Read fon 1 Axɔ́sú 21 Bible Online

1 Axɔ́sú 21 - fon bible

1 Axɔ́sú 21

¹Nǔ e wá jɛ ɖo nǔ énɛ́ lɛ́ɛ gúdo ɔ́ ɖíe: Nya ɖé tíin, bó nɔ nyí Nabɔti, bó nyí Izleyɛ́linu. Nya énɛ́ ɔ́ ɖó vǐwungle ɖokpó ɖo Izleyɛ́li ɖo axɔ́sú Samalíi tɔn Akábu sín hɔnmɛ kpá.

²É wá su gbe ɖokpó, bɔ Akábu ɖɔ n'i ɖɔ: “Jǒ vǐwungle towe nú mì, bónú má dó bló mǎgbo ná, ɖó é sɛkpɔ́ xwé ce ganjí. Un ná ná vǐwungle e nyɔ́ hú mɔ̌ ɔ́ we ɖó tɛn tɔn mɛ. Nú é ká jló we ɔ́, un ná sú axɔ́ tɔn we.”

³Nabɔti ka yí gbe nú Akábu ɖɔ: “Mawu Mavɔmavɔ ní ma lɔn nú má jó gǔ e un ɖu ɖo tɔ́gbó ce lɛ́ɛ sí ɔ́ nú we ó!”

⁴Ée Akábu se mɔ̌ ɔ́, wǔ kú i; xomɛ sin i, ɖó xó e Nabɔti ɖɔ é wú, bɔ é lɛ́ kɔ yi xwé tɔn gbe. É mlɔ́ ayǐ bó kpan nukɔn dǒ; é ɖu nǔ ǎ.

⁵Asi tɔn Jezabɛ́li ɔ́ wá gɔ̌n tɔn, bó ɖɔ n'i ɖɔ: “Nɛ̌ ká gbɔn bɔ wǔ kú we mɔ̌, bɔ a gbɛ̌ nǔ ɖu?”

⁶Bɔ é yí gbe nú asi tɔn ɖɔ: “Un ɖɔ nú Nabɔti ɖɔ é ní jó vǐwungle tɔn nú mì, bónú má sú axɔ́ tɔn ɛ, abǐ nú é jló e ɔ́, un ná ná ɛ vǐwungle ɖěvo ɖó tɛn tɔn mɛ, bɔ é ká ɖɔ nú mì ɖɔ émí kún ná jó vǐwungle émítɔn nú mì ó.”

⁷Ée é ɖɔ mɔ̌ ɔ́, asi tɔn ɖɔ n'i ɖɔ: “Hwi jɛ́n ká ɖo acɛ kpa wɛ ɖo Izlayɛ́li a? Sí te bó ɖu nǔ, bó j'awǎ. Vǐwungle Nabɔti Izleyɛ́linu ɔ́ tɔn ɔ́, nyɛ ná yí nú we.”

⁸Ée é ɖɔ mɔ̌ ɔ́, é wlán wěma dó axɔ́sú Akábu sín nyǐkɔ mɛ, bó sɔ́ axɔ́sú ɔ́ sín wuntun ɖó yě jí. É bɛ́ wěma lɛ́ɛ sɛ́ dó tomɛxó lɛ́ɛ kpó tonukún lɛ́ɛ kpó ɖo Izleyɛ́li fí e Nabɔti ɖe é.

⁹Nǔ e é ɖɔ dó wěma ɔ́ mɛ lɛ́ɛ ɖíe: É ɖɔ: “Mi kplé togun ɔ́ bǐ, bónú mɛ bǐ ní blá nu. Mi zé Nabɔti ɖó kplé ɔ́ nu,

¹⁰bó sɔ́ nǔvɔ́nɔ we ɖó nukɔn tɔn, bɔ yě ná dó hwɛ ɛ, bó ɖɔ é nylá gbe nú Mawu kpódó axɔ́sú ɔ́ kpó. Nú yě ɖɔ mɔ̌ ɔ́, mi ná dɔn ɛ jɛ toxo ɔ́ gúdo, bó ná nyi awǐnnyaglo dó e káká bɔ é ná kú.”

¹¹Tomɛxó lɛ́ɛ kpó tonukún e ɖo Nabɔti sín toxo mɛ lɛ́ɛ kpó bló nǔ e Jezabɛ́li zɔ́n yě gbɔn wěma e é sɛ́ dó yě ɔ́ mɛ lɛ́ɛ.

¹²Yě kplé togun ɔ́ bǐ bó blá nu, bó zé Nabɔti ɖó kplé ɔ́ nu.

¹³Nǔvɔ́nɔ we lɛ́ɛ wá cí nukɔn tɔn, bó jɛ hwɛ dó e jí, bó nɔ ɖɔ: “Nabɔti nylá gbe nú Mawu kpódó axɔ́sú ɔ́ kpó.” Ée yě ɖɔ mɔ̌ ɔ́, yě dɔn ɛ jɛ toxo ɔ́ gúdo, bó nyi awǐnnyaglo dó e káká bɔ é kú.

¹⁴Ée nǔ nyí mɔ̌ ɔ́, yě sɛ́ wɛn dó Jezabɛ́li ɖɔ: “È ko nyi awǐnnyaglo dó Nabɔti káká bɔ é kú.”

