Read fon 1 Axɔ́sú 8 Bible Online

1 Axɔ́sú 8 - fon bible

1 Axɔ́sú 8

¹ Ée axɔ́sú Salomɔ́ɔ bló nǔ lɛ́ɛ fó ɔ́, é ylɔ́ tomɛxó Izlayɛ́li tɔn lɛ́ɛ, akɔtagán lɛ́ɛ bǐ, kpódó hɛ̌nnugán Izlayɛ́li tɔn lɛ́ɛ kpó, ɖɔ yě ní wá gɔ̌n émítɔn ɖo Jeluzalɛ́mu, bó ná yi zé akɔjijɛgbá Mawu Mavɔmavɔ tɔn ɔ́ sín Sinyɔ́ɔ, Davídi Toxo mɛ sɔ́ yi Mawu Mavɔmavɔ xwé gbe.

² Énɛ́ ɔ́, Izlayɛ́li ví lɛ́ɛ bǐ wá axɔ́sú Salomɔ́ɔ gɔ́n ɖo azavaxwe hwenu, ɖo Etanímu sun ɔ́ mɛ, sun tɛ́nwegɔ́ e ɖo xwe ɔ́ mɛ é.

³Ée tomɛxó Izlayɛ́li tɔn lɛ́ɛ wá ɔ́, vɔ̌sánú-xwlémawutɔ́ lɛ́ɛ zé akɔjijɛgbá ɔ́.

⁴Vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó wɛ zé akɔjijɛgbá Mawu Mavɔmavɔ tɔn ɔ́, kpó goxɔ ɔ́ kpó, bó bɛ́ nǔ e ɖo goxɔ ɔ́ mɛ lɛ́ɛ.

⁵Axɔ́sú Salomɔ́ɔ kpódó Izlayɛ́li ví e wá gɔ̌n tɔn lɛ́ɛ kpó bǐ kplé ɖo akɔjijɛgbá ɔ́ nukɔn. Gbɔ̌ kpódó nyibú kpó e yě dó sá vɔ̌ ná lɛ́ɛ sukpɔ́ káká bɔ è sixú xa ǎ.

⁶Énɛ́ ɔ́ gúdo ɔ́, vɔ̌sánú-xwlémawutɔ́ lɛ́ɛ zé akɔjijɛgbá Mawu Mavɔmavɔ tɔn ɔ́ ɖó tɛn tɔn mɛ, ɖo tɛn mímɛ́ bǐ ɔ́ mɛ, ɖo Mawu xwé ɔ́ gbe, wɛnsagun susunɔ lɛ́ɛ sín awa glɔ́.

⁷Đó fí e ná nɔ wɛ akɔjijɛgbá ɔ́ ɖe ɔ́ ta nu wɛ wɛnsagun susunɔ lɛ́ɛ sín awa ɖo dlɛ̌ndlɛ́n ɖe, bónú akɔjijɛgbá ɔ́ kpó kpo e è nɔ dó zé ná lɛ́ɛ kpó ná nɔ awa yětɔn lɛ́ɛ glɔ́.

⁸Kpo lɛ́ɛ ɖi ga ɖésú, nú è ɖo tɛn mímɛ́ ɔ́ mɛ dě, ɖo tɛn mǐmɛ́ bǐ ɔ́ nukɔn ɔ́, è nɔ mɔ kpo lɛ́ɛ sín nuvínu sɛ́ dó. È ka ɖo kɔ́xota ɔ́, è nɔ mɔ yě sɛ́ dó ǎ. Bǐ kpo ɖo mɔ̌ káká wá jɛ égbé.

⁹ Nǔɖé ɖo akɔjijɛgbá ɔ́ mɛ zɛ awǐnnyatɛ we e Mɔyízi bɛ́ d'é mɛ ɖo Holɛ́bu, hwenu e Izlayɛ́li ví lɛ́ɛ tɔ́n sín Ejípu, bɔ Mawu Mavɔmavɔ jɛ akɔ xá yě ɔ́ wú ǎ.

¹⁰ Hwenu e vɔ̌sánú-xwlémawutɔ́ lɛ́ɛ gosín tɛn mímɛ́ ɔ́ mɛ ɔ́, akpɔ́kpɔ́ gɔ́ sinsɛnxɔ ɔ́.

¹¹Bɔ yě sɔ́ sixú nɔ fínɛ́ bó wa azɔ̌ yětɔn ǎ, ɖó akpɔ́kpɔ́ ɔ́ sukpɔ́ dín, ɖó susu Mawu Mavɔmavɔ tɔn gɔ́ xɔ ɔ́.

