Read fon 2 Axɔ́sú 10 Bible Online

2 Axɔ́sú 10 - fon bible

2 Axɔ́sú 10

¹Akábu ɖó vǐ súnnu kpó vǐvú súnnu kpó kanɖé gban (70). Samalíi wɛ yě nɔ́ nɔ. Jehu sɛ́ wěma dó ahwangán Izleyɛ́li tɔn lɛ́ɛ, tomɛxó lɛ́ɛ, kpó mɛ e nɔ kplɔ́n nǔ Akábu ví lɛ́ɛ kpó ɖo Samalíi. É ɖɔ dó wěma ɔ́ mɛ ɖɔ:

²“Mi wɛ ɖo nukún kpé dó axɔ́sú ɔ́ sín vǐ lɛ́ɛ wú wɛ, kɛkɛ́ví tɔn lɛ́ɛ ɖo mi sí, sɔ́ tɔn lɛ́ɛ ɖo mi sí, ahwanfunnú tɔn lɛ́ɛ ɖo mi sí, bɔ mi ɖo toxo tɔn e è mɛ ahohó lɛ́ lɛ̌ dó ɔ́ mɛ. Hǔn din e mi ɖo wěma élɔ́ mɔ wɛ ɔ́,

³mi ná kpɔ́n vǐ tɔn lɛ́ɛ mɛ, bó ná sɔ́ mɛ e nyɔ́ hú yě bǐ, bó sixú ɖu axɔ́sú ɖo yě mɛ é, bó ná sɔ́ ɛ ɖó zinkpo jí. Énɛ́ ɔ́ gúdo ɔ́, mi ná sɔ́ ahwan nú, bó ná fun ahwan dó gǎn mitɔn sín xwédo tamɛ.”

⁴Ée yě se mɔ̌ ɔ́, xɛsi ɖaxó ɖé jɛ yě jí, bɔ yě ɖɔ: “Éyɛ́ mɛ e nukɔn axɔ́sú we ma sixú nɔ te ǎ ɔ́, nɛ̌ wɛ mǐdɛɛ lɛ́ɛ ká sixú nɔ te nukɔn tɔn gbɔn?”

⁵Énɛ́ ɔ́, mɛ e kpa acɛ dó axɔ́sú ɔ́ sín xwé nu ɔ́, kpó mɛ e kpa acɛ dó toxo ɔ́ nu ɔ́ kpó, kpó tomɛxó lɛ́ɛ kpó, kpódó mɛ e nɔ kplɔ́n nǔ axɔ́sú ɔ́ sín vǐ lɛ́ɛ kpó sɛ́ wɛn dó Jehu ɖɔ: “Mɛsɛntɔ́ towe wɛ mǐ nyí. Mǐ ná bló nǔ e a nǎ ɖɔ nú mǐ lɛ́ɛ bǐ. Mǐ ná sɔ́ mɛɖé axɔ́sú ǎ, nǔɖé jló we hǔn wa.”

⁶Énɛ́ ɔ́, Jehu lɛ́ sɛ́ wěma ɖěvo dó yě bó ɖɔ: “Ényí mi ɖo jǐ ce bo jló ná se tónú nú mì hǔn, mi gbo ta gǎn mitɔn sín vǐ lɛ́ɛ, bó wá gɔ̌n ce sɔ zǎnzǎn lěhwenu ɖo Izleyɛ́li.” Lo ɔ́, axɔ́sú ɔ́ sín vǐ kanɖé gban lɛ́ɛ ka ɖo tonukún to ɔ́ tɔn lɛ́ɛ gɔ́n, bɔ yě ɖo nukún kpé dó vǐ lɛ́ɛ wú wɛ.

⁷Ée yě mɔ wěma ɔ́, yě bɛ́ axɔ́sú ɔ́ sín vǐ kanɖé gban (70) lɛ́ɛ, bó gbo ta yě bǐ, bó bɛ́ ta yětɔn dó xasun mɛ, bo sɛ́ dó Jehu ɖo Izleyɛ́li.

