Read fon 1 Axɔ́sú 6 Bible Online

1 Axɔ́sú 6 - fon bible

1 Axɔ́sú 6

¹Hwenu e Salomɔ́ɔ ɖo xwe ɛnɛ bló wɛ ɖo zinkpo jí, ɖo Izlayɛ́li ɔ́ wɛ é jɛ Mawu Mavɔmavɔ xwé ɔ́ sá jí, ɖo Ziwu sín sun ɔ́ mɛ, sun wegɔ́ e ɖo xwe ɔ́ mɛ é. Izlayɛ́li ví lɛ́ɛ gosín Ejípu ɔ́, é ko bló xwe afɔwe kanwe (480) nɛ́.

²Xɔ e Salomɔ́ɔ gbá nú Mawu Mavɔmavɔ ɔ́, ga tɔn nyí mɛ̌tlu gban (30), gblǒ tɔn nyí mɛ̌tlu wǒ, bɔ jǐ yiyi tɔn nyí mɛ̌tlu afɔtɔn.

³Hɔnnúwa e ɖo xɔ ɔ́ nukɔn ɔ́ sín ga nyí mɛ̌tlu wǒ xɔ ɔ́ sín gbló ɖɔhun. Gblǒ tɔn nyí mɛ̌tlu atɔ́ɔ́n.

⁴Salomɔ́ɔ ɖe flɛtɛ́li gbɔn xɔ ɔ́ wú, bó dó ganja nu.

⁵É lɛ́ gbá síngbó atɔnnɔ ɖó tɛn mímɛ́ ɔ́ kpó tɛn mímɛ́ bǐ ɔ́ kpó sín dǒdɔn wú ɖo ɖisí amyɔ, bó lɛ́ gbá ɖó dǒdɔn gǔdo tɔn ɔ́ wú, ɖo xɔ ɔ́ sín gblǒ jí.

⁶Síngbó ɔ́, do tɔn sín gblǒ nyí mɛ̌tlu we adaɖé, éé ɖo tɛ́ntin ɔ́ sín gblǒ nyí mɛ̌tlu atɔn, éé ɖo aga ɔ́ sín gblǒ nyí mɛ̌tlu atɔn adaɖé, ɖó xɔ e è gbǎ lɛ́ lɛ̌ dó lɛ́ɛ ɔ́, è gbǎ yědɛɛ lɛ́ɛ ɖó vo, bɔ azakpo yětɔn byɔ́ xɔ ɖaxó ɔ́ sín dǒ mɛ ǎ.

⁷Awǐnnya e è ko kpa bǐ ɖ'ayǐ lɛ́ɛ wɛ è zǎn dó gbá xɔ ɔ́ ná. Énɛ́ ɔ́, è se zǔn gbe ǎ, è ka se asyɔ́ gbe ǎ, è se alǐnnyánú ɖěbǔ sín gbe hwenu e è ɖo xwé ɔ́ sá wɛ ɔ́ ǎ.

⁸Síngbó do tɔn ɔ́ sín ali ɖo xɔ ɔ́ sín ɖisíxwé. È gosín xɔ do tɔn ɔ́ mɛ ɔ́, è nɔ gbɔn kpekán jí yi síngbó tɛ́ntin tɔn ɔ́ mɛ, bó nɔ lɛ́ gbɔn kpekán jí sín fínɛ́ yi síngbó atɔngɔ́ ɔ́ jí.

⁹Ée è mɛ xɔ ɔ́ fó ɔ́, è zě xwlɛ kpódó sɛ́dlukpo kpó dó sú aza ná.

¹⁰Síngbó e è gbǎ lɛ́ lɛ̌ dó xɔ ɔ́, éé ɖo do ɔ́, éé ɖo tɛ́ntin e, kpó éé ɖo aga ɔ́ kpó ɔ́, ɖokpó ɖokpó sín jǐ yiyi nyí mɛ̌tlu we adaɖé, bɔ è zě sɛ́dlutín dó dɔn yě cá dó xɔ ɔ́ wú.

¹¹Mawu Mavɔmavɔ ɖɔ nú Salomɔ́ɔ ɖɔ:

¹²“A ɖo xɔ gbá nú mì wɛ. É nyɔ́! Nú a xwedó sɛ́n ce lɛ́ɛ bó bló nǔ e un ɖɔ lɛ́ɛ ɔ́, nú a se tónú, bó bló nǔ e un zɔ́n ɖɔ è nǐ bló lɛ́ɛ bǐ ɔ́, un ná ɖe nǔ e un dó akpá tɔn nú tɔ́ towe Davídi ɖɔ un ná bló ɔ́ nú we:

¹³Un ná nɔ Izlayɛ́li ví lɛ́ɛ tɛ́ntin ɖo goxɔ mɛ fí; un ná jó togun ce Izlayɛ́li ɔ́ dó gbeɖé ǎ.”