¹² Énɛ́ ɔ́, Salomɔ́ɔ sú xó bó ɖɔ: “Mawu Mavɔmavɔ! A ɖɔ émí ná nɔ zǐnflú mɛ.

¹³Un gbá nɔtɛn towe nú we lo, fí e a nǎ nɔ káká sɔ́yi é!”

¹⁴Izlayɛ́li togun ɔ́ bǐ kplé bó ɖo te, bɔ axɔ́sú Salomɔ́ɔ lílɛ́ kpan nukɔn yě, bó xo ɖɛ dó yě jí,

¹⁵bo ɖɔ: “Susu nú Mawu Mavɔmavɔ, Mawu Izlayɛ́li tɔn! É ɖésúnɔ wɛ ɖɔ xó nú tɔ́ ce, bɔ nǔ e é ɖɔ ɔ́, é sɔ́ hlɔ̌nhlɔ́n tɔn dó bló. É ɖɔ:

¹⁶ ‘Sín gbe e gbe un ko ɖe togun ce Izlayɛ́li ɔ́ tɔ́n sín Ejípu ɔ́, un sɔ́ toxo ɖěbǔ ɖo Izlayɛ́li sín toxo lɛ́ɛ mɛ, bónú è nǎ sá xwé ɖé, bónú má nɔ́ ɖe susu ce xlɛ́ ɖo fínɛ́ ǎ. Amɔ̌ un sɔ́ Davídi bɔ é ɖu axɔ́sú ɖo togun ce Izlayɛ́li ɔ́ nu.’

¹⁷ Tɔ́ ce Davídi wɛ ko lin ɖɔ émí ná sá xwé nú Mawu Mavɔmavɔ, Mawu Izlayɛ́li tɔn.

¹⁸Lo ɔ́, Mawu Mavɔmavɔ ɖɔ n'i ɖɔ: ‘Linlin e a ɖǒ ɖɔ émí ná sá xwé ɖokpó nú mì ɔ́, linlin ɖagbe wɛ.

¹⁹ Amɔ̌ hwi wɛ ná gbá xwé ɔ́ ǎ, lo ɔ́, vǐ towe jiji wɛ ná gbá nú mì.’

²⁰Xó énɛ́ e Mawu Mavɔmavɔ ɖɔ ɔ́, é bló ɖ'é jí. Un jɛ tɔ́ ce Davídi sín tɛnmɛ, bó jínjɔ́n axɔ́súzinkpo Izlayɛ́li tɔn ɔ́ jí lě e Mawu Mavɔmavɔ ɖɔ gbɔn é, bó sá xwé nú Mawu Mavɔmavɔ, Mawu Izlayɛ́li tɔn ɔ́.

²¹Un bló tɛnmɛ nú gbǎ e mɛ akɔjijɛ sín nǔ lɛ́ɛ ɖe ɔ́ ɖó xɔ ɔ́ mɛ; akɔ e é jɛ xá tɔ́gbó mǐtɔn lɛ́ɛ, hwenu e é ɖe yě tɔ́n sín Ejípu é.”

²²Salomɔ́ɔ yi cí vɔ̌sákpe Mawu Mavɔmavɔ tɔn ɔ́ nukɔn, bó kpan nukɔn Izlayɛ́li ví e kplé lɛ́ɛ bǐ. É dlɛ́n alɔ tɔn lɛ́ɛ sɛ́ dó jǐnukúnsin, bó ɖɔ:

²³“Mawu Mavɔmavɔ, Mawu Izlayɛ́li tɔn! Nǔmɛsɛn towe ɖɔhun ɖě sɔ́ tíin ǎ, ɖě sɔ́ ɖo jǐxwé aga ǎ, ɖě ká sɔ́ ɖo do ɖo ayǐkúngban jí fí ǎ. Mɛsɛntɔ́ towe e nɔ xwedó sɛ́n towe lɛ́ɛ kpódó ayixa yětɔn bǐ kpó lɛ́ɛ ɔ́, a nɔ́ nɔ gbejí nú akɔ e a jɛ xá yě ɔ́, bó nɔ ɖe xomɛnyínyɔ́ towe xlɛ́ yě.

²⁴A ɖe akpá e a dǒ nú tɔ́ ce Davídi mɛsɛntɔ́ towe ɔ́; nǔ e a ɖɔ n'i ɔ́ ɖíe hwi ɖésúnɔ bló ɖ'é jí égbé e.

