Read fon 2 Axɔ́sú 1 Bible Online

2 Axɔ́sú 1 - fon bible

2 Axɔ́sú 1

¹Ée axɔ́sú Akábu zán wá kú ɔ́, Mɔwabunu lɛ́ɛ fɔ́n gǔ dó acɛkpikpa Izlayɛ́li tɔn jí.

²É wá su gbe ɖokpó, bɔ axɔ́sú Akaziasi jɛ ayǐ gbɔn flɛtɛ́li nu. Síngbó tɔn e ɖo Samalíi ɔ́ jí wɛ é jɛ ayǐ sín, bó gblé wǔ ɖésú. Énɛ́ ɔ́, é sɛ́ mɛ dó Eklɔ́ni toxo ɔ́ mɛ, bónú è nǎ yi kan nǔ byɔ́ vodún Eklɔ́ni tɔn Baalu-Zebúbi ɖɔ émí ná gán ɖo wǔ e émí gblé ɔ́ mɛ ají.

³Wɛnsagun Mawu Mavɔmavɔ tɔn ɖokpó ka ɖɔ nú Elíi Ticibéenu ɔ́ ɖɔ: “Sɔ́ nǔ, bó yi kpé mɛ e axɔ́sú Samalíi tɔn sɛ́ dó lɛ́ɛ, bó kanbyɔ́ yě ɖɔ: ‘Mawu ɖo Izlayɛ́li ǎ wú wɛ mi xwe nǔ kan gbé ɖo Eklɔ́ni vodún Baalu-Zebúbi gɔ́n a?’

⁴Mawu Mavɔmavɔ ɖɔ: ‘A nǎ ɖɔ nú Izlayɛ́li xɔ́sú ɔ́ ɖɔ wǔ e é gblé bó jɛ xɔ ɔ́, é kún ɖo nǎ gán ɖ'é mɛ wɛ ó, é ná kú dandan.’ ” Elíi bló nǔ e Mawu Mavɔmavɔ zɔ́n ɛ ɔ́.

⁵Mɛ e axɔ́sú Akaziasi sɛ́ dó lɛ́ɛ lɛ́ kɔ wá mɔ ɛ tlóló, bɔ é kanbyɔ́ yě ɖɔ: “Étɛ́wú mi ka yá wǔ wá sɔ mɔ̌?”

⁶Yě yí gbe n'i ɖɔ: “Nya ɖé wá kpé mǐ, bó ɖɔ nú mǐ ɖɔ Mawu Mavɔmavɔ ɖɔ Mawu ɖo Izlayɛ́li ǎ wú wɛ hwi sɛ́ mɛ dó nǔ kan gbé ɖo Eklɔ́ni vodún Baalu-Zebúbi gɔ́n a jí? Énɛ́ ɔ́ wú wɛ wǔ e hwi gblé ɔ́, hwi kún ɖo nǎ gán ɖ'é mɛ wɛ ó, hwi ná kú dandan.”

⁷Ée yě ɖɔ mɔ̌ ɔ́, Akaziasi kanbyɔ́ yě ɖɔ: “Nɛ̌ nya e ká wá kpé mi bó ɖɔ xó énɛ́ lɛ́ɛ nú mi ɔ́ ká cí?”

⁸ Yě yí gbe n'i ɖɔ: “Nya ɖé wɛ, bó dó awu ɖé, bɔ è sɔ́ lǎkúnmí fún dó lɔn ná; é sin anyǔkan dó alin.” Ée yě ɖɔ mɔ̌ ɔ́, axɔ́sú Akaziasi sú xó bó ɖɔ: “Hǔn! Elíi Ticibéenu ɔ́ wɛ!”

⁹Axɔ́sú Akaziasi sɛ́ ahwangán ɖokpó kpódó sɔ́ja kanɖé wǒ (50) kpó dó Elíi gbé mɛ, bónú yě ná wlí i. Yě yi mɔ Elíi ɖo só ɖé ta aga, bɔ é ɖo ayǐjínjɔ́n, bɔ yě ɖɔ n'i ɖɔ: “Đɛ̌mɛnu Mawu tɔn, axɔ́sú ɔ́ ɖɔ hwi ní wá.”

