Read fon 1 Axɔ́sú 13 Bible Online

1 Axɔ́sú 13 - fon bible

1 Axɔ́sú 13

¹Mawu Mavɔmavɔ sɛ́ gbeyíɖɔ tɔn dó, bɔ é gosín Judáa bó wá Betɛ́li hwenu e Jelobowámu ɖo vɔ̌sákpe ɔ́ kɔn, bó ɖo vɔ̌ sá wɛ é.

² Gbeyíɖɔ ɔ́ sú xó dó vɔ̌sákpe ɔ́ jí lě e Mawu Mavɔmavɔ ɖɔ n'i gbɔn é; é ɖɔ: “Vɔ̌sákpe! Vɔ̌sákpe! Nǔ e Mawu Mavɔmavɔ ɖɔ ɔ́ ɖíe: ‘È nǎ ji vǐ súnnu ɖokpó ɖo Davídi hɛ̌nnu; nyǐkɔ tɔn ná nyí Joziyási. É ná hu sinsɛngán e ɖo vɔ̌ sá wɛ ɖo hwi vɔ̌sákpe ɔ́ jí lɛ́ɛ, bɔ è nǎ nɔ́ dó gbɛtɔ́ xú zo ɖo jǐ towe!’ ”

³Gbeyíɖɔ Mawu tɔn ɔ́ lɛ́ ɖɔ: “Vɔ̌sákpe ɔ́ ná gba, bɔ afín e ɖ'é jí ɔ́ ná kɔn nyi kɔ́ mɛ. Énɛ́ ɔ́ ná xlɛ́ mi ɖɔ Mawu Mavɔmavɔ ɖésú wɛ ɖɔ xó.”

⁴Ée axɔ́sú Jelobowámu se xó e gbeyíɖɔ Mawu tɔn ɔ́ ɖo ɖiɖɔ dó vɔ̌sákpe Betɛ́li tɔn ɔ́ wú wɛ ɔ́, é dlɛ́n alɔ tɔn e ɖo vɔ̌sákpe ɔ́ jí ɔ́ dó gbeyíɖɔ ɔ́, bó sú xó bó ɖɔ: “Mi wlí nya élɔ́!” Lo ɔ́, alɔ e Jelobowámu dlɛ́n dó gbeyíɖɔ ɔ́ nɔ dlɛ̌ndlɛ́n mɔ̌, bó kú, bɔ é sɔ́ sixú wún ǎ.

⁵Hwenɛ́nu ɖokpó ɔ́, vɔ̌sákpe ɔ́ gba, bɔ afín e ɖ'é jí ɔ́ kɔn nyi kɔ́ mɛ, lě e Mawu Mavɔmavɔ ko ɖɔ gbɔn bó ná wuntun tɔn gbɔn gbeyíɖɔ tɔn jí é.

⁶Ée nǔ cí mɔ̌ ɔ́, axɔ́sú ɔ́ yí xó, bó ɖɔ nú gbeyíɖɔ Mawu tɔn ɔ́ ɖɔ: “Ylɔ̌ Mawu Mavɔmavɔ, Mawu towe, bó sa vo n'i dó ta ce mɛ, bónú má sixú wún alɔ ce!” Bɔ gbeyíɖɔ Mawu tɔn ɔ́ sa vo nú Mawu Mavɔmavɔ, bɔ axɔ́sú ɔ́ wún alɔ tɔn, bɔ alɔ jɛ alɔ tɛnmɛ.

⁷Énɛ́ ɔ́, axɔ́sú ɔ́ ɖɔ nú gbeyíɖɔ Mawu tɔn ɔ́ ɖɔ: “Wǎ mǐ ní yi xwé gbe, bó ná yi ɖu nǔ, énɛ́ ɔ́ gúdo ɔ́, un ná ná nǔ we.”

⁸Ée é ɖɔ mɔ̌ ɔ́, gbeyíɖɔ Mawu tɔn ɔ́ yí gbe n'i ɖɔ: “Nú a na bo ná mì dɔkun towe sín vlɔ̌ɖówe ɔ́, un xwe xwé towe gbe ǎ, un ɖo nǔ ná ɖu wɛ ǎ, un ka ɖo sin ná nu wɛ ɖo fí ǎ.

⁹Đó Mawu gbɛ́ nú mì ɖɔ nyɛ ní ma ɖu nǔ ó, nyɛ ní ma nu sin ó, nyɛ ní ma ká lɛ́ kɔ gbɔn ali e un gbɔn wá ɔ́ ó.”

¹⁰Ée é ɖɔ mɔ̌ ɔ́, é wlí ali ɖěvo ɖidó. É sɔ́ lɛ́ kɔ gbɔn ali e é gbɔn bó wá Betɛ́li ɔ́ ǎ.

