Read fon 1 Axɔ́sú 7 Bible Online

1 Axɔ́sú 7 - fon bible

1 Axɔ́sú 7

¹Salomɔ́ɔ sá xwé é ɖésúnɔ tɔn. Xwe wǒ atɔn wɛ é sɔ́ ɖó te bó dó gbá xɔ lɛ́ɛ bǐ fó.

²Xɔ e è nɔ ylɔ́ ɖɔ “Zungbó Libáan tɔn” ɔ́ wɛ é to gbá hwɛ̌, bɔ ga tɔn nyí mɛ̌tlu kanɖé wǒ (50), gblǒ tɔn nyí mɛ̌tlu koatɔ́n (25), bɔ jǐ yiyi tɔn nyí mɛ̌tlu afɔtɔn. È ylɔ̌ ɖɔ “Zungbó Libáan tɔn” ɖó sɛ́dlukpo wɛ nyí dotín tɔn lɛ́ɛ, bɔ è to ɖó hǎ ɛnɛ jí, bó lɛ́ zé sɛ́dlu kpo dó ɖó azakpo nú xɔ ɔ́.

³Azakpo kanɖé atɔ́ɔ́n (45) wɛ, bɔ è to afɔtɔn afɔtɔn ɖó hǎ atɔn jí, bó zé dotín dó hɛn ná, bó wá to sɛ́dlu xwlɛ gbɔn azakpo lɛ́ɛ jí, dó sú aza nú xɔ ɔ́.

⁴Flɛtɛ́li hǎ atɔn wɛ ɖo xɔ ɔ́ sín akpá ɖokpó ɖokpó xwé; flɛtɛ́li e ɖo akpá ɖě xwé lɛ́ɛ ɔ́ nɔ́ kpan nukɔn éé ɖo akpá ɖě ɔ́ xwé lɛ́ɛ.

⁵Ali énɛ́ lɛ́ɛ kpó hɔnkpo yětɔn lɛ́ɛ kpó bǐ ɖǒ gblǒ zɛ̌ɛ́n, ga zɛ̌ɛ́n. Flɛtɛ́li ɖokpó kpan nukɔn flɛtɛ́li ɖěvo. Énɛ́ ɔ́, flɛtɛ́li hǎ atɔn e ɖo akpá élɔ́ xwé lɛ́ɛ kpan nukɔn atɔn e ɖo akpá ɖě ɔ́ xwé lɛ́ɛ.

⁶Énɛ́ ɔ́ gúdo ɔ́, é lɛ́ gbá “Dotín xɔ”. Ga tɔn nyí mɛ̌tlu koatɔ́n (25), bɔ gblǒ tɔn nyí mɛ̌tlu afɔtɔn. É wɛ nyí hɔnnúwa ɔ́, bɔ è fɔ dotín dó bló ná, bɔ jɔhɔnsinglɔ́nnú ɖo nukɔn tɔn.

⁷É lɛ́ gbá xɔ nú “Zinkpo ɔ́”. È nɔ lɛ́ ylɔ́ xɔ énɛ́ ɔ́ ɖɔ “Hwɛɖɔxɔsá”, ɖó fínɛ́ wɛ Salomɔ́ɔ nɔ ɖɔ hwɛ ɖe. Sɛ́dlutín wɛ è xwe dó xɔ ɔ́ wú sín do káká yi aga.

⁸ É gbá xɔ é ɖésúnɔ tɔn, ɖó zɔ zaan, ɖo “Zinkpo xɔ” ɔ́ gúdo. É gbá bɔ é cí ɖě lɛ́ɛ ɖɔhun. Xɔ alɔkpa ɖokpó ɔ́ wɛ é lɛ́ gbá nú asi tɔn, Ejípu xɔ́sú ví ɔ́.

⁹Awǐnnya ɖagbe ɖagbe e è kpa lɛ́ɛ wɛ é cyán dó gbá xɔ énɛ́ lɛ́ɛ bǐ ná. È kpa awǐnnya lɛ́ɛ ɖó jlɛ̌ jí. È sɔ́ sá dó kpa yě ná ɖo gǔdo nukɔn. Awǐnnya énɛ́ lɛ́ɛ wɛ è zǎn sín awǐnnya dodó ɔ́ jí káká yi aga. Yě wɛ é zán dó mɛ xɔ e ɖo xwé ɔ́ gúdo lɛ́ɛ, kpó kɔ́xota ɖaxó ɔ́ sín dǒ lɛ́ɛ kpó.

