Read fon 1 Axɔ́sú 18 Bible Online

1 Axɔ́sú 18 - fon bible

1 Axɔ́sú 18

¹Akú ɖó ɔ́, é kó lín, bɔ xwe tɔn atɔngɔ́ ɔ́ mɛ ɔ́, Mawu Mavɔmavɔ ɖɔ nú Elíi ɖɔ: “Yi Akábu gɔ́n, un ná sɛ́ jǐ dó bɔ é ná ja kɔn nyi ayǐkúngban ɔ́ jí.”

²Ée Mawu Mavɔmavɔ ɖɔ mɔ̌ nú Elíi ɔ́, é ɖidó axɔ́sú Akábu gɔ́n. Adɔ ɔ́ ka syɛ́n ɖo Samalíi ɖésú.

³Ée adɔ ɔ́ syɛ́n mɔ̌ ɔ́, Akábu ylɔ́ hɔnmɛgán tɔn Ovadiahu. Mɛ ɖé wɛ Ovadiahu ka nyí, bó nɔ ɖó sísí nú Mawu Mavɔmavɔ ɖésú.

⁴Hwenu e axɔ́si Jezabɛ́li ɖo gbeyíɖɔ Mawu Mavɔmavɔ tɔn lɛ́ɛ hu wɛ ɔ́, Ovadiahu fɔ yě mɛ kanwe ko (100) hwlá. Yě mɛ kanɖé wǒ (50) kanɖé wǒ (50) wɛ é fɔ hwlá dó sóxo mɛ sóxo mɛ, bó nɔ ná nǔɖuɖu kpódó sin kpó yě.

⁵Ée axɔ́sú Akábu ylɔ́ Ovadiahu bɔ é wá ɔ́, é ɖɔ n'i ɖɔ: “Wǎ mǐ yi gbɔn fí e tɔjɔtɛn kpó tɔsisa kpó ɖe ɖo to ɔ́ mɛ é. Bóyá mǐ ná mɔ gběhan, bó ná ná sɔ́ mǐtɔn lɛ́ɛ kpódó sɔ́tócí mǐtɔn lɛ́ɛ kpó. Énɛ́ ɔ́, é sɔ́ ná byɔ́ ɖɔ mǐ ní hu yě ǎ.”

⁶Akábu kpó Ovadiahu kpó ɖɔ fí e mɛ ɖokpó ɖokpó ná gbɔn ɖo to ɔ́ mɛ ɔ́ nú yěɖée. Akábu wlí ali éyɛ́ tɔn, bɔ Ovadiahu wlí ali élɔ́ tɔn.

⁷Ée Ovadiahu ɖo yiyi wɛ ɔ́, Elíi nu jɛ́n é kpédó ɖo ajijimɛ. Ée é mɔ ɛ ɔ́, é tunwun i, bó xwe agbɔ̌nnusú do bó ɖɔ: “Gǎn ce Elíi! Hwi jɛ́n wɛ a?”

⁸Ée é ɖɔ mɔ̌ ɔ́, Elíi yí gbe n'i ɖɔ: “Nyɛ wɛ hǔn! Yi ɖɔ nú gǎn towe Akábu ɖɔ Elíi ɖo fí.”

⁹Ovadiahu ka yí xó bó ɖɔ: “Hwɛ tɛ́ wɛ un hu, bɔ a nǎ jó nyɛ mɛsɛntɔ́ towe nú Akábu bɔ é ná hu?

¹⁰Mawu Mavɔmavɔ ɖo gbɛ! Togun ɖé mɛ abǐ axɔ́súɖuto ɖé mɛ tíin bɔ gǎn ce ma sɛ́ mɛ dó, ɖɔ è yi ba we ɖe ǎ. Nú è yi ba we kpo ɖo togun ɖé abǐ to ɖé mɛ bó wá ɖɔ n'i ɔ́, é nɔ́ ɖɔ nú togun ɔ́ abǐ axɔ́súɖuto ɔ́ ɖɔ yě ní xwlé nǔ ɖɔ: ‘É ɖo mǐ gɔn ǎ.’