²⁵ Din ɔ́, Mawu Mavɔmavɔ, Mawu Izlayɛ́li tɔn, lɛ̌ ɖe akpá e a dǒ nú tɔ́ ce Davídi bo ɖɔ n'i ɖɔ nú vǐ tɔn lɛ́ɛ nyi sɛ́n émítɔn lɛ́ɛ, bó xwedó émí lě e é ɖésúnɔ bló gbɔn ɔ́, mɛ e ná nɔ tɛn tɔn mɛ, ɖo axɔ́súzinkpo Izlayɛ́li tɔn ɔ́ jí ɔ́, é kún ná ba kpo ɖo yě mɛ gbeɖé ó.

²⁶Din ɔ́, Mawu Izlayɛ́li tɔn, akpá e a dǒ nú mɛsɛntɔ́ towe tɔ́ ce Davídi ɔ́ ní bó nyí mɔ̌!

²⁷ “Mawu ká sixú nɔ ayǐkúngban jí nǔgbó a? Jǐnukúnsin ɖíe sɔ́ avɔ sɔ mɔ̌ cóbó ma ka sixú hɛn ɛ ǎ e! Ani wɛ ka sɔ́ lɛ́ nyí xɔ élɔ́ e nyɛ gbá nú we ɔ́ tɔn?

²⁸Amɔ̌ Mawu Mavɔmavɔ, Mawu ce, nyi kɔ kpɔ́n mì, ɖǒtó vo e sa wɛ un ɖe ɔ́. Đǒtó xó e sú ylɔ́ we wɛ un ɖe égbé ɔ́.

²⁹ Nukún towe ní ɖo xɔ élɔ́ jí zǎn kéze, tɛn élɔ́ e mɛ a ɖɔ émí ná nɔ é! Đǒtó ɖɛ e nyɛ mɛsɛntɔ́ towe ɖo tɛn élɔ́ mɛ, bó ɖo xixo sɛ́ dó we wɛ é!

³⁰Đǒtó xó e sú ylɔ́ we wɛ un ɖe é, bó ɖótó xó e togun towe Izlayɛ́li e kpan nukɔn tɛn élɔ́ bó ɖo susu sɛ́ dó we wɛ é! Mawu Mavɔmavɔ, ɖǒtó mǐ sín jǐxwé fí e a nɔ nɔ é! Đǒtó mǐ, bó sɔ́ hwɛ kɛ mǐ!

³¹“Nú mɛɖé hu hwɛ dó nɔzo tɔn, bɔ è ɖɔ n'i ɖɔ ní xwlé nǔ dandan, bɔ é wá xwlé nǔ ɖo vɔ̌sákpe towe nukɔn ɖo xɔ élɔ́ mɛ hǔn,

³²Mawu Mavɔmavɔ, nɔ jǐxwé dɔ̌n bó ɖǒtó; blǒ gbɔn ɖě; gbo hwɛ nú mɛsɛntɔ́ towe lɛ́ɛ, nú mɛ e wa nǔ nyi do ɔ́, è nǎ dɔn tó n'i, bɔ hwɛ ka ná jó mɛ e hwɛ tɔn jɔ é.

³³“Hwenu e Izlayɛ́li ví lɛ́ɛ ná hu hwɛ dó we, bɔ é ná sín hwɛ e yě hu dó we ɔ́ wú, bɔ kɛntɔ́ yětɔn lɛ́ɛ ná ɖu ɖo yě jí ɔ́, nú yě byɔ́ sísɔ́kɛ hwɛ yětɔn lɛ́ɛ tɔn, nú yě kpa susu nú we, nú yě xo ɖɛ lobo sa vo nú we ɖo xwé élɔ́ gbe hǔn,

³⁴nɔ jǐxwé dɔ̌n, bó ɖótó yě, bó sɔ́ hwɛ kɛ togun towe Izlayɛ́li, bó kplá yě wá ayǐkúngban e a nǎ tɔ́gbó mǐtɔn lɛ́ɛ ɔ́ jí.

³⁵“Hwenu e jǐnukúnsin ná sú dó yě bɔ jǐ ma sɔ́ ná ja ǎ ɖó yě hu hwɛ dó we wútu ɔ́, nú yě kpan nukɔn tɛn élɔ́ bó xo ɖɛ ɔ́, nú yě kpa susu nú we ɔ́, nú yě lɛ́ kɔ sín hwɛ yětɔn lɛ́ɛ gúdo ɖó a ɖo tó dɔn nú yě wɛ wútu ɔ́,

³⁶nɔ jǐxwé dɔ̌n, bó ɖótó yě, bó sɔ́ hwɛ kɛ togun towe mɛsɛntɔ́ towe lɛ́ɛ. Xlɛ́ ali ɖagbe e yě ɖó ná gbɔn ɔ́ yě, bó bló bónú jǐ ní ja kɔn nyi ayǐkúngban e a nǎ yě, bɔ é nyí yětɔn é jí.

