̌ kpɔ́n gbeɖé ǎ. È ka sɔ́ mɔ ɖě káká jɛ égbé ǎ.

¹³Axɔ́sú Salomɔ́ɔ ka ná nǔ e jló axɔ́sú nyɔ̌nu Saba tɔn bɔ é byɔ́ ɛ lɛ́ɛ bǐ i. É lɛ́ ná ɛ nǔ e axɔ́sú é ɖɔhun sixú ná mɛ é. Énɛ́ ɔ́ gúdo ɔ́, axɔ́sú nyɔ̌nu ɔ́ kpódó mɛsɛntɔ́ tɔn lɛ́ɛ kpó lɛ́ kɔ yi to yětɔn mɛ.

¹⁴Siká e nɔ wá nú Salomɔ́ɔ xwewú xwewú ɔ́ yi tɔ́nu ko.

¹⁵Nǔjɔ e è nɔ ɖe ɖo agban e nɔ gosín togúdo wá lɛ́ɛ jí lɛ́ɛ, kpódó ée è nɔ yí ɖo ajɔ̌nú to ɔ́ mɛ tɔn lɛ́ɛ jí lɛ́ɛ kpó, kpódó takwɛ́ e axɔ́sú toɖévomɛ tɔn lɛ́ɛ nɔ sú lɛ́ɛ kpó, abǐ ée tokpɔngán to ɔ́ mɛ tɔn lɛ́ɛ nɔ yí lɛ́ɛ kpó gɔ́ ná.

¹⁶Axɔ́sú Salomɔ́ɔ zɔ́n bɔ è blǒ gǎglónú ɖaxó ɖaxó afɔɖé n'i bó tɛ́ siká dó yě wú. Siká kilóo ayizɛ́n wɛ è tɛ́ dó gǎglónú ɖokpó ɖokpó wú.

¹⁷È lɛ̌ bló gǎglónú kpɛví kpɛví afɔɖé kanwe ko (300) n'i bó tɛ́ siká dó yě wú. Siká kilóo ɖokpó adaɖé wɛ è tɛ́ dó ɖokpó ɖokpó wú. É bɛ́ yě dó xwé e è nɔ ylɔ́ ɖɔ “Zungbó Libáan tɔn” ɔ́ gbe.

¹⁸Axɔ́sú ɔ́ lɛ́ zɔ́n bɔ è blǒ axɔ́súzinkpo ɖaxó ɖokpó n'i, bó zé ajinakúɖú dó ɖó acɔ́ ná, bó tɛ́ siká akú d'é wú.

¹⁹Axɔ́súzinkpo énɛ́ ɔ́ ɖó kpekán ayizɛ́n, bɔ gǎnjɛmɛ tɔn cí toboo. É ɖó awaɖótɛn we; é kpa kinnikínní we ɖó awaɖótɛn ɖokpó ɖokpó kpá.

²⁰È lɛ̌ kpa kinnikínní wěwé ɖěvo lɛ́ɛ, bó to yě ɖó kpekán lɛ́ɛ jí, ayizɛ́n ɖo amyɔxwé, bɔ ayizɛ́n ɖo ɖisíxwé. È blǒ nǔ mɔ̌hunkɔtɔn ɖě ɖo axɔ́súɖuto lɛ́ɛ ɖě mɛ ǎ.

²¹Siká wɛ è dǒ bló kɔ́fu axɔ́sú Salomɔ́ɔ tɔn lɛ́ɛ bǐ nǎ. Gannú e ɖo xwé e è nɔ ylɔ́ ɖɔ “Zungbó Libáan tɔn” ɔ́ gbe lɛ́ɛ bǐ wɛ è sɔ́ siká akú dó bló ná. È zě kpatágan dó bló nǔ ɖěbǔ ná ǎ, ɖó axɔ́sú Salomɔ́ɔ sín hwenu ɔ́, è nɔ mɔ kpatágan dó mɔ nǔɖé wa nú ǎ.

²²Axɔ́sú Salomɔ́ɔ ɖó tɔjíhún ɖaxó ɖaxó ɖé lɛ́ɛ, bó nɔ sɛ́ dó gbě jí zɔga kpódó axɔ́sú Ilámu tɔn lɛ́ɛ kpó, bɔ xwe atɔn mɛ tɛgbɛ ɔ́, tɔjíhún nɛ́ lɛ́ɛ nɔ hɛn siká, kpatágan, ajinakúɖú, zǐnwó, kpódó ahlǐnhǎn kpó wá.

²³Axɔ́sú Salomɔ́ɔ hú gǎn axɔ́sú e ɖo ayǐkúngban jí lɛ́ɛ bǐ ɖo dɔkun kpó nǔnywɛ́ kpó mɛ.

²⁴Mɛ bǐ nɔ ba ná mɔ Salomɔ́ɔ, bó ná se nǔnywɛ́xó e Mawu sɔ́ dó ayi mɛ n'i é.

²⁵Yě mɛ ɖokpó ɖokpó nɔ wá ná nǔ i. Yě nɔ́ hɛn nǔ e è zě kpatágan dó bló ná lɛ́ɛ kpódó ée è zě siká dó bló ná lɛ́ɛ kpó, yě nɔ́ hɛn avɔ, ahwanfunnú, nǔsáwǔ wǎnɖagbenɔ, sɔ́ kpódó sɔ́tócí kpó wá n'i. Mɔ̌ wɛ yě nɔ́ bló xwewú xwewú tɛgbɛ.

²⁶ Salomɔ́ɔ kplé kɛkɛ́ví lɛ́ɛ kpódó sɔ́ lɛ́ɛ kpó. É ɖó kɛkɛ́ví afɔtɛ́nwe (1.400), bó ɖó sɔ́ děgba atɔn (12.000). É bɛ́ kɛkɛ́ví lɛ́ɛ ɖě dó toxo e mɛ kɛkɛ́ví lɛ́ɛ nɔ́ nɔ é mɛ, bó bɛ́ ɖě ɖó é ɖésúnɔ gɔ́n ɖo Jeluzalɛ́mu.

²⁷Axɔ́sú Salomɔ́ɔ bló bɔ kpatágan e ɖo Jeluzalɛ́mu ɔ́ sukpɔ́ kɛ́n ɖɔhun. É bló bɔ sɛ́dlutín sukpɔ́ sikomɔ́ɔtín e ɖo Cefela lɛ́ɛ ɖɔhun.

²⁸ Ejípu kpó Silísíi kpó wɛ axɔ́sú Salomɔ́ɔ sín sɔ́ lɛ́ɛ nɔ gosín. Ajɔ̌tɔ́ ɖé lɛ́ɛ wɛ nɔ yi xɔ wá n'i sín dɔ̌n.

²⁹Gankwɛ́ nǔwɔntɔn (600) wɛ è nɔ dó xɔ kɛkɛ́ví ɖokpó ná sín Ejípu, bó nɔ xɔ sɔ́ ɖokpó yí gankwɛ́ kantɔn gban (150). Ajɔ̌tɔ́ ɖokpó énɛ́ lɛ́ɛ wɛ nɔ xɔ wá nú axɔ́sú Hitíti lɛ́ɛ bǐ kpódó axɔ́sú Silíi tɔn lɛ́ɛ bǐ kpó.