¹¹Hwi ɖíe ká ɖɔ nú mì din ɖɔ má yi ɖɔ nú gǎn ce ɖɔ Elíi ɖo fí e!

¹²Bɔ hwenu e un ná gosín gɔ̌n towe, bó ná ɖidó ɔ́, yɛ Mawu Mavɔmavɔ tɔn ná wá zé we yi fí e un ma ná tunwun ǎ é, bɔ un ká ná kó ɖɔ nú Akábu ɖɔ hwi ɖo fí, bɔ é ná wá ba we kpo, bó ná hu mì. Sín vǔ ɖokpóó wɛ nyɛ mɛsɛntɔ́ towe ka kó nɔ ɖó sísí nú Mawu Mavɔmavɔ.

¹³Gǎn ce, nǔ e un wa hwenu e Jezabɛ́li ɖo gbeyíɖɔ Mawu Mavɔmavɔ tɔn lɛ́ɛ hu wɛ ɔ́, è ɖɔ nú we ǎ cé? Un bɛ́ gbeyíɖɔ Mawu Mavɔmavɔ tɔn kanwe ko (50) hwlá. Yě mɛ kanɖé wǒ (50) kanɖé wǒ (50) wɛ un fɔ hwlá dó sóxo mɛ sóxo mɛ, bó nɔ́ ná nǔɖuɖu kpó sin kpó yě.

¹⁴A ka ɖo ɖiɖɔ nú mì wɛ din ɖɔ má yi ɖɔ nú gǎn ce ɖɔ Elíi ɖo fí! É ná hu mì.”

¹⁵Elíi ka xwlé nǔ ɖɔ: “Mawu Mavɔmavɔ Nǔbǐwúkpétɔ́ e sɛn wɛ un ɖe ɔ́ ɖo gbɛ! Égbé ɔ́, un ná yi Akábu gɔ́n.”

¹⁶Ovadiahu kpé Akábu, bó ɖɔ fí e Elíi ɖe ɔ́ n'i, bɔ Akábu yi kpé Elíi.

¹⁷Ée Akábu mɔ Elíi lě tlóló ɔ́, é kanbyɔ́ ɛ ɖɔ: “É má nyí hwi wɛ dɔn nǔ nyanya dó Izlayɛ́li togun jí a?”

¹⁸Elíi ka yí gbe n'i ɖɔ: “Un dɔn nǔ nyanya ɖé dó Izlayɛ́li togun ɔ́ jí ǎ. É nyɔ́ wa ɔ́, hwi kpó mɛ towe lɛ́ɛ kpó wɛ, ɖó mi gbɛ́ nǔ e Mawu Mavɔmavɔ zɔ́n lɛ́ɛ wa, bɔ a ɖo vodún Baalu lɛ́ɛ sɛn wɛ.

¹⁹Din ɔ́, sɛ́ mɛ dó nú è nǐ kplé Izlayɛ́li togun ɔ́ bǐ nú mì ɖo Kaamɛ́li só ɔ́ jí. Vodún Baalu sín hunnɔ afɔwe kanɖé wǒ (450) lɛ́ɛ kpódó vodún Acela sín hunnɔ afɔwe (400) e axɔ́si Jezabɛ́li nɔ ná nǔɖuɖu lɛ́ɛ lɔ kpó ní wá.”

²⁰Akábu sɛ́ mɛ dó, bɔ è kplé Izlayɛ́li togun ɔ́ bǐ, kpó hunnɔ lɛ́ɛ bǐ kpó ɖo Kaamɛ́li só ɔ́ jí.