¹⁴Ée Salomɔ́ɔ mɛ xɔ ɔ́ fó ɔ́,

¹⁵é tɛ́ sɛ́dlu xwlɛ dó xɔ ɔ́ sín dǒ lɛ́ɛ wú ɖo xomɛ, sín do káká yi aga, bó lɛ́ tɛ́ siplɛ́xwlɛ dó kɔ́ mɛ, ɖo xɔ ɔ́ mɛ.

¹⁶Tɛn mímɛ́ bǐ ɔ́ ɖo xɔ ɖaxó ɔ́ mɛ ɖo nukɔn dɔ̌n bǐ, bó ɖó gblǒ zɛ̌ɛ́n, ga zɛ̌ɛ́n, bó nyí mɛ̌tlu wǒ. É sɔ́ sɛ́dlu xwlɛ dó gbo Tɛn mímɛ́ bǐ ɔ́ ɖó vo, sín do káká yi aga.

¹⁷Tɛn e kpo ɖo sinsɛnxɔ ɔ́ mɛ, bɛ́ sín Tɛn mímɛ́ bǐ ɔ́ kɔn káká wá yi jɛ sinsɛnxɔ ɔ́ li nu ɔ́, ga tɔn nyí mɛ̌tlu ko.

¹⁸É kun atínsínsɛ́n e è nɔ ylɔ́ ɖɔ kolokɛ́nti ɔ́ kpódó folówa kikɛ kpó dó xwlɛ e é tɛ́ dó xɔ ɔ́ sín xomɛ lɛ́ɛ mɛ. Xwlɛ kɛ́ɖɛ́ wɛ kpé dǒ ɔ́ bǐ wú; è sɔ́ nɔ mɔ awǐnnya e è dǒ mɛ xɔ ɔ́ ná lɛ́ɛ ɖěbǔ ǎ.

¹⁹É bló Tɛn mímɛ́ bǐ ɔ́ mɛ ɖó, bó ná zé akɔjijɛgbá Mawu Mavɔmavɔ tɔn ɔ́ d'é mɛ.

²⁰Tɛn mímɛ́ bǐ ɔ́ sín ga nyí mɛ̌tlu wǒ, gblǒ tɔn nyí mɛ̌tlu wǒ, bɔ jǐ yiyi tɔn nyí mɛ̌tlu wǒ. Salomɔ́ɔ tɛ́ siká akú d'é wú. É zé sɛ́dlutín dó bló vɔ̌sákpe ɖokpó nyi tɛn mímɛ́ ɔ́ sín nukɔn, lobo tɛ́ siká d'é wú.

²¹É tɛ́ siká akú gbɔn sinsɛnxɔ ɔ́ sín dǒ wú bǐ ɖo xomɛ, bó dó siká wlɔ kpɛví kpɛví gbɔn Tɛn mímɛ́ bǐ ɔ́ nukɔn.

²² Énɛ́ ɔ́, é tɛ́ siká gbɔn sinsɛnxɔ ɔ́ bǐ wú, bó tɛ́ gbɔn vɔ̌sákpe e ɖo Tɛn mímɛ́ bǐ ɔ́ nukɔn ɔ́ wú bǐ.

²³ Salomɔ́ɔ zé olívutín gbě tɔn dó bló wɛnsagun susunɔ we ná, bó bɛ́ ɖó Tɛn mímɛ́ bǐ ɔ́ mɛ. Đokpó ɖokpó sín jǐ yiyi nyí mɛ̌tlu atɔ́ɔ́n.

²⁴Wɛnsagun susunɔ we lɛ́ɛ ɖokpó ɖokpó sín awa ɖó mɛ̌tlu we adaɖé; hǔn wɛnsagun ɖokpó kɛ awa tɔn we lɛ́ɛ ɔ́, é nɔ́ bló mɛ̌tlu atɔ́ɔ́n.

²⁵Wɛnsagun susunɔ wegɔ́ ɔ́ sín awa we lɛ́ɛ lɔ ɖó mɛ̌tlu atɔ́ɔ́n. Wɛnsagun we lɛ́ɛ ɖó jlɛ̌ ɖokpó ɔ́, ninɔmɛ ɖokpó ɔ́.

²⁶Wɛnsagun susunɔ we lɛ́ɛ ɖokpó ɖokpó sín jǐ yiyi nyí mɛ̌tlu atɔ́ɔ́n.