⁸Axɔ́sú ɔ́ sín wɛnsagun ɖokpó wá dó wɛn Jehu bo ɖɔ: “Yě bɛ̌ axɔ́sú ɔ́ sín vǐ lɛ́ɛ sín ta wá.” Ée wɛnsagun ɔ́ wá ɖɔ nú Jehu ɖɔ è bɛ̌ vǐ lɛ́ɛ sín ta wá ɔ́, é ɖɔ: “Mi má yě ɖó donu we ɖó toxo ɔ́ sín hɔntogbó jí, nú yě nɔ fínɛ́ káká nú ayǐ hɔ́n.”

⁹Zǎnzǎn ɔ́, Jehu tɔ́n bó wá togun ɔ́ bǐ nukɔn, bó ɖɔ: “Midɛɛ lɛ́ɛ ɔ́, mi mɛ́! Nyɛ ɔ́, nyɛ tunwun ɖɔ nyɛ wɛ blá gǎn ce Yolámu gbé bó hu i. Midɛɛ ká tunwun mɛ e hu mɛ élɔ́ lɛ́ɛ a?

¹⁰Mi bo tunwun ɖɔ xó e Mawu Mavɔmavɔ ɖɔ dó Akábu sín mɛ lɛ́ɛ wú ɔ́ ɖě kún ná gɔn jijɛ ó. Mawu Mavɔmavɔ bló nǔ e é ɖɔ gbɔn mɛsɛntɔ́ tɔn Elíi jí é.”

¹¹ Ée Jehu ɖɔ mɔ̌ ɔ́, é hu mɛ e kpo ɖo Akábu sín hɔnmɛ ɖo Izleyɛ́li lɛ́ɛ bǐ. É hu mɛ nukúnɖéjí lɛ́ɛ bǐ, mɛ e va dó wǔ tɔn lɛ́ɛ bǐ. É hu vodúnnɔ lɛ́ɛ bǐ. É jó yě mɛ ɖokpó dó nyi gbɛ ǎ.

¹²Énɛ́ ɔ́ gúdo ɔ́, Jehu jɛ ali bo ɖidó Samalíi. É ɖo yiyi wɛ bo jɛ Gbɔ̌fúnkpatɛn,

¹³bó kpé Judáa xɔ́sú Akaziasi sín mɛ lɛ́ɛ, bó kanbyɔ́ yě ɖɔ: “Mɛ̌ mi ka nyí?” Bɔ yě yí gbe n'i ɖɔ: “Axɔ́sú Akaziasi sín mɛ wɛ mǐ nyí. Mǐ wá bó ná dó gbe axɔ́si Jezabɛ́li sín vǐ lɛ́ɛ kpódó axɔ́sú ɔ́ sín mɛ ɖě lɛ́ɛ kpó.”

¹⁴Ée yě ɖɔ mɔ̌ ɔ́, Jehu ɖɔ: “Mi wlí yě gbɛɖe gbɛɖe.” Bɔ mɛ tɔn lɛ́ɛ wlí yě gbɛɖe gbɛɖe, bó gbo gbe yě, bó bɛ́ yě kɔn nyi dotɔ e ɖo Gbɔ̌fúnkpatɛn ɔ́ mɛ. Yě mɛ kanɖé-nukún-we (42) wɛ. Jehu jǒ mɛ ɖěbǔ dó nyi gbɛ ǎ.

¹⁵Ée Jehu gosín fínɛ́ ɔ́, é kpé Yonadávu Hlekávu ví ɔ́. É dó gbe e, bó ɖɔ n'i ɖɔ: “Xomɛ towe ka ɖo wɛn dó wǔ ce lě e xomɛ ce ɖo wɛn dó wǔtu towe gbɔn ɔ́ a?” Yonadávu yí gbe n'i bó ɖɔ: “Ɛɛn!” Jehu lɛ́ ɖɔ n'i ɖɔ: “Ényí é ɖo mɔ̌ nǔgbó hǔn, nǎ alɔ mì.” Bɔ Yonadávu ná alɔ ɛ, bɔ Jehu dɔn ɛ dó kɛkɛ́ví e mɛ é ɖe ɔ́ mɛ,

¹⁶bó ɖɔ: “Wǎ mǐ yi kpɔ́n lě do e un yí wǎn nú Mawu Mavɔmavɔ sín azɔ̌ gbɔn é.” Énɛ́ ɔ́, é sɔ́ ɛ dó kɛkɛ́ví tɔn mɛ ɖidó.