¹¹Gbeyíɖɔ Mawu tɔn degénɔ ɖé ko ɖo Betɛ́li fínɛ́. Vǐ tɔn lɛ́ɛ ɖokpó wá wlí nǔ e gbeyíɖɔ Mawu tɔn ɔ́ wa ɖo Betɛ́li gbe nɛ́ gbe ɔ́ kpódó xó e é ɖɔ nú axɔ́sú ɔ́ lɛ́ɛ bǐ kpó ɖɔ n'i. Ée é wlí nǔ énɛ́ lɛ́ɛ bǐ ɖɔ nú tɔ́ tɔn ɔ́,

¹²tɔ́ yětɔn kanbyɔ́ yě ɖɔ: “Ali tɛ́ wɛ é ka gbɔn ɖidó?” Vǐ lɛ́ɛ ká mɔ ali e gbeyíɖɔ Mawu tɔn e gosín Judáa wá ɔ́ gbɔn é.

¹³Énɛ́ ɔ́, é ɖɔ nú vǐ tɔn lɛ́ɛ ɖɔ: “Mi blá akpa nú tócí ce nú mì.” Bɔ yě blá akpa nú tócí ɔ́, bɔ é xá jí,

¹⁴bo jɛ gbeyíɖɔ Mawu tɔn ɔ́ gúdo, bó yi mɔ ɛ ɖo ayǐjínjɔ́n ɖo telebɛ́ntitín ɖé sá, bó kanbyɔ́ ɛ ɖɔ: “Hwi wɛ nyí gbeyíɖɔ Mawu tɔn e gosín Judáa ɔ́ a?” Bɔ gbeyíɖɔ Mawu tɔn ɔ́ yí gbe n'i ɖɔ: “Nyɛ wɛ.”

¹⁵Bɔ é ɖɔ n'i ɖɔ: “Bo wá mǐ yi xwé gbe, bó ná yi ɖu nǔ.”

¹⁶É ká ɖɔ n'i ɖɔ: “Un sixú lɛ́ kɔ xwedó we ǎ, un ka sixú byɔ́ xwé towe gbe ǎ. Un ná ɖu nǔ ǎ, un ka ná nu sin xá we ɖo Betɛ́li fínɛ́ ǎ,

¹⁷ɖó Mawu Mavɔmavɔ gbɛ́ nú mì ɖɔ nyi wá hǔn, nyɛ ní ma ɖu nǔ ó, nyɛ ní ma ka nu sin ɖo fínɛ́ ó, nyɛ ní ma ka lɛ́ kɔ gbɔn ali e un gbɔn yi ɔ́ ó.”

¹⁸Bɔ gbeyíɖɔ Mawu tɔn degénɔ ɔ́ ɖɔ n'i ɖɔ: “Nyɛ lɔ ɔ́, gbeyíɖɔ Mawu tɔn wɛ un nyí hwi ɖɔhun, bɔ Mawu Mavɔmavɔ wá ɖɔ xó nú mì gbɔn wɛnsagun ɖokpó jí ɖɔ: ‘Kplá ɛ wá xwé towe gbe, bónú é ní ɖu nǔ bó nu sin.’ ” Adingban ɖó wɛ é ká ɖe.

¹⁹Ée gbeyíɖɔ Mawu tɔn ɔ́ se mɔ̌ ɔ́, é lɛ́ kɔ xwedó e yi xwé tɔn gbe, bó ɖu nǔ, bó nu sin.

²⁰Nǔ ɖu wɛ yě ɖe, bɔ Mawu ɖɔ xó nú gbeyíɖɔ e kplá ɛ wá xwé gbe ɔ́,

²¹bɔ éyɛ́ sú xó sɛ́ dó gbeyíɖɔ Mawu tɔn e gosín Judáa wá ɔ́ ɖɔ: “Xó e Mawu Mavɔmavɔ ɖɔ ɔ́ ɖíe: ‘A gba sɛ́n e Mawu Mavɔmavɔ dó nú we ɔ́. A blǒ nǔ e Mawu Mavɔmavɔ, Mawu towe zɔ́n we ɔ́ ǎ.

²²A lɛ̌ kɔ bo ɖu nǔ, bó nu sin ɖo tɛn e mɛ Mawu Mavɔmavɔ gbɛ́ nú we ɖɔ hwi ní má ɖu nǔ ɖe, hwi ní má ka nu sin ɖe ɔ́ ó. Énɛ́ ɔ́ wú ɔ́, a nǎ kú, bɔ è nǎ ɖi cyɔ towe dó tɔ́ towe sín yɔdo lɛ́ɛ mɛ ǎ.’ ”

²³Ée gbeyíɖɔ Mawu tɔn e lɛ́ kɔ wá ɔ́, ɖu nǔ bó nu sin ɔ́, mɛ e kplá ɛ wá ɔ́ blá akpa nú tócí ɔ́ n'i.