²⁷Salomɔ́ɔ bɛ́ wɛnsagun susunɔ we lɛ́ɛ ɖó Tɛn mímɛ́ bǐ ɔ́ tɛ́ntin. Awa yětɔn lɛ́ɛ ɖo dlɛ̌ndlɛ́n, bɔ ɖokpó sín awa sɔ́ dǒ ɔ́ ɖo akpá ɖokpó, bɔ wegɔ́ ɔ́ lɔ sín awa sɔ́ dǒ ɔ́ ɖo akpá wegɔ́ ɔ́ xwé. Bɔ awa yětɔn ɖě lɛ́ɛ ɖě kpé ɖě, ɖo Tɛn mímɛ́ bǐ ɔ́ tɛ́ntin.

²⁸É tɛ́ siká dó wɛnsagun susunɔ lɛ́ɛ wú.

²⁹Salomɔ́ɔ zɔ́n bɔ è kun wɛnsagun susunɔ, bó kun děma, bó kun folówa kikɛ dó xwlɛ e è tɛ́ dó xɔ ɔ́ sín dǒ lɛ́ɛ wú lɛ́ lɛ̌ dó, ɖo gǔdo kpó xomɛ kpó lɛ́ɛ mɛ.

³⁰É tɛ́ siká gbɔn kɔ́ mɛ ɖo xwé ɔ́ gbe, bó lɛ́ tɛ́ gbɔn kɔ́ mɛ ɖo Tɛn mímɛ́ kpó Tɛn mímɛ́ bǐ ɔ́ kpó mɛ.

³¹È zě olívutín gbě tɔn dó bló hɔn vǐ we nɔ ná, bó zé dó Tɛn mímɛ́ bǐ ɔ́ sín ali nu. Agba ɔ́ kpó hɔnkpo lɛ́ɛ kpó sín tlitli yi dǒ ɔ́ sín atɔ́ɔ́nvlɔ́ɖó.

³²Olívutín gbě tɔn wɛ è dǒ kpa hɔnvǐwenɔ ɔ́ ná, bó kun wɛnsagun susunɔ, bó kun děma, bó kun folówa kikɛ, dó hɔn lɛ́ɛ mɛ, lobo tɛ́ siká dó yě wú. Wɛnsagun susunɔ lɛ́ɛ kpódó děma lɛ́ɛ kpó ɔ́, siká wɛ è dǒ tun.

³³É lɛ́ bló hɔn ɖokpó ɖó xɔ ɖaxó ɔ́ nu, bɔ hɔnkpo lɛ́ɛ sín tlitli yi dǒ ɔ́ sín ɛnɛvlɔ́ɖó. Olívutín gbě tɔn wɛ è dǒ bló.

³⁴È zě siplɛ́tín dó bló hɔn vǐ-ɛnɛnɔ ɖokpó ná. Vǐ we ɖo aɖisíxwé, vǐ we ɖo amyɔxwé. Hɔn lɛ́ɛ ɖokpó ɖokpó nɔ́ lílɛ́ dó gǔdo nukɔn, ɖo hɔnsóswé lɛ́ɛ jí.

³⁵È kun wɛnsagun susunɔ, bó kun děma, bó kun folówa kikɛ dó hɔn lɛ́ɛ mɛ, bó tɛ́ siká dó.

³⁶Awǐnnya e è kpa lɛ́ɛ ɔ́, è to atɔn atɔn, ɖě ɖo ɖě jí, dó xá kɔ́xota ɔ́, bó wá zé sɛ́dlukpo hǎ ɖokpó gbɔn jí.

³⁷Énɛ́ ɔ́, è dǒ Mawu Mavɔmavɔ xɔ ɔ́ do, hwenu e Salomɔ́ɔ ɖo xwe ɛnɛ bló wɛ ɖo zinkpo jí ɔ́, ɖo Ziwu sun ɔ́ mɛ.

³⁸Hwenu e Salomɔ́ɔ ɖo xwe wǒ-ɖokpó bló wɛ ɖo zinkpo jí ɔ́ wɛ é fó Mawu Mavɔmavɔ xɔ ɔ́ bǐ, bó bló nǔ e ɖ'é wú lɛ́ɛ, bɔ é cí lě e é ɖó ná nɔ é. Bulu sun, sun tántɔngɔ́ ɔ́ e ɖo xwe ɔ́ mɛ é mɛ wɛ é fó xɔ ɔ́. Xwe tɛ́nwe wɛ é sɔ́ ɖó te dó gbá xɔ ɔ́ fó.