¹⁷Ée Jehu jɛ Samalíi ɔ́, é hu Akábu sín mɛ e kpo ɖo fínɛ́ lɛ́ɛ bǐ. É sú yě bǐ sín kún dó lě e Mawu Mavɔmavɔ ko ɖɔ nú Elíi gbɔn é.

¹⁸Énɛ́ ɔ́ gúdo ɔ́, Jehu kplé togun ɔ́ bǐ, bó ɖɔ nú yě ɖɔ: “Akábu sɛn vodún Baalu nabí ɖé ǎ, amɔ̌, nyɛ ɔ́, nyɛ ná sɛn káká.

¹⁹Din ɔ́, mi dó wɛn sɛ́ dó gbeyíɖɔ vodún Baalu tɔn lɛ́ɛ bǐ, Baalusi lɛ́ɛ kpódó hunnɔ tɔn lɛ́ɛ bǐ kpó nú yě wá gɔ̌n ce fí. Yě mɛ ɖěbǔ ma hwe ó, ɖó un jló ná sá vɔ̌ ɖaxó ɖokpó nú vodún Baalu. È nǎ hu mɛ e ná gɔn lɛ́ɛ bǐ.” Ayi wɛ Jehu ka sɔ́ ɖó nukɔn bó ná mɔ tɛn bo hu mɛ e nɔ sɛn vodún Baalu lɛ́ɛ bǐ.

²⁰Énɛ́ ɔ́ wú wɛ é ɖɔ: “Mi ylɔ́ kplé ɖaxó ɖokpó nú mǐ ná wa nǔ nú vodún Baalu.” Bɔ è ylɔ̌ kplé ɔ́.

²¹É sɛ́ mɛ dó Izlayɛ́li to ɔ́ bǐ mɛ, bɔ mɛ e nɔ sɛn Baalu lɛ́ɛ bǐ wǎ; yě ɖokpó gɔn ǎ. Yě bǐ wá bó byɔ́ Baalu xwé, bɔ xwé ɔ́ gɔ́ bǐ,

²²bɔ Jehu ɖɔ nú mɛ e nɔ kpé nukún dó vodúnwu lɛ́ɛ wú é ɖɔ: “Đe awu tɔ́n nú Baalusɛntɔ́ lɛ́ɛ bǐ.” Bɔ nya ɔ́ ɖe awu lɛ́ɛ tɔ́n nú yě.

²³Énɛ́ ɔ́ gúdo ɔ́, Jehu kpódó Yonadávu Hlekávu ví ɔ́ kpó wá Baalu xwé ɔ́ gbe, bɔ Jehu ɖɔ nú mɛ e nɔ sɛn Baalu lɛ́ɛ ɖɔ: “Mi kpɔ́n ɖɔ mɛ e nɔ sɛn Mawu Mavɔmavɔ ɔ́ ɖě ɖo mɛ mɛ a jí, ɖó mɛsɛntɔ́ Baalu tɔn lɛ́ɛ kɛ́ɖɛ́ wɛ ɖó ná nɔ fí.”

²⁴Énɛ́ ɔ́, Jehu kpó Yonadávu kpó ɖidó vɔ̌ yǎyá lɛ́ɛ kpó vɔ̌ e è nɔ dó zo lɛ́ɛ kpó sá gbé. Jehu ka ko ɖó sɔ́ja kanwe (80) kɔ́xo, bó ko ɖɔ nú yě ɖɔ: “Un jó mɛ énɛ́ lɛ́ɛ bǐ nú mi. Ényí mɛɖé gló mɛɖé bó yi ɔ́, un ná hu mɛ ɔ́ ɖó tɛn tɔn mɛ.”