¹⁰ Elíi yí gbe nú ahwangán ɔ́ ɖɔ: “Đɛ̌mɛnu Mawu tɔn wɛ un nyí nǔgbó. Ée nǔ nyí mɔ̌ é ɔ́, myɔ ní gosín jǐxwé bó fyɔ́ hwi kpó sɔ́ja towe kanɖé wǒ (50) lɛ́ɛ kpó!” Ée Elíi ɖɔ mɔ̌ tlóló ɔ́, myɔ gosín jǐxwé, bó fyɔ́ ahwangán ɔ́ kpó sɔ́ja tɔn kanɖé wǒ (50) lɛ́ɛ kpó.

¹¹Akaziasi lɛ́ sɛ́ ahwangán ɖěvo kpó sɔ́ja kanɖé wǒ (50) ɖěvo kpó dó Elíi gɔ́n, bɔ ahwangán ɔ́ yi ɖɔ nú Elíi ɖɔ: “Đɛ̌mɛnu Mawu tɔn, axɔ́sú ɔ́ ɖɔ hwi ní wá din tlóló.”

¹²Elíi ka yí gbe nú yě ɖɔ: “Đɛ̌mɛnu Mawu tɔn wɛ un nyí nǔgbó. Ée nǔ nyí mɔ̌ é ɔ́, Mawu ní sɛ́ myɔ dó sín jǐxwé, bó fyɔ́ hwi kpó sɔ́ja towe kanɖé wǒ (50) lɛ́ɛ kpó!” Ée Elíi ɖɔ mɔ̌ tlóló ɔ́, Mawu sɛ́ myɔ dó sín jǐxwé, bó fyɔ́ ahwangán ɔ́ kpó sɔ́ja tɔn kanɖé wǒ (50) lɛ́ɛ kpó.

¹³Akaziasi lɛ́ sɛ́ ahwangán ɖěvo kpódó sɔ́ja kanɖé wǒ (50) kpó dó Elíi gɔ́n azɔn atɔngɔ́ ɔ́. Yě xá só e jí Elíi ɖe ɔ́ jí. Ée yě mɔ Elíi ɔ́, ahwangán ɔ́ jɛ kpo, bó sa vo n'i ɖɔ: “Đɛ̌mɛnu Mawu tɔn, kɛnklɛ́n bó ma hu nyɛ kpódó sɔ́ja ce lɛ́ɛ kpó ó.

¹⁴Myɔ ɖíe ko gosín jǐxwé bó fyɔ́ ahwangán kanɖéwǒgán we nukɔntɔn lɛ́ɛ kpó sɔ́ja e xwedó yě lɛ́ɛ bǐ kpó e. Amɔ̌, kɛnklɛ́n, má hu mì ó.”

¹⁵Wɛnsagun Mawu Mavɔmavɔ tɔn ka ɖɔ nú Elíi ɖɔ: “Xwedó ahwangán ɔ́, ma ɖi xɛsi n'i ó.” Ée wɛnsagun ɔ́ ɖɔ mɔ̌ ɔ́, Elíi xwedó ahwangán ɔ́ yi axɔ́sú ɔ́ gɔ́n,

¹⁶bó ɖɔ n'i ɖɔ Mawu Mavɔmavɔ ɖɔ: “Mawu ɖo Izlayɛ́li ǎ wú wɛ a sɛ́ mɛ dó nǔ kan gbé ɖo Eklɔ́ni vodún Baalu-Zebúbi gɔ́n a? Énɛ́ ɔ́ wú wɛ wǔ e a gblě bó jɛ xɔ ɔ́, a ɖo nǎ gán ɖ'é mɛ wɛ ǎ; a nǎ kú dandan.”

¹⁷Akaziasi kú nǔgbó lě e Mawu Mavɔmavɔ ɖɔ nú Elíi gbɔn é. É ká ɖó vǐ ǎ, bɔ nɔví tɔn Yolámu ɖu axɔ́sú ɖó tɛn tɔn mɛ, hwenu e axɔ́sú Judáa tɔn Yexolámu Jozafáti ví ɔ́ ɖo xwe we bló wɛ ɖo zinkpo jí é.

¹⁸È wlǎn Akaziasi sín tan e kpo ɔ́ bǐ dó “Izlayɛ́li xɔ́sú lɛ́ɛ sín Tan wéma” mɛ.