¹⁰Awǐnnya ɖaxó ɖaxó ɖagbe ɖagbe lɛ́ɛ wɛ è dǒ dó xɔ lɛ́ɛ do. Awǐnnya lɛ́ɛ ɖě sín ga nyí mɛ̌tlu atɔ́ɔ́n, bɔ ɖě tɔn nyí mɛ̌tlu ɛnɛ.

¹¹Awǐnnya énɛ́ lɛ́ɛ jí wɛ è to awǐnnya ɖagbe ɖagbe e è kpa ɖó jlɛ̌ jí lɛ́ɛ kpódó sɛ́dlukpo lɛ́ɛ kpó ɖó.

¹²Awǐnnya ɖagbe ɖagbe e è kpa lɛ́ɛ ɔ́, hǎ atɔn jí wɛ è to ɖó ɖě ɖo ɖě jí lɛ́ dó, bó to sɛ́dlukpo lɛ́ɛ hǎ ɖokpó gbɔn jí. È blǒ bɔ é cí dǒ e è dǒ xá Mawu Mavɔmavɔ xwé ɔ́ sín kɔ́xota ná ɔ́ ɖɔhun, bó cí hɔnnúwa Mawu Mavɔmavɔ xwé ɔ́ tɔn sín dǒ ɖɔhun.

¹³Axɔ́sú Salomɔ́ɔ sɛ́ mɛ dó Tíi, bɔ è yi ylɔ́ Ilámu wá.

¹⁴Ilámu sín nɔ ɔ́, asúkúsi wɛ, bó jɔ ɖo Nɛfutali sín akɔta mɛ. Tɔ́ tɔn ɔ́, Tíinu wɛ bó nɔ wa ganvɔ sín azɔ̌. Ilámu ɖó nǔnywɛ́ bó ɖó nukúnnú-mɔjɛnǔmɛ, bó ɖó nǔtunwuntunwun, bó nɔ wa alɔlyɛ́n. É wá Salomɔ́ɔ gɔ́n, bó wa azɔ̌ e é zɔ́n ɛ lɛ́ɛ bǐ.

¹⁵Ilámu zé ganvɔ dó bló dotín we ná. Jǐ yiyi yětɔn nyí mɛ̌tlu tɛ́nnɛ, bɔ goto yětɔn nyí mɛ̌tlu ayizɛ́n lɛ́ dó.

¹⁶É sínsín ganvɔ dó bló ata we ná, bó ná fɔ ɖó dotín we lɛ́ɛ ta. Ata we lɛ́ɛ ɖokpó ɖokpó sín jǐ yiyi nyí mɛ̌tlu we adaɖé.

¹⁷É lɛ́ zé ganvɔ dó bló acɔ́ɖónú ɖěvo lɛ́ɛ ná, é bló nǔ ɖɔ ɖɔhun ɖé lɛ́ɛ, bó lɛ́ bló nǔ wlɔ ɖɔhun ɖé lɛ́ɛ, bó lɛ́ zé nǔ fukɔfukɔ ɖé dó bló wlɔ kpɛví kpɛví ná, bó tɛ́ yě dó ata lɛ́ɛ wú. Nǔ énɛ́ lɛ́ɛ tɛ́nwe tɛ́nwe wɛ ɖo ata ɖokpó ɖokpó wú.

¹⁸É lɛ́ zé ganvɔ dó bló glenádi sínsɛ́n ná, bó to hǎ we we dó ɖɔ e è cyɔ́n dó ata lɛ́ɛ é wú.

¹⁹Ata ɖěvo lɛ́ ɖo dotín lɛ́ɛ ɖokpó ɖokpó jí. Jǐ yiyi yětɔn nyí mɛ̌tlu we, yě cí folówa ɖɔhun.

²⁰Gǒ ɖé ɖo ata ɖokpó ɖokpó jí, bó ɖo aga nú ɖɔ ɔ́ kpódó glenádi sínsɛ́n afɔɖé e è to ɖó ata ɖokpó ɖokpó wú é kpó.

²¹É tun dotín lɛ́ɛ gbɔn Mawu Mavɔmavɔ xwé ɔ́ sín hɔnnúwa kpá. Đokpó ɖo ɖisíxwé, bɔ ɖokpó ɖo amyɔxwé. È nɔ ylɔ́ ɖisíxwé tɔn ɔ́ ɖɔ Yakíni, bó nɔ ylɔ́ amyɔxwé tɔn ɔ́ ɖɔ Bowazi.