³⁷“Hwenu e adɔ abǐ jɛmɛjí ná byɔ́ to ɔ́ mɛ ɔ́, hwenu e jinukún lɛ́ɛ ná fyɔ́ abǐ yě ná nyɔ dó te ɔ́, hwenu e wɛn kpó bɔkle kpó ná vun blá to ɔ́, hwenu e kɛntɔ́ lɛ́ɛ ná hun káká yi gba Izlayɛ́li ví lɛ́ɛ ɖo toxo yětɔn e yě mɛ ahohó lɛ́ lɛ̌ dó lɛ́ɛ mɛ ɔ́, hwenu e nǔ baɖabaɖa ɖěbǔ abǐ azɔnhwi ná byɔ́ to ɔ́ mɛ ɔ́,

³⁸nú togun towe Izlayɛ́li ɔ́ mɔ ɖɔ émí wa nǔ nyi do, bɔ hwɛ tɔn lɛ́ɛ vɛ́ n'i, bónú é kpan nukɔn xwé élɔ́, bó dlɛ́n alɔ tɔn, bó sa vo sɛ́ dó we lobo xo ɖɛ sɛ́ dó we hǔn,

³⁹nɔ jǐxwé, fí e a nɔ nɔ é, bó ɖótó e, bó sɔ́ hwɛ tɔn lɛ́ɛ kɛ ɛ. Blǒ gbɔn ɖě, dǒ alɔ mɛ ɖokpó ɖokpó nú é ní sɔgbe xá lě e é zán gbɛ tɔn gbɔn ɔ́, ɖó a tunwun ayixa tɔn. Hwi ɖokpónɔ géé wɛ tunwun gbɛtɔ́ lɛ́ɛ bǐ sín ayixa.

⁴⁰Énɛ́ ɔ́, Izlayɛ́li ví lɛ́ɛ ná nɔ ɖó sísí nú we hwebǐnu, ɖo ayǐkúngban e a nǎ tɔ́gbó mǐtɔn lɛ́ɛ ɔ́ jí.

⁴¹“Mɔ̌ ɖokpó ɔ́, toɖévomɛnu e ma nyí Izlayɛ́li ví ǎ sixú gosín to línlín ɖé mɛ, bó wá xo ɖɛ ɖo xwé élɔ́ gbe,

⁴²ɖó è nǎ tunwun ɖɔ nyǐkɔ towe d'agba, bó ná tunwun ɖɔ mɛɖé kún nɔ sixú nɔ te hlɔ̌nhlɔ́n towe nukɔn ó; bó ná tunwun ɖɔ a kpé nǔ bǐ wú. Ényí mɛ mɔ̌hun wá xo ɖɛ ɖo xwé élɔ́ gbe hǔn,

⁴³nɔ jǐxwé fí e a nɔ nɔ ɔ́, bó ɖótó e, bó ná ɛ nǔ e é byɔ́ we é; énɛ́ ɔ́, togun e ɖo ayǐkúngban jí lɛ́ɛ bǐ nǎ tunwun we, bó ná ɖó sísí nú we togun towe Izlayɛ́li ɖɔhun, bó ná tunwun ɖɔ nyǐkɔ towe wɛ ɖo xwé élɔ́ e un sá é wú.

⁴⁴“Hwenu e a nǎ ná gbe Izlayɛ́li ví lɛ́ɛ bɔ yě ná yi ahwan fun xá kɛntɔ́ yětɔn lɛ́ɛ gbé ɔ́, nú yě kpan nukɔn toxo e a sɔ́ ɔ́ kpódó xwé élɔ́ e un sá nú we ɔ́ kpó, bó xo ɖɛ sɛ́ dó hwi Mawu Mavɔmavɔ hǔn,

⁴⁵nɔ jǐxwé dɔ̌n, bó ɖótó yě; ɖǒtó vo e sa sɛ́ dó we wɛ yě ɖe é, bó wá dó alɔ yě.

