Read fon 1 Axɔ́sú 17 Bible Online

1 Axɔ́sú 17 - fon bible

1 Axɔ́sú 17

¹ Elíi Ticibéenu ɔ́ xwlé Mawu nú axɔ́sú Akábu ɖɔ: “Mawu Mavɔmavɔ ɖo gbɛ; ɖo Mawu Izlayɛ́li tɔn e sín mɛsɛntɔ́ un nyí ɔ́ nyíkɔ mɛ ɔ́, un ɖo ɖiɖɔ nú we wɛ ɖɔ: ‘Xwe e jǎwe lɛ́ɛ mɛ ɔ́, ahǔn ná ja ǎ, jǐ ká ná ja ǎ, káká jɛ hwenu e un ná ɖɔ é.’ ”

²Énɛ́ ɔ́ gúdo ɔ́, Mawu Mavɔmavɔ ɖɔ nú Elíi ɖɔ:

³“Gosín fí, bó yi zǎnzǎnhwe jí, bó yi hwlá cí tɔhwín Keliti tɔn e ɖo Judɛ́ɛn tɔ ɔ́ sín zǎnzǎnhwe jí ɔ́ kpá.

⁴A nǎ nɔ́ nu tɔ ɔ́ sín sin. Un ko ná gbe avǔnsákɔwó lɛ́ɛ ɖɔ yě ní nɔ́ hɛn nǔɖuɖu wá nú we ɖo fínɛ́.”

⁵Elíi bló lě e Mawu Mavɔmavɔ ɖɔ gbɔn n'i é. É yi cí tɔhwín Keliti tɔn ɔ́ tó.

⁶Avǔnsákɔwó lɛ́ɛ nɔ hɛn wɔ̌xúxú kpódó lan kpó wá n'i zǎnzǎn gbada, bɔ é nɔ́ nu tɔhwín ɔ́ sín sin.

⁷Ée Elíi ɖo fínɛ́ káká ɔ́, tɔ ɔ́ wá xú, ɖó jǐ sɔ́ ja ɖo to ɔ́ mɛ ǎ.

⁸Énɛ́ ɔ́, Mawu Mavɔmavɔ ɖɔ nú Elíi ɖɔ:

⁹ “Sɔ́ nǔ bó yi Salɛpúta ɖo Sidɔ́ɔn kpá, bó nɔ fínɛ́. Un ko ná gbe nyɔ̌nu asúkúsi ɖé ɖo dɔ̌n ɖɔ ní nɔ ná nǔɖuɖu we.”

¹⁰Ée Mawu Mavɔmavɔ ɖɔ mɔ̌ ɔ́, Elíi sɔ́ nǔ, bó ɖidó, bó yi Salɛpúta. Ée é jɛ toxo ɔ́ sín hɔn nukɔn ɔ́, é mɔ nyɔ̌nu asúkúsi ɖé ɖo nakí cyán wɛ. É ylɔ́ nyɔ̌nu ɔ́, bó ɖɔ n'i ɖɔ: “Kɛnklɛ́n bó yi wún sin kpɛɖé wá nú mì, bónú ma nu.”

¹¹Ée é ɖɔ mɔ̌ ɔ́, nyɔ̌nu ɔ́ ɖidó sin ɔ́ wún gbé, bɔ Elíi lɛ́ ylɔ́ ɛ, bó ɖɔ n'i ɖɔ: “Kɛnklɛ́n bó hɛn wɔ̌xúxú kpɛɖé wá nú mì d'é jí.”

¹²Bɔ nyɔ̌nu ɔ́ xwlé nǔ n'i ɖɔ: “Mawu Mavɔmavɔ, Mawu towe ɖo gbɛ! Un ko ɖa nǔ ɖěbǔ ǎ. Linfín alɔgogo ɖokpó jɛ́n ɖo ká mɛ nú mì, bɔ ami kpɛɖé kpo ɖo go mɛ nú mì. Éɖíe un ɖo nakí kwín we ɖé cyán wɛ din, bo ná yi xwé gbe bó yi ɖa, bɔ nyɛ kpódó vǐ ce kpó ná ɖu e. Nú mǐ ɖu énɛ́ ɔ́, nǔɖé sɔ́ kpo nú mǐ zɛ kú wú ǎ.”