²²Lě e Ilámu bló dotín lɛ́ɛ fó gbɔn ɔ́ nɛ́.

²³Ilámu zé ganvɔ dó bló basya ɖaxó tobotobo ɖokpó ná. Gblǒ tɔn nyí mɛ̌tlu atɔ́ɔ́n, jǐ yiyi tɔn nyí mɛ̌tlu we adaɖé, bɔ goto tɔn nyí mɛ̌tlu afɔtɔn lɛ́ dó.

²⁴É bló kolokɛ́nti sínsɛ́n gbɔn tó tɔn lɛ́ lɛ̌ dó. É to ko ko ɖó mɛ̌tlu ɖokpó jí lɛ́ dó, bó to hǎ we. Kolokɛ́nti lɛ́ɛ kpódó basya ɔ́ kpó wɛ è kɔn ɖó kpɔ́.

²⁵Nyibúsú ganvɔ tɔn wěwe jí wɛ basya ɔ́ jínjɔ́n. Nyibúsú ɔ́ atɔn kpan nukɔn totaligbé, atɔn kpan nukɔn gbadahwe jí, atɔn kpan nukɔn tofɔligbé, bɔ atɔn kpan nukɔn zǎnzǎnhwe jí. Bɔ yě dǒ gǔdo yěɖée ɖo basya ɔ́ glɔ́.

²⁶Basya ɔ́ sín tlitli yi santimɛ́tlu tántɔn; è blǒ tó tɔn, bɔ é cí kɔ́fu sín tó ɖɔhun, bó kɛ folówa ɖɔhun. É nɔ́ hɛn sin lǐtli adɔ̌kpo ɛnɛ (80.000) mɔ̌.

²⁷Ilámu lɛ́ zé ganvɔ dó bló kɛkɛ́ví wǒ nǎ. Đokpó ɖokpó sín ga nyí mɛ̌tlu we, gbló tɔn nyí mɛ̌tlu we, bɔ jǐ yiyi tɔn nyí mɛ̌tlu ɖokpó adaɖé.

²⁸Lě e è blǒ yě gbɔn ɔ́ ɖíe: ganvɔ gbajagbaja wɛ è dǒ ján yě ná, bó tɛ́ ganvɔ gbajagbaja ɖěvo dó gankpo lɛ́ɛ tɛ́ntin.

²⁹È ɖe kinnikínní kpódó nyibúsú kpó, kpódó wɛnsagun susunɔ kpó dó ganvɔ gbajagbaja lɛ́ɛ wú, bó lɛ́ ɖe ɖó gankpo lɛ́ɛ ta, bɔ acɔ́ɖónú tɛnmɛ tɛnmɛ ɖo gblɛlɛ mɛ ɖo kinnikínní lɛ́ɛ kpódó nyibúsú lɛ́ɛ kpó glɔ́.

³⁰Kɛkɛ́ví ɖokpó ɖokpó ɖó afɔ ɛnɛ; ganvɔ wɛ è dǒ bló yě; mayóokpo ɖé lɛ́ɛ hɛn afɔ lɛ́ɛ ɖó kɛkɛ́ví ɔ́ wú. Nǔ kɛkɛ́fɔ ɖɔhun ɖé lɛ́ɛ tɛ́ntin wɛ gankpo kpɛví kpɛví nɛ́ lɛ́ɛ ɖe, ɖo zwe ɛnɛ lɛ́ɛ jí. Nǔ kɛkɛ́fɔ ɖɔhun nɛ́ lɛ́ɛ kpó ganvɔ gbajagbaja e è jǎn ɔ́ kpó wɛ è kɔn ɖó kpɔ́. Yě ká ɖi ga hú acɔ́ɖónú lɛ́ɛ ǎ.

³¹È ɖe ali tobotobo ɖé ɖó kɛkɛ́ví ɔ́ ta, bɔ jǐ yiyi tɔn nyí mɛ̌tlu vlɔ́, bɔ basya ɔ́ nɔ́ nɔ jí. Ali tobotobo ɔ́ sín gblǒ nyí mɛ̌tlu ɖokpó é hwe káa. Akpá xwé e zɛ kádli e mɛ basya ɔ́ jínjɔ́n ɔ́ wú ɔ́ ɖó gblǒ zɛ̌ɛ́n ga zɛ̌ɛ́n, é ɖo toboo ǎ, bɔ è ɖe nǔɖé lɛ́ɛ gbɔn tó tɔn dó ba acɔ́ ná.