⁴⁶“Gbɛtɔ́ ɖě nɔ́ gɔn hwɛ hu ǎ. Hwenu e Izlayɛ́li ví lɛ́ɛ nǎ hu hwɛ dó we, bɔ a nǎ sin xomɛ dó yě, bó ná jó yě nú kɛntɔ́ yětɔn lɛ́ɛ, bɔ yě ná wlí kannumɔ yětɔn hɛn yi to yětɔn e lín lɛ́ɛ abǐ éé yá lɛ́ɛ ɖě mɛ ɔ́,

⁴⁷nú yě byɔ́ yěɖée mɛ ɖo to e mɛ yě nyí kannumɔ ɖe ɔ́ mɛ ɔ́, nú yě lɛ́ kɔ wá gɔ̌n towe, bó sa vo nú we ɖo to e mɛ è wlǐ yě yi ɔ́ mɛ, bó ɖɔ: ‘Mǐ vɛ́ tóli, mǐ hu hwɛ, mǐ wa nǔ nyi do’ ɔ́,

⁴⁸nú yě lɛ́ kɔ wá gɔ̌n towe kpódó ayixa yětɔn bǐ kpó, kpódó lǐndɔ̌n yětɔn kpó ɔ́, nú yě nɔ to e mɛ kɛntɔ́ wlí kannumɔ yětɔn hɛn yi ɔ́ mɛ, lobo kpan nukɔn to e a nǎ tɔ́gbó yětɔn lɛ́ɛ ɔ́ mɛ, toxo e a sɔ́ é, xwé e un sá nú we égbé, bó xo ɖɛ sɛ́ dó we hǔn,

⁴⁹nɔ jǐxwé dɔ̌n bó ɖótó yě; ɖǒtó vo e sa sɛ́ dó we wɛ yě ɖe é bó wá dó alɔ yě.

⁵⁰Sɔ́ togun towe sín hwɛ lɛ́ɛ kɛ ɛ; sɔ́ nǔ e é wa nyi do nú we lɛ́ɛ bǐ kɛ ɛ. Blǒ bónú kɛntɔ́ yětɔn lɛ́ɛ ní nyɔ́ xomɛ dó yě wú,

⁵¹ɖó togun towe wɛ yě nyǐ, towe wɛ yě nyǐ, hwi wɛ ɖe yě tɔ́n sín Ejípu kú gan mɛ.

⁵²“Mawu Mavɔmavɔ, kpɔ́n mǐ jǐ; ɖǒtó vo e nyɛ kpó togun towe kpó ná sa sɛ́ dó we lɛ́ɛ. Mǐ sú xó sɛ́ dó we hweɖěbǔnu hǔn, nɔ ɖótó mǐ.

⁵³Đó a ɖe mǐ ɖó vo nú togun ɖě lɛ́ɛ e ɖo ayǐkúngban jí lɛ́ɛ bǐ, bónú mǐ ná nyí towe lě e a ɖɔ gbɔn, gbɔn mɛsɛntɔ́ towe Mɔyízi jí hwenu e a ɖe tɔ́gbó mǐtɔn lɛ́ɛ tɔ́n sín Ejípu é!”

⁵⁴Ée Salomɔ́ɔ xo ɖɛ énɛ́ lɛ́ɛ bǐ, bó sa vo énɛ́ bǐ sɛ́ dó Mawu Mavɔmavɔ fó ɔ́, é sí te sín vɔ̌sákpe Mawu Mavɔmavɔ tɔn e kɔn é ko jɛ kpo ɖe ɖ'ayǐ, bó dlɛ́n alɔ sɛ́ dó jǐnukúnsin ɔ́ nukɔn.

⁵⁵É nɔ te bo zé gbe dó jǐ, bó xo ɖɛ dó kplékplé Izlayɛ́li tɔn ɔ́ bǐ jí ɖɔ:

⁵⁶ “Un dó kú nú Mawu Mavɔmavɔ ɖó é ná vivo togun tɔn Izlayɛ́li, bɔ é sɔgbe xá akpá e é dó lɛ́ɛ bǐ! Akpá ɖagbe ɖagbe e é dó gbɔn mɛsɛntɔ́ tɔn Mɔyízi jí lɛ́ɛ ɔ́, é gɔn ɖěbǔ ɖe ǎ.

⁵⁷Mawu Mavɔmavɔ, Mawu mǐtɔn ní nɔ kpɔ́ xá mǐ, lě e é nɔ kpɔ́ xá tɔ́gbó mǐtɔn lɛ́ɛ gbɔn é. Ní má ɖe alɔ tɔn sín mǐ wú ó, ní má ka jó mǐ dó ó.