²¹Ée yě kplé ɔ́, Elíi sɛkpɔ́ yě, bó ɖɔ: “Hwetɛ́nu wɛ mi ka ná sɛn nǔ we yi jɛ? Mi sɔ́ ɖokpó bó sɛn. Ényí Mawu Mavɔmavɔ wɛ ɖó acɛ nǔgbó hǔn, mi bo sɛn ɛ. É ká nyí vodún Baalu wɛ ɖó acɛ nǔgbó hǔn, mi bo sɛn ɛ!” Ée é ɖɔ mɔ̌ ɔ́, mɛɖé kɛ nu ɖo yě mɛ ǎ.

²²Bɔ Elíi lɛ́ yí xó bó ɖɔ: “Nyɛ ɖokpónɔ géé wɛ nyí gbeyíɖɔ Mawu Mavɔmavɔ tɔn e kpo ɔ́, bɔ vodún Baalu sín hunnɔ lɛ́ɛ ká nyí afɔwe kanɖé wǒ (450).

²³È nǐ ná mǐ nyibúsú we. Vodún Baalu sín hunnɔ lɛ́ɛ ná kpɔ́n nyibúsú ɔ́ ɖokpó ɖo we lɛ́ɛ mɛ bó ná sɔ́. Yě ná já nyibúsú ɔ́, bó bɛ́ lan tɔn ɖó nakí jí. Yě ní má ká flɔ́ myɔ dó ó. Nyɛ lɔ ná já nyibúsú ɖě ɔ́, bó ná bɛ́ lan tɔn ɖó nakí jí, un ka ná flɔ́ myɔ dó ǎ.

²⁴Énɛ́ ɔ́ gúdo ɔ́, yě ná xomlá vodún yětɔn, bɔ nyɛ lɔ ná xomlá Mawu Mavɔmavɔ ce. Yě mɛ we lɛ́ɛ mɛ ɔ́, mɛ e ná bló bɔ nakí e jí è bɛ̌ lan ɔ́ ɖó ɔ́ ná wlí myɔ ɔ́ wɛ ɖó acɛ.” Ée é ɖɔ mɔ̌ ɔ́, togun ɔ́ bǐ ɖɔ: “Mǐ yí gbe.”

²⁵Elíi ɖɔ nú vodún Baalu sín hunnɔ lɛ́ɛ ɖɔ: “Midɛɛ lɛ́ɛ sukpɔ́, mi kpɔ́n nyibúsú lɛ́ɛ ɖokpó, bó wa azɔ̌ tɔn dó nukɔn, bó xomlá vodún mitɔn; mi ma ka flɔ́ myɔ dó ó.”

²⁶Ée é ɖɔ mɔ̌ ɔ́, yě zě nyibúsú e è zě wá lɛ́ɛ ɖokpó, bó wa azɔ̌ tɔn, bó jɛ vodún Baalu xomlá jí sín zǎnzǎn káká yi hwemɛ, bó nɔ ɖɔ: “Baalu, yǐ gbe nú mǐ.” Yě ɖo we ɖú lɛ́ lɛ̌ dó vɔ̌sákpe e yě bló ɔ́ wɛ. Lo ɔ́, mɛɖé kɛ nu d'é mɛ nú yě ǎ.

²⁷Ée é jɛ hwemɛ ɔ́, Elíi jɛ slǎmɛ ɖɔ yě wú jí, bó nɔ ɖɔ: “Mi sú xó hú mɔ̌, ɖó vodún wɛ é nyí. Nǔɖé linkpɔ́n wɛ é ná kó ɖe, abǐ nǔkan mɛ yi wɛ é ná kó ɖe, abǐ é sixú kó yi tomɛ. Bóyá ɔ́, amlɔ dɔ́ wɛ é ná kó ɖe; mi sú xó ganjí din ɔ́, é ná fɔ́n.”