³²Kɛkɛ́ví ɔ́ sín tó lɛ́ɛ glɔ́ wɛ è blǎ afɔ ɛnɛ lɛ́ɛ ɖó, bɔ gan e hɛn afɔ lɛ́ɛ ɖó te ɔ́ gbɔn kɛkɛ́ví ɔ́ mɛ dín. Afɔ lɛ́ɛ sín gblǒ nyí mɛ̌tlu ɖokpó é hwe káa.

³³È blǒ afɔ lɛ́ɛ bɔ é cí ahwankɛkɛ́ ɖaxó sín afɔ ɖɔhun. Mayóo lɛ́ɛ, hlúu lɛ́ɛ, hlɛnyɔ́ɔ́ lɛ́ɛ kpódó mayóokpo lɛ́ɛ kpó ɔ́, bǐ wɛ è zě ganvɔ dó kɔn.

³⁴Nǔ ɛnɛ e cí afɔ ɖɔhun, bo ɖo kɛkɛ́ví ɖokpó ɖokpó sín zwe ɛnɛ lɛ́ɛ jí ɔ́, yě kpó kɛkɛ́ví kpó kɛkɛ́ví ɔ́ sín kádli kpó bǐ wɛ è kɔn ɖó kpɔ́.

³⁵È blǒ acɔ́ɖónú ɖokpó ɖokpó ɖó kɛkɛ́ví ɖokpó ɖokpó ta, bɔ é lɛ́ dó ali tobotobo ɔ́. Acɔ́ɖónú ɔ́ sín gblǒ nyí mɛ̌tlu ɖokpó sín vlɔ̌ ɖó ɛnɛ. Awa tɔn lɛ́ɛ kpódó ganvɔ gbajagbaja lɛ́ɛ kpó bǐ wɛ ɖo bǔ.

³⁶È lɛ̌ kun wɛnsagun susunɔ, bó kun kinnikínní, bó kun děma dó nǔ e jí afɔ lɛ́ɛ jínjɔ́n é kpó ganvɔ gbajagbaja ɔ́ kpó mɛ. È kun acɔ́ɖónú lɛ́ɛ lɛ́ lɛ̌ dó.

³⁷Lě e è blǒ kɛkɛ́ví wǒ lɛ́ɛ ɖokpó ɖokpó gbɔn ɔ́ nɛ́. È kɔn bǐ ɖó bǔ. Yě bǐ ɖó jlɛ̌ ɖokpó ɔ́, ɖě gbɔn vo nú ɖě ǎ.

³⁸ Ilámu lɛ́ zé ganvɔ dó bló basya wǒ ná, bɔ è nǎ bɛ́ ɖó kɛkɛ́ví wǒ lɛ́ɛ jí. Basya lɛ́ɛ ɖokpó sín gbló nyí mɛ̌tlu we, bo nɔ hɛn sin lǐtli afatɔ́n nǔwɔntɔn (1.600) mɔ̌.

³⁹È to kɛkɛ́ví atɔ́ɔ́n ɖó xɔ ɔ́ sín ɖisíxwé, bó to atɔ́ɔ́n ɖó sinsɛnxɔ ɔ́ sín amyɔxwé, bɔ basya ɖokpó ɖokpó ɖo kɛkɛ́ví ɖokpó ɖokpó jí. È zě basya ɖaxó tobotobo ɔ́ ɖó sinsɛnxɔ ɔ́ sín ɖisíxwé, ɖo zwe tɔn e ɖo afɔligbé-zǎnzǎnhwe jí ɔ́ kpá.

⁴⁰Ilámu lɛ́ bló basya lɛ́ɛ, bó bló afínbɛ́nú lɛ́ɛ, lobo bló gannú lɛ́ɛ. Ilámu bló nǔ e axɔ́sú Salomɔ́ɔ zɔ́n ɛ nú sinsɛnxɔ Mawu Mavɔmavɔ tɔn ɔ́ bǐ.

⁴¹É bló dotín we, ata tobotobo we, bɔ è nǎ bɛ́ yě ɖó dotín lɛ́ɛ ta; é bló nǔ ɖɔ ɖɔhun we, bɔ è nǎ bɛ́ yě cyɔ́n dó ata tobotobo lɛ́ɛ, ɖo dotín lɛ́ɛ jí.