¹⁵Ée Jezabɛ́li se ɖɔ è ko nyi awǐnnyaglo dó Nabɔti bɔ é kú ɔ́, é ɖɔ nú Akábu ɖɔ: “Sɔ́ nǔ, bó yi yí vǐwungle Nabɔti tɔn. É gbɛ́ ɖɔ émí kún ná sɔ́ jó nú we, bó ná yí akwɛ́ ó; din ɔ́, é ká sɔ́ ɖo gbɛ ǎ, é kó kú.”

¹⁶Ée Akábu se ɖɔ Nabɔti kú ɔ́, é sɔ́ nǔ, bo ɖidó Nabɔti sín vǐwungle mɛ, bó ná yí gle ɔ́.

¹⁷Ée yě bló nǔ lɛ́ɛ gbɔn mɔ̌ ɔ́, Mawu Mavɔmavɔ ɖɔ nú Elíi Ticibéenu ɔ́ ɖɔ:

¹⁸“Sɔ́ nǔ bó yi mɔ axɔ́sú Izlayɛ́li tɔn Akábu e nɔ nɔ Samalíi é. É ɖo Nabɔti sín vǐwungle mɛ. É yi fínɛ́ bó yí gle ɔ́.

¹⁹ A nǎ ɖɔ n'i ɖɔ Mawu Mavɔmavɔ ɖɔ: ‘Étɛ́! A hu Nabɔti, bó lɛ́ yí gle tɔn! Énɛ́ ɔ́ wú ɔ́, tɛn e mɛ cukú lɛ́ɛ ɖíɖɔ́ hun tɔn ɖe ɔ́, tɛn ɖokpó ɔ́ mɛ wɛ yě ná ɖíɖɔ́ hwi ɖésúnɔ sín hun ɖe.’ ”

²⁰Elíi yi dó wɛn ɔ́ Akábu, bɔ Akábu ɖɔ n'i ɖɔ: “Kɛntɔ́ ce, a kpo ɖo gǔdo ce” Bɔ Elíi yí gbe n'i ɖɔ: “Ɛɛn! Un kpo ɖo gǔdo towe! Nǔ e má nyɔ́ Mawu Mavɔmavɔ nukún mɛ ǎ é wiwa wɛ nɔ víví nú we; énɛ́ wútu ɔ́,

²¹Mawu Mavɔmavɔ ɖɔ: ‘Un ná sɛ́ nyladó dó we, un ná za mɛ towe lɛ́ɛ bǐ zunkɔ́ ɖɔhun: un ná hu mɛ towe lɛ́ɛ bǐ, un ná hu yɔkpɔ́vú kpó mɛxó kpó.

²²Un ná wa nǔ xá xwédo towe lě e un wa nǔ xá Jelobowámu Nɛvati ví ɔ́ sín xwédo gbɔn é, bó wa nǔ xá Baeca Axiya ví ɔ́ sín xwédo gbɔn é, ɖó a dǒ xomɛsin nú mì; a dɔn Izlayɛ́li togun ɔ́ dó hwɛ mɛ.’

²³ Mawu Mavɔmavɔ ɖɔ xó dó Jezabɛ́li lɔ wú ɖɔ: ‘Cukú lɛ́ɛ ná vúnvún Jezabɛ́li ɖo Izleyɛ́li toxo ɔ́ sín ahohó kpá.

²⁴Akábu sín xwégbenu e ná kú ɖo toxo ɔ́ mɛ lɛ́ɛ ɔ́, cukú lɛ́ɛ wɛ ná ɖu lan yětɔn. Mɛ tɔn e ka ná kú ɖo gběhan mɛ lɛ́ɛ ɔ́, xɛ lɛ́ɛ wɛ ná ɖu lan yětɔn.’ ”

²⁵Mɛ ɖěbǔ ɖe bɔ nǔ e má nyɔ́ Mawu Mavɔmavɔ nukún mɛ ǎ wiwa nɔ víví n'i Akábu ɖɔhun ǎ. Asi tɔn Jezabɛ́li ɔ́ wɛ ká dɔn ɛ d'é mɛ.

²⁶Nǔ e Akábu dó sin ɔ́ hɛn hǔn; é sɛn vodún lě e Amɔliti e Mawu Mavɔmavɔ nya bo sɔ́ to yětɔn jó nú Izlayɛ́li ví lɛ́ɛ nɔ bló gbɔn é.

²⁷Ée Akábu se xó e Elíi ɖɔ ɔ́, é vún awu dó kɔ nú éɖée, bó bɛ́ ati kplá, lobo blá nu. Ati ɔ́ mɛ wɛ é nɔ dɔ́; kéze ɔ́, é nɔ ɖo zɔnlin ɖi wɛ wǔɖéwúɖé.

²⁸Hwenɛ́nu ɔ́, Mawu Mavɔmavɔ kanbyɔ́ Elíi Ticibéenu ɔ́ ɖɔ:

²⁹“A mɔ lě e Akábu sɔ́ éɖée hwe gbɔn ɖo nukɔn ce ɔ́ a? Ée é sɔ́ éɖée hwe mɔ̌ ɔ́, un sɔ́ ná kɔn nǔ nyanya dó xwédo tɔn jí hwenu e é ɖo axɔ́sú ɖu wɛ ɔ́ ǎ; lo ɔ́, vǐ tɔn hwenu wɛ nǔ nyanya ɔ́ ná kɔn dó xwédo tɔn jí.”