²⁸Ée Elíi ɖɔ mɔ̌ nú yě ɔ́, yě lɛ́ sú xó syɛ́nsyɛ́n; yě zé jǐví kpódó hwǎn kpó dó já wǔtu nú yěɖée, lě e é kó ɖe gbɔn ɖo walɔ yětɔn mɛ é káká bɔ hun nɔ sa sín yě wǔ.

²⁹Ée hwe lɛ́ kɔ ɔ́, yě lɛ́ jɛ vodún Baalu xomlá jí kpó awǒbóbó kpó káká jɛ gan e mɛ è nɔ xwlé vɔ̌sánú hwe lɛ́ kɔ tɔn dó é. Lo ɔ́, mɛɖé kɛ nu d'é mɛ nú yě ǎ, yě se xó ɖé ǎ, nǔɖé ká kpácá yě ǎ.

³⁰Hwe énɛ́ ɔ́ nu ɔ́, Elíi ɖɔ nú togun ɔ́ bǐ ɖɔ: “Mi sɛkpɔ́ mì!” Bɔ togun ɔ́ bǐ sɛkpɔ́ ɛ, bɔ Elíi jɛ vɔ̌sákpe Mawu Mavɔmavɔ tɔn e ko ɖo fínɛ́ bó ko gblé ɔ́ blóɖó jí.

³¹ É bɛ́ awǐnnya wěwe bɔ é sɔgbe xá Jakɔ́bu ví lɛ́ɛ sín akɔta wěwe lɛ́ɛ. Jakɔ́bu wɛ Mawu Mavɔmavɔ ɖɔ yě ná nɔ ylɔ́ ɖɔ Izlayɛ́li.

³²É zé awǐnnya énɛ́ lɛ́ɛ dó mɛ vɔ̌sákpe ɖokpó nú Mawu Mavɔmavɔ. É kun do lɛ́ lɛ̌ dó vɔ̌sákpe ɔ́, bɔ do ɔ́ sixú hɛn nǔ lǐtli gban.

³³É to nakí ɖó vɔ̌sákpe ɔ́ jí; é já nyibúsú ɔ́, bó bɛ́ lan tɔn ɖó nakí lɛ́ɛ jí.

³⁴Énɛ́ ɔ́ gúdo ɔ́, é ɖɔ: “Mi dun sin zɛ̌n ɛnɛ bó húzú kɔn nyi vɔ̌ ɔ́ kpódó nakí ɔ́ kpó jí.” Bɔ yě bló. Ée yě bló ɔ́, é lɛ́ ɖɔ nú yě ɖɔ: “Mi lɛ́ bló azɔn wegɔ́!” Bɔ yě bló. É lɛ́ ɖɔ nú yě ɖɔ yě ní bló azɔn atɔngɔ́ ɔ́, bɔ yě bló.

³⁵Sin ɔ́ sa lɛ́ lɛ̌ dó vɔ̌sákpe ɔ́, bɔ do e è kun ɔ́ bǐ gɔ̌.

³⁶Ée gan e mɛ è nɔ xwlé vɔ̌sánú hwe lɛ́ kɔ tɔn Mawu Mavɔmavɔ ɔ́ xo ɔ́, gbeyíɖɔ Mawu Mavɔmavɔ tɔn Elíi sɛkpɔ́ vɔ̌sákpe ɔ́, bó ɖɔ: “Mawu Mavɔmavɔ, Mawu Ablaxámu tɔn, Mawu Izáki tɔn, Mawu Izlayɛ́li tɔn! Đe xlɛ́ égbé din ɖɔ hwi wɛ nyí Mawu Izlayɛ́li tɔn, bɔ nyɛ nyí mɛsɛntɔ́ towe; ɖe xlɛ́ ɖɔ gbe towe wɛ un xwedó dó bló nǔ énɛ́ lɛ́ɛ bǐ.