⁴²É bló glenádi afɔwe ɖó ɖɔ we e è bǔ dó ata lɛ́ɛ wú. É to glenádi sínsɛ́n lɛ́ɛ hǎ we we dó ɖɔ ɖokpó ɖokpó wú dó ata lɛ́ɛ ɖokpó ɖokpó wú.

⁴³É bló kɛkɛ́ví wǒ. É bló basya wǒ, bɔ è bɛ̌ ɖó kɛkɛ́ví lɛ́ɛ jí.

⁴⁴É bló basya ɖaxó tobotobo ɖokpó, bo bló nyibúsú wěwe, bɔ basya ɔ́ ɖo yě jí.

⁴⁵Afíngannú lɛ́ɛ, afínbɛ́nú lɛ́ɛ kpódó gannú lɛ́ɛ kpó. Nǔ énɛ́ lɛ́ɛ e Salomɔ́ɔ ɖɔ nú Ilámu bɔ é bló nú sinsɛnxɔ Mawu Mavɔmavɔ tɔn lɛ́ɛ ɔ́, ganvɔ wɛ è dǒ bló yě ná, bó ɖíɖí wǔ ná.

⁴⁶Kɔ́kpe mɛ wɛ Ilámu kɔn nǔ énɛ́ lɛ́ɛ bǐ ɖe, ɖo Judɛ́ɛn tɔdo mɛ, ɖo Sukɔ́tu kpódó Saatáni kpó sín gletoxo lɛ́ɛ tɛ́ntin.

⁴⁷Axɔ́sú Salomɔ́ɔ zɔ́n bɔ è bɛ̌ nǔ énɛ́ lɛ́ɛ to dó sinsɛnxɔ Mawu Mavɔmavɔ tɔn mɛ. Lo ɔ́, nǔ lɛ́ɛ sukpɔ́ káká bɔ é sɔ́ ba ná tunwun ganvɔ kilóo nabí e è zǎn ɔ́ ǎ.

⁴⁸ Salomɔ́ɔ ɖɔ bɔ è lɛ̌ bló sikánú e è nǎ nɔ zán ɖo sinsɛnxɔ Mawu Mavɔmavɔ tɔn mɛ lɛ́ɛ: vɔ̌sákpe e jí è nɔ dó zǎlínkpɔ́n zo ɖe ɔ́, távo e jí è nɔ bɛ́ wɔ̌xúxú e è nɔ xwlé Mawu lɛ́ɛ ɖó ɔ́, siká wɛ è dǒ bló bǐ ná.

⁴⁹ É bló zogbɛ́nhɛnnú wǒ, bó bɛ́ ɖó tɛn mímɛ́ bǐ ɔ́ nukɔn, atɔ́ɔ́n ɖo ɖisíxwé, atɔ́ɔ́n ɖo amyɔxwé. Siká akú wɛ è dǒ bló yě ná. É bló folówa lɛ́ɛ kpó zogbɛ́n lɛ́ɛ kpó, bó bló nǔ e è nɔ dó bló myɔ ɖó ná lɛ́ɛ nú zogbɛ́nhɛnnú lɛ́ɛ; siká wɛ è dǒ bló bǐ.

⁵⁰É bló basya lɛ́ɛ, nǔ e è nɔ dó bló myɔ ɖó ná lɛ́ɛ, gannú lɛ́ɛ, kɔ́fu lɛ́ɛ, zǎlínkpɔ́nfyɔ́nú lɛ́ɛ; siká akú wɛ é dó bló yě ná. É bló hɔnsóswé nú tɛn mímɛ́ bǐ ɔ́, bó bló nú tɛn mímɛ́ ɔ́ sín hɔn lɛ́ɛ; siká wɛ è dǒ bló yě ná.

⁵¹ Ée axɔ́sú Salomɔ́ɔ wa azɔ̌ e ɖo sinsɛnxɔ Mawu Mavɔmavɔ tɔn wú ɔ́ bǐ fó ɔ́, é ɖɔ bɔ è bɛ̌ nǔ e tɔ́ tɔn Davídi bɛ́ ɖ'ayǐ nú Mawu Mavɔmavɔ ɔ́ wá: kpatágan, siká, kpódó nǔ ɖěvo ɖěvo lɛ́ɛ kpó. É bɛ́ nǔ énɛ́ lɛ́ɛ bǐ ɖó sinsɛnxɔ Mawu Mavɔmavɔ tɔn mɛ, ɖo fí e dɔkun Mawu Mavɔmavɔ tɔn lɛ́ɛ nɔ́ nɔ é.