⁵⁸Ní bló bónú ayixa mǐtɔn ní nɔ jǐ tɔn, bónú mǐ ná zán gbɛ lě e é jló gbɔn é, bó ná nyi sɛ́n tɔn lɛ́ɛ, bó ná bló nǔ e é zɔ́n lɛ́ɛ, bó ná bló nǔ e é ɖɔ nú tɔ́gbó mǐtɔn lɛ́ɛ é!

⁵⁹Mawu Mavɔmavɔ, Mawu mǐtɔn ní nɔ́ flín vo e sa n'i wɛ un ɖe din lɛ́ɛ zǎn kéze, bó nɔ wá dó alɔ mì, bó nɔ́ wá dó alɔ togun tɔn Izlayɛ́li,

⁶⁰bónú togun e ɖo ayǐkúngban jí lɛ́ɛ bǐ ná tunwun ɖɔ Mawu Mavɔmavɔ ɖokpónɔ géé wɛ nyí Mawu, Mawu ɖěvo kún sɔ́ ɖe ó.

⁶¹Ayixa mitɔn bǐ ní nɔ Mawu Mavɔmavɔ, Mawu mǐtɔn jí, lě e é ɖe gbɔn égbé din é, bónú mi ní xwedó sɛ́n tɔn lɛ́ɛ, bó wa nǔ e é zɔ́n mi lɛ́ɛ.”

⁶²Axɔ́sú Salomɔ́ɔ kpódó Izlayɛ́li ví e ɖo fínɛ́ lɛ́ɛ bǐ kpó sá vɔ̌ nú Mawu Mavɔmavɔ.

⁶³Salomɔ́ɔ hu nyibú adɔ̌kpo ɖě afɔwó (22.000), bó hu lɛ̌ngbɔ́ adɔ̌kpo ayizɛ́n (120.000), bó dó sá kɔnɖókpɔ́vɔ́ nú Mawu Mavɔmavɔ. Énɛ́ ɔ́, Salomɔ́ɔ kpó Izlayɛ́li ví lɛ́ɛ kpó jó xwé ɔ́ nú Mawu Mavɔmavɔ.

⁶⁴Gbe énɛ́ ɔ́ gbe ɔ́, axɔ́sú ɔ́ jó kɔ́xota e ɖo sinsɛnxɔ ɔ́ nukɔn ɔ́ bǐ nú Mawu Mavɔmavɔ. Đó vɔ̌sákpe ganvɔ tɔn e ɖo sinsɛnxɔ ɔ́ nukɔn ɔ́ sixú hɛn vɔ̌ lɛ́ɛ bǐ ǎ, bɔ Salomɔ́ɔ gbɔ bo dó vɔ̌ e è nɔ dó zo é, jinukúnvɔ́ lɛ́ɛ, kpó kanlin e è dǒ sá kɔnɖókpɔ́vɔ́ ná lɛ́ɛ sín jǒ kpó zo ɖo kɔ́xo ɔ́ ta.

⁶⁵Salomɔ́ɔ ɖu azavaxwe ɔ́ hwe énɛ́ ɔ́ nu, é kpódó Izlayɛ́li ví lɛ́ɛ bǐ kpó. Yě wǎ kpɔ́ gégé. Yě gosín fí tɛnmɛ tɛnmɛ ɖo to ɔ́ mɛ. Mɛɖě gosín káká Lɛbo-Hamáti ɖo totaligbé, bɔ mɛ ɖě gosín káká tɔsisa Ejípu tɔn kɔn ɖo tofɔligbé, bó wá kplé ɖo Mawu Mavɔmavɔ, Mawu mǐtɔn nukɔn, bó ɖu xwe ɔ́ káká nú azǎn tɛ́nwe, bó lɛ́ bló azǎn tɛ́nwe ɖěvo gɔ́ ná, bɔ bǐ blǒ azǎn wǒ-ɛnɛ.

⁶⁶Ayǐhɔ́ngbe tɔn, azǎn afɔtɔngɔ́ ɔ́ gbe ɔ́, Salomɔ́ɔ nyi togun ɔ́, bɔ mɛ ɖokpó ɖokpó dó kú n'i, bó ɖidó xwé; yě bǐ ɖo awǎ jɛ wɛ, xomɛ ɖo yě hun wɛ, ɖó ɖagbe e Mawu Mavɔmavɔ wa nú mɛsɛntɔ́ tɔn Davídi kpó togun tɔn Izlayɛ́li kpó ɔ́ bǐ tamɛ.