³⁷Yǐ gbe nú mì Mawu Mavɔmavɔ, yǐ gbe nú mì, bónú togun élɔ́ ná tunwun ɖɔ hwi Mawu Mavɔmavɔ ɔ́ wɛ ɖó acɛ nǔgbó. Yǐ gbe nú mì bó ná lɛ́ kɔ nú yě, nú yě ná nɔ gbejí nú we lě e yě nɔ́ gbɔn ɖ'ayǐ é!”

³⁸Ée Elíi ɖɔ mɔ̌ ɔ́, Mawu Mavɔmavɔ sɛ́ myɔ dó, bɔ é fyɔ́ vɔ̌ ɔ́, bó fyɔ́ nakí ɔ́, bó fyɔ́ awǐnnya lɛ́ɛ, bó fyɔ́ kɔ́ e ɖo fínɛ́ é, bó xwí sin e ɖo do ɔ́ mɛ ɔ́ bǐ.

³⁹Ée togun ɔ́ bǐ mɔ mɔ̌ ɔ́, yě xwe agbɔ̌nnusú do, bó ɖɔ: “Mawu Mavɔmavɔ wɛ ɖó acɛ nǔgbó! Mawu Mavɔmavɔ wɛ ɖó acɛ nǔgbó!”

⁴⁰Bɔ Elíi ɖɔ nú yě ɖɔ: “Mi wlí vodún Baalu sín hunnɔ lɛ́ɛ. Mi ma jó ɖokpó yětɔn dó ó!” Ée yě wlí yě ɔ́, Elíi kplá yě yi Kicɔ́ni tɔ ɔ́ tó, bó gbo gbe yě.

⁴¹Énɛ́ ɔ́ gúdo ɔ́, Elíi ɖɔ nú Akábu ɖɔ: “Yi, ɖu nǔ, bó nu sin, ɖó jǐ ɖo nǔ wa wɛ.”

⁴² Ée é ɖɔ mɔ̌ ɔ́, Akábu yi ɖu nǔ, bó nu sin. Elíi ka xá Kaamɛ́li só ɔ́ ta aga, bó fɛ, lobo zé ta dó asá mɛ,

⁴³bó ɖɔ nú mɛsɛntɔ́ tɔn ɖɔ: “Xá só ɔ́ jí bó kpɔ́n xuwa jí.” Bɔ mɛsɛntɔ́ ɔ́ xá só ɔ́ jí, bó kpɔ́n xuwa jí, lobo ɖɔ: “Un mɔ nǔ ɖěbǔ ǎ.” Elíi ɖɔ n'i azɔn tɛ́nwe ɖɔ ní lɛ́ kɔ yi kpɔ́n xuwa jí.

⁴⁴Ée mɛsɛntɔ́ tɔn lɛ́ kɔ yi azɔn tɛ́nwegɔ́ ɔ́, é ɖɔ: “Un mɔ akpɔ́kpɔ́ kpɛví ɖé sí te sín xu ɔ́ jí, bó sɔ́ gbló hú alɔkpákpá mɛ gbɛtɔ́ tɔn ǎ.” Bɔ Elíi ɖɔ nú mɛsɛntɔ́ tɔn ɔ́ ɖɔ é ní yi ɖɔ nú Akábu ɖɔ é ní sɔ́ kɛkɛ́ví tɔn sín dó sɔ́ tɔn lɛ́ɛ wú, bó yá wǔ yi, bónú jǐ ní má gbo e dó ó.

⁴⁵Zaanɖé kpowun ɔ́, akpɔ́kpɔ́ kpé jǐnukúnsin bǐ, bɔ ablu dó, bɔ jɔhɔn jɛ nyinyi jí, bɔ jǐ ɖaxó ɖé bɛ́, bó ja ɖésú, bɔ Akábu xá kɛkɛ́ví tɔn jí, bó ɖidó Izleyɛ́li.

⁴⁶Mawu Mavɔmavɔ nɔ kpɔ́ xá Elíi, bɔ é sin gǒjíblánú tɔn, bó kán wezun ɖo Akábu nukɔn káká yi Izleyɛ́li.