²⁴Bɔ é ɖidó, bɔ kinnikínní wlí i ɖo alixo bo hu i. Cyɔ tɔn ɖo ali ɔ́ jí, bɔ tócí ɔ́ ɖo akpá tɔn, bɔ kinnikínní ɔ́ lɔ ɖo akpá tɔn.

²⁵Mɛ e ɖo dǐndín wá yi wɛ lɛ́ɛ mɔ cyɔ ɔ́ ɖo ali ɔ́ xo, bɔ kinnikínní ɔ́ ɖo akpá tɔn. Ée yě jɛ toxo e mɛ gbeyíɖɔ Mawu tɔn degénɔ ɔ́ ɖe ɔ́ mɛ ɔ́, yě jɛ nǔ e yě mɔ ɔ́ ɖɔ jí.

²⁶Ée gbeyíɖɔ Mawu tɔn e lɛ́ kɔ n'i wá xwé gbe ɔ́ se mɔ̌ ɔ́, é ɖɔ: “Gbeyíɖɔ Mawu tɔn Judáanu e gbɛ́ gbe nú Mawu Mavɔmavɔ ɔ́ wɛ, bɔ Mawu Mavɔmavɔ jó e nú kinnikínní, bɔ kinnikínní wlí i bó hu i, lě e Mawu Mavɔmavɔ ko ɖɔ gbɔn n'i é.”

²⁷Énɛ́ ɔ́ gúdo ɔ́, é ɖɔ nú vǐ tɔn lɛ́ɛ ɖɔ: “Mi blá akpa nú tócí ce nú mì.” Ée yě blá akpa nú tócí ɔ́,

²⁸gbeyíɖɔ Mawu tɔn degénɔ ɔ́ ɖidó, bó mɔ cyɔ ɔ́ ɖo alixo, bɔ tócí ɔ́ kpó kinnikínní ɔ́ kpó ɖo akpá tɔn. Kinnikínní ɔ́ vún cyɔ ɔ́ ɖu ǎ, é ká wlí tócí ɔ́ ɖu ǎ.

²⁹Gbeyíɖɔ degénɔ ɔ́ sɔ́ cyɔ ɔ́ ɖó tócí ɔ́ jí, bó lɛ́ kɔ dó jǐ tɔn wá toxo ɔ́ mɛ, bó ná ɖi i, bó ná nɔ aluwɛ mɛ n'i.

³⁰É sɔ́ cyɔ ɔ́ dó yɔdo é ɖésúnɔ tɔn mɛ, bɔ mɛ lɛ́ɛ ji nǔwamɛhan élɔ́ n'i ɖɔ: “Áo nɔví ce kú!”

³¹Ée é ɖi i gúdo ɔ́, é ɖɔ nú vǐ tɔn lɛ́ɛ ɖɔ: “Nú un wá kú ɔ́, mi ná ɖi mì dó yɔdo e mɛ è ɖi gbeyíɖɔ Mawu tɔn ɔ́ dó ɔ́ mɛ; mi ná bɛ́ xú ce lɛ́ɛ ɖó xú tɔn lɛ́ɛ kpá.

³²Đó xó e Mawu Mavɔmavɔ ɖɔ n'i bɔ é sú xó bó ɖɔ ɔ́ ɖó ná jɛ; xó e Mawu Mavɔmavɔ ɖɔ n'i dó vɔ̌sákpe e ɖo Betɛ́li ɔ́ kpódó nɔtɛn Mawu tɔn e gbɔn só jí só jí ɖo Samalíi toxo lɛ́ɛ bǐ mɛ lɛ́ɛ kpó ɔ́ ɖó ná jɛ.”

³³Mawu Mavɔmavɔ ɖɔ xó énɛ́ lɛ́ɛ nú Jelobowámu, có é jó walɔ tɔn nyanya lɛ́ɛ dó ǎ. É lɛ́ cyán mɛ gbɔn togun ɔ́ bǐ mɛ, bó sɔ́ yě sinsɛngán. Mɛ ɖěbǔ jló ɔ́, é nɔ sɔ́ ɛ sinsɛngán.

³⁴Nǔ énɛ́ e Jelobowámu wa ɔ́ wɛ dɔn xwédo tɔn dó hwɛ mɛ. É wɛ zɔ́n bɔ è sú kún tɔn dó sín gbɛ ɔ́ mɛ.