²⁵Ée Jehu sá vɔ̌ lɛ́ɛ fó ɔ́, é ɖɔ nú sɔ́ja lɛ́ɛ kpó gǎn yětɔn lɛ́ɛ kpó ɖɔ: “Mi byɔ́ xwé ɔ́ gbe, bó hu mɛ lɛ́ɛ bǐ. Mi ma lɔn nú mɛ ɖokpó tɔ́n ó.” Ée é ɖɔ mɔ̌ ɔ́, sɔ́ja lɛ́ɛ kpó gǎn yětɔn lɛ́ɛ kpó hu yě, bó bɛ́ cyɔ yětɔn nyi gbě. Énɛ́ ɔ́ gúdo ɔ́, yě hun káká yi slǎ e mɛ vodún Baalu xwé ɔ́ ɖe é, ɖo tɛn mímɛ́ bǐ ɔ́ mɛ.

²⁶Yě bɛ̌ awǐnnya e yě tun te ɖó vodún Baalu xwé bó nɔ sɛn lɛ́ɛ tɔ́n bó dó zo.

²⁷Yě flí Baalu wínnya e yě tun te bó nɔ sɛn lɛ́ɛ xwe, bó gba xɔ tɔn, bó kun adado ɖó fínɛ́, bɔ yě kpo ɖo fínɛ́ káká jɛ égbé.

²⁸Lě e Jehu sú Baalu sinsɛn sín kún dó gbɔn ɖo Izlayɛ́li ɔ́ nɛ́.

²⁹ Lo ɔ́, é hu hwɛ e Jelobowámu Nɛvati ví ɔ́ hu bó dɔn Izlayɛ́li togun ɔ́ d'é mɛ é. É sɛn sikányibúví e ɖo Betɛ́li lɛ́ɛ kpó ée ɖo Dan lɛ́ɛ kpó Jelobowámu ɖɔhun.

³⁰Mawu Mavɔmavɔ ɖɔ nú Jehu ɖɔ: “A dɔn tó nú Akábu xwédo ɔ́ lě e un ba gbɔn é. Nǔ e nɔ jló mì é nɛ́. Énɛ́ ɔ́ wú wɛ vǐ towe lɛ́ɛ ná ɖu axɔ́sú ɖo Izlayɛ́li ɖě jɛ ɖě gúdo káká nú jijimɛ ɛnɛ.”

³¹É ɖo mɔ̌ có Jehu nyi Mawu Mavɔmavɔ, Mawu Izlayɛ́li tɔn sín sɛ́n lɛ́ɛ kpó ayi tɔn bǐ kpó ǎ. Hwɛ e Jelobowámu hu bo dɔn Izlayɛ́linu lɛ́ɛ d'é mɛ ɔ́, é gɔn huhu ǎ.

³²Hwe énɛ́ ɔ́ nu ɔ́, Mawu Mavɔmavɔ jɛ Izlayɛ́li sín ayǐkúngban yí jí. É sɛ́ Hazayɛ́li Silíi xɔ́sú ɔ́ dó, bɔ é jɛ Izlayɛ́li to ɔ́ yí jí.

³³Énɛ́ ɔ́, è yǐ ayǐkúngban e ɖo zǎnzǎnhwe jí nú Judɛ́ɛn tɔ é kpódó ée ɖo totaligbé nú Alowɛ́ɛ toxo ɖo Aanɔ́ni tɔdo ɔ́ mɛ ɔ́ kpó sín yě sí. Ayǐkúngban énɛ́ lɛ́ɛ wɛ nyí Galadi to ɔ́ kpó Basáni to ɔ́ kpó. To énɛ́ lɛ́ɛ mɛ wɛ akɔta Hwlibɛ́ni tɔn, Gadi tɔn kpódó Manasée tɔn kpó nɔ́ nɔ.

³⁴È wlǎn axɔ́sú Jehu sín tan e kpo ɔ́, nǔ e é wa lɛ́ɛ kpó akɔ́nkpinkpan e é ɖó ɔ́ kpó dó “Izlayɛ́li xɔ́sú lɛ́ɛ sín Tan wéma” mɛ.

³⁵Jehu zán wá kú, bɔ è sɔ́ ɛ yi ɖó Samalíi, bɔ vǐ tɔn Yoakázi ɖu axɔ́sú ɖó tɛn tɔn mɛ.

³⁶Xwe koatɔ́n-nukún-atɔn (28) wɛ Jehu bló ɖo axɔ́súzinkpo Izlayɛ́li tɔn jí ɖo Samalíi.