¹³Elíi ka xwlé Mawu n'i ɖɔ: “Ado ma hu we ó, yi bo bló lě e a ɖɔ gbɔn ɔ́. Amɔ̌, to zé dó ɖa wɔ̌xúxú kpɛví ɖé, bó zé wá nú mì hwɛ̌. Énɛ́ ɔ́ gúdo ɔ́, a nǎ ɖa hwi kpódó vǐ towe kpó tɔn.

¹⁴Đó nǔ e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe: ‘Linfínká ɔ́ ná jɛ vɔ̌ ǎ, amigo ɔ́ ná jɛ vɔ̌ ǎ, káká yi jɛ gbe e gbe nyɛ Mawu Mavɔmavɔ ná bló bɔ jǐ ná ja kɔn nyi ayǐkúngban ɔ́ jí dó é.’ ”

¹⁵Ée Elíi ɖɔ mɔ̌ ɔ́, nyɔ̌nu ɔ́ yi bó bló lě e é ɖɔ gbɔn ɔ́, bɔ é kpódó vǐ tɔn kpó, kpódó Elíi kpó mɔ nǔ bó ɖu xɔ azǎn.

¹⁶Linfínká ɔ́ jɛ vɔ̌ ǎ, amigo ɔ́ jɛ vɔ̌ ǎ lě e Mawu Mavɔmavɔ ɖɔ gbɔn, gbɔn Elíi jí é.

¹⁷Ée nǔ énɛ́ lɛ́ɛ jɛ wá yi ɔ́, asúkúsi e yí gbeyíɖɔ Mawu tɔn ɔ́ dó xwé gbe ɔ́ sín vǐ wlí azɔn. Azɔn ɔ́ syɛ́n káká bɔ gbɔjɛ tɔn xwɛ.

¹⁸Ée vǐ ɔ́ sín gbɔjɛ xwɛ mɔ̌ ɔ́, nyɔ̌nu ɔ́ ɖɔ nú Elíi ɖɔ: “Étɛ́wú wɛ a wa mɔ̌ xá mì gbeyíɖɔ Mawu tɔn? A nǎ flín hwɛ e un hu lɛ́ɛ Mawu, bó ná hu vǐ ce wú wɛ a wǎ a?”

¹⁹Ée nyɔ̌nu ɔ́ ɖɔ mɔ̌ ɔ́, Elíi ɖɔ n'i ɖɔ: “Zě vǐ ɔ́ nú mì.” Vǐ ɔ́ ká ɖo nyɔ̌nu ɔ́ sín awa mɛ bɔ Elíi yí i, bó zé e yi xɔ e mɛ é nɔ nɔ é mɛ ɖo jǐ, bó zé e mlɔ́ zan tɔn jí.

²⁰Énɛ́ ɔ́ gúdo ɔ́, é ylɔ́ Mawu Mavɔmavɔ bó ɖɔ: “Mawu Mavɔmavɔ, Mawu ce, nyɔ̌nu asúkúsi élɔ́ yí mì ɖó xwé tɔn gbe. A hu vǐ tɔn bó ná dó wa nǔ xá ɛ nǔgbó wɛ a?”

²¹ Ée Elíi ɖɔ mɔ̌ ɔ́, é mlɔ́ vǐ ɔ́ jí azɔn atɔn, bó ylɔ́ Mawu Mavɔmavɔ bo ɖɔ: “Mawu Mavɔmavɔ, Mawu ce, kɛnklɛ́n bó fɔ́n vǐ élɔ́ wá gbɛ.”

²²Mawu Mavɔmavɔ se xó e Elíi ɖɔ ɔ́, bó fɔ́n vǐ ɔ́ wá gbɛ, bɔ é jɛ gbigbɔjɛ́ jí,

²³bɔ Elíi zé e wá do, lobo sɔ́ ɛ jó nú nɔ tɔn, bó ɖɔ n'i ɖɔ: “Kpɔ́n! Vǐ towe ɖíe, é ɖo gbɛ.”

²⁴Ée nyɔ̌nu ɔ́ mɔ mɔ̌ ɔ́, é ɖɔ nú Elíi ɖɔ: “Un mɔ din ɖɔ gbeyíɖɔ Mawu tɔn wɛ a nyǐ nǔgbó, bɔ xó Mawu Mavɔmavɔ tɔn e nɔ tɔ́n sín nu towe mɛ ɔ́ nyí nǔgbó.”